མཚོ་སྔོན་ཞིང་ཆེན་གྱི་ལུས་རྩལ་འགྲན་ཚོགས་སྐབས་བཅོ་བརྒྱད་པ་དང་དམངས་ཡོངས་ལུས་སྦྱོང་ཚོགས་ཆེན་སྐབས་བཞི་པ་དངོས་སུ་མགོ་བརྩམས་པ།

        ཟླ་བརྒྱད་པའི་ཚེས་དྲུག་ཉིན། མཚོ་སྔོན་ཞིང་ཆེན་གྱི་ལུས་རྩལ་འགྲན་ཚོགས་སྐབས་བཅོ་བརྒྱད་པ་དང་དམངས་ཡོངས་ཀྱི་ལུས་སྦྱོང་ཚོགས་ཆེན་སྐབས་བཞི་པ་མཚོ་ལྷོ་བོད་རིགས་རང་སྐྱོང་ཁུལ་ཁྲི་ཀ་རྫོང་གི་དམངས་ཡོངས་ལུས་སྦྱོང་ལྟེ་གནས་ལུས་རྩལ་ར་བ་ནས་གཟབ་རྒྱས་ངང་བསྡུས། ཐེངས་འདིའི་འགྲན་ཚོགས་ནི་མཚོ་ལྷོ་བོད་རིགས་རང་སྐྱོང་ཁུལ་གྱིས་གཙོ་སྒྲུབ་བྱས་པ་དང་། འགྲན་ཞུགས་ལས་ཁུངས35ཡིས་ཐུན་མོང་གིས་རོགས་སྒྲུབ་བྱས་ཏེ་སྤེལ་བ་ཡིན། མཚོ་སྔོན་ཞིང་ཆེན་གྱི་གྲོང་ཁྱེར་དང་ཁུལ་སོ་སོ་ནས་ཐོན་པའི་ལུས་རྩལ་འགྲན་ཞུགས་པ་དག་གིས་ཉིན་བཅུའི་རིང་མཐུན་སྒྲིལ་དང་མཛའ་བརྩེ་གཙོར་བཟུང་འགྲན་སྡུར་གྱི་རྣམ་གྲངས་ཆེ་ཆུང་ཁག་གོ་རིམ་བཞིན་སྤེལ་འཆར་ཡོད། ཟླ8ཚེས15ཉིན་ཁྲི་ཀ་རྫོང་གི་དམངས་ཡོངས་ལུས་སྦྱོང་ལྟེ་གནས་སུ་མཇུག་བསྒྲིལ་རྒྱུ་རེད།
        མཛད་སྒོའི་སྟེང་ཞིང་ཆེན་ཏང་ཨུའི་ཧྲུའུ་ཅི། དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་ཞིན་ཁྲང་ཞིང་གིས་ལུས་རྩལ་འགྲན་ཚོགས་དབུ་བརྩམས་པ་ཁྱབ་བསྒྲགས་བྱས། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ཝའོ་ཞའོ་ཅིན་གྱིས་ཤིས་ཚིག་ཕུལ། ཞིང་ཆེན་སྲིད་གྲོས་ཀྱི་ཀྲུའུ་ཞི་མགོན་པོ་བཀྲ་ཤིས་མཛད་སྒོར་ཞུགས། མཚོ་ལྷོ་ཁུལ་གྱི་ཏང་ཨུའི་ཧྲུའུ་ཅི་ལིས་ཀང་གིས་དགའ་བསུའི་ཞུ་ཚིག་ཕུལ།