བོད་ཀྱི་དམངས་གླུའི་དགོང་ཚོགས་སྐབས་བཞི་པ་ལེགས་འགྲུབ་བྱུང་།

        མཚོ་ལྷོ་ཁུལ་རྒྱང་སྒྲོག་བརྙན་འཕྲིན་ཁང་གི་བོད་རབ་རྒྱན་ཆུ་ཕོ་སྟག་ལོའི་བོད་ཀྱི་དམངས་གླུའི་དགོང་ཚོགས་སྐབས་བཞི་པ་སྟེ༼གྲེ་འགྱུར་ངག་གི་དགྱེས་སྟོན༽ཞེས་པ་བརྙན་ཕབ་ལེགས་འགྲུབ་བྱུང་།

        མཚོ་སྔོན་ཞིང་ཆེན་མི་རིགས་སྐད་གློག་བརྙན་འཕྲིན་སྒྱུར་སྐྲུན་ལྟེ་གནས་དང་མཚོ་ལྷོ་ཁུལ་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུའུ་ཡིས་གཙོ་སྒྲུབ་བྱས་པ་དང་། མཚོ་ལྷོ་ཁུལ་རྒྱང་སྒྲོག་བརྙན་འཕྲིན་ཁང་དང་མཚོ་སྔོན་བོད་སྐད་དྲ་ལམ་རྒྱང་སྒྲོག་བརྙན་འཕྲིན་ཁང་བཅས་ཀྱིས་འགན་སྒྲུབ་བྱས་པའི་བོད་ཀྱི་དམངས་གླུའི་དགོང་ཚོགས་སྐབས་བཞི་པ་སྟེ། ༼གྲེ་འགྱུར་ངག་གི་དགྱེས་སྟོན༽ཞེས་པ་སྤྱི་ཟླ་དང་པོའི་ཚེས་དྲུག་ཉིན་གྱི་དགོང་མོར་མཚོ་ལྷོ་ཁུལ་རྒྱང་སྒྲོག་བརྙན་འཕྲིན་ཁང་གི་འཁྲབ་སྟོན་ཚོམས་ཆེན་དུ་བདེ་བླག་ངང་བརྙན་ཕབ་ལེགས་འགྲུབ་བྱུང་།

        དམངས་གླུ་ནི་རོལ་མོའི་ལུས་ཀྱི་ནང་གསེས་ཤིག་སྟེ་མི་དམངས་མང་ཚོགས་ཀྱིས་འཚོ་བའི་ཉམས་ལེན་གྱི་ཁྲོད་དུ་ངག་ཐོག་ནས་བརྒྱུད་དེ་བྱུང་ཞིང་དར་བའི་གླུ་དབྱངས་སྒྱུ་རྩལ་ཡིན། དམངས་གླུ་ནི་བྱིས་པ་ནས་གཞོན་ནུ། དར་མ། རྒས་འཁོགས་སོགས་ན་རིམ་སུས་ཀྱང་བླངས་ཆོག་ལ། ན་རིམ་དེ་དང་དེ་འབྲེལ་གྱི་དམངས་གླུ་ཀྱང་སྣ་ཚོགས་གདའ།

        བོད་ཀྱི་དམངས་གླུའི་དགོང་ཚོགས་སྐབས་བཞི་པའི་རྩེད་མགོ་གླུ་སྙན་མོ་ངག་ལ་བཀུག་ཅིང་། ངག་འཇམ་པོ་ཚིག་གིས་གྲོལ་ཏེ། རང་རིགས་མེས་པོ་རྣམས་ཀྱི་བློ་གྲོས་ཀྱི་རྩལ་ལས་བྱུང་བའི་དམངས་གླུ་ནི་མཐོ་བ་གངས་རིའི་ཁོང་གསེང་ནས་བརྡོལ་བའི་རྫ་ཆུ་བསིལ་མ་བཞིན། ལྷུང་ལྷུང་དང་ཤག་ཤག བསིལ་བསིལ་དང་མངར་མངར་གྱིས་ཁྲོམ་ཆེན་པོའི་དར་ལུང་རྣ་བའི་གསོས་དང་། ཁྲ་ཆུང་མིག་གི་དགའ་སྟོན་དུ་བྱོན་པ་ལེགས་པའི་ཚུལ་གྱིས་གྲེ་འགྱུར་ངག་གི་དགྱེས་སྟོན་གྱིས་གར་སྟེགས་ཡོངས་སུ་ཕྱེ་བར། ཚོགས་རར་ཕེབས་པའི་ཕྱོགས་ཡོངས་ཀྱི་མགྲོན་པོ་དག་དྲངས་པའི་མིག་ཟུང་ཅེར་ཞིང་། དགའ་བའི་སེམས་པ་གཡོ་བ་ཞལ་དཀར་པོའི་ངོས་ལ་འཛུམ་འཛུམ་དང་བཞད་བཞད་དུ་མངོན་བྱུང་ལ། སྤྲོ་བའི་ཐལ་སྒྲ་རྡེབ་བཞིན་སྲོལ་རྒྱུན་རིག་གནས་ཉིང་བཅུད་ལྡན་པ་འདི་དཀར་པོ་འོ་མར་མར་ལོ་སེར་པོས་མངར་བླུད་པའི་ལོངས་སྤྱོད་ཆེན་པོའི་ངང་ཚུལ་ཞིག་ཏུ་ངོམས་པ་མེད་པའི་རྟེན་འབྲེལ་འགྲིག་པར། རང་ཅག་གི་ཕུལ་དུ་བྱུང་བའི་གླུ་བ་གླུ་མ་དག་གི་དམངས་གླུས་སྒྱུ་རྩལ་གྱི་རང་མདངས་དང་ངག་རིག་སྒྱུ་རྩལ་གྱི་རྩལ་མངོན་པ་ཡིན་ལ། དམངས་གླུའི་སྒྱུ་རྩལ་གྱི་རྨད་བྱུང་གི་ཁྱད་ཆོས་དེ་ཡོངས་སུ་མཚོན་པར་བྱས་པས། མང་ཚོགས་ཀྱི་བསམ་པའི་ལོངས་སྤྱོད་ཕུན་སུམ་ཇེ་ཚོགས་སུ་གཏོང་བ་དང་། སྲོལ་རྒྱུན་རིག་གནས་རྒྱུད་འཛིན་དང་དར་སྤེལ་ལ་འབད་པ་བགྱིས་པར། གཙོ་སྒྲུབ་ལས་ཁུངས་ཀྱི་ཐོག་མའི་བསམ་འདུན་གྱི་རི་མོ་འགྲུབ་པའི་རྟེན་འབྲེལ་དུ་གྲུབ་སོང་།

        ཐེངས་འདིའི་བོད་ཀྱི་དམངས་གླུའི་དགོང་ཚོགས་སྟེང་ཞིང་ཆེན་ཕྱི་ནང་ནས་ཡོང་བའི་དམངས་ཁྲོད་ཀྱི་སྒྱུ་རྩལ་པ་ཉི་ཤུ་ལྷག་གར་སྟེགས་གཅིག་ཏུ་འཛོམས་ནས་གླུ་གར་གྱི་མཆོད་པ་གྱ་ནོམ་པ་ཕུལ་ཏེ། རྒྱ་ཆེའི་ལྟད་མོ་བ་ཡོངས་ལ་ཁྱད་ཆོས་མངོན་གསལ་ལྡན་པའི་རིག་གནས་ཀྱི་དགའ་སྟོན་བཤམས་ཤིང་། དུས་རབས་གསར་པའི་གངས་ལྗོངས་མཐོ་སྒང་གི་འཕེལ་རྒྱས་ཀྱང་རི་མོ་བཞིན་མཚོན་པར་བྱས།

        དགོང་ཚོགས་ཀྱི་ཐོག་མཐའ་བར་གསུམ་དུ་ཏང་དང་རྒྱལ་ཁབ་ལ་བླངས་པའི་བསྟོད་གླུ་དང་ཡིད་སེམས་འགུལ་བའི་ཕུལ་བྱུང་གི་བརྩམས་ཆོས་དག་ངག་གི་དབྱངས་རྟ་དང་ལུས་ཀྱི་ཉམས་འགྱུར་ལ་བརྟེན་ནས་ལྟད་མོ་བའི་མིག་གི་དགའ་སྟོན་དུ་བཤམས་པས། དགོང་ཚོགས་ཀྱི་ཡོ་ལང་ཡང་མཐོ་ཚད་གསར་བ་ཞིག་ཏུ་སླེབས་པར་བྱས། ལྟད་མོ་བ་རྣམས་ཀྱི་ཁྲ་ཆུང་མིག་གི་དགའ་སྟོན་དང་དར་ལུང་རྣ་བའི་བཅུད་དུ་སྨིན་པར་བྱས་ལ། དགོང་ཚོགས་ཀྱི་གོ་རིམ་ཧྲིལ་བོ་ནི་སྤྲོ་སྣང་དང་། འཆམ་མཐུན། རྔམ་བརྗིད་ཀྱི་ཀློང་ནས་བདེ་ལེགས་ངང་མཇུག་རྫོགས།

        ཐེངས་འདིའི་བོད་ཀྱི་དམངས་གླུའི་དགོང་ཚོགས་སྐབས་བཞི་པ༼གྲེ་འགྱུར་ངག་གི་དགྱེས་སྟོན༽ཞེས་པ2022ལོའི་བོད་ལུགས་ལོ་སར་གྱི་སྐབས་སུ་མཚོ་ལྷོ་ཁུལ་རྒྱང་སྒྲོག་བརྙན་འཕྲིན་ཁང་དང་གངས་ལྗོངས་མེ་ལོང་དྲ་བ་བརྒྱུད་ནས་དུས་མཉམ་དུ་གཏང་རྒྱུ་ཡིན་ལ། དེ་དང་མཉམ་དུ་མཚོ་སྔོན་བོད་སྐད་དྲ་ལམ་རྒྱང་སྒྲོག་བརྙན་འཕྲིན་ཁང་གི་ཉིན་རེའི་གངས་ལྗོངས་དང་མཚོ་ལྷོ་རྒྱང་སྒྲོག་བརྙན་འཕྲིན་ཁང་གི་སྐད་འཕྲིན་སྤྱི་སྟེགས་བཅས་ནས་དུས་མཉམ་དུ་གཏང་རྒྱུ་ཡིན།