༄༅། །བོད་ཀྱི་ལོ་རྩིས་རིག་པའི་བྱུང་རབས་དང་དགེ་མཚན་མདོ་ཙམ་བརྗོད་པ།

       དེ་ཡང་བོད་ཀྱི་བཅུ་ཕྲག་རིག་པའི་གནས་ཀྱི་ཡ་གྱལ་སྐར་རྩིས་རིག་པ་འདི་ནི་སྤྱི་ལོ་མ་ཚུགས་པའི་ཡར་སྔོན་དུ་གནའ་རབས་རྒན་པོ་དག་གིས་ཡུན་རིང་འཚོ་བའི་ཉམས་མྱོང་སོགས་ཀྱི་རྨང་གཞི་བྱས་པའི་མྱོང་རྩིས་དང་། བལ་མོ་ཟླ་རྩིས། ཞང་ཞུང་རྒན་པོའི་ངག་རྩིས། བྱ་དང་ཤིང་ལ་བརྟག་པ་ལྷོ་སྨོན་གྱི་རྩིས། ཉི་མའི་འགྲོ་ལམ་བརྟག་པ་བོན་ཞང་གི་རྩིས། རི་ཕྱུགས་མཚོ་ལ་བརྟག་པ་གམ་འབྲོག་གི་རྩིས། སྐར་མ་དང་རླུང་ལ་བརྟག་པ་བྱང་བའི་རྩིས་སོགས་དང་། རྒྱ་གར་འཕགས་ཡུལ་ནས་དར་བའི་དཔལ་དུས་ཀྱི་འཁོར་ལོའི་ཕྱི་ནང་གཞན་གསུམ་གྱི་རྩིས། རྒྱ་ནག་ཙི་ནའི་ཡུལ་དུ་དར་བའི་རྩིས་ཀྱི་བསྟན་བཅོས་དང་གནམ་རིག་སྐར་རྩིས་པའི་ཉི་ཟླ་གཟའ་སྐར་སོགས་ཀྱི་རྩིས་ཕྲན་དག་ཚུར་བླངས་ནས་རྩིས་ཀྱི་གཞུང་ལུགས་དར་རྒྱས་སུ་བཏང་བར་མ་ཟད། བོད་རང་གི་སྔོན་བྱོན་རྩིས་པ་མཁས་པའི་དབང་པོ་དག་གིས་ཀྱང་། སྨན་རྩིས་ཀྱི་ཕྱག་རྒྱུན་འཁྲུལ་མེད་སྐྱེ་བོ་གཞན་གྱིས་བསྒྲུན་མི་ནུས་པ་དགོས་འདོད་ཀུན་འབྱུང་དཔག་བསམ་གྱི་ལྗོན་པ་ལྟ་བུ་འདི། རང་རེ་བྷོ་ཊའི་ལྗོངས་འདིའི་སྐར་རྩིས་རིག་གནས་རྒྱ་ཆེར་དར་བ་བདེ་བླག་ཏུ་རྟོགས་པའི་སླད་ཚིག་ཉུང་གོ་སླའི་ཁྱད་ཆོས་དང་ལྡན་པའི་དུས་ཀྱི་འཁོར་ལོའི་དགོངས་བཅུད་ལེགས་བཤད་རྨད་བྱུང་སྐར་རྩིས་ཀྱི་ལོ་ཐོ་ལ་འཇུག་པའི་རྩིས་ཀྱི་རྣམ་གཞག་རྒྱ་ཆེར་བསྟན་ཡོད།
       དེ་ལ་རྩིས་ཀྱི་སྙིང་བོ་མ་རྟོགས་པའི་བློ་གྱ་གྱུ་ཅན་དག་གིས་དགོས་པ་མེད་པར་འདོད་ན་ཡང་། དོན་དུ་སྐར་རྩིས་རིག་པ་འདི་རྒྱལ་སྤྱིའི་ས་ཁུལ་དང་། བྱེ་བྲག་ཡུལ་ལུང་སོ་སོའི་རང་བྱུང་ཁམས་ཀྱི་རླུང་དང་སྤྲིན། རྩི་ཤིང་དང་ལྗོན་པ། ཆར་ཞོད་ཆེ་ཆུང་། ཕྱུགས་རིགས་ཀྱི་འཕེལ་ཁ། ཞིང་ལས་སོ་ནམ་བྱེད་པའི་དུས་ཚིགས་ཀྱི་སྔ་ཕྱི། ཉི་ཟླ་སྐར་གསུམ་གྱི་རྒྱུ་བ་ལ་བརྟགས་ནས་དུས་བཞིའི་འགྱུར་བ་དང་གནམ་གཤིས་ཀྱི་དྲོ་གྲང་། རང་བྱུང་ཁམས་ཀྱི་གནོད་འཚེ་དང་ཡུལ་ཁམས་བདེ་མིན། སྐྱེ་འགྲོ་ཀུན་གྱི་སྲོག་འཚོ་ཡུན་དང་ལུས་ཀྱི་ན་ཚ་སོགས་དར་རྒུད་སྣ་ཚོགས་དངོས་ཡོད་འཚོ་བའི་ཁྲོད་ར་སྤྲོད་བྱས་དང་བྱེད་བཞིན་ཡོད་ཅིང་། རྒྱུ་རྐྱེན་རྟེན་འབྲེལ་གྱི་རྟོག་པ་ལས་ལེགས་ཉེས་ཀྱི་བདེ་སྡུག་འབྱུང་བ་བསླུ་མེད་ཆོས་ཉིད་ཡིན་པའི་རྒྱུ་མཚན་གྱིས། དུས་ཀྱི་མཐར་རྩོད་ལྡན་སྙིགས་མའི་སེམས་ཅན་རྣམས་ཉོན་མོངས་བག་ཆགས་ཀྱི་དབང་གིས་དུག་གསུམ་ལ་ཤས་ཆེར་སྤྱོད་པའི་སྐབས་གཟའ་སྐར་སོགས་ཀྱི་ནུས་པ་ཆེས་མྱུར་ལ་གདུག་རྩུབ་ཀྱང་ཆེ་བས། འཇམ་དཔལ་རྩ་རྒྱུད་ལས། རྒྱུ་སྐར་མང་པོ་གསུངས་པ་སྟེ། །སྟོང་ཕྲག་དྲུག་ཅུ་རྩ་བཞི་པོ། །དུས་ཀྱི་ཐ་མ་འདི་ལ་ནི། །འདི་དག་གི་ནི་ནུས་པ་ཡོད། །ཅེས་བསྟན་པ་བཞིན་གཟའ་དང་རྒྱུ་སྐར་ས་བདག་རྒྱུ་ཐེབས་སོགས་ཀྱི་གནད་མ་ཤེས་པར་ལམ་དུ་འགྲོ་ཉེས་པ་དང་། བྱ་བ་བྱེད་ཉེས་པ་སོགས་ཀྱིས་སྣང་སྲིད་ལྷ་ཀླུ་སྡེ་བརྒྱད་དང་གཟའ་སྐར་ས་བདག་སོགས་འཁྲུགས་པའི་གེགས་དང་བར་ཆད་ཀྱི་འབྲས་བུ་ངན་པ་འབྱུང་སྲིད། རྟེན་འབྲེལ་གྱི་དཔྱད་བཅོས་སམ་སྤང་བླང་ཚུལ་བཞིན་ཏུ་བྱས་ན་དེ་དག་གི་འཁྲུགས་པ་ཞི་བ་དང་། ཉེས་པ་སྒྲིབ་པ་སོགས་ཀྱི་ཐབས་ལ་བརྟེན་ནས་འབྲས་བུ་ཕན་བདེ་བླ་མེད་འབྱུང་བའི་རྟེན་འབྲེལ་གྱི་ཐབས་སུ་རྒྱལ་བ་ཐབས་མཁས་ཐུགས་རྗེ་དང་ལྡན་པ་ཁོང་གིས་ཀུན་རྫོབ་རྩིས་ཀྱི་རྣམ་གཞག་འདི་བསྟན་པ་ཡིན་ཏེ། ཀུན་མཁྱེན་མི་ཕམ་རྒྱ་མཚོ་མཆོག་གིས། ཆོས་ཀུན་རང་བཞིན་སྟོང་ན་ཡང་། །མཚན་མའི་བློ་ཅན་འགྲོ་བ་ལ། །ཚད་མར་གྱུར་པ་ཀུན་རྫོབ་རྩིས། །རྟེན་འབྱུང་བསླུ་མེད་ཚུལ་གསལ་བ། །ཀུན་ཀྱང་རྩིས་ཀྱི་ལམ་ལ་ཐུག །དེས་ན་རྒྱལ་བས་ཐབས་འདི་བསྟན། །ཞེས་གསུངས།