བོད་མིར་ཞེ་ས་མང་བའི་སྐོར།

  བོད་པ་ནི་ཡ་རབ་ཚུལ་ལྡན་གྱི་མི་རིགས་ཤིག་ཡིན་པ་གང་གི་བྱ་སྤྱོད་ངོ་མའི་ཐོག་ནས་མངོན་ཐུབ་པ་མ་ཟད།  སྐད་བརྡའི་ཐོག་ནས་ཀྱང་མངོན་ཐུབ་ཀྱི་ཡོད།  སྤྱིར་ན་སྐད་རིགས་མང་ཆེ་བར།  ཕར་ཕྱོགས་ཀྱི་ཡུལ་ལ་བརྩི་བཀུར་གྱི་ཚུལ་དུ་བརྗོད་པར་བྱེད་པའི་ཞེ་སའི་ཐ་སྙད་འགའ་ཞིག་ཡོད་ནའང་།  བོད་སྐད་ཇི་བཞིན་བྱ་བ་ཚང་མར་ཞེ་སའི་ཐ་སྙད་རེ་སྤྱོད་རྒྱུ་ཡོད་པའི་སྐད་ཡིག་ནི་འཛམ་གླིང་ཐོག་དེ་ཙམ་མང་པོ་མེད།  བོད་ཀྱི་ཞེ་སའི་འབྱུང་བ་དང་དགོས་དོན་སྐོར་མས་པ་མང་པོས་ཞིབ་འཇུག་གནང་བར་གཞིགས་ན།  དེ་ཡང་སྐད་བརྡའི་འབྱུང་བ་དང་འདྲ་བར་སྤྱི་ཚོགས་འཕེལ་རྒྱས་འགྲོ་བའི་རྒྱུད་རིམ་ནང་།  རིམ་པས་མི་དང་མིའི་བར་ཕན་ཚུན་བརྩི་འཇོག་དང་།  གཞོན་པས་རྒན་པར་བརྩི་བཀུར་བྱེད་པའི་དགོས་པ་དམིགས་བསལ་ཅན་ལ་གཞིགས་ནས་རིམ་བཞིན་བྱུང་བའི་ཡར་ཐོན་གྱི་མཚོན་ཚུལ་ཞིག་ཡིན།  འོཕན་ཀྱང་དུས་སྐབས་འགའ་ཞིག་རིང་།  ཞེ་ས་ནི་རིམ་པའི་ལྟ་བ་ལས་བྱུང་བ་ལྟ་བུར་གསུང་བའང་ཡོད།  དོན་དངོས་ཐོག་རིམ་པའི་སྤྱི་ཚོགས་དང་གྲལ་རིམ་གྱི་སྤྱི་ཚོགས་ཀྱི་སྐས་སུ་ཞེ་སས་དམིགས་བསལ་གྱི་ནུས་པ་ཐོན་པ་མ་གཏོགས།  འདི་ལྟའི་སྤྱི་ཚོགས་ཀྱི་ཆ་རྐྱེན་འོག་གཞི་ནས་བྱུང་བ་ཞིག་གཏན་ནས་མིན།  གང་ལགས་ཤེ་ན་ཞེ་ས་དར་ཁྱབ་ཆེ་བའི་ས་ཁུལ་ཁག་ལ།  ཕར་ཕྱོགས་ཀྱི་དགུང་ལོ་རང་ལས་མཐོ་དམན་ལ་མ་བལྟོས་པར་ཚང་མར་ཞེ་ས་བེད་སྤྱོད་བྱེད་སྲོལ་ཡོད་པ་མ་ཟད།  ཞེ་ས་ཡང་དག་མི་ཤེས་ན།  གུས་ཞབས་མེད་པ་དང་ཐག་རིང་ལུང་ཁུག་གི་མི་ཡིན་པར་ངོས་འཛིན་བྱེད་སྲོལ་ཡོད་པས།  དེ་ནི་ཡར་ཐོན་གྱི་རིག་གནས་མཚོན་བྱེད་ཉག་གཅིག་ཡིན།

  གཞན་ཡང་བོད་རིགས་ཀྱི་ས་ཁུལ་འགར་ཞེ་སའི་ཐ་སྙད་དེ་ཙམ་མང་པོ་མེད་ན་ཡང་།  ངག་གདངས་ཀྱི་མཉེན་བྱར་བརྟེན་ནས།  རང་གི་གུས་ཞབས་མཚོན་པར་བྱེད་བཞིན་ཡོད།