2023ལོའི་མཚོ་སྐོར་ལྕགས་རྟ་འགྲན་སྡུར་སྤེལ་བའི་དུས་ཚོད་དང་འགྲན་སྡུར་ལམ་ཐིག་ཁྱབ་བསྒྲགས་བྱས་པ།

       ཟླ5པའི་ཚེས24ཉིན། 2023ལོའི་མཚོ་སྐོར་རྒྱལ་སྤྱིའི་གཞུང་ལམ་ལྕགས་རྟ་འགྲན་སྡུར་སྐབས་ཉེར་གཉིས་པའི་གསར་འགྱུར་ཡོངས་བསྒྲགས་ཚོགས་འདུ་པེ་ཅིང་དུ་འཚོགས་ཤིང་། རྒྱལ་ཁབ་ལུས་རྩལ་སྤྱི་ཁྱབ་ཅུས་དང་ཀྲུང་གོའི་ལྕགས་རྟ་མཐུན་ཚོགས། མཚོ་སྐོར་འགྲན་སྡུར་སྒྲིག་འཛུགས་ཨུ་ལྷན། མཚོ་སྔོན་ཞིང་ཆེན་ལུས་རྩལ་ཅུས། འགན་སྒྲུབ་གནང་མཁན་སོ་སོའི་ས་གནས་སྲིད་གཞུང་། རོགས་སྐྱོར་ཚོང་པའི་འཐུས་མི། སྨྱན་སྦྱོར་མི་སྣ་བཅས་མི300ལྷག་ཙམ་བྱེད་སྒོར་ཞུགས།

       མཚོ་སྐོར་འགྲན་སྡུར་སྒྲིག་འཛུགས་ཨུ་ལྷན་གྱི་རྒྱུན་ལས་ཀྲུའུ་རིན་གཞོན་པའམ་སྒྲིག་འཛུགས་ཨུ་ལྷན་གཞུང་ལས་ཁང་གི་ཀྲུའུ་རིན། ཞིང་ཆེན་ལུས་རྩལ་ཅུས་ཀྱི་ཅུས་ཀྲང་ཝང་ཞ་ཡིས་འགྲན་སྡུར་གྱི་གྲ་སྒྲིག་གནས་ཚུལ་ངོ་སྤྲོད་བྱས་པ་དང་། འགྲན་སྡུར་གྱི་ལམ་ཐིག་དང་འགྲན་ཞུགས་རུ་ཁག འགྲན་སྡུར་གྱི་སྣེ་ཁྲིད་གྱོན་གོས་བཅས་ཡོངས་བསྒྲགས་བྱས། རོགས་སྐྱོར་ཚོང་པས་འགྲེམས་སྟོན་བྱས་པ་དང་འབྲེལ་མིང་རྟགས་བཀོད།

       ངོ་སྤྲོད་བྱས་པར་གཞིགས་ན། སྐབས་འདིའི་འགྲན་སྡུར་དེ2023ལོའི་ཟླ7པའི་ཚེས8ཉིན་ཟི་ལིང་གྲོང་ཁྱེར་དུ་མགོ་རྩོམ་མཛད་སྒོ་འཚོགས་རྒྱུ་ཡིན་པ་དང་། ཟླ7པའི་ཚེས9ཉིན་ནས་ཚེས16ཉིན་བར་འགྲན་སྡུར་སྤེལ་རྒྱུ་རེད། ཚེས16ཉིན་གྱི་དགོང་མོར་མཚོ་ནུབ་ཁུལ་ཝུའུ་ལམ་རྫོང་ཚྭ་ཁ་གྲོང་རྡལ་དུ་མཇུག་སྒྲིལ་མཛད་སྒོ་འཚོགས་རྒྱུ་རེད། འགྲན་སྡུར་གྱི་ལམ་ཐག་ཧྲིལ་པོར་ཁྱོན་འགྲན་དུམ8ཡོད་པ་དང་། ལམ་བར་དུ་ཟི་ལིང་དང་མཚོ་ཤར་གྲོང་ཁྱེར་གཉིས། མཚོ་ལྷོ། མཚོ་བྱང་། མཚོ་ནུབ་བཅས་ཁུལ་གསུམ་བརྒྱུད་དགོས་ལ། ཁྱོན་ལམ་ཐག་སྤྱི་ལེ1344ཡོད་པའི་ནང་འགྲན་སྡུར་གྱི་བར་ཐག་སྤྱི་ལེ1294དང་བརྗེ་སྒྱུར་ལམ་ཐག་སྤྱི་ལེ50ཡོད། སྐབས་འདིའི་འགྲན་སྡུར་ཁྲོད། གླིང་ཆེན་བཞི་ནས་ཡོང་པའི་རུ་ཁག22དང་ལུས་རྩལ་པ154འགྲན་སྡུར་ནང་ཞུགས་རྒྱུ་ཡིན་པ་དང་། དེའི་ནང་ལས་རིགས་རུ་ཁག5དང་། གླིང་རིམ་པའི་རུ་ཁག15། རྒྱལ་ཁབ་ཀྱི་རུ་ཁག2བཅས་ཡོད། སྐབས་འདིའི་འགྲན་སྡུར་ནང་སྤྱིའི་གྲུབ་འབྲས་ཀྱི་ཨང་དང་པོ་དང་། རི་འཛེག་སྐར་གསོག་ཨང་དང་པོ། མཐའ་མའི་གདོང་མཆོང་གི་སྐར་གསོག་ཨང་དང་པོ། ཨེ་ཤ་ཡའི་ཆེས་བཟང་བའི་ལྕགས་རྟ་སྐོར་མཁན་མི་སྒེར་བཞིའི་བྱ་དགའ། ཚོགས་པའི་སྐར་གསོག ཨེ་ཤ་ཡའི་ཚོགས་པ་གཉིས་ཀྱི་བྱ་དགའ་བཅས་བཀོད་སྒྲིག་བྱ་རྒྱུ་དང་། འགྲན་སྡུར་གྱི་བྱ་དགའི་དངུལ་དང་འགྲན་རིན་བསྡོམས་འབོར་ཨ་སྒོར་ཁྲི100ཟིན་རྒྱུ་རེད།