བོད་ཀྱི་མེད་དུ་མི་རུང་བའི་ཡོ་བྱད་དང་རྒྱན་ཆ་བོད་གྲི།
བོད་གྲི་ལ་ནང་གསེས་གློ་གྲི་དང་སྐེད་གྲི་གཉིས་ཡོད་དེ། གློ་གྲི་ནི་གློར་འདོགས་པའི་གྲི་ཆུང་ཤུབས་ལྡན་ལ་ཟེར་ཞིང༌། སྐེད་གྲི་ནི་སྐེད་པར་གཟེར་བའི་གྲི་ལ་ཟེར། བོད་གྲི་ལ་རིང་ཐུང་མི་འདྲ་བ་སྣ་ཚོགས་ཡོད་དེ། སྤྱིར་བཏང་ཐོག་དབྱེ་ན་གྲི་རིང་དང༌། གྲི་ཐུང༌། གྲིའུ་གསུམ་བཅས་ཡོད། གྲི་རིང་ཆེས་རིང་བ་ལ་སྨི་གཅིག་ལྷག་ཡོད། གྲི་ཐུང་ལ་ཧ་ལམ་ལི་སྨི་བཞི་བཅུ་ཡས་མས་ཡོད། གྲིའུ་ལ་ལི་སྨི་བཅུ་ལྷག་ཙམ་ལས་མེད། བུད་མེད་ཀྱིས་སྤྱོད་བྱེད་བོད་གྲི་རིང་བ་ལ་ལི་སྨི་ཉི་ཤུ་ཙམ་དང༌། ཆེས་ཐུང་བ་ལ་ལི་སྨི་བརྒྱད་ཡས་མས་ཤིག་ལས་མེད།
བོད་གྲི་ནི་ངར་ལྕགས་ལས་རྡུང་ཞིང༌། ལས་སྣོན་ཕྲ་ཞིང་ཞིབ་པ་དང༌། གྲིའི་ངོས་འོས་འཚེར་བ། གྲི་དངོ་ཧ་ཅང་རྣོ་བ་བཅས་ཡིན། གྲི་ཤུབས་གྲུབ་ཆའི་རྒྱུ་ལ་དང་དོད་ཆེན་པོ་བྱས་པས། ཀོ་རིགས་དང༌། ཤིང་རིགས། ལྕགས་རིགས་སོགས་སྣ་མིན་སྣ་ཚོགས་ཡོད། ཀོ་རིགས་ལས་གྲུབ་པ་ལ་གཙོད་དང་ཉ་ཆེན་རྨིགས་པའི་ལྤགས་པས་བཟོ་བ་ནི་ཆེས་རྩ་ཆེན་ཞིག་རྩིས། ཤིང་རིགས་དང་ལྕགས་རིགས་ལས་གྲུབ་པའི་གྲི་ཤུབས་ལ་ཕལ་ཆེར་ཟངས་དང་དངུལ་གྱིས་ཐུམ་ཡོད། འགའ་རེར་མེ་ཏོག་དང༌། ཁྱུང་འབྲུག་གམ་གཅན་གཟན་གཏུམ་པོ། གཡུང་དྲུང་རི་མོ་སོགས་བརྐོས་ཡོད། སྤོས་ཤེལ། རྟ་ཀླད་སོགས་རིན་ཆེན་རྡོ་རིགས་ཀྱིས་ཕྲ་རྒྱན་བརྒྱབ་པས། བཟོ་སྤུས་དག་ཅིང་བཟོ་བཀོད་ལེགས་ལ་བརྐོས་རིས་ཞིབ་པའོ། གྲི་ཡུ་ནི་ནོར་གནག་གི་རྭ་དང་རྒྱ་རུའི་རྭའམ་ཤིང་སྤུས་ལེགས་ཀྱིས་བཟོ་ལ། དེའི་ཐོག་ཏུ་དངུལ་སྐུད་དང་ཟངས་སྐུད་དམ་ལྕགས་སྐུད་བཅས་ཀྱིས་དཀྲིས་ཡོད། གྲི་ཡུའི་རྩེ་མོ་ལ་རག་དང་དངུལ་གྱིས་རྒྱན་ཡོད། མ་གཞི་བོད་རིགས་ས་ཁུལ་ག་སར་གྲི་རྡུང་ཐུབ་མོད། ཡིན་ནའང་བོད་ལྗོངས་ལྷ་ས་དང༌། འདམ་གཞུང༌། ལྷ་རྩེ། ཡེ་གོང༌། ཆབ་མདོ། དེ་མིན་སི་ཁྲོན་དཀར་མཛེས་བོད་རིགས་རང་སྐྱོང་ཁུལ་གྱི་དཔལ་ཡུལ་རྫོང་སོགས་ལས་ཐོན་པའི་བོད་གྲི་ལ་སྐད་གྲགས་ཧ་ཅང་ཆེན་པོ་ཡོད། ས་གནས་དེ་ཚོ་ལས་ཐོན་པའི་བོད་གྲི་ལ་བོད་མི་རིགས་རང་ཉིད་དང་སྤུན་ཟླ་མི་རིགས་གཞན་རྣམས་དགའ་བ་མ་ཟད། ཕྱི་རྒྱལ་སྤྲོ་གསེང་གཏོང་མཁན་རྣམས་ཀྱང་ཧ་ཅང་དགའ་བ་རེད།
བོད་ཁམས་སུ་མགར་ལས་དར་ནས་ལོ་གྲངས་ཆིག་སྟོང་ལྷག་གི་ལོ་རྒྱུས་ཡོད་ཅིང༌། མི་ལོ་ཆིག་སྟོང་དྲུག་བརྒྱ་བདུན་བརྒྱའི་སྔ་རོལ་དུ་མཚོ་བོད་མཐོ་སྒང་དུ་འཚོ་གནས་བྱས་པའི་བོད་ཚོ་པས་ལྕགས་ཟངས་དངུལ་བཅས་བཞུ་བའི་ལག་རྩལ་ཁོང་དུ་ཆུད་ཅིང་གྲི་མགར་བའི་འགོ་ཡང་བརྩམས། གཉའ་ཁྲི་བཙན་པོའི་དུས་སུ་ཡར་ཀླུང་གཙང་པོའི་རྒྱུད་ལ་ཆགས་ཡོད་པའི་བོད་ཁམས་གཡག་དྲུག་གི་མིས་གཏེར་རྡོ་བཞུས་ཏེ་ཟངས་ལྕགས་དངུལ་གསུམ་རྙེད་པས་གྲི་མགར་བར་རྨང་གཞི་བཏིང་ཞེས་གྲགས། བོད་པས་གྲི་འདོགས་པའི་གོམས་སྲོལ་ལ་ལོ་རྒྱུས་ཡུན་རིང་ལྡན། ངག་སྒྲོས་སུ། སྐབས་དེ་དུས་མཁྱེན་དཀར་བ་རྣམས་མཁྱེན་ཞེས་བྱ་བའི་སྤྱང་གྲུང་འཛོམས་ཤིང༌། འཇོན་ཐང་ཆེ་བའི་མི་ཞིག་ཡོད་པ་དེས་ལྕགས་ཀྱིས་རྒྱུ་བྱས་ཏེ་གྲི་དང་པོ་ཞིག་མགར་ནས་རང་གི་ལུས་ལ་འདོགས་པས། མི་ཀུན་གྱིས་ཡིད་མོས་བྱུང༌། དེ་ནས་བཟུང༌། གྲི་འདོགས་པའི་གོམས་སྲོལ་ཆགས་ཤིང༌། བོད་དེ་རང་ཤུགས་ཀྱིས་གྲི་འདོགས་པར་དགའ་པོ་ཡོད་པའི་མི་རིགས་སུ་གྱུར། བོད་པའི་རྒན་པོ་ལ་རྭ་ཅོས་རྒྱན་པའི་གྲི་དང་ན་གཞོན་ཕོ་གསར་ལ་དངུལ་གྲི། བུད་མེད་ལ་བཟོ་བཀོད་ལེགས་པའི་དངུལ་གྱི་གློ་གྲི་བཅས་ཡོད། དེ་ཡང་“ཡོངས་ཀྱིས་གྲིར་དགའ་ཞིང་ཀུན་གྱིས་གྲི་འདོགས་པ”ཞེས་ཟེར་ཆོག་པས། གྲི་ནི་བོད་མང་ཚོགས་ཀྱིས་ཧ་ཅང་དགའ་པོ་བྱེད་པའི་རྒྱན་ཆ་ཞིག་ཏུ་གྱུར། མཐོ་སྒང་ཐུན་མོང་མ་ཡིན་པའི་ས་བབ་གནས་ཚུལ་ཁྲུང་ནམ་རྒྱུན་གྱི་འཚོ་བའི་དགོས་མཁོས་འབྲོག་མི་རྣམས་དང་ཡང་སྒོས་ཁམས་པའི་མི་རྣམས་ཀྱིས་སྐེད་པར་རལ་གྲི་ཞིག་དང་གློ་གྲི་ཞིག་འདོགས་པའི་གོམས་གཤིས་ཆགས་ཡོད་པ་རེད། གྲི་ནི་འཚོ་བར་བེད་སྤྱོད་པའི་ལག་ཆ་ཞིག་དང་འགོག་སྲུང་གི་མཚོན་ཆ་ཞིག་ཀྱང་རེད། དེ་ཐོན་སྐྱེད་བྱེད་པ་དང༌། འཚོ་བ་རོལ་བ། རང་སྲུང་བྱེད་པར་ལོངས་སུ་སྤྱོད་དགོས་པ་མ་ཟད། རྒྱན་ཆ་ཡང་རེད། གྲི་ནི་ནམ་རྒྱུན་འཚོ་བར་མཁོ་བའི་ཡོ་བྱད་དང་རྒྱན་ཆ་ཞིག་ཡིན་པ་ཕུད། ད་དུང་ཁ་ལྟས་ངན་པར་འཛེམ་པའི་ནུས་པ་ཡང་ལྡན་པར་སྙམ་པས་བྱིས་པའི་ཁུར་ཐག་ལ་གྲི་ཆུང་ཆུང་ཞིག་འདོགས་པ་དེས་བྱིས་པར་འདྲེ་བདུད་ཀྱིས་མི་གནོད་པར་སྲུང་སྐྱོབ་བྱེད། མཚན་མོར་ཉལ་བའི་སྐབས་སུ་སྔས་མགོའི་འོག་ཏུ་གྲི་ཞིག་བཞག་ན་རྨི་ལམ་འཚུབ་པོ་མི་རྨི་བ་རེད། གཞན་ཡང་བོད་པས་གྲི་མི་གཞན་ལ་སྤྲད་པའི་ཚེ་ཡུ་བ
