རྒྱ་ལོ་བཅོ་ལྔའི་དུས་ཆེན་གྱི་རིག་རྩལ་འཁྲབ་སྟོན་སྣ་མང་ཕུན་སུམ་ཚོགས།

        བོད་རབ་རྒྱན་ཆུ་མོ་ཡོས་ལོའི་དཔྱིད་གསར་དགའ་སྟོན་གྱི་དཔལ་ལ་རོལ་བཞིན། ད་ནི་རྒྱ་ལོ་བཅོ་ལྔའི་དུས་ཆེན་གྱི་རིག་རྩལ་འཁྲབ་སྟོན་གྱ་ནོམ་པ་ཞིག་གིས། ཕྱོགས་བཞི་མཚམས་བརྒྱད་ནས་ཕེབས་པའི་མང་ཚོགས་ཁྲི་སྟོང་མང་པོའི་ཡིད་སེམས་རབ་ཏུ་འཕྲོག་ཏེ། གྲོང་ཁྱེར་འདིའི་ལྟེ་བར་ཆགས་པའི་མཚོ་སྔོན་པོའི་ཐང་ཆེན་དུ་མི་ཚོགས་ཀྱིས་ཡོངས་སུ་ཁེངས་འདུག        ཆུ་མོ་ཡོས་ལོའི་གནམ་ལོ་གསར་བའི་ནང་རོང་འབྲོག་མང་ཚོགས་ཡོངས་ཀྱི་ཅི་བསམ་དོན་ཀུན་འགྲུབ་ཅིང་ནད་མེད་ཚེ་རིང་ཡོང་བ། བྱ་བཞག་ཐམས་ཅད་ཡར་ངོའི་ཟླ་ལྟར་འཕེལ་ཅིང་། མཚན་ལྗོངས་འདིའི་ཚོན་མདངས་རྣམ་པར་བཀྲ་བའི་ཤོག་སྦག་གིས་ཁྱེད་ཅག་གི་སེམས་འདུན་བཀྲ་ཤིས་པའི་རི་མོ་བཞིན་དུ་འགྲུབ་པར་སྨོན།        སྣ་མང་ཤོག་སྦག་གི་ཚོན་མདངས་སྣ་ཚོགས་ཀྱིས་མཚན་མོའི་འདིའི་མཁའ་དབྱིངས་ལ་སྐར་ཚོགས་ཀྱི་ཕྲ་རྒྱན་བཏབ་ཅིང་། མི་ཚོགས་བརྒྱ་འདུས་སྟོང་འདུས་ཀྱི་དཀྱིལ་དབུས་སུ། མེ་ཕུང་སྐོར་བྲོ་འཁྲབ་པའི་མགོ་བརྩམས་བྱུང་། འགྱུར་ཁུག་སྙན་མོའི་འགྲོས་དང་བསྡོངས་ནས་ལང་ཚོ་དར་ལ་བབས་པའི་གཞོན་སྐྱེས་ཕོ་མོ་དག་གིས་ལུས་ལ་འཕྱོར་གོས་གྱོན་ཏེ་གར་གྱི་སྟངས་སྟབས་ངོམས་བཞིན་བདེ་མོ་གར་ལ་རོལ་བས། གནས་འདི་ལ་སྔར་ན་མེད་པའི་སྤྲོ་སྐྱིད་དང་དགོད་སྒྲས་ཁེངས་འདུག