སྐུ་ཞབས་སྐལ་བཟང་ཐུབ་བསྟན་ལགས་ནི་བྲག་དཀར་རྫོང་ནས་སྐྱེས་ཤིང་རང་ས་རང་ཡུལ་ནས་འཚར་ལོངས་བྱུང་བའི་ཁེ་ལས་པ་གྲགས་ཅན་ཞིག་ཡིན། ཁོས་ལོ་ངོ་ཉི་ཤུའི་རིང་ལ་ཚོང་ལས་ཀྱི་བྱ་བ་གཉེར་ཞོར་གཏོང་ཕོད་ཀྱི་ཕྱག་ཟུང་རིང་དུ་བརྐྱངས་ཏེ། བྱིས་སྐྱོང་ཁང་དང་སློབ་གྲྭ་ཆུང་འབྲིང་། སྤྱི་ཚོགས་ཀྱི་ལས་སྒོ་སོ་སོའི་བྱ་བ་ཆེ་མ་ཆུང་གསུམ་ཀུན་ལ་རྒྱུན་མ་ཆད་པར་ལྷག་བསམ་དང་བྱམས་བརྩེའི་ཕྱག་ཟུང་མ་རེག་ས་ཕལ་ཆེར་མེད་ཅེས་བཤད་ཆོག ཁོང་གི་ལུས་ངག་ཡིད་གསུམ་གྱི་བསམ་སྤྱོད་དང་གཞན་ཕན་གྱི་བྱ་གཞག་ལ་ཀུན་གྱིས་རྗེས་སུ་ཡི་རང་དང་བསྟོད་བསྔགས་ཀྱི་མེ་ཏོག་བར་མེད་དུ་གཏོར་བཞིན་ཡོད།
ད་ལོར་ཡང་བྲག་དཀར་རྫོང་སྐལ་བཟང་ཐེབས་རྩས་སྐབས་གསུམ་པའི་སྔོན་འགྲོ་སློབ་གསོའི་བྱམས་བརྩེའི་ཞལ་འདེབས་གནང་བའི་བྱ་འགུལ་བྲག་དཀར་རྫོང་མི་རིགས་སློབ་འབྲིང་དང་པོའི་རྩལ་སྦྱོང་ཁང་དུ་སྤེལ། བྱ་འགུལ་སྟེང་བྲག་དཀར་རྫོང་སྔོན་འགྲོ་སློབ་གསོ་གཞུང་ལས་ཁང་གི་ཀྲུའུ་རིན་རྡོ་རྗེ་ལྷུན་གྲུབ་དང་ཡུལ་ཚོ་དང་གྲོང་རྡལ་རིམ་པའི་སྔོན་འགྲོ་སློབ་གསོའི་ཀྲུའ་རིན། རྫོང་མཁར་གྱི་བྱིས་སྐྱོང་ཁང་སོ་སོའི་མགོ་གཙོ་སོགས་འབྲེལ་ཡོད་མི་སྣ15དང་དགེ་རྒན་དང་བྱིས་པའི་ཁྱིམ་བདག་བཅས་མི200ལྷག་ཞུགས།
རྫོང་སྔོན་འགྲོ་སློབ་གསོ་གཞུང་ལས་ཁང་གི་ཀྲུའུ་རིན་རྡོ་རྗེ་ལྷུན་གྲུབ་ཀྱིས་ཐེངས་འདིའི་བྱ་འགུལ་གྱི་སྤྱིའི་སྒྲིག་འཛུགས་དང་དམིགས་ཡུལ་སོགས་གསལ་བཤད་བྱས། 2021ལོར་སྔོན་འགྲོ་སློབ་གསོ་དོ་དམ་གཞུང་ལས་ཁང་གིས་གཙོ་སྒྲིག་བྱས་ཏེ་སྔོན་འགྲོ་སློབ་གསོའི་དགེ་རྒན་གྲགས་ཅན་གྱི་གཞུང་ལས་ཁང་གཉིས་ཀྱིས་མཉམ་འབྲེལ་སྒོས་སྤེལ་བའི་བྱིས་པའི་ནུས་རྩལ་དང་། དམངས་གླུ། བྱིས་གླུ། བཤད་པ། གཏམ་དཔེ་བཅས་ཀྱི་འགྲན་སྡུར་སྟེང་ཞང་དང་གྲོང་རྡལ་རིམ་པ་དང་རྫོང་མཁར་གྱི་བྱིས་སྐྱོང་ཁང་ལྔ་ནས་བདམས་ཐོན་བྱུང་བའི་བྱིས་པ180འགྲན་སྡུར་དུ་ཞུགས།འགྲན་སྡུར་ཁྲོད་དཔྱད་འདེམས་པས་ཡང་བསྐྱར་བདམས་ཐོན་བྱུང་བའི་གླུ་བ་ཆུང་ཆུང་དང་གཏམ་བཤད་པ་ཆུང་ཆུང་བཅས་བསྡོམས་པས་བྱིས་པ45དང་། དེ་དག་གི་ཕུལ་བྱུང་མཛུབ་སྟོན་དགེ་རྒན34ཡི་མིང་གསལ་བསྒྲགས་བྱས་ཏེ་བྱིས་པ་ཚོའི་འཇོན་ནུས་དང་དགེ་རྒན་གྱི་གྲུབ་འབྲས་ལ་གཟེངས་བསྟོད་བྱས། སྔོན་འགྲོ་སློབ་གསོའི་སློབ་དཔྱོད་ཁང་གི་ཀླུ་ཕྱུག་ཡག་གིས་མདོ་འཛིན་བྱས་ཏེ། བྱ་འགུལ་གྱི་ནང་དོན་གོ་རིམ་ལྡན་པའི་ངང་རེ་རེ་བཞིན་འགོ་ཁྲིད་དང་དགེ་བཟོ་པ་ཡོངས་ཀྱི་སྙན་ལམ་དུ་ཕུལ།
སྐུ་ཞབས་སྐལ་བཟང་ཐུབ་བསྟན་ལགས་ཀྱིས་ད་ལོར་བྲག་དཀར་རྫོང་གི་ལྷོ་ཕྱོགས་ཀྱི་ཡུལ་ཚོ་གསུམ་སྟེ་འབྲོང་ཐུ་དང་ལུང་བཟང་། ཆུ་ཁོལ་བཅས་ཡུལ་ཚོ་གསུམ་དང་རྩི་གོར་ཐང་གྲོང་རྡལ་སྔོན་འགྲོ་སློབ་གསོ་དོ་དམ་གཞུང་ལས་ཁང་བཅས་ལ་ད་ལོའི་དྲུག་གཅིག་བྱིས་པའི་དུས་ཆེན་གྱི་འཚམས་འདྲིའི་ལེགས་སྐྱེས་ལ་སྒོར8000བྱིན་པ་དང་། དགེ་རྒན་གྱི་བྱ་གཞག་དང་སློབ་གསོའི་ལས་དོན་ལ་བློ་སེམས་དཀར་བའི་ཁེ་ལས་པ་ཁོང་གིས་རྫོང་མཁར་དང་ཞང་དང་གྲོང་རྡལ་རིམ་པའི་བྱིས་སྐྱོང་གི་དགེ་རྒན44ལ་བྱ་དགའ་དམངས་སྒོར13900བྱིན་པ་དང་། བྱིས་པའི་ནུས་རྩལ་འགྲན་སྡུར་ཁྲོད་ཀྱི་གླུ་བ་རྩེ་གྲས་དང་གླུ་མ་གཏམ་བཤད་པ་བཅས་བསྡོམས་པས་བྱིས་པ45ལ་བྱ་དགའི་མ་དངུལ་སྒོར་12825བྱིན། ད་དུང་རྫོང་ཡོངས་ཀྱི་རྫོང་མཁར་དང་ཞང་དང་གྲོང་རྡལ་རིམ་པའི་སྔོན་ཐོན་ཐུན་མོང་གསུམ་ལ་བྱ་དགའི་མ་དངུལ1100བཅས་ཁྱོན་བསྡོམས་པས་དམངས་སྒོར28425བྱིན་ནས་དཔེ་བཟང་ཅན་མིག་དཔེར་འཛིན་དགོས་པ་དང་། རྗེས་ཕྱོགས་མུ་མཐུད་དུ་སྔར་ལས་ལྷག་པའི་ཡར་རྒྱས་ལ་སྐུལ་ལྕག་གཏོང་དགོས་པའི་རེ་འདུན་བཏོན།
ཁེ་ལས་པ་སྐལ་བཟང་ཐུབ་བསྟན་ཁོ་ལ་མཚོན་ན་དཔལ་འབྱོར་ཁེ་ལས་ཀྱི་ལམ་ཁ་ནས་དཀའ་ཚེགས་གང་མང་མྱངས་ནས་རང་ཉིད་ཀྱི་མི་ཚེ་ལ་མཚར་སྡུག་གི་འོད་སྣང་བསྐྲུན་ཏེ། མི་ཚེ་ཧྲིལ་བོར་གཞན་དོན་རྐྱང་བ་ལ་འབད་པ་ལྷོད་མེད་བྱེད་པའི་སྐྱེས་བུ་མཆོག་ཏུ་གྱུར་བ་ཞིག་ཡིན། ཁོང་གིས་ས་གནས་སློབ་གསོའི་ལས་དོན་ཐད་ལ་ལོ་རེ་རེ་བཞིན་མ་དངུལ་བཏང་སྟེ། རང་ས་གནས་ཀྱི་ཆབ་དཔལ་རིག་གསུམ་ཡར་རྒྱས་ཀྱི་ཕྱོགས་ལ་སྟོབས་ཤུགས་ཕུལ་དང་འབུལ་བཞིན་ཡོད་ལ། རང་ས་གནས་ཀྱི་བསམ་བློ་བ་དང་ཚོང་ལས་གཉེར་མཁན་ཡོངས་ཀྱིས་མིག་དཔེ་བལྟ་སའི་ཁེ་ལས་པ་ཚད་ལྡན་ཞིག་ཏུ་གྱུར་ཡོད།
ཁོང་གིས་དུས་རྒྱུན་གསུང་རྒྱུར། ད་དུང་མུ་མཐུད་དུ་ལོ་རེ་བཞིན་རང་ས་གནས་ཀྱི་སློབ་གསོ་དང་དཀའ་ཁག་ཅན་གྱི་ཁྱིམ་ཚང་། ཆ་རྐྱེན་ཞན་པའི་སློབ་མ།ཉམ་ཐག་ནད་པ་བཅས་སྤྱི་ཚོགས་ཁྲོད་ཀྱི་དཀའ་ཁག་ཅན་མང་པོ་ལ་རོགས་སྐྱོར་བྱ་རྒྱུའི་ཕུགས་བསམ་དང་འདུན་པ་བརྟན་པོ་ཡོད་ཅེས་བརྗོད་འདུག
