ལྷ་ས་བའི་རྒྱན་གོས།
བོད་རིགས་ནི་དཔའ་མཛངས་ལྡན་ལ་ལས་ལ་བརྩོན་པ་དང༌།ཤེས་རིག་ཀྱི་དཔལ་འབར་བ་ཞིག་ཡིན་ཁར་གླུ་གར་ལ་སོགས་པའི་སྒྱུ་རྩལ་ལ་སྤྲོ་བ་འཕེལ་ཞིང༌།རྒྱས་སྤྲོས་ཀྱིས་རང་ཉིད་དང་ཁོར་ཡུག་མཛེས་པར་བྱ་རྒྱུར་དང་ཞེན་ཆེ་བའི་མི་རིགས་ཤིག་ཡིན།བོད་རིགས་ཀྱི་གནས་ཡུལ་ནི་འཛམ་གླིང་གི་ཡང་རྩེ་གངས་རི་ར་བས་བསྐོར་བའི་བསིལ་ལྗོངས་ཡིན་པ་སོགས་སྣོད་བཅུད་ཀྱི་རྒྱུ་རྐྱེན་ཁག་གིས་རྐྱེན་པས་བོད་རིགས་ཀྱི་རྒྱན་གོས་ལ་མི་རིགས་གཞན་དང་མི་འདྲ་བའི་དམིགས་བསལ་གྱི་ཁྱད་ཆོས་མངོན་གསལ་དང་ལྡན་པ་ཞིག་བྱུང་བ་རེད།དེང་སྐབས་སུ་མཚོན་ནའང་ཕྱུ་པ་གྱོན་ཏེ་སྐེད་རགས་འཆིང་བ་ནི་བོད་རིགས་ཡོངས་རྫོགས་གཅིག་གྱུར་ཡིན་ཀྱང༌།བྱེ་བྲག་ཏུ་ཞྭ་ལྷམ་དང༌།པང་གདན།རྒྱབ་གདན།གནས་ཐ་དད་དབར་ལ་ཁྱད་པར་ཆེན་པོ་ཡོད།སྐབས་འདིར་ལྷ་ས་བའི་རྒྱན་གོས་འགོད་པ་ལ་ལྷ་ས་ནི་ལོ་ངོ་སྟོང་གི་སྔོན་ནས་བོད་ཀྱི་ཆབ་སྲིད་དང༌།དཔལ་འབྱོར།རིག་གནས།འགྲིམ་འགྲུལ་བཅས་ཀྱི་ལྟེ་གནས་ཡིན་པས་སྔ་དུས་ནས་ཁྱིམ་མཚེས་རྒྱལ་ཁབ་དང༌།དེ་བཞིན་རྒྱལ་ནང་གི་མི་རིགས་གཞན་དང་ཡང་གང་ཅིའི་ཐད་འབྲེལ་བ་བཙུགས་ནས་ཕན་ཚུན་ཤུགས་རྐྱེན་ཐེབས་རེས་བྱས་པར་བརྟེན་ལྷ་ས་བའི་རྒྱན་གོས་ནི་བོད་ཀྱི་ཡུལ་གཞན་ལས་རྣམ་གྲངས་མང་ཞིང་ཕུན་སུམ་ཚོགས་པ་ཞིག་བྱུང་ཡོད།དེ་ཡང་དུས་ཡུན་རིང་པོའི་ལོ་རྒྱུས་ཀྱི་ནང་དུ་རིམ་བཞིན་འཕེལ་འགྱུར་གྱིས་བྱུང་བ་ཞིག་རེད།
ཆོས་རྒྱལ་སྲོང་བཙན་སྒམ་པོའི་དུས་རབས་ཀྱི་རྒྱན་གོས།
ལོ་རྒྱུས་ཀྱི་དེབ་ཐེར་ཁག་ལ་འཁོད་པར་གཞིགས་ན་གནའ་རབས་སུ་ཆོས་རྒྱལ་སྲོང་བཙན་སྒམ་པོས་དར་དམར་པོའི་ཐོད་བཞེས་པ་དང༌།ཟ་འོག་གི་བེར་དང་ཕྱགས་ལྷམ་སྣ་འཁྱིལ་གྱོན་པ་དང༌།དེ་སྔ་མངའ་རིས་ལ་དྭགས་སུ་ཆོས་རྒྱལ་གྱི་གདུང་རྒྱུད་དུ་གྲགས་པ་རྣམས་ཀྱིས་ལོ་གསར་སོགས་ཀྱི་ཚེ་སྔོན་གྱི་ཆས་ཡིན་ཟེར་ནས་ཞྭ་དམར་བཙན་ཞྭའི་དབྱིབས་ཅན་རྩེ་མོ་མཐོ་ཞིང་ཕྲ་བའི་གཡས་ཟུར་དུ་ཚེ་དཔག་མེད་ཀྱི་སྐུ་བརྙན་ཞིག་དར་དམར་གྱིས་བཅིངས་པའི་ལྷག་མ་མདུན་ནས་བསྣོལ་བསྒྲིགས་ཏེ་གྱོན་པར་བྱེད།སྐབས་དེར་བཙན་པོ་རྗེ་བློན་རྣམས་ཤས་ཆེར་གུར་གྱི་ནང་དུ་བཞུགས་པར་མངོན།བློན་ཆེན་རྣམས་ཀྱང་ཕལ་ཆེར་རྒྱལ་པོའི་ཆས་འདྲ་བ་དང༌།དམག་དཔོན་རྣམས་སྟག་ལྤགས་གྱོན་པར་བྱེད་ལ།དམག་དཔོན་ཆེ་གྲས་རྣམས་སྟག་དཀར་པོའི་པགས་པ་གྱོན།ཕྱིས་སུ་གཟིམ་འགག་ཚོས་འཁྱེར་བའི་འབོག་ལྕག་གམ་སྟག་གི་ཐོག་བུ་བྱ་བ་འདི་ཡང་ཁྲི་སྲོངགི་དུས་སུ་དཔའ་བོ་རྣམས་ལ་བསྩལ་བའི་ཆས་སུ་གྲགས་སྐབས་དེ་དུས་ནས་བོད་མི་རྣམས་གསེར་དངུལ་གྱི་རྒྱན་ལ་གཅེས་སྤྲས་ཆེ་ཞིང༌།རིགས་མཐོ་དམན་གྱི་ཁྱད་པར་མི་སོ་སོའི་དཔུང་པའི་སྟེང་ན་མཚན་མ་བཏབ་ནས་སྣང༌།
གནའ་རབས་སུ་རྒྱལ་མོ་རྣམས་ཀྱི་ཆས་གོས་ཇི་ལྟ་བུ་ཞིག་ཡིན་པའི་ཐད་ལ་རྒྱ་ནག་གི་སྒྲོས་ལས་མཆེད་པའི་བོད་ཀྱི་ལོ་རྒྱུས་སྐད་རིགས་གཞན་དུ་བྲིས་པ་ཞིག་སྣང་བར།བོད་ཀྱི་རྒྱལ་མོ་མཚན་མི་གསལ་བ་ཞིག་བྲིས་ཏེ།རྒྱལ་མོ་དེའི་སྟོད་ཐུང་སྔོ་ནག་ཕུ་ཐུང་གི་ཁ་ས་ལ་རེག་པ་ཙམ་དུ་རིང་བ་ཞིག་གྱོན།སྨད་ལ་དར་ནག་པོའི་གཤམ་ཐབས་གྱོན།སྐྲ་ལ་ལྷས་མ་ཆུང་ངུ་མང་དུ་བྱས་ཤིང༌།རྣ་བ་ལ་ཨ་ལོང་བཏགས།ལྷམ་ཟོ་ཡའི་བྱ་བ་གྱོན།དགུན་དུས་སུ་པགས་པའི་གྱོན་པ་ཕྱི་ལ་ཚེམ་དྲུབ་སྣ་ཚོགས་ཡོད་པ་ཞིག་གྱོན་ཞེས་འཁོད་ཡོད།སྐབས་དེར་འབངས་མི་སྤྱིར་བཏང་བ་རྣམས་ནི་ཧ་ལམ་འབྲོག་པའི་ཆ་ལུགས་སུ་གནས་ཏེ།དབྱར་གྱི་དུས་སུ་ཕྱིང་པའི་ཕྱུ་པ་དང༌།དགུན་ཁ་པགས་པའི་སློག་པ་གྱོན་ཞིང༌།ཕུ་ཐུང་རྩེ་ཕྲ་ལ་རྩ་བ་སྦོམ།མི་རྣམས་ཀྱིས་གདོང་པར་ཚོས་དམར་བྱུག་པར་བྱེད།
བོད་ཡིག་གི་དེབ་ཐེར་ནང་རྒྱན་གོས་སྐོར་གྱི་འཁོད་པ།
སྤྱི་ལོ་༡༧༣༣ལོར་རྫོགས་པར་བརྩམས་ནས་ད་བར་ལོ་ངོ་ཉིས་བརྒྱ་ལྔ་ལྷག་ཙམ་ལས་མ་སོང་བའི་《མི་དབང་རྟོགས་བརྗོད་》ནང་དུ་མི་དབང་ཕོ་ལྷ་གཞོན་ནུའི་དུས་སུ་གཞིས་ཀ་རྩེར་པཎ་ཆེན་བློ་བཟང་ཡེ་ཤེས་མཇལ་བར་ཕེབས་སྐབས་སུ་གཞིས་རྩེའི་རྫོང་དཔོན་དང་འབངས་རྣམས་ཀྱི་ཆ་ལུགས་ཞིབ་པར་བཀོད་པ་འདི་ལྟར་ཏེ།དེའི་ཚེ་དེའི་དུས་ན་བསིལ་ལྡན་གྱི་ལྗོངས་འདིར་ཡང་སྐྱེ་དགུ་རྣམས་རང་དབང་དུ་སྤྱོད་པ།གནའ་བོའི་སྲོལ་བཟང་པོ་ནུབ་པ་མེད་པ།ཆས་ཀྱིས་མཛེས་ཤིང་ཁྲིམས་ཀྱིས་སྤ་བ་ཡིན་པས་རྒྱལ་པོའི་ཁབ་བསམ་གྲུབ་རྩེའི་སྣེ་མོར་སྤྱོད་པའི་རྗེ་བོ་དག་ཀྱང་ཞྭ་བཟང་པོ་ཀ་ཤི་ཀའི་ལ་ཐོད་ཅན་ཨུཏཔལ་རབ་ཏུ་རྒྱས་པའི་རྫིང་བུའི་དབུས་སུ་བཞིན་རས་ཀྱི་ཟླ་བ་ཁྲུས་ལ་ཞུགས་པ་ལྟ་བུའི་རྣ་རྒྱན་འཆང་བ་བེཌའུརྱ་ཁུ་རྒྱུན་གཙང་མ་རླུང་གིས་བསྐྱོད་པའི་གཉེར་རིས་སྙོམས་པར་ཁྱབ་པ་ལྟ་བུའི་གོས་བཟང་པོ་དང་ཐུན་མཚམས་ཀྱི་སྤྲིན་གསར་པ་དབང་པོའི་གཞུ་མཚར་པོས་དཀྲིགས་པ་དང་མཚུངས་པའི་སྟོད་གཡོགས་དང༌།པད་མ་དམར་པོའི་སྐུད་པ་ཐགས་སུ་བྲན་པ་དང་འདྲ་བའི་རྔུལ་གཟན་མནབས་ཏེ་ཡ་རབས་དྲ་མའི་ཆས་ཀྱིས་མཛེས་པ་དང༌།འབངས་རྣམས་ཀྱང་སྐྲ་དོ་ཀེར་དུ་བཅིངས་པ་དང༌།སིལ་བུར་གྲོལ་བ་དང༌།གོས་ཀྱི་སྟ་ཟུར་སུལ་བཞི་ཅན་དང༌།གུར་གུམ་གཞོན་ནུའི་མེ་ཏོག་འབར་བ་ལྟ་བུའི་ཞྭ་བཟང་པོས་ཀླུབས་པར་བྱེད།ཅེས་བཀོད་ཡོ
