སྐྲ་སྟོན་བཀྲ་ཤིས་དགུ་འཛོམས། (བླ་བྲང་ཡུལ་གྱི་སྐྲ་ཕབ་ཆོ་ག)

       “སྐྲ་ཕབ་བུ་མོ་བལ་མགོ་མ། གཤིས་ཀ་བལ་ལས་འཇམ་པར་ཤོག”
       དམངས་སྲོལ་ཆོ་ག་ནི་མི་རིགས་ཀྱི་སྲོལ་རྒྱུན་རིག་གནས་ཀྱི་མ་དཔེ་གསོན་པོ་ཡིན་ལ། མཚོན་དོན་རྒྱ་ཆེན་པོ་འདུས་པའི་རིག་གནས་ཀྱི་བང་མཛོད་ཅིག་ཀྱང་ཡིན། དེ་ཡང་སྐྲ་ཕབ་པ་ཞེས་མདོ་སྨད་ཡུལ་དུ་དར་ཁྱབ་ཆེ་བའི་ལུགས་སྲོལ་འདི་ཡང་། ལོ་རྒྱུས་ཀྱི་རྒྱུན་རིང་ཞིང་། རིག་གནས་ཀྱི་ནང་དོན་ཕུན་སུམ་ཚོགས་པ། བཀྲ་ཤིས་པའི་རྟེན་འབྲེལ་བཟང་པོས་ཀུན་ནས་ཕྱུག་པའི་དམངས་སྲོལ་ཐུན་མོང་མ་ཡིན་པ་ཞིག་དང་། དམངས་ཁྲོད་དུ་ཤིན་ཏུ་མཐོང་ཆེན་བྱེད་པའི་སྟོན་མོའམ་ཆོ་ག་གཟབ་རྒྱས་ཤིག་ཀྱང་ཡིན། གཤམ་ནས་གསར་འགོད་པས་ཀན་ལྷོའི་བླ་བྲང་ཡིག་ཆུང་སྡེ་བའི་སྐྲ་སྟོན་གཉིས་ཀྱི་ཡུལ་དངོས་ལས་འཚོལ་སྡུད་བྱས་པའི་པར་རིས་རྒྱུ་ཆ་བརྒྱུད་དེ་བླ་བྲང་ས་ཆའི་སྐྲ་ཕབ་ཀྱི་དམངས་སྲོལ་འདི་ལ་རྒྱུས་ལོན་རགས་ཙམ་བྱ།
       སྲོལ་རྒྱུན་ལྟར་ན། སྐྲ་ཕབ་པ་ནི་བུ་མོ་ལང་ཚོ་དར་ལ་བབས་ཏེ་མི་དར་མའི་གྲས་སུ་གཟུད་ཆོག་ཅིང་འཇིག་རྟེན་མཐུན་འཇུག་གི་ལས་སུ་གཞུག་ཏུ་རུང་བའི་རྟགས་མཚན་ཤིག་དང་། མ་འོངས་པར་ཁྱིམ་བཟའ་ཚང་འཛོམས་པའི་རྟེན་འབྲེལ་སྒྲིག་པ་ཡིན། སྐྲ་ཕབ་པའི་བུ་མོ་གང་དེར་སྤྱིར་བཏང་དུ་སྐྲ་ཕབ་བམ་སྐྲ་ཕབ་མ་ཞེས་འབོད། 
སྐྲ་ཕབ་མ་ནི་མོ་ལོ་བཅུ་དྲུག་གམ་བཅུ་བདུན་ལ་སོན་པའི་བུ་མོ་ཡིན་དགོས་ཤིང་། ཡུལ་གྲུ་ཁ་ཅིག་ཏུ་མོ་ལོ་བཅོ་ལྔའམ་བཅུ་བདུན། བཅུ་དགུ་སོགས་ཡ་གྲངས་ཁོ་ནར་ད་གཟོད་ཆོ་ག་འདི་སྤེལ་པ་ནི་བུ་མོ་རང་ཉིད་ད་དུང་གཉེན་སྒྲིག་མེད་པའི་མཚོན་དོན་ལགས།