༄༅།།ཨ་མདོ་བརྙན་འཕྲིན་གྱི་ལོ་སར་དགོང་ཚོགས་བརྙན་ཕབ་ལེགས་འགྲུབ་བྱས།

      ཨ་མདོ་བརྙན་འཕྲིན་གྱི་བོད་རབ་རྒྱན་ལྕགས་མོ་གླང་ལོའི(༢༠༢༡)ལོ་སར་རིག་རྩལ་དགོང་ཚོགས་ཆེན་མོ༼ལོ་ཡག་བཀྲ་ཤིས་རང་འགྲུབ༽ཅེས་པ་དེ་སྤྱི་ཟླ་བཅུ་གཉིས་པའི་ཚེས་བཅུ་དགུའི་དགོང་མོར་མཚོ་སྔོན་རྒྱང་སྒྲོག་བརྙན་འཕྲིན་ཁང་གི་འཁྲབ་གཏོང་ཚོམས་ཆེན་ནས་གཟབ་རྒྱས་ངང་བརྙན་ཕབ་བྱས།       ད་ལོའི་ལོ་སར་དགོང་ཚོགས་ཀྱིས“ཀྲུང་ཧྭ་མི་རིགས་ཁྱིམ་ཚང་གཅིག་ལྟར་བརྩེ། བློ་རྩེ་གཅིག་གིས་ཀྲུང་གོའི་ཕུགས་འདུན་སྙེག”ཅེས་པ་བརྗོད་དོན་གཙོ་བོར་བཟུང་ནས། ཉེ་བའི་ལོ་འགའི་རིང་དུ་རང་ཞིང་དང་ཉེ་འཁོར་གྱི་བོད་འབྲེལ་ས་གནས་ཁག་གི་རྒྱ་ཆེའི་ལས་བྱེད་མང་ཚོགས་ཀྱིས་ཏང་གི་ཡང་དག་པའི་དབུ་ཁྲིད་འོག ཁྱོན་ཡོངས་ནས་འབྱོར་འབྲིང་སྤྱི་ཚོགས་མངོན་འགྱུར་འབྱུང་བ་དང་དབུལ་ཐར་མཁྲེགས་གཏོར་ལ་རྒྱལ་ཁ་ཕུ་ཐག་ཆོད་པ་ལེན་པའི་ཐད་ནས་བླངས་པའི་བླ་ན་མཐོ་བའི་གྲུབ་འབྲས་ཆེན་པོར་བསྟོད་གླུ་བླངས་ཡོད་པར་མ་ཟད།རྒྱལ་ཡོངས་ཀྱི་རིགས་སོ་སོའི་མི་དམངས་ཀྱིས་འཆམ་མཐུན་མཉམ་གནས་ངང་མཐུན་སྒྲིལ་འབད་བརྩོན་གྱིས་མཉམ་དུ་ཡར་རྒྱས་གོང་འཕེལ་སྙེག་པའི་དུས་རབས་གསར་བའི་སྣང་ཚུལ་ཉམས་དགའ་བ་དེ་ལ་བསྔགས་བརྗོད་མཛད་ཡོད་པ་རེད།       ལོ་སར་རིག་རྩལ་དགོང་ཚོགས་ཆེན་མོ་དེ་དུས་ཆེན་གྱི་སྤྲོ་དགའི་རྣམ་པ་རབ་ཏུ་མངའ་བའི་མགོ་རྩོམ་པའི་ཞབས་བྲོ༼བཀྲ་ཤིས་རང་འགྲུབ ༽ཅེས་པས་དགོང་ཚོགས་མགོ་རྩོམ་པའི་ཡོལ་བ་ངང་གིས་ཕྱེས་པའི་མོད་ལ།མཚོ་སྔོན་རྒྱང་སྒྲོག་བརྙན་འཕྲིན་ཁང་དང་བོད་ལྗོངས་རྒྱང་སྒྲོག་བརྙན་འཕྲིན་ཁང་།ཟི་ཁྲོན་རྒྱང་སྒྲོག་བརྙན་འཕྲིན་ཁང་བཅས་ཀྱི་མདོ་དབུས་ཁམས་གསུམ་གྱི་མདོ་འཛིན་པ་བདུན་གྱིས་བོད་རྒྱ་སྐད་གཉིས་ཀྱི་ལམ་ནས།རྒྱལ་ཡོངས་ཀྱི་རིགས་སོ་སོའི་མི་དམངས་དང་རི་ཁ་བའི་ལྗོངས་ཀྱི་རིགས་མཐུན་སྤུན་ཟླ་ཡོངས་ལ་གནམ་ལོ་གསར་ཚེས་ཀྱི་འཚམ་འདྲི་དང་བཀྲ་ཤིས་ཁ་གཡང་གི་སྨོན་ཚིག་བརྗོད་ནས་དགོང་ཚོགས་ཀྱི་སྒོ་འཕར་གཞི་ནས་ཕྱེས་ལ།རྒྱལ་ཡོངས་ལ་མིང་དུ་གྲགས་པའི་གླུ་མ་འཇམ་དབྱངས་སྒྲོལ་མ་དང་།གླུ་བ་ཤེར་བསྟན།ཀུན་དགའ། ཚེ་དབང་ལྷ་མོ། ལྷ་སྒྲོན། བདེ་ལེགས་ནོར་བུ། དེ་མིན་ཀྲུང་གོའི་ཟློས་གར་གྱི་དཔྱིད་མགོའི་མེ་ཏོག་བྱ་དགའ་ཐོབ་མཁན་བོད་རིགས་ཐོག་མ་བ།སྒྱུ་རྩལ་པ་དཔལ་ལྡན་དབང་ཕྱུག་དང་ཀྲུང་དབྱང་བརྙན་འཕྲིན་ཁང་གི་སྐར་འོད་ལམ་ཆེན་ནས་ཨང་དང་པོའི་མཚན་སྙན་ལེན་མཁན་གྱི་གླུ་མ་ཚེ་རིང་གཡང་དཀར།ཀྲུང་གོའི་རྒྱལ་གཅེས་གླུ་གཞས་འགྲན་ཚོགས་ཀྱི་ཨང་དང་པོའི་མཚན་སྙན་ཐོབ་མཁན་གླུ་མ་ཚེ་རིང་ཆོས་མཚོ་སོགས་མཚོ་སྔོན་དང་།བོད་ལྗོངས།ཟི་ཁྲོན། ཀན་སུའུ། ཡོན་ནན་སོགས་ནས་ཡོང་བའི་སྒྱུ་རྩལ་པ་དང་གླུ་བ་གླུ་མ་སྔ་ཕྱིར་གར་སྟེགས་ལ་བུད་ནས་སྙན་མོ་གླུ་ཡི་འགྱུར་ཁུགས་དང་མཚར་མོ་གར་གྱི་སྟངས་སྟབས་ཀྱིས་གནམ་ལོ་གསར་ཚེས་ལ་བཀྲ་ཤིས་བདེ་ལེགས་ཀྱི་མཆོད་བསྟོད་ཕུལ་ཡོད་པ་རེད།       ད་ལོའི་ལོ་སར་དགོང་ཚོགས་དེ་དམངས་གླུ་དང་རྡུང་ལེན། གླུ་གཞས། ཞབས་བྲོ། ཟློས་གར། ཁ་ཤགས་དང་གར་ཆུང་སོགས་འཁྲབ་ཚན་ཉི་ཤུ་ཡིས་གྲུབ་ཅིང་།འཁྲབ་ཚན་ཧྲིལ་བོའི་བརྒྱ་ཆའི་བརྒྱད་ཅུ་བརྩམས་ཆོས་གསར་བ་དང་ལོ་སར་དགོང་ཚོགས་ལ་ཆེད་དུ་གསར་རྩོམ་གནང་བ་འབའ་ཞིག་ཡིན་འདུགའཁྲབ་སྟོན་ཚོགས་པ་ལ་མཚོ་སྔོན་ཞིང་ཆེན་བོད་ཀྱི་ཟློས་གར་ཚོགས་པ་དང་།མགོ་ལོག་ཁུལ་མི་རིགས་གླུ་གར་ཚོགས་པ། ཡུས་ཧྲུའུ་ཁུལ་མི་རིགས་གླུ་གར་ཚོགས་པ།བོད་ལྗོངས་ཉིང་ཁྲི་གྲོང་ཁྱེར་སྒྱུ་རྩལ་ཚོགས་པ།བོད་ལྗོངས་ལྷོ་ཁ་གྲོང་ཁྱེར་སྒྱུ་རྩལ་ཚོགས་པ།དེ་མིན་ཞིན་ཧེ་རྫོང་གི་ན་ཆུང་མཉམ་ལེན་ཚོགས་པ་དང་།ཡུས་ཧྲུའུ་ཁྲི་འདུ་རྫོང་གི་ན་ཆུང་ཞབས་བྲོ་ཚོགས་པ་བཅས་ཞིང་ཆེན་དང་ཁུལ་རིམ་པའི་ཆེད་ལས་འཁྲབ་སྟོན་ཚོགས་པ་ལྔ་དང་ན་ཆུང་འཁྲབ་སྟོན་ཚོགས་པ་གཉིས་ཀྱི་འཁྲབ་སྟོན་པ་བསྡོམས་པས་མི་བཞི་བརྒྱ་ཙམ་ཨ་མདོ་བརྙན་འཕྲིན་གྱི་ལོ་སར་དགོང་ཚོགས་ཆེན་མོའི་གར་སྟེགས་ལ་མཉམ་གཅིག་ཏུ་འཛོམས་ནས།ཚད་མཐོ་བའི་རིག་གནས་སྒྱུ་རྩལ་གྱི་དགྱེས་སྟོན་ཆེན་པོ་ཞིག་རི་ཁ་བའི་ལྗོངས་ཀྱི་རིགས་མཐུན་སྤུན་ཟླ་ཡོངས་གཙོ་བྱས་པའི་རྒྱལ་ཁབ་ཕྱི་ནང་ཀུན་གྱི་རིགས་སོ་སོའི་ལྟ་མཁན་ཡོངས་ལ།ལོ་སར་གྱི་ལེགས་སྐྱེས་ཤིག་གི་ཚུལ་དུ་མིག་ཡིད་རྣ་བའི་བདུད་རྩི་རུ་ཕུལ་ཡོད་པ་རེད།