ལྷ་སར་བོད་ཆས་དང་འབྲེལ་བའི་ཞིབ་གྲོས་ཚོགས་འདུ་ཞིག་འཚོགས་འདུག
རྩོམ་པ་པོ།：
ཡོང་ཁུངས།：ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།
དུས་ཚོད།：2023-12-28
ཀློག་གྲངས།：
ཀྲུང་ཧྭ་ཡི་ས་གཞི་ཆེན་པོའི་ཐོག་བོད་ཀྱི་རིག་གནས་ཀྱིས་རང་སོའི་ཐུན་མོང་མ་ཡིན་པའི་ཁྱད་ཆོས་དང་ཡིད་དབང་འཕྲོག་ཤུགས་ཀྱིས་ཀྲུང་ཧྭའི་རིག་གནས་ལ་སྣེ་མང་ཕུན་སུམ་ཚོགས་པའི་མཛེས་རྒྱན་སྤྲས་ཡོད། བོད་རིགས་ཀྱི་རྒྱན་གོས་ནི་བོད་ཀྱི་རིག་གནས་ཀྱི་གྲུབ་ཆ་གལ་ཆེན་ཞིག་ཡིན་པའི་ངོས་ནས་དེ་བས་ཐུན་མོང་མ་ཡིན་པའི་ཁྱད་ཆོས་ལྡན་པ་དང་མི་རིགས་ཀྱི་ཡུལ་སྲོལ་གོམས་གཤིས་ཟབ་མོ་མངོན་ཡོད།
སྤྱི་ཚེས26ཉིན་བོད་ལྗོངས་རྟེན་རྫས་བཤམས་མཛོད་ཁང་དུ་བོད་རིགས་ཀྱི་རྒྱན་གོས་ཀྱི་གནའ་སྲོལ་རྒྱུན་འཛིན་ངང་གསར་གཏོད་དང་ཚད་ལྡན་ངང་འཕེལ་རྒྱས་གཏོང་དགོས་ཞེས་པ་བརྗོད་དོན་གཙོ་བོར་བྱས་པའི་ཞིབ་གྲོས་ཚོགས་འདུ་ཞིག་འཚོགས་པ་རེད།
ད་ཐེངས་ཀྱི་ཞིབ་གྲོས་ཚོགས་འདུའི་དམིགས་ཡུལ་ནི་བོད་རིགས་ཀྱི་རྒྱན་གོས་རིག་གནས་ཀྱི་ནང་དོན་སྔོག་འདོན་གཏིང་ཟབ་བྱས་ཏེ་ཇི་ལྟར་བྱས་ནས་སྲོལ་རྒྱུན་རྒྱུན་འཁྱོངས་བྱེད་པའི་རྨང་གཞིའི་ཐོག་གསར་གཏོད་འཕེལ་རྒྱས་གཏོང་རྒྱུའི་ཐད་ཞིབ་གྲོས་བྱ་རྒྱུ་དང་འབྲེལ་བོད་རིགས་ཀྱི་གྱོན་ཆས་ཐོན་ལས་ཚད་ལྡན་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་ཆེད་ཡིན་པ་རེད།
ཚོགས་ཞུགས་རིགས་གཅིག་མཁས་ཅན་དང་མཁས་དབང་ཚོས་བོད་རིགས་ཀྱི་རྒྱན་གོས་ཀྱི་ལོ་རྒྱུས་འབྱུང་ཁུངས་དང་རིག་གནས་ཀྱི་ནང་དོན་དང་བཟོ་རྩལ་གྱི་ཁྱད་ཆོས་སོགས་ཐད་སྤེལ་རེས་གཏིང་ཟབ་གནང་ནས་བོད་རིགས་ཀྱི་རྒྱན་གོས་ཀྱི་འཕེལ་ཕྱོགས་དང་འབྱུང་འགྱུར་ལ་རྒྱང་ལྟ་བྱ་རྒྱུར་ཐུན་མོང་ཐོག་ཞིབ་གྲོས་གནང་བ་རེད། རིགས་གཅིག་མཁས་ཅན་ཚོས་བོད་རིགས་ཀྱི་རྒྱན་གོས་ཀྱི་སྲོལ་རྒྱུན་བཟོ་རྩལ་དང་ཐུན་མོང་མ་ཡིན་པའི་ཁྱད་ཆོས་ནི་ཀྲུང་ཧྭ་མི་རིགས་ཀྱི་རྩ་ཆེའི་རིག་གནས་ཤུལ་བཞག་ཡིན་པས་སྲུང་སྐྱོང་དང་རྒྱུན་འཛིན་གང་ལེགས་བྱེད་དགོས། དེ་དང་ཆབས་ཅིག་དུས་རབས་འཕེལ་རྒྱས་དང་སྤྱི་ཚོགས་ཡར་རྒྱས་འགྲོ་བ་དང་ཆབས་ཅིག་བོད་རིགས་ཀྱི་རྒྱན་གོས་ཀྱང་དུས་བསྟུན་འཕེལ་རྒྱས་དང་རྒྱུན་ཆད་མེད་པར་གསར་གཏོད་བྱས་ཏེ་དེང་རབས་འཛད་སྤྱོད་པའི་དགོས་མཁོ་སྐོང་དགོས་པའི་ངོས་འཛིན་གཅིག་མཐུན་གནང་བ་རེད། དེར་བརྟེན་ཇི་ལྟར་བྱས་ནས་སྲོལ་རྒྱུན་རྒྱུན་འཁྱོངས་བྱེད་པའི་རྨང་གཞིའི་ཐོག་གསར་གཏོད་འཕེལ་རྒྱས་གཏོང་རྒྱུ་ནི་བོད་རིགས་ཀྱི་རྒྱན་གོས་རིག་གནས་ལ་འཕྲད་པའི་ཞིབ་འཇུག་བྱ་གཞི་གལ་ཆེན་ཞིག་ཡིན།
གནད་དོན་དེར་དམིགས་ནས་ཚོགས་ཞུགས་རིགས་གཅིག་མཁས་ཅན་རྣམ་པས་ཕུགས་ཕན་རང་བཞིན་ལྡན་པའི་གྲོས་འགོ་མང་པོ་བཏོན་གནང་བ་རེད། ཕྱོགས་གཅིག་ནས་བོད་རིགས་ཀྱི་རྒྱན་གོས་སྲོལ་རྒྱུན་བཟོ་རྩལ་སྲུང་སྐྱོང་དང་རྒྱུན་འཛིན་བྱ་རྒྱུར་ཤུགས་སྣོན་རྒྱབ་སྟེ་མངོན་མིན་རིག་གནས་ཤུལ་བཞག་གི་རྒྱུན་འཛིན་པ་གསོ་སྦྱོང་དང་སྲོལ་རྒྱུན་བཟོ་རྩལ་འགྲན་བསྡུར་ཆེན་མོ་གཉེར་བ་སོགས་ཀྱི་རྣམ་པའི་ཐོག་ནས་སྲོལ་རྒྱུན་བཟོ་རྩལ་གྱི་སྐད་གྲགས་ཆོད་ཚད་དང་ཤུགས་རྐྱེན་ཐེབས་ཤུགས་ཆེ་རུ་གཏོང་དགོས་པ་དང་། ཕྱོགས་གཞན་ཞིག་ནས་ཁེ་ལས་དང་ཇུས་འགོད་པས་སྲོལ་རྒྱུན་གྱི་གཞི་རྒྱུ་རྒྱུན་འཁྱོངས་བྱེད་པའི་རྨང་གཞིའི་ཐོག་དེང་རབས་ཀྱི་ཇུས་འགོད་འདུ་ཤེས་དང་ཚན་རྩལ་བྱ་ཐབས་སྤྱད་དེ་གསར་གཏོད་བྱ་རྒྱུར་སྐུལ་མ་བཏང་ནས་བོད་རིགས་ཀྱི་རྒྱན་གོས་ཀྱི་དར་སྲོལ་ཚོར་སྣང་དང་ཉེར་སྤྱོད་རང་བཞིན་ཆེ་རུ་གཏོང་དགོས།
གཞན་ཡང་ཚོགས་ཞུགས་རིགས་གཅིག་མཁས་ཅན་གྱིས་ད་དུང་ཇི་ལྟར་བྱས་ནས་བོད་རིགས་ཀྱི་རྒྱན་གོས་ཐོན་ལས་ཚད་ལྡན་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་རྒྱུའི་ཐད་ཞིབ་གྲོས་གཏིང་ཟབ་གནང་བ་སྟེ། རིགས་གཅིག་མཁས་ཅན་དང་མཁས་དབང་རྣམ་པས་འབྲེལ་ཡོད་ཁྲིམས་སྲོལ་དང་ཚད་གཞི་འཛུགས་པ་དང་འཐུས་སྒོ་ཚང་དུ་གཏོང་བ་དང་། ཚོང་རའི་སྒྲིག་ལམ་ཚད་ལྡན་དུ་གཏོང་བ། ཆས་ཡ་མ་གཟུགས་གྱོན་པ་དང་པར་ར་མ་ལུག་རྒྱག་མཁན་གྱི་བྱ་སྤྱོད་ལ་རྡུང་རྡེག་གཏོང་བ། ཤེས་བྱའི་ཐོན་དངོས་བདག་དབང་སྲུང་སྐྱོང་བྱེད་པ། རྒྱ་ཆེའི་ཡུལ་སྐོར་བར་ཚད་ལྡན་གྱི་ཁྲིད་སྟོན་བཅས་བྱ་དགོས་པའི་ངོས་འཛིན་གཅིག་མཐུན་གནང་བ་དང་། དུས་མཚུངས་སུ་ལས་རིགས་རང་གཅུན་བྱེད་ཤུགས་ཆེ་རུ་གཏོང་བ་དང་། ཐོན་རྫས་ཀྱི་སྤུས་ཚད་དང་ཞབས་ཞུའི་ཆུ་ཚད་མཐོ་རུ་བཏང་ནས་ལས་རིགས་ཀྱི་གཟུགས་བརྙན་བཟང་པོ་འཛུགས་དགོས་ཞེས་གསུངས་པ་རེད། ད་ཐེངས་ཀྱི་ཞིབ་གྲོས་ཚོགས་འདུ་བདེ་བླག་ངང་གཉེར་བ་དེས་བོད་རིགས་ཀྱི་རྒྱན་གོས་རིག་གནས་ཀྱི་ཉམས་འགྱུར་སྲུང་སྐྱོང་དང་། ཁྱད་ཆོས་རྒྱུན་འཛིན། ལེགས་ཆ་གསར་གཏོད། ཐོན་ལས་འཕེལ་རྒྱས་བཅས་ལ་བསམ་ཕྱོགས་དང་བློ་སྒོ་ཕྱེ་ཡོད།
འབྲེལ་ཡོད་འོས་སྦྱོར།
