ཀྲུང་ཧྭའི་སྲོལ་རྒྱུན་རིག་གནས་མེ་ཏོག་རྣམ་པར་བཀྲ །དཔའ་རིས་ཡུལ་ལ་བསམ་པའི་དཔལ་ཡོན་དུས་ཀུན་ཁྱབ། །

       མཚོ་སྔོན་ཞིང་ཆེན་གྱིས་གཏན་ལ་ཕབ་ཡོད་པའི་དམ་འཛིན་གསུམ་དང་སྐུལ་འདེད་གསུམ་ཞེས་པའི་ལས་འགུལ་ལག་བསྟར་དོན་འཁྱོལ་གང་ལེགས་སྤེལ་བའི་ཆེད་དུ། དཔའ་རིས་བོད་རང་སྐྱོང་རྫོང་བོད་སྐད་ཡིག་ཁྲིད་སྟོན་ལྟེ་བས་རྒྱལ་ཁབ་རྫས་མིན་རིག་གནས་ཤུལ་བཞག་དཔའ་རིས་དམངས་གླུ་དང་། ཞིང་ཆེན་རིམ་པའི་རྫས་མིན་རིག་གནས་ཤུལ་བཞག་དཔའ་རིས་གཉེན་སྲོལ་ལས་འོད་ལམ་ལམ་དུ་འཕྲོ་བའི་སྐྱེས་བུ་སྔོན་བྱོན་དག་གི་རིག་པའི་ཞུན་ཐིགས་དེ་ཉིད། རྒྱུད་འཛིན་སྲུང་སྐྱོབ་ཀྱི་འོས་འགན་ཕྲག་ཏུ་འཁུར་ནས་སྤྱི་ལོ2023ལོའི་ཟླ6པའི་ཚེས21ཉིན། དཔའ་རིས་བོད་རང་སྐྱོང་རྫོང་བཀྲ་ཤིས་ལུང་བའི་གྲོང་རྡལ་མི་དམངས་སྲིད་གཞུང་གིས་གཙོར་བཟུང་ཞིང་། བོད་སྐད་ཡིག་ཁྲིད་སྟོན་ལྟེ་བས་རམ་འདེགས་གང་ནུས་ཕུལ་ནས་སངས་རྒྱས་སྨན་བླའི་རིག་གནས་སྒྱུ་རྩལ་དུས་ཆེན་སྐབས་བརྒྱད་པ་རྡོ་ལུང་སྡེ་བར་གཟབ་རྒྱས་ངང་འཚོགས། ཐེངས་འདིའི་དུས་ཆེན་ཐོག་ཕ་ཡུལ་གྱི་དམངས་ཁྲོད་སྒྱུ་རྩལ་བ་དང་། དཔའ་རིས་དམངས་གླུའི་རྒྱུད་འཛིན་པ། བཀྲ་ཤིས་ལུང་བ་གྲོང་རྡལ་གྱི་མང་ཚོགས་མང་བོ་མཉམ་དུ་འདུས་ནས་དགའ་བའི་གླུའི་དབྱངས་རྟ་མཐོན་པོ་གྱེར་ཞིང་། གཉེན་སྲོལ་རྣལ་མའི་འགྲོ་ལུགས་སྐྱོང་ལུགས་དག་འཁྲབ་སྟོན་གྱི་སྒོ་ནས་ལྟད་མོ་བ་ཀུན་གྱི་ཁྲ་ཆུང་མིག་གི་དགའ་སྟོན་དང་བསམ་པའི་ལོངས་སྐྱོད་ཡིད་ཚིམ་པ་ཞིག་སྦྱིན་ཐུབ་པར་བྱས།

       དཔའ་རིས་དམངས་གླུ་ནི2008ལོའི་ཟླ6པར། རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་ཅིང་། རིག་གནས་པུའུ་ནས་སྤྱི་བསྒྲགས་གནང་དེ་རྒྱལ་ཁབ་རིམ་པའི་རྫས་མིན་རིག་གནས་ཤུལ་བཞག་གི་མིང་བྱང་འབོགས། དཔའ་རིས་དམངས་གླུ་ནི་ནང་དོན་ཕུན་སུམ་ཚོགས་ཤིང་སྒྲིག་གཞི་འཐུས་ཚང་བ། རྣམ་གྲངས་མང་ཞིང་སྐད་ཆའི་སྒྱུ་རྩལ་འབུར་དུ་ཐོན་པ། བརྗོད་བྱའི་ཆ་ནས་རྒན་བཀུར་ཆུང་བྱམས། དྲིན་ལན་གཟོ་བ། མི་དང་མིའི་བར་ཕན་ཚུན་བརྩི་འཇོག། སྲོག་ཆགས་སྐྱེ་ཁམས་སོགས་ལ་སྙིང་ནས་བརྩེ་བ་སོགས་དགེ་བའི་ལས་ལ་འབད་པའི་བསླབ་བྱ་དང་གདམས་ངག་རིག་གནས་རིན་ཐང་མི་དམན་པ་ཚང་ཡོད་པ་ཞིག་ལགས།

       དེ་ཡང་ས་ཆ་རེ་ལ་འགྲོ་ལུགས་རེ་ཟེར་བ་ཇི་བཞིན། དཔའ་རིས་གཉེན་གྱི་འགྲོ་ལུགས་ལའང་ཐུན་མོང་མ་ཡིན་པའི་ཁྱད་ཆོས་ཡོད། རིག་གནས་འདི་དག་ཉམས་པ་སླར་གསོ་དང་མ་ཉམས་གོང་སྤེལ་ལ་དམིགས་ནས། དམངས་ཁྲོད་ཀྱི་གཉེན་སྲོལ་ལ་བྱང་ཆའམ་ཞིབ་འཇུག་རེ་ཡོད་པའི་རྒན་པ་མཁས་པ་འགའ་གདན་དྲངས་ཤིང་། འཁྲབ་སྟོན་མི་སྣ་བདམས་ནས་རང་ཡུལ་གྱི་གནའ་ནས་དར་ཡོང་བའི་གཉེན་སྲོལ་ཆ་ཚང་མགོ་ནས་མཇུག་བར་འཁྲབ་སྟོན་ལེ་ཚན་ཞིག་ཏུ་བཀོད་ཡོད་དེ། དེ་ལ་ཐོག་མར་ན་གཞོན་ཕོ་མོ་གཉིས་ཀྱི་ལོ་རེས་སྤར་ཁ་སོགས་མོ་བས་མོ་འདེབས་པ་དང་། རྩིས་པས་རྩིས་རྒྱག ཚིག་ལོན་གཉེན་གྱི་དབུ་ཁྱུད་དེ་མགོ་རྩོམ་པ་དང་། གཞི་མགྲོན་གཉིས་ཀ་འཐད་རྗེས་ཀྱི་རིན་བཤེ། རིན་བཤེར་ནས་གཉེན་སྟོན། མགྲོན་པོ་ཚང་གིས་བུ་མོ་སྐྱེལ་བའི་སྟོན་མོ་བཤམས་པ་སོགས་དཔའ་རིས་གཉེན་གྱི་གོ་རིམ་ཆ་ཚང་བ་ཞིག་རྒྱ་ཆེའི་མང་ཚོགས་ཀྱི་མིག་གི་དགའ་སྟོན་དུ་ཕུལ་ཡོད།

       གཞུག་གི་ལས་རིམ་ཁྲོད་དུ། ངེད་ཅག་གིས་རྒྱལ་ཁབ་དང་ཞིང་ཆེན་རིམ་པའི་རྫས་མིན་རིག་གནས་ཤུལ་བཞག་ལ་རྒྱུད་འཛིན་གཞིར་བཞག་ཅིང་གསར་བཏོད་གང་ལེགས་སྤེལ་ཏེ། ཀྲུང་ཧྭ་མི་རིགས་ཀྱི་ཐུན་མོང་འདུ་ཤེས་སྐྲུན་པ་ལ་བརྩོན་ལེན་དང་མེས་རྒྱལ་རིག་གནས་རླབས་པོ་ཆེའི་ཟུངས་ཤུགས་སྔར་ལས་ཇེ་རྒྱས་ཇེ་ཕྱུག་ཡོང་བར་འབད་པ་ལྷོད་མེད་བྱེད་ངེས་ཡིན་ནོ། །