འུར་རྡོའི་འགྲན་བསྡུར་བོད་ལྗོངས་ཉིང་ཁྲིར་སྤེལ།

        ཟླ8པའི་ཚེས3ཉིན། བོད་རང་སྐྱོང་ལྗོངས་ཀྱི་ལུས་རྩལ་འགྲན་ཚོགས་སྐབས་བཅུ་གསུམ་པ་དང་མི་རིགས་ཀྱི་སྲོལ་རྒྱུན་ལུས་རྩལ་འགྲན་ཚོགས་སྐབས་ལྔ་པའི་ཐོག་ཏུ་སྲོལ་རྒྱུན་ལུས་རྩལ་རྣམ་གྲངས“འུར་རྡོའི”འགྲན་བསྡུར་དེ་ཉིང་ཁྲི་གྲོང་ཁྱེར་ཉང་ཆུའི་ངོགས་སུ་སྤེལ།

        གཞིས་རྩེ་གྲོང་ཁྱེར་ས་སྐྱ་རྫོང་ནས་ཡོང་པའི་བདམས་ཐོན་པ་བུ་ཆུང་དང་བསྟན་པ་ཚེ་རིང་གཉིས་གཞིས་རྩེའི་འཐུས་མི་བྱས་ནས་འགྲན་བསྡུར་ནང་ཞུགས་ཡོད།

        འགྲན་བསྡུར་གྱི་ཁྲོད། བདམས་ཐོན་པ་རེ་རེས་འགྲན་སྐོར་རེར་རྡོ་ཐེངས་གསུམ་རེ་འཕེན་ཆོག་པ་དང་། འབེན་གྱི་བར་ཐག་སྨི80དང་། སྨི60 སྨི50བཅས་རེད། འབེན་ཐོག་གི་རི་མོ་མི་འདྲ་བར་རྡོ་འཕེན་ཐུབ་ཚེ་སྐར་མ་མི་འདྲ་བ་ཐོབ་ཅིང་། རི་མོ་གཡག་མགོར་ཕོག་ཚེ་སྐར་མ2དང་།  ལུག་མགོར་ཕོག་ཚེ་སྐར་མ4། སྤྱང་ཀིའི་མགོར་རྡོ་ཕོག་ཚེ་སྐར་མ6བཅས་ཐོབ་ཀྱི་ཡོད།

        རེས་སྐོར་དང་པོའི་སྨི80ཡི་འགྲན་བསྡུར་དུ་གཞིས་རྩེའི་འཐུས་མི་ཚོགས་པ་དང་ཉིང་ཁྲིའི་འཐུས་མི་ཚོགས་པའི་བདམས་ཐོན་པ་གཉིས་ཀྱིས་ཨང་དང་པོ་དང་གཉིས་པ་བརྩོན་ལེན་བྱས་པ་དང་། མཐར་གཞིས་རྩེའི་འཐུས་མི་ཚོགས་པའི་བདམས་ཐོན་པ་བུ་ཆུང་གིས་ད་ཐེངས་ཀྱི་འགྲན་བསྡུར་གྱི་ཨང་དང་པོ་བླངས།