སྒེག་སྟོབས་ལུས་རྩལ་ལུས་སྦྱོང་གི་འགྲན་བསྡུར་མཚོ་ལྷོ་ཁུལ་དུ་སྤེལ།

མཚོ་སྔོན་ཞིང་ཆེན་སྐབས་བཞི་བའི་དམངས་ཡོངས་ཀྱི་ལུས་སྦྱོང་ཚོགས་ཆེན་ལས་སྒེག་སྟོབས་ལུས་རྩལ་ལུས་སྦྱོང་གི་འགྲན་བསྡུར་སྤེལ་བ།
 

        ཟླ7པའི་ཚེས10ཉིན། མཚོ་སྔོན་ཞིང་ཆེན་མི་དམངས་སྲིད་གཞུང་གིས་གཙོ་སྒྲུབ་བྱས་ཤིང་། མཚོ་སྔོན་ཞིང་ཆེན་ལུས་རྩལ་ཅུའུ་དང་མཚོ་སྔོན་ཞིང་ཆེན་དབང་བོ་སྐྱོན་ཅན་མཉམ་འབྲེལ་ལྷན་ཚོགས། མཚོ་ལྷོ་ཁུལ་མི་དམངས་སྲིད་གཞུང་བཅས་ཀྱིས་འགན་སྒྲུབ་གནང་བ། ཞིང་ཆེན་ཐད་གཏོགས་ཀྱི་འབྲེལ་ཡོད་སྡེ་ཁག་དང་མཚོ་སྔོན་ཞིང་ཆེན་ལུས་རྩལ་སྤྱི་ཁྱབ་ལྷན་ཚོགས། མཚོ་ལྷོ་ཁུལ་གུང་ཧོ་རྫོང་མི་དམངས་སྲིད་གཞུང་། མཚོ་སྔོན་ཞིང་ཆེན་སྒེག་སྟོབས་ལུས་རྩལ་ལུས་སྦྱོང་མཐུན་ཚོགས་ཀྱིས་རོགས་སྒྲུབ་བྱས་པའི་མཚོ་སྔོན་ཞིང་ཆེན་གྱི་དམངས་ཡོངས་ཀྱི་ལུས་སྦྱོང་ཚོགས་ཆེན་སྐབས་བཞི་བའི་སྒེག་སྟོབས་ལུས་སྦྱོང་འགྲན་བསྡུར་དེ་མཚོ་ལྷོ་ཁུལ་སྨྱན་སྦྱོར་ལྟེ་གནས་ཀྱི་འཁྲབ་སྟོན་ཚོམས་ཆེན་དུ་སྤེལ་བ་རེད།

        ཐེངས་འདིའི་འགྲན་བསྡུར་གྱི་རྣམ་གྲངས་ནང་སྐྱེས་པའི་སྒེག་སྟོབས་ལུས་རྩལ་དང་ལུས་སྦྱོང་། བུད་མེད་ལུས་སྦྱོང་གི་པི་ཅི་ཉི། ཕོ་མོའི་ལུས་སྦྱོང་གི་ཤོམ་འགྲོས། སྒེག་སྟོབས་ལུས་སྦྱོང་མཉམ་འདྲེས། ལུས་རྩལ་གྱི་ཤོམ་འགྲོས་སོགས་ཚུད་ཡོད་པ་རེད།

        རྒྱུས་ལོན་པ་ལྟར་ན། ཐེངས་འདིའི་ལུས་སྦྱོང་ལུས་རྩལ་འགྲན་བསྡུར་ནང་ཞིང་ཆེན་ནང་ཁུལ་གྱི་འཐུས་མིའི་རུ་ཁག10དང་ལུས་རྩལ་པ་བརྒྱ་ཙམ་ཞུགས་རྒྱུའི་མིང་ཐོ་བཀོད་ཡོད་པ་རེད།

        ལུས་རྩལ་པ་ཚོས་གར་སྟེགས་སྟེང་ཡིད་ཆེས་བརྟན་པོ་དང་འབད་འབུངས་ཡར་བརྩོན་གྱིས་ཀྲུང་ཧྭའི་ལུས་རྩལ་སྙིང་སྟོབས་མངོན་པར་བྱས་ནས་བདེ་ཐང་གི་ཀྲུང་གོའི་འཐབ་ཇུས་ལག་ལེན་དུ་བསྟར་བའི་འོག་ཏུ། དམངས་ཡོངས་ཀྱི་ལུས་སྦྱོང་དབྱར་མཚོ་རྒྱས་པ་ལྟར་འཕེལ་རྒྱས་སུ་འགྲོ་བའི་རྣམ་པ་གསར་བ་མངོན་པར་བྱས་ཏེ། མང་ཚོགས་མང་པོ་ཞིག་ལུས་སྦྱོང་ནང་ཞུགས་ཏེ་དམངས་ཡོངས་ཀྱིས་ལུས་སྦྱོང་ལ་བརྩི་མཐོང་དང་ལུས་སྦྱོང་ནང་ཞུགས་པ། བདེ་ཐང་གི་འཚོ་བ་སྐྱེལ་སྟངས་ཐད་དོན་གཉེར་བཅས་བྱེད་པའི་རྣམ་པ་བཟང་བོ་ཞིག་སྔར་ལས་བཏོད་ཡོད་པ་རེད།