བོད་ལྗོངས་དེང་རབས་དུས་ཆེན་གྱི་འཁྲབ་ཚན་གཙོ་བོ་སྟེ་སྲོལ་རྒྱུན་གྱི་རིག་རྩལ་འཁྲབ་སྟོན།

ས་དགའི་རྒྱ་གཞས་འཁྲབ་སྟོན་བྱེད་བཞིན་པ།

　　བོད་ལྗོངས་གཞིས་ཀ་རྩེ་ས་ཁུལ་གྱི་ངམ་རིང་དང་། རིན་སྤུངས། གཞིས་ཀ་རྩེ་གྲོང་ཁྱེར། ས་སྐྱ། ལྷ་རྩེ་བཅས་ཡུལ་གྲུའི་ཁྱད་ཆོས་གཟེངས་སུ་ཐོན་པའི་བོད་ཀྱི་ཟློས་གར་དང་གླུ་གཞས་འཁྲབ་སྟོན་སོགས་ཕུལ་དུ་བྱུང་བའི་སྲོལ་རྒྱུན་གྱི་དམངས་ཁྲོད་སྒྱུ་རྩལ་འཁྲབ་སྟོན་དེ་དག་སྐབས་དགུ་བའི་ཇོ་མོ་གླང་མའི་རིག་གནས་གནས་སྐོར་དུས་ཆེན་ཁྲོད་ཀྱི་འཁྲབ་སྟོན་གཙོ་བོ་ཞིག་ཏུ་གྱུར།

འོང་སྐོར་དུས་ཆེན་ཁྲོད་ཀྱི་འཁྲབ་ཚན་ཁག་ཅིག

དམངས་ཁྲོད་ཀྱི་རིག་རྩལ་འཁྲབ་སྟོན་བྱེད་བཞིན་པ།

　　གཞིས་ཀ་རྩེ་ས་ཁུལ་གྱི་སྲིད་འཛིན་གཞུང་ལས་ཁང་གི་ཆེད་སྒྲུབ་པ་གཞོན་པ་དབང་འདུས་ལགས་ཀྱིས་མཚམས་སྦྱོར་བྱས་པ་ལྟར་ན། སྐབས་དགུ་བའི་ཇོ་མོ་གླང་མའི་རིག་གནས་གནས་སྐོར་དུས་ཆེན་ཚོགས་པ་ནས་བཟུང་གཙང་གི་སྒྲ་སྙན་ཞབས་བྲོའི་རིག་གནས་ཀྱི་གཟའ་འཁོར་དང་། འཛམ་གླིང་གཟུགས་འདས་ཤུལ་བཞག་རིག་གནས་ཏེ་བོད་ཀྱི་ཟློས་གར་རིག་གནས་གཟའ་འཁོར། གཟུགས་འདས་ཤུལ་བཞག་རིག་གནས་ཀྱི་སྲུང་སྐྱོབ་གྲུབ་འབྲས་འགྲེམ་སྟོན་བྱེད་པའི་གཟའ་འཁོར་བཅས་གྱི་བྱ་འགུལ་རིགས་གསུམ་སྤེལ་བ་བརྒྱུད་ནས། གཙང་གི་རིག་གནས་ཀྱི་ཁྱད་དུ་འཕགས་པའི་གཟི་ཉམས་དང་། འཕེལ་རྒྱས་ཀྱི་གྲུབ་འབྲས། དེ་མིན་གཞིས་ཀ་རྕེ་ས་ཁུལ་གྱི་ཡུལ་གྲུའི་རིག་གནས་དང་གནས་སྐོར་ཐོན་ཁུངས་སོགས་འགྲེམ་སྟོན་རྒྱ་ཆེན་པོ་བྱས། ཐེངས་འདིའི་ཇོ་མོ་གླང་མའི་རིག་གནས་གནས་སྐོར་གྱི་གཙོ་སྒྲུབ་པས་རིག་རྩལ་གྱི་བྱ་འགུལ་དང་། གནས་སྐོར་གྱི་བྱ་འགུལ། དཔལ་འབྱོར་ཚོང་ཟོག་གི་བྱ་འགུལ། ཁོར་ཡུག་ལེགས་སྒྱུར་གྱི་བྱ་འགུལ་སོགས་རིགས་དྲུག་སྤེལ་བཞིན་ཡོད།
　　བོད་ལྗོངས་ལ་གནའ་སྔ་མོ་ནས་གླུ་གར་གྱི་རྒྱ་མཚོ་ཞེས་སུ་འབོད་ཅིང་། གཙང་ཕྱོགས་ལ་གླུ་གར་གྱི་ཕ་གཞིས་ཞེས་པའི་མཚན་སྙན་གསོལ་ཡོད་ལ། དེང་རབས་ཀྱི་མཁས་པ་མང་པོའི་བཞེད་པ་ལྟར་ན་གཞིས་ཀ་རྩེ་ནི་མཉམ་འབྲེལ་རྒྱལ་ཚོགས་ཀྱི་གཟུགས་འདས་ཤུལ་བཞག་རིག་གནས་ཀྱི་སྡེ་ཚན་ཁྲོད་དུ་ཡོད་པའི་བོད་ཀྱི་ཟློས་གར་གྱི་འབྱུང་ཡུལ་ཡིན་པར་བཤད།