གཅན་ཚའི་གཡང་མདའ་རྟགས་མའི་དྲག་རྩལ་འགྲན་ཚོགས་ཆེན་མོའི་གསར་འགྱུར་སྒྲོག་སྤེལ་ཚོགས་འདུ་བསྡུས།

     སྤྱི་ཟླ9པའི་ཚེས1ཉིན་གྱི་ཕྱི་དྲོར། གཅན་ཚ་རྫོང་མི་དམངས་སྲིད་གཞུང་གིས་གཙོ་སྒྲུབ་བྱས་ཤིང་གཅན་ཚ་རྫོང་རིག་རྩལ་རྒྱང་སྒྲོག་བརྙན་འཕྲིན་ཡུལ་སྐོར་ཅུའུ་ཡིས་འགན་སྒྲུབ་བྱས་པའི་མཚོ་སྔོན་གཅན་ཚའི་སྐབས་དང་པོའི་གཡང་མདའ་རྟགས་མའི་དྲག་རྩལ་འགྲན་ཚོགས་ཆེན་མོའི་གསར་འགྱུར་སྒྲོག་སྤེལ་ཚོགས་འདུ་དེ་གནའ་མཁར་ཟི་ལིང་དུ་བསྡུས།
     ཚོགས་འདུ་ལས་བསྟན་དོན། སྐབས་དང་པོའི“གཡང་མདའ་རྟགས་མའི”དྲག་རྩལ་འགྲན་སྡུར་ནི་གཅན་ཚ་རྫོང་དུ་ཚོགས་བཞིན་པའི་རྒྱལ་སྤྱིའི་མི་རིགས་སྲོལ་རྒྱུན་མདའ་འཕེན་འགྲན་སྡུར་གྱི་རྗེས་སུ་སྤེལ་པའི་རྒྱལ་སྤྱི་རང་བཞིན་གྱི་ལུས་རྩལ་འགྲན་ཚོགས་ཤིག་ཡིན་ལ།“ གཡང་མདའ་རྟགས་མའི”རིག་གནས་ཀྱི་མཚོན་རྟགས་དེ་སྔར་ལས་ལྷག་པའི་སྒོ་ནས་ཁྱབ་སྤེལ་ཤུགས་ཆེར་བྱེད་པ་དང་། གཅན་ཚ་རྫོང་གི་ལུས་རྩལ་ལས་དོན་འཕེལ་རྒྱས་ཐད་ཀྱི་འཚོལ་ཞིབ་དང་ཐབས་ལམ་གསར་བ་ཞིག་ཡིན་པ་རེད། ཐེངས་འདིའི་འགྲན་སྡུར་དེ“ཀྲུང་ཧྭའི་དྲག་རྩལ་དར་སྤེལ་དང་མི་རིགས་རིག་གནས་རྒྱུད་འཛིན། རབ་མཛེས་མཚོ་སྔོན་དུ་བསྐྱོད་ནས་ཡིད་འོང་གི་གཅན་ཚ་མངོན་པ”དམིགས་ཡུལ་དུ་བཟུང་བ་དང་། “སྤྲོ་སེམས་དང་གྲོན་ཆུང་། བདེ་འཇགས། འཆམ་མཐུན”བཅས་རྩ་དོན་དུ་བཟུང་ནས་སྤེལ་རྒྱུ་ཡིན་ཞིང་། ཨུ་རུ་སུ་དང་ཐེ་གོ འཇའ་ཕན། ཧ་སག་སི་ཐན། དབྱི་ལིང་། ཝུའུ་ཁི་ལན་བཅས་རྒྱལ་ཁབ་དྲུག་ནས་ཐོན་པའི་དྲག་རྩལ་པ་དང་། རྒྱལ་ནང་གི་ཟི་ཁྲོན་མགོན་པོ་དྲག་རྩལ་ཁང་དང་གཅན་ཚའི་གངས་རྒྱན་དྲག་རྩལ་ཁང་གཉིས་ནས་དྲག་རྩལ་པ24འགྲན་སྡུར་དུ་ཞུགས་ནས་རྒྱལ་སྤྱིའི་དྲག་རྩལ་འགྲན་སྡུར་གྱི་སྒྲིག་སྲོལ་ལྟར་འགྲན་སྡུར་བྱ་རྒྱུ་ཡིན་ཞིང་། འགྲན་སྡུར་གྱི་རྣམ་གྲངས་ལ་སྤྱི་རྒྱ50ཅན་དང་སྤྱི་རྒྱ55ཅན། སྤྱི་རྒྱ60ཅན། སྤྱི་རྒྱ65ཅན། སྤྱི་རྒྱ70ཅན། སྤྱི་རྒྱ75ཅན་བཅས་ཀྱི་རིམ་པ་དྲུག་གཏན་ཁེལ་བྱས་ཡོད་ཟེར།
     གོང་རིམ་འགོ་ཁྲིད་སྡེ་ཁག་གི་སྣེ་ཁྲིད་དང་སྤྱི་ཚོགས་ལས་རིགས་སོ་སོའི་ཐུགས་ཁུར་འོག་ཏུ། ཐེངས་འདིའི་འགྲན་སྡུར་དེ་སྔར་ལས་ལྷག་པའི་སྒོ་ནས་རྒྱ་ཆེར་སྤེལ་ཏེ། ཀྲུང་ཧྭའི་དྲག་རྩལ་དང་མི་རིགས་རིག་གནས་དར་སྤེལ་དང་འཕེལ་རྒྱས་སུ་གཏོང་བར་སྐུལ་འདེད་ཀྱི་ནུས་པ་ཆེན་པོ་ཐོན་པར་བྱེད་པ་དང། གཡང་མདའ་རྟགས་མའི་མི་རིགས་ཀྱི་སྲོལ་རྒྱུན་མདའ་འཕེན་འགྲན་སྡུར་སོགས་མི་རིགས་རིག་གནས་ཀྱི་མཚོན་རྟགས་སྔར་ལས་ཇེ་རྒྱས་ཇེ་ལེགས་སུ་གཏོང་བར་ནུས་ཤུགས་མི་དམན་པ་ཐོན་ངེས་རེད།