དགོད་གཏམ་ཐོས་པ་འཛུམ་ཤོར། ཨ་རིག་གླེན་པའི་གཏམ་རྒྱུད་ཁག་དགུ།

       སྔོན་ཨ་རིག་གི་རྒན་པོ་གཉིས་ལྷ་སར་མཇལ་སྐོར་དུ་སོང་ནས། ལྷ་ཁང་ཐོག་བརྩེགས་ཅན་ཞིག་ཏུ་མཇལ་བར་འགྲོ་དགོས་བྱུང་ནས་འགྲོ་མ་ཤེས་པར་བསྡད་ཡོད་པའི་སྐབས་ལ། བྱི་ལ་ཞིག་སྐས་ཐེམ་བརྒྱུད་ནས་ཐོག་ཁང་དུ་འགྲོ་བ་མཐོང་། ཁོ་གཉིས་ཀྱིས་ཀྱང་བྱི་ལའི་ལད་མོ་བྱས་ཏེ་རྐང་ལག་བཞི་བོ་སར་བཙུགས་ཏེ་ཐོག་ཁང་ནང་དུ་སོང་། མཇལ་ཚར་རྗེས་ཕྱིར་ཇི་ལྟར་ཡོང་དགོས་པའང་མ་ཤེས་པར་འདུག་སྐབས། བྱི་ལ་ཐེམ་སྐས་སྟེང་ནས་མར་ལྡིང་གིན་ལྡིང་གིན་སོང་བ་མཐོང་རྗེས། མཇལ་བ་གཅིག་གིས་བྱི་ལའི་ལད་མོ་བྱས་ཏེ་མར་ལྡིང་གིན་ལྡིང་གིན་འགྲོ་རྩིས་བྱས་པ་ན། ཤུད་ནས་སྐས་རྟིང་བར་ཐོན་ཚེ། གཞན་དེས་ཨ་རོགས་ཇི་འདྲ་རེད་ཅེས་དྲིས་པ་ན། འོ་མྱུར་མོ་ཞིག་ཀྱང་རེད་ལ། རྩུབ་མོ་ཞིག་ཀྱང་རེད་གོ་ཞེས་བཤད་དོ། །

---

       སྔོན་ཨ་རིག་གི་རྒན་པོ་གཉིས་ལྷ་སར་མཇལ་སྐོར་དུ་སོང་ནས་བྱམས་ཆེན་ཐོག་ཚད་གསུམ་ཅན་ཞིག་གི་དབུའི་ཐད་དུ་སླེབས་པ་ན། དྲ་མའི་ནང་དུ་མགོ་གཟུར་ནས་བཏང་སྟེ་ནང་གི་བྱམས་སྐུའི་ཞལ་རས་ལ་མཐོང་མཇལ་ཞིག་བྱས་རྗེས། མགོ་དྲང་མོར་དྲ་མ་ལས་ཕྱིར་འཐེན་པས་དྲ་མ་ལས་ལེན་མ་ཐུབ། དེ་ལྟར་ཡང་ཡང་འཐེན་ཡང་ལེན་མ་ཐུབ། འགྲོ་རོགས་ཀྱིས་རྐང་བ་ནས་བཟུང་སྟེ་ཡང་ཡང་འཐེན་རུང་ལེན་མ་ཐུབ་པས། ཁོ་ཐབས་ཟད་དེ་འགྲོ་རོགས་ལ། འུ་གཉིས་འདིར་བསྡད་པས་ཀྱང་དགོས་པ་མེད་འདུག  ཁྱོད་ཡུལ་ལ་སོང་། ངའི་ཡུལ་མི་ཚོར་ང་རྒན་པོ་འཆི་ས་བཟང་གི རྗེ་བཙུན་བྱམས་པའི་ཞལ་ལ་བལྟས་ནས་འཆི་ཐུབ། འཆི་སྲོལ་ངན་གི མུ་གེ་བྱུང་ནས་འཆི་བ་ལས་གཞན་མེད་ཅེས་སྐད་འདི་ཤོད་ཅེས་བཤད་པ་ན། བྱམས་སྐུས་ཞལ་ནས། ཁྱེད་ཀྱིས་དང་པོར་མགོ་ཇི་ལྟར་ནང་དུ་བཅུག་པ་ཡིན་ཞེས་གསུངས་པ་ན། ཁོས་ཤུགས་ཀྱིས་སྔོན་བཞིན་འདི་ལྟར་བཅུག་ཅེས་སྔར་བཞིན་བྱས་པ་ན་མགོ་ཕྱིར་ལོན་སོང་བས་ཕྱིས་སུ་བྱམས་སྐུ་དེར་བྱམས་པ་གསུང་འབྱོན་མ་ཞེས་གྲགས་སོ། །

---

       སྔོན་ཨ་རིག་སྨད་མ་མཚོ་སྔོན་པོའི་སར་བསྡད་ཡོད་པའི་སྐབས་སུ། རྡོ་གྲུབ་ཆེན་གྱིས། མཚོ་སྔོན་པོའི་མཐའ་ཡི་ཨ་རིག་ཚོ། །རྟ་ནག་པོའི་ཁོག་ཏུ་ཡང་ཡང་ལྟོས། །ཞེས་པའི་ལུང་བསྟན་ཞིག་འབྱོར། དོན་དུ་རྟ་ནག་མའི་ཕྱོགས་ཀྱི་དགྲ་ཇག་ལ་དོགས་ཟོན་བྱོས་ཟེར་བ་ཡིན་མོད། འོན་ཀྱང་ཨ་རིག་རྒན་པོ་ཞིག་གིས་ཁོ་ཚང་ལ་རྟ་ནག་ཅིག་ཡོད་པ་དེ་བཤས་ནས་ཁོག་ཏུ་ཡང་ཡང་བལྟས་རྗེས། ཨ་ཧ་བོ་བླ་མའི་གསུང་འཁྲུལ་བ་མིན་ཚེ་ངའི་མིག་འཁྲུལ་བ་ཡིན་འདུག རྟ་ནག་པོའི་ཁོག་ཏུ་ཅི་ཡང་མི་འདུག་ཅེས་བཤད་དོ། །

---

       སྔོན་ཨ་རིག་གི་རྒན་པོ་གཉིས་ཀྱིས་ལབ་གླེང་བྱེད་སྐབས། གཅིག་གིས་བཤད་རྒྱུར། ངས་དགུང་མོར་ཉལ་སྐབས་ཞོ་མཛུབ་རྩེབ༼ཞོ་མང་པོ་འཐུང་ནས་མིད་པའི་ཁར་ཐོན་ནས་མཛུབ་མོས་རེག་ཐུབ་པ་ཞིག་གི་དོན།༽ཅིག་འཐུང་མྱོང་ཟེར། ཅིག་ཤོས་ན་རེ། ང་ལ་འབྲི་བརྒྱ་ཡོད་ཀྱང་ད་རག་བར་དུ་ཞོ་མཛུབ་རྩེབ་ཅིག་འཐུང་མ་མྱོང་ཟེར་ནས་མཚམས་མ་བྱས་པར་ཞོ་འཐུང་བས་གཉིས་ཀ་ཚེ་འཕོས་སོ། །

---

       སྔོན་ཨ་རིག་གི་རྒན་པོ་ཞིག་གིས་དཀའ་ཚེགས་གང་མང་བརྒྱུད་དེ་གསེར་ཅུང་ཟད་བསགས་ནས་ཇོ་བོར་གསེར་ཞལ་འབུལ་དགོས་བསམ་སྟེ་ལྷ་སར་སོང་། ལམ་བར་དུ་ཇག་པར་ཐུག་སྟེ་འཕྲོག་རྩིས་བྱས་པ་ན། ཁོ་ན་རེ། ཁྱོད་ཚོར་སྟེར་བ་ལས་ཆུའི་དཀྱིལ་དུ་འཕངས་ན་བཟང་ཟེར་ནས་ཆུའི་དཀྱིལ་དུ་གཡུགས། ཁོ་རང་ཇོ་བོའི་མདུན་དུ་སོང་ནས་ཞུ་རྒྱུར། ངས་ཁྱེད་ལ་གསེར་ཅུང་ཟད་ཅིག་ཁྱེར་ཡོང་བ་ལམ་ཁར་ཇག་པས་ཕྲོགས་སོང་ཞེས་ཞུས་པར། ཇོ་བོས་གསུང་འབྱོན་ཏེ། གསེར་དེ་ང་ལ་འཕྲོད་སོང་ཞེས་གསུངས་པ་ན། ཁོས་ཇོ་བོ་རིན་པོ་ཆེར་ཁྱེད་ཚང་ཡང་རྐུན་མའི་ཁྲོད་དུ་ཡོད་དམ་ཞེས་བཤད་ནས་གཤེ་གཤེ་མང་དུ་བཏང་ངོ་། །

---

       སྔོན་ཨ་རིག་དང་མགོ་ལོག་མ་མཐུན་པར་གཡུལ་བཤམས་སྐབས་སུ་ཨ་རིག་གི་ཁྱིམ་ཚང་ཞིག་ལ་ཡུམ་གསེར་བྲིས་མ་ཞིག་ཡོད། ཁོ་ཚང་ཡང་བྲོས་བྱོལ་དུ་འགྲོ་དགོས་བྱུང་བར། གར་འགྲོ་རྒྱལ་བའི་ཡུམ་གསེར་བྲིས་མས་མཁྱེན་ཟེར་ནས་ཡུམ་གསེར་བྲིས་མ་དེ་མཛོ་ཞིག་ལ་བཀལ་ནས་མཛོ་རྒན་གར་འགྲོའི་རྗེས་དེད་ནས་ཉིན་གང་བོར་སོང་སོང་བའི་མཐར། མཛོ་རྒན་སྔར་གྱི་རུ་བཀལ་ཤུལ་དུ་ཐོན་པའི་ཚེ། འོ་ད་དུང་ཨ་ཕའི་ཉལ་ས་སྔར་བཞིན་འདུག ཨ་མའི་ཉལ་ས་སྔར་བཞིན་འདུག ཆུ་རྐའི་ནང་དུ་ཆུས་ཝ་ཤུལ་འཐེན་བཞིན་འདུག ཡུམ་གསེར་བྲིས་མ་འཆུག་ག་ལ་སྲིད། རུ་འདི་ལ་མི་འབབ་གང་ལ་འབབ་ཟེར་བཞིན་སྔར་གྱི་ཤུལ་དེར་བསྡད་པ་ན། མགོ་ལོག་གི་དམག་ཐོན་ནས་གཞན་ལ་བདའ་རྩིས་བྱས་ཚེ། ཁྱིམ་ཚང་དེས་ས་འདི་དཀོན་མཆོག་གསུམ་པོས་ངེད་ཚང་ལ་གནང་བ་ཡིན་ཞེས་བཤད། རྒྱུ་མཚན་དྲིས་པར་ཡུམ་གསེར་བྲིས་མ་མཛོ་ལ་བཀལ་ནས་སོང་ཚུལ་བརྗོད་པས་ཁོ་ཚོའང་ངོ་མཚར་དུ་གྱུར་ནས་གནས་དེ་རུ་འདུག་ཏུ་བཅུག་པ་རེད། གནས་དེ་ད་ལྟའང་མགོ་ལོག་དགའ་བདེ་རྫོང་གངས་ལུང་ཡུལ་ཚོ་རུ་ཡོད་དོ། །

---

       སྔོན་ཨ་རིག་གི་བཟའ་མི་གཉིས་ཡོད་ལ་ཁོ་གཉིས་ཀྱིས་དཀའ་སྡུག་མང་པོ་མྱངས་ཏེ་གསེར་ཉུང་ཙམ་རྙེད་ཅིང་། ལོ་རྗེས་མར་ལྷ་སའི་ཇོ་བོར་ཞལ་གསེར་འབུལ་རྩིས་བྱས་མོད། འགལ་རྐྱེན་གང་རུང་གི་དབང་གིས་འགྲོ་མ་ཐུབ་པས། དད་པ་བརྟན་པོའི་ངང་གསེར་སྣེ་ལོ་ནོར་ལུག་གི་སྙིང་ཐུམ་ཕུར་མཉེད་བཏང་ནས་སྣོད་བཟོས་པ་ཞིག་གང་ཡོད་པ་ཚང་མ་འུར་ཆའི་མཐིལ་ལ་བཞག་སྟེ་ལྷ་སའི་ཕྱོགས་སུ་འཕངས། ཕྱི་ལོར་ཁོ་བཟའ་མི་གཉིས་ལྷ་སར་འབྱོར་ནས་ཇོ་བོར་མཇལ་སྐབས། ཁོ་ན་རེ། ན་ནིང་ཁྱེད་ལ་གསེར་སྣེ་ལོ་གང་བསྐུར་བ་འཕྲོད་དམ་ཞེས་དྲིས་པར། ཇོ་བོའི་ཞལ་ནས་འཕྲོད་འདུག་གསུངས་ནས་གསེར་སྣོད་ཕྱིར་སྤྲད་དོ། །

---

       སྔོན་ཨ་རིག་གི་རྒན་པོ་ཞིག་ལྷ་སར་མཇལ་སྐོར་དུ་སོང་། ཁོ་ལྷ་ཁང་ལ་འགྲོ་སྐབས་ལག་རྟེན་ལ་ཁེན་ནས་སོང་ཞིང་། མཆོད་མཇལ་བྱེད་སྐབས་ལག་རྟེན་འཕྲེད་དུ་སྐེད་ལ་དྲངས། ཕྱིར་འབུད་དུས་ལག་རྟེན་སྒོར་ཐོགས་ནས་ཐར་མ་ཐུབ་པས། ཁོས་གཡོན་ཕྱོགས་སུ་ཡོད་པའི་ལྷ་སྐུ་དེར་ཁྱོད་ཀྱིས་ང་འགྲོ་རུ་ཆུགས་ཞེས་བཤད་ཞོར་ཡང་ཡང་འཐེན་མོད་འགྲོ་མ་ཐུབ། ཁོ་རང་ཐབས་ཟད་དེ་སྐག་གི་བེར་ག་བླངས་ནས་ད་དུང་འགྲོ་རུ་མི་འཇུག་ན་དབྱུག་པས་གཞུ་དགོས་པ་འུ་རེད་ཟེར་བཞིན་ལག་རྟེན་གྱིས་གྲབས་པས། ལྷ་སྐུ་དེས་ཨ་ཚ་ཞེས་ཕྱག་གིས་དབུ་བསྐྱོར། དེ་ནས་སྐུ་དེར་ཇོ་བོ་ཨ་ཚ་མ་ཞེས་ཐོགས་སོ། །

---

       སྔོན་ཨ་རིག་གི་རྒན་པོ་ཞིག་གིས་བྲག་དཀར་སྤྲེལ་རྫོང་དུ་ལོ་ཟླ་མང་པོར་འཕགས་པ་སྤྱན་རས་གཟིགས་ལ་གསོལ་བ་རྩེ་གཅིག་ཏུ་བཏབ་ནས་ཕྱག་འཚལ་བས། ཕྱག་འཚལ་ས་ཡང་ཟད་དེ་དོང་དུ་བབས། སྐབས་དེར་མདུན་གྱི་བྲག་ངོས་སུ་སྤྱན་རས་གཟིགས་ཀྱི་སྐུ་དངོས་སུ་གཟིགས་ཏེ་བྱང་ཕྱོགས་ཤམ་བྷ་ལར་ལམ་སྟོན་མཛད། ཨ་རིག་རྒན་པོའི་ཕྱག་དོང་དང་སྤྱན་རས་གཟིགས་ཀྱི་སྐུ་རང་བྱོན་དེ་ད་ལྟའང་མཇལ་རྒྱུ་ཡོད་དོ། །