མདོ་དབུས་མཐོ་སྒང་གི་ལྷ་བྱ་གོང་མོ།

       གོང་མོ་ནི་འདབ་ཆགས་ཀྱི་སྡེ་དང་དེ་ཕོའི་ཚན། གོང་མོའི་ཁོངས་བཅས་སུ་གཏོགས་ལ། བོད་པ་རྣམས་ཀྱིས་ལྷ་བྱར་བརྩི་བ་དང་རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོབ་སྲོག་ཆགས་ཡིན། 

       གོང་མོ་ནི་གཟུགས་དབྱིབས་འབྲིང་གྲས་ཀྱི་བྱ་རིགས་ཤིག་ཡིན་ལ། ཆ་སྙོམས་ཀྱི་གཟུགས་པོའི་རིང་ཚད་ལ་ལི་སྨི53ཡོད་པ་དང་ཕོ་མོ་གཉིས་ཀྱི་སྤུ་མདོག་འདྲ་མཚུངས་ཡིན། གོང་མོའི་མགོ་དང་བྲང་ཁ་སྐྱ་བོ་ཡིན་ལ། མགྲིན་པ་དཀར་པོ་དང་སྨིན་མ་སྔོ་སྐྱ་ཡིན། བྲང་གི་གཞོགས་གཉིས་སུ་སྒོར་དབྱིབས་ཅན་གྱི་དཀར་ཐིག་ཡོད་པ་དང་མིག་མཐའི་སྐྱི་མོ་རྗེན་པར་ལི་ཁྲིའི་མདོག་དང་ལྡན། གཤོག་ཟུང་སྐྱ་བོའི་སྟེང་དུ་དཀར་ཤ་འདྲེས་ཡོད་ལ། རྔ་སྒྲོའི་མདོག་སྐྱ་བོ་དང་སྒྲོ་སྣེ་ཁམ་དམར་ཡིན། ཕོ་བའི་མདོག་སྔོ་སྐྱ་ཡིན་ལ་སྟེང་དུ་ནག་ཤ་འདྲེས་ཡོད།

       གོང་མོ་ནམ་རྒྱུན་མཚོ་འཕགས་ལ་སྨི2000ནས4500ཡོད་པའི་རྫ་རི་མཐོ་ས་དང་ན་སྤང་། རྡོ་ཧྲུག་ཐང་སོགས་སུ་འཚོ་སྡོད་བྱེད་ལ། ས་མཐོའི་སྲོག་ཆགས་ཀྱི་མཚོན་བྱེད་རིགས་ཤིག་ཡིན། ཁོ་ཚོ་རྟག་པར་བྲག་ངོས་དང་རྡོ་ཧྲུག་ཐང་སོགས་སུ་འཚོ་སྡོད་བྱེད་ཀྱིན་པས། སྡེར་མོའི་ཞབས་མཐུག་ལ་སྲ་མཁྲེགས་ལྡན་པ་དང་། རང་བྱུང་ཆ་རྐྱེན་ལ་བསྟུན་པའི་ནུས་པ་དྲགས་པོ་ཡོད་པས། གངས་འཁྱགས་ཁྲོད་དུ་གཉན་དང་གནའ་བ་སོགས་ས་མཐོའི་རྨིག་ལྡན་སྲོག་ཆགས་དང་འགྲོགས་ནས་འཚོ་བ་རོལ་ཐུབ།

       ནམ་ཟླའི་ཤུགས་རྐྱེན་གྱི་དབང་གིས་མཐོ་སྒང་གི་རྡོ་ཧྲུག་ཐང་རྣམས་ལོ་མང་བོར་ཁ་བས་གཡོགས་ཡོད། ཁ་བ་སྟུག་པོའི་ཁྲོད་ནས་བྲག་རྡོ་སྐྱ་བོ་དང་ནག་པོ་དག་རྗེན་པར་མངོན་ལ། གོང་མོའི་སྐྱ་ནག་བར་མཚམས་ཀྱི་ལུས་མདོག་དེ་ཁོ་ར་ཁོར་ཡུག་གི་ཁ་དོག་དང་གཞི་གཅིག་ཏུ་འདྲེས་པས། གོང་མོ་འགུལ་ཙམ་ཡང་མི་བྱེད་པར་བསྡད་ན། སྦས་སྐུང་གི་ནུས་པ་ཐོན་ཐུབ་པ་དང་། གཉེན་པོ་དག་གིས་རྙེད་པར་དཀའ།