རྩྭ་ཐང་ཆེན་མོའི་ལུས་རྩལ་འགྲན་ཚོགས་ཀྱིས་གྲོང་གསེབ་དར་སྤེལ་གྱི་ངར་ཤུགས་ཀུན་ལ་ངོམས།

       ལྔ་བཞིའི་རྒྱལ་གཅེས་སྙིང་སྟོབས་སྔར་ལས་དར་སྤེལ་སྒོས། མང་ཚོགས་ཀྱི་ལས་ཞོར་རིག་གནས་འཚོ་བ་ཕུན་ཚོགས་སུ་གཏོང་ཆེད། ཟླ5པའི་ཚེས1ཉིན། མཛོད་དགེ་རྫོང་བྱམས་མེ་གྲོང་རྡལ་ལུས་རྩལ་ཚོགས་པས་ལུས་རྩལ་འགྲན་ཚོགས་སྐབས་དང་པོ་བྱམས་མེ་གྲོང་རྡལ་དུ་སྤེལ། ཐེངས་འདིའི་བྱེད་སྒོ་ནི་བྱམས་མེ་གྲོང་རྡལ་ལུས་རྩལ་ཚོགས་པས་རྩ་འཛུགས་བྱས་ཤིང་། འགྲན་ཚོགས་སུ་རིག་རྩལ་དང་འགྲན་རྩོད་གཅིག་ཏུ་འདུས་ཏེ། རྒྱང་མཆོང་དང་བྱེ་ཁུག་འགྱོག་པ། རྒྱུག་འགྲན། ལྒང་རྩེད་སོགས་ལུས་རྩལ་གྱི་རྣམ་གྲངས་བཀོད་སྒྲིག་བྱས་པས། གྲོང་རྡལ་ཡོངས་ཀྱི་སྡེ་བ7གྱི་མང་ཚོགས་སྟོང་ལ་ཉེ་བ་ལྟད་མོར་བཀུག

       ཉིན་དེའི་སྔ་དྲོའི་དུས་ཚོད11ཐོག་རྟེན་འབྲེལ་གྱི་སྒྱོགས་སྒྲ་དང་བཅས། མཛོད་དགེ་རྫོང་བྱམས་མེ་གྲོང་རྡལ་ལུས་རྩལ་ཚོགས་པའི་ལུས་རྩལ་འགྲན་ཚོགས་སྐབས་དང་པོ་དངོས་སུ་མགོ་བརྩམས། གནམ་གཤིས་བཟང་རྒྱུ་མེད་ལ་རླུང་ཆེ་རུང་མང་ཚོགས་ཀྱི་ལྟད་མོའི་སྤྲོ་སྣང་འགོག་མི་ཐུབ་པར། ཚང་མས་སྡེ་བ་སོ་སོའི་འཐུས་མི་རུ་ཁག་གི་ངོ་མཚར་ཆེ་བའི་འགྲན་རྩལ་ལ་སྒུག་ཡོད།

       རྒྱུས་ལོན་པ་ལྟར་ན། ཐེངས་འདིའི་ལུས་རྩལ་འགྲན་ཚོགས་ཀྱི་དུས་ཡུན་ཉིན་གསུམ་ཡིན་ལ། རྒྱང་མཆོང་དང་བྱེ་ཁུག་འགྱོག་པའི་རྣམ་གྲངས་གཉིས་ནི་འགྲན་ཚོགས་ཀྱི་མགོ་རྩོམ་ཉིན་མོར་འགྲན་སྡུར་བྱས། རྒྱུག་འགྲན་དང་ལྒང་རྩེད་འགྲན་སྡུར་གཉིས་ནི་བྱེ་བྲག་ཏུ་ཟླ5པའི་ཚེས2ཉིན་དང་ཟླ5པའི་ཚེས3ཉིན་ལ་སྤེལ་རྒྱུ་རེད། །