བོད་མིའི་ཡ་རབས་གུས་ཞབས་ཀྱི་སྲོལ་རྒྱུན།

  བོད་མི་རིགས་ནི་ལོ་ངོ་སྟོང་ཕྲག་གི་གོང་ནས་ཤེས་རིག་འཕེལ་རྒྱས་ཀྱི་ལོ་རྒྱུས་ཡུན་རིང་ལྡན་པ་ཞིག་ཡིན་པར་བརྟེན་མི་དང་མི་ཡི་བར་ལ་ཡ་རབས་གུས་ཞབས་ཀྱི་སྲོལ་རྒྱུན་བཟང་པོ་ཡོད་ཅིང་དེ་ལ་གཞན་དང་མི་འདྲ་བའི་དམིགས་བསལ་གྱི་ཁྱད་ཆོས་ཡོད་པ་ཞིག་ཡིན།   དེ་ལ་ནང་གསེས་ཀྱིས་དབྱེ་ན།  དེ་སྔ་སྤྱི་ཚོགས་ཐོག་བླ་མ།  སློབ་དཔོན།  དགེ་རྒན།  དཔོན་རིགས།  རྒན་རབས་བཅས་ལ་གུས་བཀུར་བྱེད་སྲོལ་དང༌།  ཁྱིམ་ཚང་གི་ནང་བུ་ཕྲུག་གིས་ཕ་མར་གུས་ཞབས་ཞུ་སྲོལ།  ཁྱིམ་དུ་སྐུ་མགྲོན་ཕེབས་སྐབས་གུས་ཞབས་ཞུ་སྲོལ།  ཕན་ཚུན་མིང་འབོད་སྐབས་གུས་ཞབས་ཞུ་སྲོལ།  ཡི་གེ་གཏོང་སྐབས་གུས་ཞབས་ཞུ་སྲོལ་སོགས་མི་འདྲ་བ་མང་པོ་ཡོད།  དེའི་ནང་དུ་ལུས་ཀྱི་རྣམ་འགྱུར་ཐོག་ནས་གུས་ཞབས་ཞུ་སྲོལ་དང༌།  ངག་ཐོག་གི་ཞེ་ས་ཞུ་ཚུལ་མི་འདྲ་བའི་ཁྱད་པར་རྣམས་འདུས་ཡོད།  གུས་ཞབས་ཞེས་པ་ནི་སྐྱེ་བོ་མཐོ་དམན་དྲག་ཞན་སུ་ཡིན་ཀྱང་ཕན་ཚུན་འབྲེལ་བ་བྱེད་སྐབས་ལུས་ཀྱི་རྣམ་འགྱུར་དང༌།  ངག་ཐོག་གི་སྐད་ཆ་བཤད་སྟངས།  མཉམ་དུ་བཟའ་བཏུང་བྱེད་སྟངས།  ཚུར་བསུ་ཕར་སྐྱེལ་སོགས་ཡ་རབས་བཟང་པོའི་སྤྱོད་ཚུལ་ཡོད་པ་ལ་ཟེར་བ་ལས་འབངས་མི་སེར་གྱིས་དཔོན་རིགས་སམ་མི་དྲག་ལ་མགོ་སྒུར་ལྕེ་སྣར་བྱེད་པ་གཅིག་པུ་ལ་གོ་རྒྱུ་མིན།

 དང་པོ།  རང་ལ་ཤེས་ཡོན་སློབ་མཁན་གྱི་སློབ་དཔོན་དང༌།  ཕ་མ།  མེས་པོ་བཅས་ལ་གུས་བཀུར་གཙོ་ཆེ་ཤོས་ཞུ་དགོས་པ།   ཐོག་མར་མཇལ་བའམ་རང་ཁྱིམ་དུ་ཕེབས་པ་དང་བཞུགས་པ་བཅས་ཀྱི་སྐབས་སུ་ལུས་ཀྱི་རྣམ་འགྱུར་མགོ་བོ་སྒུར་ཏེ་གྲྭ་པ་ཡིན་ཚེ་ལག་གཉིས་ཐལ་མོ་སྦྱར་བའང་ཡང་ན་པུས་མོའི་སྟེང་དུ་བཞག་ནས་བློན་པོ་ཆེན་པོས་རྒྱལ་པོའི་བཀའ་ཉན་པ་ལྟར་བྱ་དགོས་ཤིང༌།  ཚུར་གསུང་བའི་བཀའ་མོས་མ་རྫོགས་བར་དུ་གུས་པས་ཉན་ནས་རང་ཉིད་ཀྱི་ཞུ་ལན་རྣམས་ཞེ་ས་དང་བཅས་ཏེ་ཞུ་དགོས་པ་ལས་མཚན་རྗེན་པར་བོས་ནས་ཞུ་མི་རུང་བ་དང༌། རང་གི་བློ་ལ་མི་བབས་པའི་བཀའ་ཞིག་གནང་ཡང་རྗེས་སུ་གོ་སྐབས་བསྟུན་ནས་རིམ་བཞིན་འཇམ་པོའི་ངག་གིས་ཞུ་བ་མ་གཏོགས་སྤུན་མཆེད་ཕན་ཚུན་དང་བཟའ་ཚང་ཕན་ཚུན་ཁ་རྩོད་རྒྱག་པ་ལྟ་བུའི་སྐབས་ཐོག་ཐ ད་ཀར་ཞུ་མི་རུང་བ་ཡིན།  སློབ་དཔོན་དང་ཕ་མ་མེས་པོ་བཅས་དང་མཉམ་དུ་བཟའ་བཏུང་བྱ་དགོས་བྱུང་ཚེ་ཁོང་རྣམ་པས་མ་བཞེས་གོང་དུ་རང་གིས་ལོངས་སྤྱོད་མི་རུང་བ་དང༌།   བཟའ་བཏུང་སྐབས་ཅག་སྒྲ་དང་ཧུ་སྒྲ་སྒྲོགས་པ།  མདུན་ཅོག་ཐོག་ལག་པ་གཉིས་བཀན་ནས་བཟའ་བ།  ཁ་མ་བཀབ་པར་སྐད་སངས་ཆེན་པོས་གློ་རྒྱག་པ་དང༌།  ཧབ་སྦྲིད་རྒྱག་པ།  སྣབས་ལུད་དོར་བ།  ལག་པ་ཡ་གཅིག་གིས་སྣོད་སྤྱད་ཕར་འཇོག་ཚུར་ལེན།  ཕར་ཚུར་འགྲོ་སྐབས་དང་སྐས་ཀྱི་གདང་བུར་ཡར་འཛེག་མར་བབས་བྱེད་སྐབས་རྐང་ཤུགས་ཆེན་པོས་རྡིག་སྒྲ་དང་བཅས་ནས་འགྲོ་བ།  ལམ་དུ་འགྲོ་བའི་ཚེ་ན་དགེ་རྒན་དང་ཕ་མའི་རྗེས་དང་གཡོན་ངོས་ཀྱི་ཟུར་ནས་འགྲོ་བ་མ་གཏོགས་མདུན་དང་གཡས་ངོས་ནས་འགྲོ་མི་རུང་བ།  རྟ་བཞོན་པ་དང་འཁོར་ལོའི་ནང་དུ་འགྲོ་སྐབས་དགེ་རྒན་དང་ཕ་མ་གཉིས་ཆིབས་རྟ་དང་འཁོར་ལོར་བསྡད་ནས་འགྲོ་དགོས་པ་དང་བབས་སྐབས་ཀྱང་སྔོན་ལ་རང་ཉིད་རྟ་དང་འཁོར་ལོ་ནས་འབབས་དགོས་པ་སོགས་གུས་ཞབས་ཞུ་ཚུལ་མང་པོ་ཡོད།

 གཉིས་པ།  སྤྱི་ཚོགས་ཐོག་གི་རྒན་རབས་དང་ཡོན་ཏན་ཅན་ཞིག་ཡིན་ཕྱིན་ལུས་ཀྱི་རྣམ་འགྱུར་གུས་ཞབས་དང་ངག་གི་རྣམ་འགྱུར་འཇམ་པོའི་སྒོ་ནས་གཏམ་གླེང་སྨྲ་དགོས་པ་ལས་བཟའ་ཚང་སྤུན་མཆེད་ལྟར་བྱེད་མི་རུང༌།   ཚོགས་འདུ་འཚོགས་སྐབས་གཏམ་གླེང་འགོ་རྒན་རིམ་ནས་འཛུགས་དགོས་པ་དང་གཞོན་པ་རྣམས་ཀྱིས་རྒན་རབས་ལ་ཐད་ཀར་ཁ་རྩོད་རྒྱག་མི་རུང་བར་གཏམ་གླེང་གོ་སྐབས་རང་ལ་ཁེལ་བ་དང་བསྟུན་ནས་གནས་ཚུལ་བབས་གསེད་འཇམ་མཁས་ཀྱི་ཐོག་ནས་ཞུ་དགོས་ལ་གལ་ཏེ་རང་གི་ནོར་འཛོལ་འདྲ་བྱུང་ཡོད་ན་རྒན་རབས་རྣམས་དགོངས་པ་དྭངས་པ་ཞུ་དགོས་པ།  ཕར་འགྲོ་ཚུར་ཡོང་གི་ལམ་བརྒྱུད་དུ་རྒན་རབས་དང་ཡོན་ཏན་ཅན་སོགས་མཇལ་བ་བྱུང་ཚེ་རང་གིས་ངོ་ཤེས་པ་ཞིག་ཡིན་ན་མཚམས་འདྲིའི་གུས་བཀུར་ཞུ་བའི་ཚིག་ཁ་ཤས་ཞུ་དགོས་པ་དང་ངོ་མི་ཤེས་པ་ཞིག་ཡིན་ནའང་ལུས་ཀྱི་རྣམ་འགྱུར་གུས་པའི་སྒོ་ནས་མགོ་སྒུར་ཙམ་བྱེད་དགོས་པ་སོགས་ཡིན།

   གསུམ་པ།  རང་ཁྱིམ་དུ་སྐུ་མགྲོན་ཕེབས་སྐབས་གུས་ཞབས་ཞུ་སྲོལ་ཐད་མི་རིགས་ཁག་སོ་སོར་ལུགས་སྲོལ་མི་འདྲ་བ་ཡོད་ཅིང༌།   དེ་མ་ཤེས་པར་རང་གི་མི་རིགས་ཀྱི་ལུགས་སྲོལ་ལྟར་བྱས་ན་རང་ངོས་ནས་གུས་ཞབས་ཡིན་རུང་ཕར་ཕྱོགས་ངོས་ནས་གུས་ཞབས་མེད་པ་ལྟ་བུར་མཐོང་གི་ཡོད་པ་དཔེར་ན་བོད་མི་རིགས་གྱི་ལུགས་སྲོལ་ལ་གཡས་གྲལ་ནི་གྲལ་མགོ་དང་གཡོན་གྲལ་ནི་གྲལ་མཇུག་ཡིན་པས་རང་ལས་མཐོ་བའི་སྐུ་མགྲོན་ཞིག་ཕེབས་ན་གུང་གྲལ་ལ་བཞུགས་ཐོག་རང་ཉིད་གཡོན་གྲལ་དུ་སྡོད་དགོས་རྒྱུ་དང༌།   རང་དང་མཉམ་པའི་སྐུ་མགྲོན་ཞིག་ཕེབས་ན་གུས་ཞབས་མཚོན་བྱེད་དུ་སྐུ་མགྲོན་གཡས་གྲལ་དུ་བཞུགས་སུ་འཇུག་དགོས་པ་ཡིན་རུང་རྒྱ་རིགས་དང་མན་ཇུ་རིགས་ཀྱི་ལུགས་སྲོལ་