ཐལ་མོ་སྦྱོར་བའི་སྲོལ།

  བོད་མིར་ལག་པ་གཉིས་ཀྱི་ཐལ་མོ་སྦྱོར་བའི་སྲོལ་ཞིག་ཡོད།  དེའང་དགོན་པ་དང་ལྷ་ཁང་སོགས་ལ་ཆོས་མཇལ་ཞུ་སྐབས་ལྷ་སྐུ་རྟེན་གསུམ་གྱི་མདུན་དུ་ལག་པ་གཉིས་ཐལ་མོ་སྦྱར་ཏེ་གསོལ་བ་སྨོན་ལམ་འདེབས་པ་དང་།  རང་ལས་མཐོ་བའི་མི་དང་འཕྲད་སྐབས་ལག་གཉིས་ཀྱི་ཐལ་མོ་སྦྱར་ནས་གུས་བཀུར་ཞུ་བ་དེ་ཡིན།  ལག་གཉིས་ཐལ་མོ་སྦྱོར་བའི་ཚུལ་དེའི་གོ་དོན་ནི་སྙིང་ཐག་པ་ནས་དད་སེམས་ཞུ་བ་མཚོན་པར་བྱེད་པ་དང་།  གཞན་ལ་གུས་བཀུར་གྱི་ཉམས་ཀྱང་མཚོན་པར་བྱེད་ཀྱི་ཡོད།  ཡང་དེ་ལས་ལྡོག་སྟེ་ལག་པ་ཡ་གཅིག་གིས་མཛུབ་མོ་ལྔ་ཀ་རུབ་རུབ་ཀྱིས་སྟོན་སྲོལ་ཞིག་ཡོད་པས་དེ་ནི།  ཁ་ཚུམས་ཁྱོད་ལ་ཇུས་གཏོགས་མེད།  ཅེས་གུས་ཞབས་གཏན་ནས་མེད་པའི་ངང་ནས་མི་གཞན་ལ་འཕྱ་དམོད་བྱེད་པ་ཞིག་ཡིན།