༄༅།།འབའ་རྫོང་གི་སྐབས་གཉིས་པའི''རྫོང་རུ་བུམ་པ་རྟགས་མའི”ཞིང་ཆེན་ཡོངས་ཀྱི་མི་རིགས་སྲོལ་རྒྱུན་མདའ་རྩེད་གདན་ཞུ་འགྲན་བསྡུར་སྤེལ།

སྤྱི་ཟླ9བའི་ཚེས18ནས་ཚེས21ཉིན་ཏེ་དུས་ཡུན་ཉིན་བཞིའི་རིང་ལ། ཀྲུང་གུང་ཐུན་ཏེ་རྫོང་ཨུ་དང་རྫོང་མི་དམངས་སྲིད་གཞུང་གཉིས་ཀྱིས་གཙོ་སྒྲུབ་བྱས་ཤིང་། ཐུན་ཏེ་རྫོང་ཡུལ་སྐོར་རྒྱང་སྒྲོག་བརྙན་འཕྲིན་ཅུའུ་དང་ཐུན་ཏེ་རྫོང་དམངས་ཁྲོད་མདའ་འཕེན་མཐུན་ཚོགས་གཉིས་ཀྱིས་འགན་སྒྲུབ་གནང་བའི་ཐུན་ཏེ་རྫོང་གི་སྐབས་གཉིས་པའི''རྫོང་རུ་བུམ་པ་རྟགས་མའི”ཞིང་ཆེན་ཡོངས་ཀྱི་མི་རིགས་སྲོལ་རྒྱུན་མདའ་རྩེད་གདན་ཞུ་འགྲན་བསྡུར་དེ་འབའ་མདོ་སྡེ་བ་རུ་སྤེལ།
ཐེངས་འདིའི་འགྲན་བསྡུར་ནི་མཚོ་སྔོན་ཐུན་ཏེའི"རྫོང་རུ་བུམ་པ་རྟགས་མའི"མཐོ་སྒང་ཡུལ་ཕྱིའི་རྐང་རྒྱུག་འགྲན་བསྡུར་གྱི་ནང་དོན་ཚན་པ་ཞིག་ཡིན་ལ། མདའ་རྩལ་འགྲན་བསྡུར་སྟེང་ཐུན་ཏེ་རྫོང་དང་ས་གནས་གཞན་པའི་འགྲན་ཞུགས་རུ་ཁག་བསྡོམས་པས53ཞུགས་ཡོད། དེའི་ནང་གཞུ་འཁོར་ལོ་མའི་མདའ་འཕེན་འགྲན་ཞུགས་རུ་ཁག41དང་ར་གཞུ་མདའ་འཕེན་རུ་ཁག12ཡོད། 
འགྲན་ཞུགས་རུ་ཁག་འདིར་དམིགས་བསལ་བ་ཞིག་ཡོད་པ་ནི་ན་གོར་མོ་དང་དཔའ་ལུང་ས་ཆ་ནས་ཐོན་པའི་ཧེ་རིགས་མདའ་འཕེན་རུ་ཁག་ཀྱང་དངོས་སུ་ཟབ་ཞུགས་བྱས་ཡོད་ལ། འགྲན་ཞུགས་རུ་ཁག་རྣམས་ཚན་ཆུང་དྲུག་གམ་མདའ་ར་དྲུག་ཏུ་བགོས་ནས་ཛ་དྲག་གི་འགྲན་བསྡུར་བྱས་པ་བརྒྱུད་ཟླ9པའི་ཚེས21ཉིན་བདེ་བླག་ངང་ཡོངས་སུ་མཇུག་བསྡུས།
ཐེངས་འདིའི་འགྲན་བསྡུར་ཁྲོད་ཀོས་ནན་རྫོང་རླུང་རྟ་ན་གཞོན་མདའ་འཕེན་རུ་ཁག་ལ་ཨང་དང་པོ་དང་། ཐུན་ཏེ་རྫོང་འབའ་ལུང་ཤང་ཁ་སྒང་རུ་ཁག་གསུམ་པར་ཨང་གཉིས་པ། ཐུན་ཏེ་རྫོང་རྒྱལ་པོ་གོ་ཆེན་མདའ་འཕེན་རུ་ཁག་ལ་ཨང་གསུམ་པ། ཐུན་ཏེ་རྫོང་འབའ་ཡུལ་གསེར་གཞོང་མདའ་འཕེན་རུ་ཁག་ལ་ཨང་བཞི་བ་བཅས་ཐོབ་ཡོད། བྱ་དགའ་ཨང་དང་པོར་སྒོར20000.00 ཨང་གཉིས་པར་སྒོར15000.00 ཨང་གསུམ་པར་སྒོར10000.00 ཨང་བཞི་བར་སྒོར6000.00བཅས་གནང་བ་རེད།
འགྲན་བསྡུར་འདི་ནི་ཐུན་ཏེ་རྫོང་རྒྱལ་པོ་གོ་ཆེན་མདའ་འཕེན་རུ་ཁག་གིས2016ལོ་དང2018ལོའི་ཚུན་ལ་ཧུར་ཐག་གིས་བསྒྲུབ་པའི་མདའ་རྩལ་བྱ་འགུལ་ལས་ཐེངས་གསུམ་པ་ཡིན་ཞིང་། དམིགས་ཡུལ་གཙོ་བོ་ནི་བོད་ཀྱི་སྲོལ་རྒྱུན་མདའ་རྩལ་རིག་གནས་འདི་ཉིད་མ་ཉམས་གོང་སྤེལ་དང་ཉམས་པ་སོར་ཆུད་སྒོས་འགྲན་བསྡུར་སྤེལ་སའི་ས་གནས་མང་ཚོགས་ཀྱི་དབུལ་སྐྱོར་དང་ཡོང་འབབ་ལ་དམིགས་ནས་བསྒྲུབ་པ་ཞིག་རེད།  
ཐེངས་འདིའི་འགྲན་བསྡུར་ལས་མཐོ་སྒང་གི་མཛེས་པའི་ཞིང་གྲོང་དུ་བསྔགས་པའི་འབའ་མདོ་སྡེ་བ་དྲིལ་སྒྲོག་དང་ས་གནས་མང་ཚོགས་ལའང་དེར་མཐུན་གྱི་ཡོང་འབབ་འོས་འཚམ་རེ་ཐོབ་པར་བྱས་ཡོད། 
ད་རག་བར་ཐུན་ཏེ་རྫོང་རྒྱལ་པོ་གོ་ཆེན་མདའ་འཕེན་རུ་ཁག་ཞིང་ཆེན་ནང་ཁུལ་གྱི་མདའ་རྩལ་འགྲན་བསྡུར་གང་རུང་ལ་ཞུགས་མྱོང་བར་མ་ཟད། ཁོ་ཚོས་གྲུབ་འབྲས་ཀྱང་མི་དམན་པ་བླངས་ཡོད།
ཐེངས་འདིའི་འགྲན་བསྡུར་གྱི་ཤན་འབྱེད་པ་དང་ལས་བཟོ་བ་སོགས་ཀྱང་རྒྱལ་པོ་གོ་ཆེན་མདའ་འཕེན་རུ་ཁག་གིས་ཚབ་ཞུགས་བྱས་ཏེ་བདེ་བླག་ངང་མཇུག་སྒྲིལ་བ་དང་ཁོ་ཚོས་ཐུན་ཏེ་རྫོང་གི་སྤྱི་ཚོགས་འཆམ་མཐུན་དང་མི་རིགས་མཐུན་སྒྲིལ། དཔལ་འབྱོར་འཕེལ་རྒྱས། དེ་མིན། བོད་ཀྱི་སྲོལ་རྒྱུན་མདའ་རྩལ་རིག་གནས་འདི་ཉིད་གོང་ནས་གོང་དུ་སྤེལ་བར་སྔར་ལས་ལྷག་པའི་སྒོ་ནས་ནུས་པ་བཏོན་དང་འདོན་བཞིན་ཡོད་པ་རེད།