སྒྲོལ་མ་སྐྱབས་ཀྱི་བོད་ཀྱི་གཙགས་དྲུབས་བགྲོད་ལམ།

          2011ལོའི་ལོ་མཇུག་ལ། ལོ44ལ་སོན་པའི་སྒྲོལ་མ་སྐྱབས་ཀྱིས་མ་དངུལ་སྒོར་ཁྲི650བཏང་སྟེ་མཚོ་སྔོན་ཁྲི་ཀ་རྫོང་དུ་སྐར་མ་བོད་ཀྱི་བི་ཤྭ་ཀརྨ་གཙགས་དྲུབས་སྒྱུ་རྩལ་ཁང་ལས་འགོ་བརྩམས། དེ་ནི་མཚོ་སྔོན་བོད་ཀྱི་དམངས་ཁྲོད་ལག་བཟོའི་ཐོན་རྫས་ཀྱི་འཕེལ་སྟངས་གསར་བ་ཞིག་དང་སྒྲོལ་མ་སྐྱབས་རང་ཉིད་ཀྱི་མི་ཚེ་བགྲོད་ལམ་ཁྲོད་ཀྱི་རེ་བ་ཉག་ཅིག་ཀྱང་རེད།  
          ཁོ་ནི་ཆུང་དུས་ནས་རྨ་ཆུ་འགྲམ་རྒྱུད་ནས་འཚར་ལོངས་བྱུང་ཞིང་མ་འོངས་མདུན་ལམ་ལ་རེ་བ་ཆེན་པོ་བཅིངས་ཡོད་པའི་བོད་པ་ཞིག་ཡིན་ལ། འདས་བའི་ལོ17རིང་ལ་ཕྱིར་འདང་བརྒྱབ་ཚེ། ལོ27གྱི་དུས་སུ་ཁོང་གིས་བོད་ལྗོངས་ཀྱི་རྒྱལ་གཉེར་ཨར་འདམ་བཟོ་གྲྭ་ནས་ལས་མཚམས་བཞག་ཏེ། གཞིས་ཀ་རྩེ་ནས་སྒེར་གཉེར་ཨར་འདམ་བཟོ་གྲྭ་ཆུང་ཆུང་ཞིག་བཙུགས། ཁོ་རང་ཉིད་ཨར་འདམ་ལས་གཉེར་བྱེད་མཁན་གྱི་ལག་རྩལ་པ་ཞིག་ཡིན་པའི་ཆ་ནས། སྐབས་དེའི་བཟོ་གྲྭའི་འཁོར་རྒྱུགས་ཀྱི་ལས་སྒོ་གང་རུང་དང་དེའི་ཐད་ཀྱི་ལག་རྩལ་སྐོར་ལ་ཅུང་བྱང་ཆུད་པས་ལས་དེ་བསྒྲུབ་པར་ཡང་ཡིད་ཆེས་ཀྱིས་ཁེངས། ཨར་འདམ་བཟོ་གྲྭ་ཆུང་ཆུང་དེ་གཉེར་བ་ནས་བཟུང་ཚོང་རའི་འཁོར་བསྐྱོད་ཧ་ཅང་བཟང་སྟབས། ན་གཞོན་སྒྲོལ་མ་སྐྱབས་ལ་སྒེར་གཉེར་བཟོ་གྲྭའི་ཐོག་མའི་མ་དངུལ་རག་ཐུབ་པ་བྱུང་།   
          2003ལོར་ཁོ་ལ་སླར་ཡང་དཀའ་ཁག་ཆེ་བའི་གདམ་ཀ་ཤིག་ལ་འཕྲད་ན་ཡང་། ཕྱོགས་མང་པོའི་བསམ་འཆར་དང་ཉམས་མྱོང་གཞིར་བྱས་ཏེ་ལྷ་སར་བོད་ཀྱི་ས་གདན་བཟོ་གྲྭ་ཞིག་ཐོག་མར་གཉེར། ཁོང་གིས་ལས་རིགས་འདི་གཉེར་བའི་རྒྱུ་མཚན་གླེང་དུས་བཤད་རྒྱུར། སྐབས་དེར་ཁོ་ལ་མཚོན་ན་ས་གདན་གྱི་ཁེ་ལས་ལ་ཆ་མེད་རྒྱུས་མེད་ཡིན་ན་ཡང་། ལྷ་སར་ཡོད་པའི་ལོ་དེ་དག་གི་རིང་ལ། ལྗོངས་ཕྱིའི་གྲོགས་པོ་དག་འདིར་ལྟ་སྐོར་ལ་ཡོང་དུས་རྒྱུན་དུ་ཁོ་ཚོར་བོད་ཀྱི་ས་གདན་ཉོ་སར་ཁྲིད་པ་ཡིན། རིམ་བཞིན་བོད་ཀྱི་ས་གདན་གྱི་ཚོང་ལས་ཧ་ཅང་ལེགས་པོ་འདུག་བསམ་ནས་ལས་རིགས་དེ་གདམ་ཀ་བྱས་པ་ཡིན་ཞེས་དང་། ཁོང་གིས་འདས་དོན་གླེང་ཞོར་མི་ཚེའི་བགྲོད་ལམ་ཁྲོད་ཆ་རྒྱུས་མེད་པའི་ལས་རིགས་གཞན་ཞིག་གཉེར་བའི་མི་ཚེ་དཀྱོགས་མཚམས་དེར་ཕྱིར་འདང་ཞིག་བརྒྱབ་ན་ཡང་རྒྱུ་མཚན་ནི་དེ་འདྲའི་སླ་མོ་ཞིག་རེད་ཟེར།

          2008ལོར། ལོ་ན42ལ་སོན་པའི་སྒྲོལ་མ་སྐྱབས་བོད་ལྗོངས་ནས་ཕྱིར་ཕ་ཡུལ་མཚོ་སྔོན་ལ་ལོག་ཅིང་། ལོ་ལྔའི་རིང་བོད་ཀྱི་ས་གདན་ཐོན་རྫས་གཉེར་བར་ཉམས་མྱོང་ཕུན་སུམ་ཚོགས་པའི་སྒྲོལ་མ་སྐྱབས་ཀྱིས་བོད་དམངས་ཁྲོད་ཀྱི་ལག་བཟོའི་ཐོན་རྫས་ལ་སྤྲོ་བ་ཆེན་པོ་བྱུང་། ཁོང་གིས་ཆེད་ལས་མི་སྣས་བརྟག་དཔྱད་དང་དབྱེ་ཞིབ་བྱས་པར་བརྒྱུད་དེ། མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་བོད་ཀྱི་གཙགས་དྲུབས་སྒྱུ་རྩལ་གྱི་ལས་རིགས་ལ་བློ་ཁ་ཕྱོགས།
          ཁོང་གིས་བཤད་རྒྱུར། བོད་ཀྱི་གཙགས་དྲུབས་ནི་འཛམ་གླིང་ཡོངས་ནས་མཚོ་ལྷོ་ཁུལ་ན་མ་གཏོགས་མེད་ཅིང་། མཚོ་སྔོན་ཞིང་ཆེན་རྨ་ལྷོ་ཁུལ་ནི་རེབ་གོང་སྒྱུ་རྩལ་གྱི་ཕ་ས་ཡིན་ལ།  མཚོ་ལྷོ་ཁུལ་ནི་བོད་ཀྱི་གཙགས་དྲུབས་སྒྱུ་རྩལ་གྱི་ཕ་ས་ཡིན། རྒྱལ་ཡོངས་གྲངས་ཉུང་མི་རིགས་ཀྱི་གཙགས་དྲུབས་ཁྲོད་ནས་བོད་ཀྱི་གཙགས་དྲུབས་ནི་ཐུན་མོང་མ་ཡིན་པའི་ཁྱད་ཆོས་ཀྱིས་ཕྱུག་པའི་ལས་རིགས་ཡན་གར་བ་ཞིག་ཡིན་པ་དང་། ཐོག་མར་དེ་ལ་ཁབ་ཀྱི་འཚེམ་དྲུབ་བྱེད་ཐབས་ཧ་ཅང་མང་ལ། མིང་དུ་གྲགས་པའི་གཙགས་དྲུབས་བཞི་ཕུད་གཞན་ད་དུང་གཙགས་ཐབས་བཅུ་ཕྲག་ལྷག་ཡོད། ཀྲུང་གོའི་གྲངས་ཉུང་མི་རིགས་ཀྱིས་ངོས་ཐད་ནས་བཤད་ན། དེ་ནི་ལོ་རྒྱུས་རིང་ཞིང་ཁབ་ཀྱི་འཚེམ་ཐབས་ཀྱང་སྣ་མང་ལྡན། ད་ལྟའི་འཕེལ་རྒྱས་ཀྱི་གནས་ཚུལ་ལ་གཞིགས་ནས་བཤད་ན། གཙགས་ཐབས་ཕུན་སུམ་ཚོགས་ཤིང་རི་མོའི་སྒྲིག་གཞི་གྱ་ནོམ་པ་དང་གཟུགས་བརྙན་གསོན་ཉམས་ལྡན་པ། ཁ་མདོག་སྣ་ཚོགས་ཀྱིས་གྲུབ་པ། རང་མོས་གང་འདོད་ལྟར་གདམ་ཀ་བྱས་ཆོག་པ་བཅས་ཀྱི་ཁྱད་ཆོས་ལྡན་པ་མ་ཟད།  གཙགས་དྲུབས་འདི་ལ་གནའ་བོའི་མཛེས་ཉམས་ལྡན་ཞིང་གཙགས་དྲུབས་རེ་རེ་སྟེང་ན་གདོད་མའི་དུས་རབས་ཀྱི་མཚོན་སྟངས་བགས་སུ་ཉུལ་ཡོད་པས་རྩྭ་ཐང་གི་བློ་གཤོགས་ཡངས་པའི་ཁྱད་ཆོས་ཤིག་ངང་ངམ་ཤུགས་ཀྱིས་མངོན་ཡོང་།  འདི་ལྟ་བུའི་རིག་གནས་ནི་ལོ་ངོ1300ལྷག་གི་ཡར་སྔོན་ནས་བཟུང་མཚོ་བོད་མཐོ་སྒང་ནས་དར་རྒྱས་ཆེན་པོ་བྱུང་ཡོད། དེའི་རྐྱེན་གྱིས་སྐབས་དེར་མཚོ་སྔོན་བོད་ཀྱི་གཙགས་དྲུབས་ཀྱི་འཕེལ་རྒྱས་དང་མདུན་ལམ་ཡངས་པོ་དེ་ལ་ཧ་ཅང་མཐོང་ཆེན་བྱས་པ་ཡིན་ཟེར།

          2008ལོར། མཚོ་ལྷོ་བོད་རིགས་རང་སྐྱོང་ཁུལ་དུ་མཚོ་ལྷོ་ཁུལ་བི་ཤྭ་ཀརྨ་གཙགས་དྲུབས་ཀྱི་མི་རིགས་བཟོ་རྩལ་ཐོན་རྫས་འགན་ཁྲི་ཚད་ཡོད་ཀུང་སི་བཙུགས། དེ་ནི་སྒྲོལ་མ་སྐྱབས་ཕྱིར་ཕ་ཡུལ་ལ་ལོག་རྗེས་སུ་རང་ཉིད་ལ་བླངས་པའི་རྒྱུགས་འབྲས་ཤིག་ཡིན་ཞེས་བཤད་ན་ཆོག  ལྷ་ས་ནས་ལོ་མང་བསྡད་པའི་རིང་ཁོ་ལ་བོད་ལྗོངས་དམངས་ཁྲོད་ཀྱི་ལག་བཟོའི་ཐོན་རྫས་ཀྱི་ཚོང་རའི་འཕེལ་ཕྱོགས་ལ་རྒྱུས་མངའ་ཅུང་ཡོད་པ་དང་། ལྷག་པར་དུ་ཚོང་རའི་འཁོར་རྒྱུག་གི་ཕྱོགས་ལ་རང་ཉིད་ཀྱི་ཐུན་མོང་མ་ཡིན་པའི་བསམ་པའི་འཁྱེར་སོ་ཞིག་གྲུབ་ཡོད།
          ལྷ་སའི་ཚོང་ར་ཆེན་པོའི་འདུ་ཤེས་དེ་ལྷ་སའི་དམངས་ཁྲོད་ལག་བཟོའི་ཐོན་རྫས་ཀྱི་ཚོང་རའི་ཁྲོད་ལག་ལེན་བྱས་ཏེ་ཉམས་མྱོང་ཐོབ་ཡོད་མོད། ཡིན་ན་ཡང་ཏག་ཏག་མཚོ་སྔོན་གྱི་དམངས་ཁྲོད་ལག་བཟོའི་ཐོན་རྫས་ཀྱི་ཚོང་རའི་ཞན་ཆ་དང་མི་འདིང་ས་ཡང་ཚོང་ར་ཆེན་མོའི་འདུ་ཤེས་དང་ལག་ལེན་ཉམས་མྱོང་གི་ཆ་དེ་ལས་མ་འདས་པས། སྒྲོལ་མ་སྐྱབས་ཀྱིས་མཚོ་ལྷོ་ཁུལ་ནས་བོད་ཀྱི་བི་ཤྭ་ཀརྨ་གཙགས་དྲུབས་ཀུང་སི་གཉེར་བའི་དུས་མཚུངས་སུ་ཟི་ལིང་ནས་འོས་འཚམ་ཀྱི་ཚོང་ར་ཆེན་མོ་ཞིག་བཙལ་བར་འབད་པ་གང་མང་བྱས།          

          2009ལོའི་ཟླ6པའི་ཚེས19ཉིན། ཟི་ལིང་བོད་རིག་གནས་ཕོ་བྲང་ལེགས་འགྲུབ་བྱུང་ཞིང་། རིག་གནས་ཕོ་བྲང་དེས་གཙོ་བོ་བོད་ཀྱི་དམངས་ཁྲོད་གཙགས་དྲུབས་དང་མཚོན་རིས་ཐང་ག  འཚེམ་ཐང་། རྡོ་རྐོས། བོད་ཀྱི་ཁྱིམ་ཆོས། བལ་འཐག་ཐོན་རྫས། བོད་ཀྱི་ས་གདན། ཀོ་བཟོས་ཐོན་རྫས། བོད་ཀྱི་རྒྱན་ཆས། བོད་ཀྱི་གློག་སྒྲོན་ལ་སོགས་པའི་བོད་དམངས་ཁྲོད་ཀྱི་ལག་ཤེས་ཐོན་རྫས་སྣ་ཉི་ཤུ་ལྷག་གཉེར་བཞིན་ཡོད། 2010ལོར། གནས་དེ་མཚོ་སྔོན་རིག་གནས་ཐོན་དངོས་དཔེ་སྟོན་རང་བཞིན་གྱི་རྟེན་གཞིར་གཏན་འཁེལ་བྱས། 2011ལོའི་ལོ་མཇུག་ལ།  གསར་འགོད་པ་ཟི་ལིང་བོད་ཀྱི་རིག་གནས་ཕོ་བྲང་དུ་ཕྱིན་ནས་རྒྱུས་ལོན་བྱེད་དུས། རིག་གནས་ཕོ་བྲང་གི་ནང་ངོས་ན་བོད་ཀྱི་གཙགས་དྲུབས་ཆེ་ཆུང་དང་ཐང་ཀའི་དཔེ་རིས་འགྲེམས་སྟོན་བྱས་ཡོད་ཅིང་། ལྷ་སྐུ་དང་ཤིང་དཔར་རི་མོ། བོད་ཀྱི་ཡིག་གཟུགས་བཅས་གོ་རིམ་ཡོད་པའི་སྒོ་ནས་བཤམས་འདུག་པ་མ་ཟད། བོད་སྤོས་ཀྱི་དྲི་ཞིམ་དང་སྙན་མོ་བོད་གླུའི་འགྱུར་ཁུགས་ཀྱིས་མིའི་ཡིད་སེམས་དབང་མེད་དུ་བཀུག་བྱུང་བས། འགྲན་པ་མེད་པའི་སྒྱུ་རྩལ་གྱི་དྭངས་མས་ཀུན་ནས་བྱུགས་པའི་བོད་ཀྱི་རིག་གནས་ལ་ཡིད་སྨོན་འཆོར་ཞིང་ཡིད་འགུལ་ཐེབས་སུ་བཅུག  སྒྲོལ་མ་སྐྱབས་དང་ཁ་བརྡ་བྱས་བ་ལས་ཁོ་ནི་མི་བབ་ཆགས་ཤིང་འགན་འཁྲིའི་འདུ་ཤེས་ཅན་ཞིག་ཡིན་པ་ངང་གིས་རྟོགས་ཐུབ། སྒྲིག་གཞི་རྒྱ་ཆེ་བ་དང་། རིགས་ཆ་ཚང་བ། རྣམ་གྲངས་སྣ་འཛོམས་ཡིན་པ། རྒྱུ་སྤུས་ལེགས་པ་སོགས་གཙོར་འཛིན་པ་ནི་ཁོང་གིས་ཚོང་ར་ཆེན་པོར་བཞག་པའི་མཚན་ཉིད་དང་ངོས་ཤེས་ཡིན། ཁོའི་བསམ་པར་སྒྲིག་གཞིའི་ཕན་ནུས་ནི་མི་རིགས་ལག་བཟོའི་ཐོན་རྫས་འཕེལ་རྒྱས་གཏོང་བར་མེད་དུ་མི་རུང་བའི་ཆ་ཤས་ཤིག་ཡིན་པར་འདོད་ཡོད།  
          2012ལོར། བི་ཤྭ་ཀརྨ་བོད་ཀྱི་གཙགས་དྲུབས་སྒྱུ་རྩལ་བཤམས་སྟོན་ཁང་དེ་མཚོ་སྔོན་ཁྲི་ཀ་རྫོང་ནས་བསྐྲུན་རྒྱུ་ཡིན་ཞིང་། བོད་ཀྱི་གཙགས་དྲུབས་སྒྱུ་རྩལ་བཤམས་སྟོན་ཁང་དེ་འཛུགས་སྐྲུན་བྱས་ཚར་རྗེས་སུ་བོད་དམངས་ཁྲོད་ཀྱི་ལག་བཟོའི་ཐོན་རྫས་སྒྲིག་བཟོ་བྱེད་པའི་གོ་རིམ་ཆ་ཚང་གནས་འདི་ནས་ཀུན་ལ་ངོམ་སྟོན་བྱེད་རྒྱུ་ཡིན་པ་མ་ཟད། ཡུལ་སྐོར་བ་རྣམས་ཀྱིས་བཟོ་རིས་ཞིབ་ཚགས་པའི་ཐོན་རྫས་ལ་ལྟ་ཐུབ་པ་དང་ཆབས་ཅིག  ཉེ་བར་བཅར་ནས་བོད་ཀྱི་རིག་གནས་སྒྱུ་རྩལ་དང་དེའི་ཐུན་མིན་གྱི་ཁྱད་ཆོས་ལ་ཡང་ཉམས་སུ་མྱོང་ཐུབ་རྒྱུ་རེད། 
          བི་ཤྭ་ཀརྨ་བོད་ཀྱི་གཙགས་དྲུབས་ལས་ཁུངས་ཀྱིས་རིག་གནས་རྒྱུད་འཛིན་དང་། ཐོན་ལས་དཔེ་སྟོན། གསར་བྱུང་ལྗོངས་རྒྱུ། ཁོར་ཡུག་མཐུན་སྒྲིག  སྤྱི་ཚོགས་ལ་ཞབས་འདེགས་བྱེད་པ་བཅས་ཀྱི་བརྗོད་བྱ་ལྔ་གཞིར་བཟུང་ནས་རྟེན་གཞི་གཙོ་བོ་ལྔ་འཛུགས་སྐྲུན་བྱ་རྒྱུ་ཡིན་ཞིང་། དེ་དག་ནི་གཟུགས་མེད་ཤུལ་བཞག་རིག་གནས་སྲུང་སྐྱོབ་དང་རྒྱུད་འཛིན་རྟེན་གཞི། རིག་གནས་གསར་ཐོན་ཅན་གྱི་ལྗོངས་རྒྱུ་དང་ཁྱད་ལྡན་སྤྲོ་གསེང་རྟེན་གཞི། གཟུགས་མེད་རིག་གནས་ཤུལ་བཞག་ཐོན་ལས་རྒྱུད་སྤེལ་རྟེན་གཞི། ཐཱན་ཉུང་བའི་ལྗོངས་རྒྱུའི་དཔེ་སྟོན་རྟེན་གཞི། གཟུགས་མེད་རིག་གནས་ཤུལ་བཞག་སྐོར་གྱི་སློབ་གསོ་དང་ཟབ་སྦྱོང་རྟེན་གཞི་བཅས་སོ།།