ཁྲི་ཤོར་རྒྱལ་མོ་དང་ཡུམ་ཆུང་ལྷ་མོ།

        གནའ་སྔ་མོ་ཞིག་ལ། མཚོ་སྙིང་བྱ་བའི་རི་དེའི་ཞབས་ན་ཀླུའི་ཕོ་བྲང་ཞིག་ཡོད། ཕོ་བྲང་དེར་གཡུ་འབྲུག་ཏུ་འབོད་པའི་ཀླུའི་ཁམས་མ་ལུས་དབང་དུ་སྡུད་པའི་ཀླུ་ཡི་རྒྱལ་མོ་རྔམ་བརྗིད་ལྡན་པ་ཞིག་ཡོད།         གཡུ་འབྲུག་རྒྱལ་མོའི་བསམ་པ་ལ། བུ་མོ་གང་དང་གང་ཡིན་ཡང་རྒྱུ་ནོར་ཟས་གོས་ལ་ཞེན་པ་ཡིན་སྙམ་མོད། འོན་ཀྱང་། དེ་དག་རྣམས་ཇི་ལྟར་མཛེས་ཤིང་བརྒྱན་ཡང་ཡུམ་ཆུང་ལྷ་མོས་མིག་གི་ཟུར་གྱིས་ཀྱང་མ་བལྟས་པར་མགོ་བསྒུར་ནས་བསྡད། གཉེན་མཁན་སྐུ་དམར་མཚོ་མོ་ནི་ཡུམ་ཆུང་ལྷ་མོའི་ལྷ་རྩིབ་ཡོང་ནས་ཡག་བཤད་རྩུབ་བཤད་གང་བྱས་ཀྱང་མོའི་རྣ་ནང་དུ་ཚིག་སྤུ་ཙམ་ཡང་མ་སོང་ཞིང་། མོས་སེམས་སྡུག་ངང་ནས་ངུ་བཞིན་དུ་ཤི་གསོན་གྱི་ལམ་བསྙེགས་ཤིང་རྒྱལ་མོར་གདུག་མཛུབ་བཙུགས་ཏེ་ང་ཕྱིར་ལ་འགྲོ་རུ་ཆུག་ཅེས་བརྗོད།
        རྒྱལ་མོས་ཚུལ་དེ་མཐོང་བས་ཁོང་ཁྲོ་སྐྱེས་ཏེ་ན་རེ༼ཧུན། ཁྱོད་ལ་སྟོན་མོ་འདི་འདྲ་ཞིག་བསྒྲིགས་ཀྱང་ད་དུང་མནའ་མ་བྱེད་མི་འདོད་ན། ཁྱོད་ཕྱིར་འགྲོ་ས་མེད།༽ཟེར་བ་དང་དེ་ནས་ཆུ་སྲིན་དམག་དཔོན་ལ༼བུ་མོ་ཐ་ཤལ་བ་འདི་ཆུ་རྙོག་རྫིང་བུར་ཕོངས་ཤིག༽ཅེས་བཀའ་ཕབ། ཆུ་སྲིན་གྱིས་ཀླུ་དམག་བོས་ནས་ཡུམ་ཆུང་ལྷ་མོ་བཀྱགས་ནས་ཆུ་རྙོག་ནང་དུ་འཕངས། རུས་སྤལ་བློན་གྱིས་དེ་མཐོང་པས་ཧ་ལས་ཏེ་རྒྱུགས་འོངས་ནས་བུ་མོ་སྐྱོབ་འདོད་ཀྱང་སྐྱོབ་ལོང་མ་བྱུང་བ་རེད། ཡུམ་ཆུང་ལྷ་མོས་རྫིང་བུའི་ནང་དུ་འཕག་ར་བྱས་བྱས་པས་ཆུ་ཁར་གཡེང་དུས། རྐང་པ་གཉིས་ལ་རྡོ་བཏགས་པ་ལྟར་འགུལ་རྒྱུ་ཅི་ཡང་མེད་པར་གྱུར་འདུག
        དེ་ནས་མོའི་སེམས་ལ་འདི་ལྟར་ང་རང་ལ་ཅི་བྱས་ཀྱང་ཡུལ་ལ་འགྲོ་དགོས་སྙམ་བཞིན་སེམས་སྐྱོ་སྟེ་མཆི་མ་འཛད་མེད་དུ་བཞུར་གྱིན་དྲན་མེད་དུ་བརྒྱལ་སོང་།         དེ་ནས་ཀླུ་ཁམས་ཀྱི་དམག་དཔོན་ཆུ་སྲིན་གྱི་ཨ་ཁུ་སྲིན་པོས་ཨོ་རྒྱན་གྱི་བཅའ་ལུགས་ལ་ཤིན་ཏུ་མ་དགའ་བར་ཐུགས་ཁྲོས་ཏེ། སེམས་ལ་གང་ལྟར་མཚོ་སྙིང་གི་རི་དེ་བཤིག་སྟེ། ཀླུ་ཆུའི་ཁ་སླར་ཡང་འབྱེད་དགོས་སྙན་ནས། ཤེད་ཤུགས་གང་ཡོད་ཕྱུང་ཞིང་བྲག་དཀར་ཐེམ་ཆེན་གྱི་དབུ་རྩེ་བཅད་ནས་མར་མཚོ་སྙིང་གི་རི་ཐོག་ཏུ་དབྱུགས་མོད། འོན་ཀྱང་སྲིན་པོས་ཚ་བོ་ལ་རོགས་བྱས་ནས་དེ་ལྟར་བྱེད་སྲིད་པ་ཨོ་རྒྱན་གྱིས་སྔར་ནས་མཁྱེན་འདུག་ཅིང་། སྲིན་པོས་བྲག་རྩེ་དབྱུགས་མ་ཐག་ཏུ་ཨོ་རྒྱན་གྱིས་མྱུར་བར་རྫུ་འཕྲུལ་བསྟན་ཏེ་མཚོ་རྔའི་ལྷོ་ནུབ་ཀྱི་མཚམས་སུ་བཏུལ་ནས་མིང་ལ་འདྲེ་མོ་བྲག་དཀར་ཞེས་མི་སྙན་པ་བཏགས་ཤིང་ལྷ་མི་ཀུན་གྱི་དགྲ་བོར་འཆད་པའོ། །
        རྗེས་སུ། ཡུམ་ཆུང་ལྷ་མོས་མི་མིན་ཀླུ་མིན་གྱི་བྱིས་པ་ཞིག་བཙས། དེའི་ཕྱིར་མོ་རང་ལྷག་པར་ཞེ་སྨྲེང་སྟེ་ངུ་བཞིན་དུ་མཚོ་ལས་གར་གནས་གར་འགྲོ་མེད་པར་བྱུང་ནས་ལྷོ་རུ་འཁྱམས་ཡོང་མོད། འོན་ཀྱང་མོའི་སེམས་སུ་ད་དུང་བེར་སྐྱ་འོད་འབུམ་ཕ་བུ་གཉིས་བཟུང་ཡོད་ཅིང་། ཟླ་རེའི་བཅོ་ལྔའི་དགོང་མོའི་ཟླ་བ་ཧ་ཅང་གསལ་བའི་དུས་ལ། མོ་རང་མཚོ་ཁར་གཡེང་སྟེ་འདྲེ་མོ་བྲག་དཀར་གྱི་སྟེང་དུ་བུད་ནས་མཚོ་ངོགས་སྐྱོ་གླུ་ལེན་བཞིན་དུ་མི་མིན་ཀླུ་མིན་གྱི་བྱིས་པར་ནུ་མ་བསྣུན་ཏེ་མཆི་མ་འདོན་ནོ། །
        སྐབས་དེར་བེར་སྐྱ་འོད་འབུམ་ཕ་བུ་གཉིས་ཀྱིས་ད་དུང་སྔར་བཞིན་དུ་ཡུམ་ཆུང་ལྷ་མོ་ཡོང་བར་བསྒུགས། ཉིན་སྒུག་མཚན་སྒུག་དང་ཟླ་སྒུག་ལོ་སྒུག་བྱས་ཀྱང་ཡུམ་ཆུང་ལྷ་མོ་ཕྱིར་ཡོང་མ་བྱུང་སྟབས། ཉིན་གཅིག་ཕ་བུ་གཉིས་རྐྱལ་གཟིངས་ཤིག་ལ་བསྡད་དེ་མཚོ་སྙིང་རིའི་མཐའ་སྐོར་ཕྱོགས་སོ་སོར་འཚོལ་དུ་སོང་སྟེ། མཚོ་ཡི་མགོ་ནས་མཇུག་བར་བུས་ཨ་མ་ཞེས་བོས་པ་དང་། བེར་སྐྱ་འོད་འབུམ་ལྷག་པར་དུ་ཡིད་སྨྲེང་ཞིང་མཆི་མ་འདོན་བཞིན་སྐད་གང་ཡོང་ཕྱུང་ནས༼ཀ་ཡེ། ཡུམ་ཆུང་ལྷ་མོ། ཀ་ཡེ་་་ ཡུམ་ཆུང་ལྷ་མོ༽ཞེས་བོས་ཀྱང་ཡུམ་ཆུང་ལྷ་མོ་མཐོང་རྒྱུ་ལྟ་ཅི། ཨ་ལན་ཞིག་ཀྱང་ཐོས་རྒྱུ་མ་བྱུང་། དེ་ནས་ཉིན་གཅིག་འདྲེ་མོ་བྲག་དཀར་གཡི་ཉེ་འདབས་སུ་བསྐྱོད་དུས། བེར་སྐྱ་འོད་འབུམ་གྱིས་རྦ་རླབས་ཤིག་གི་ནང་ནས་གློ་བུར་དུ་བུ་མོ་ཞིག་གི་ལུས་གཟུགས་མཐོང་། དེའི་རྒྱབ་ན་སྐྲ་ནག་པོ་ཐུར་དུ་དཔྱངས་ཤིང་སྐྱོ་གླུ་ལེན་པ་ཐོས། ཁོའི་སེམས་ལ་དེ་ནི་ཡུམ་ཆུང་ལྷ་མོ་ཡིན་སྙམ་ནས་ཁོས་རྐྱལ་གཟིངས་མགྱོགས་པོར་དཀྲུགས་ཤིང་མོ་ཡོད་སར་བསྐྱོད་དེ་ཐོན་ལ་ཁད་ཀྱི་སྐབས་དེར། ཀླུའི་རྒྱལ་མོ་སེམས་ནག་དེས་ཤེས་ཏེ་ཆོ་འཕྲུལ་གྱི་མཚོ་རླུང་གཡུགས་ནས། གནམ་སར་ཤང་སྒྲ་འུར་སྒྲས་ཁེངས་པར་བརྟེན་ནས་རྐྱལ་གཟིངས་དང་མི་ཚང་མ་ནམ་མཁར་དྲངས་སོང་ངོ་། །དེ་ནས་བཟུང་བེར་སྐྱ་འོད་འབུམ་ཕ་བུ་གཉིས་མཐོང་རྒྱུ་མ་བྱུང་ཞིང་། ཁོ་གཉིས་ནི་དཀར་སྐྱ་དངུལ་མདོག་འདྲ་བའི་མཐིང་རིལ་ཆེ་ཆུང་གཉིས་ཀྱིས་གྱུར་ཏེ། ཉིན་བཞིན་དུ་མཚོ་སྔོན་པོའི་མཁའ་དབྱིངས་སུ་འཕུར་ཞིང་བསྐྱོད་དེ་ཡུམ་ཆུང་ལྷ་མོ་འཚོལ་བཞིན་ནོ། །
        ང་ཚོ་མཚོ་མཐའ་ལ་ཕྱིན་ཚེ། རྒྱུན་པར་ ཨུས་ཡ་་་ ཨུས་ཡ་་ ཞེས་པའི་ཆུ་བྱའི་འབོད་སྒྲ་ཞིག་ཐོས། རྒན་པ་ཚོས་དེ་ནི་མཐིང་རིལ་གྱིས་ཡུམ་ཆུང་ལྷ་མོར་འབོད་པ་ཡིན་ཟེར། ད་ལྟ་མཚོ་སྔོན་པོའི་ནང་དུ་མཐིང་རིལ་ཁྲི་སྟོང་མང་བོ་ཚོགས་བཞིན་མཆིས་པ་དེ་དག་ནི་དེའི་རྗེས་རྒྱུད་ཀྱི་རྒྱུན་འདུག་བྱ་དང་མཚོ་སྔོན་པོའི་བདག་པོའི་བྱ་རིགས་ཡིན་པར་གྲགས་སོ། །