ཕན་ཚུན་སེམས་འཁུར་བྱེད་པའི་ལམ་སྲོལ།

  བོད་མིར་དགའ་སྐྱོའི་གནས་ཚུལ་གང་བྱུང་ཡང་ཕན་ཚུན་སེམས་འཁུར་དང་ལྟ་སྐྱོང་བྱེད་པའི་སྲོལ་བཟང་པོ་ཞིག་ཡོད།  དེ་ཡང་གལ་ཏེ་རང་གཞན་སུ་འདྲ་ཞིག་གིས་བཀྲ་ཤིས་པའི་བྱ་བ་གཉེར་སྐབས་དགའ་ཉེ་བློ་དཀར་ཚོས་ཇ་ཆང་ཁ་བཏགས་ཀྱི་མཚོན་པའི་དངོས་པོའི་རིགས་ལེགས་འབུལ་གྱི་རྟེན་འབྲེལ་ཞུ་བ་དང་།  ཁང་པ་གསར་བཞེངས་དང་ཐོན་སྐྱེད་ལས་བྲེལ་ཆེ་སྐབས་སོགས་ལ་ངལ་རྩོལ་གྱི་ཐོག་ནས་ཕན་ཚུན་ལས་རོགས་གང་ཐུབ་བྱེད་པའི་ལམ་སྲོལ་བཟང་པོ་ཡོད།  གལ་ཏེ་རང་གཞན་གང་རུང་ཞིག་ལ་རྐྱེན་ངན་བར་ཆད་ཀྱི་རིགས་བྱུང་ཚེ་གྲོང་པ་ཁྱིམ་མཚེས་དང་དགའ་ཉེ་བློ་དཀར་དང་སྤུན་མཆེད་ཚོས་ཇ་ཆང་སོགས་དྲངས་ནས་སེམས་གསོ་བྱེད་པ་ཕུད་གང་ཅིའི་ཐད་ལ་རོགས་རམ་གང་ཐུབ་བྱེད་སྲོལ་ཡོད་པ་བཅས་ཀྱི་ཐོག་ནས་བོད་མི་ནི་ཕན་ཚུན་རོགས་རམ་དང་།  ཕན་ཚུན་སེམས་འཁུར།  འཆམ་མཐུན་ཡོང་བ་བཅས་བྱེད་རྒྱུར་དོ་སྣང་ཆེན་པོ་བྱེད་མཁན་གྱི་མི་རིགས་ཤིག་ཡིན་ཞིང་།  དེའང་བོད་མི་ཚོའི་ཁང་ཁྱིམ་མང་ཆེ་བའི་ནང་མཐུན་པ་སྤུན་བཞིའི་རི་མོ་མཐོང་རྒྱུ་ཡོད་པ་དེའི་ཐོག་ནས་ཀྱང་བོད་མིས་མཐུན་སྒྲིལ་བྱེད་དགོས་པ་དེ་ཧ་ཅང་གལ་འགངས་ཆེན་པོར་བརྩི་ཡི་ཡོད་པ་ར་སྤྲོད་གསལ་པོ་བྱེད་ཐུབ།