ཕྱོགས་ལས་ཐོན་སྐབས་གཟའ་ཚེས་ལྟ་བའི་སྲོལ།

  བོད་མི་ཕྱོགས་ལས་ཐོན་སྐབས་གཟའ་ཚེས་ལྟ་བའི་སྲོལ་དེ་ནི་རྩིས་གཞུང་གི་དགོངས་དོན་ནས་བྱུང་བ་ཞིག་ཡིན་པ་གཏན་འཁེལ་བྱས་ནས་བཤད་ཆོག  བོད་མིས་ཕྱོགས་ལ་འགྲོ་རྒྱུ་ནི་གལ་ཆེའི་དོན་ཞིག་ལ་བརྩི་ཡི་ཡོད་ལ།  ཕྱིར་སྐྱོད་བྱ་རིང་བགེགས་དང་བར་ཆད་མི་ཡོང་བའི་ཐོག་བྱ་བ་ལམ་ལྷོང་ཡོང་མིན་ནི་ཕྱོགས་ལ་ཐོན་པའི་ཉིན་དེའི་གཟའ་ཚེས་ཡག་སྡུག་ལ་རག་ལས་ཀྱི་ཡོད་པར་ངོས་འཛིན་གྱི་ཡོད་སྟབས།  ཕྱོགས་ལས་ཐོན་པའི་ཉིན་དེའི་གཟའ་ཚེས་ལེགས་པ་ཞིག་འདེམས་དགོས་པར་དོ་སྣང་ཆེན་པོ་བྱེད་ཀྱི་ཡོད།  ཚེས་པ་ཡག་པའི་ཉིན་དེར་ཐོན་མ་ཐུབ་ཚེ་དེ་ཉིན་ཀ་གནོན་ཅེས་འགྲོ་སའི་ཁ་ཕྱོགས་དེར་དངོས་སུ་ཐོན་པ་ལྟར་ཐོན་ཚུལ་བྱས་ནས་གཏོ་བཅོས་བྱེད་སྲོལ་ཡང་ཡོད།  དཔེར་ན་འགྲུལ་པ་གང་ཞིག་རེ་གཟའ་ཉི་མ་ལྟ་བུར་རང་གི་ཁྱིམ་ནས་ཕྱིར་ཐོན་ན།  རྩིས་གཞུང་ནང་མི་འཚམས་ཞེས་འཁོད་པ་ལྟར།  ལམ་བར་ལ་སྟབས་མི་བདེ་བའི་དཀའ་ངལ་འཕྲད་སྲིད་པར་ངོས་འཛིན་ནས་ཕྱོགས་ལ་ཐོན་རྒྱུར་འཛེམས་ཆ་བྱེད་པ་མ་ཟད།  ལྷག་དོན་ཆུ་ཚགས་འཁེལ་བའི་དུས་ལ་འགྲུལ་བཞུད་གཏན་ནས་བྱེད་སྲོལ་མེད།  གལ་ཏེ་ཆུ་ཚགས་ཀྱི་དུས་ལ་འགྲུལ་བཞུད་བྱས་ན།  རྟ་ཤི་སྒ་ཆག་གི་ཆགས་སྒོ་ཡོང་སྲིད་པའི་བཤད་སྲོལ་ཡོད་ཀྱང་རྟགས་པ་དེ་ཙམ་མེད།  འགྲུལ་པ་ཕྱོགས་ལ་ཐོན་སྐབས་བུམ་སྟོངས་དང་འཁེལ་ན།  གཏོ་བཅོས་སུ་རང་གི་རྒྱབ་བུམ་སྟོངས་ལ་སློག་པ་དང་།  ཞལ་གཙང་ཕྱོགས་ལ་ལྟ་བའི་སྲོལ་ཡོད།