སྲིད་པ་རྒད་པོ་རྟགས་མའི་བོད་ཀྱི་གཏམ་དཔེ་གདན་ཞུའི་འགྲན་སྡུར་སྐབས་བཞི་བའི་རྟིང་རྩོད་འགྲན་སྡུར་ཡོངས་སུ་མཇུག་བསྒྲིལ།

        ཐེངས་འདིའི་འགྲན་སྡུར་ལ་ཐོག་མའི་འགྲན་སྡུར་དང་། བསྐྱར་འགྲན། རྟིང་རྩོད་འགྲན་སྡུར་བཅས་འགྲན་རིམ་སྣ་ཚོགས་བརྒྱུད་དེ་འགྲན་སྡུར་བྱས། འགྲན་ཞུགས་པ་རྣམས་ཀྱིས་གཏམ་ཁ་ལྕེ་མེ་ལྕེ་འབར་འབར་དང་བློ་རིག་པ་གློག་དམར་འཁྱུག་འཁྱུག་བྱས་ཏེ། ཛ་དྲག་གི་འགྲན་སྡུར་བརྒྱུད་མཐར་འགྲན་ཞུགས་པ་སློབ་དཔོན་སྐྱབས་ལ་སྲིད་པ་རྒད་པོ་རྟགས་མའི་བོད་ཀྱི་གཏམ་དཔེ་གདན་ཞུའི་འགྲན་སྡུར་སྐབས་བཞི་བའི་བྱ་དགའ་ཨང་དང་པོ་ཐོབ། འགྲན་ཞུགས་པ་མགོན་པོ་སྐྱབས་དང་དཔལ་སྲུང་གཉིས་ལ་བྱ་དགའ་ཨང་གཉིས་པ་ཐོབ། འགྲན་ཞུགས་པ་དབང་ཆེན་རྡོ་རྗེ། གངས་གྲགས། རྒྱལ་མོ་གསུམ་ལ་བྱ་དགའ་ཨང་གསུམ་པ་ཐོབ། འགྲན་ཞུགས་པ་ཡུ་གདུགས་དཀར་དང་ཆོས་བསམ། བློ་བཟང་དོན་གྲུབ། བློ་བཟང་རྒྱ་མཚོ། གཙང་བྱང་གྲགས། ལྷ་འབྲུག་རྒྱལ། ཆོས་སྐྱབས་རྒྱལ། རྒྱལ་མཚན་རྒྱལ་བཅས་ལ་ཕུལ་བྱུང་བྱ་དགའ་ཐོབ།

        མཇུག་མཐར་སྤྱིའི་དཔྱད་བརྗོད་པ་རོང་བོ་ཚེ་དཔལ་དང་འབའ་སྟོད་པདྨ་དབང་རྒྱལ་རྣམ་གཉིས་ཀྱིས་མཇུག་སྡོམ་གྱི་ཚུལ་དུ་དཔྱད་བརྗོད་གནད་ཐིངས་བ་སྤེལ་བ་དང་། ཐེངས་འདིའི་འགྲན་སྡུར་གྱི་དཔྱད་འདེམས་པ་ཞིག་ཡིན་པའི་ཆ་ནས་རང་རང་གི་སེམས་ཀྱི་མྱོང་ཚོར་དང་སྲོལ་རྒྱུན་རིག་གནས་འདི་རྒྱུན་འཛིན་དང་དར་སྤེལ་ཇི་ལྟར་བྱ་དགོས་པ་བཅས་ཀྱི་ཐད་ནས་དཔྱད་བརྗོད་སྤེལ་མཐར་མཇུག་མཐའི་རྟིང་རྩོད་འགྲན་སྡུར་གྱི་རིམ་པ་ཡོངས་སུ་མཇུག་བསྒྲིལ།