བག་མ་གནས་ལ་འགྲོ་སྐབས་བག་ངུ་འཐེན་པ།

     ཉིན་དེའི་ཞོགས་པའི་སྐྱ་རེངས་ཤར་མ་ཐག་མ་སྲུ་རྣམས་ཀྱིས་བག་མ་མལ་ལས་སློང་ཞིང་། བག་མ་མལ་ལས་ངུ་ངག་འདྲེས་མའི་ངུ་བ་ལ་མ་སྲུ་ཞིག་གིས་སྙན་མོ་དབྱངས་ཀྱི་འགྱུར་ཁུག་དང་ལྡན་པའི་ངང་ནས་བག་ངུ་ཅོ་གའི་དྲུག་འགྱུར་འཐེན་བཞིན་འདུག
                  བུ་མོ་མ་ཉལ་ཡར་ལ་ལོངས། །
                  ཡར་ལ་ལོངས་ང་གནས་ལ་སོང་། ། 
                  བྱ་ངང་བ་སྐྱེས་སྐྱེས་བྲག་ནས་སྐྱེས། །
                  བྲག་ནས་སྐྱེས་ཏེ་མཚོ་ནས་རྒས། །
                  མ་བུ་མོ་སྐྱེས་སྐྱེས་ཡུལ་ནས་སྐྱེས། །
                  ཡུལ་ནས་སྐྱེས་ཏེ་གནས་ནས་རྒས། །
                  ད་མ་ངུ།  མ་ངུ་ཡར་ལ་ལོངས། །
                  ཡར་ལ་ལོངས་ང་གནས་ལ་སོང་། ། 
                  དེ་རིང་ཉི་ཤར་རྩེ་མོ་ལ། །
                  རྐང་ཡོབ་ལ་བཞག་ནས་ལམ་ལ་ཆས། །
                  གནས་ཟེར་བ་རང་གི་རྒས་ཡུལ་ཡིན། །
                  ཡུལ་དེ་ནས་རྒས་ན་ཚོགས་བསགས་ཡིན། །
                  ད་མ་ངུ།  མ་ངུ་ཡར་ལ་ལོངས། །
                  ཡར་ལ་ལོངས་ང་གནས་ལ་སོང་། ། 
                  དེ་རིང་བཀྲ་ཤིས་ཉི་མ་ལ། །
                  མགོར་ཝ་མོར་གྱོན་ནས་ལམ་ལ་ཆས། །
                  གནས་ཟེར་བ་རང་གི་མལ་ཡུལ་ཡིན། །
                  མལ་དེ་ནས་སྐྱིད་ན་བདེ་བ་ཡིན། །
                  ད་མ་ངུ།  མ་ངུ་ཡར་ལ་ལོངས། །
                  ཡར་ལ་ལོངས་ང་གནས་ལ་སོང་། ། 
                  དེ་རིང་ཉི་མའི་གོང་རོལ་ལ། །
                  གོས་ཚར་ལྭ་གོན་ནས་ལམ་ལ་ཆས། །
                  གནས་ཟེར་བ་རང་གི་སྐྱིད་ཡུལ་ཡིན། །
                  ཡུལ་དེ་ནས་སྐྱིད་ན་བསོད་ནམས་ཆེ། །
                  ད་མ་ངུ།  མ་ངུ་ཡར་ལ་ལོངས། །
                  ཡར་ལ་ལོངས་ང་གནས་ལ་སོང་། །
      ཅེས་བག་ངུ་འཐེན་ཞོར་ཡར་ལ་ལངས་སུ་བཅུག་ནས་གཉེན་ཚང་གི་གྱོན་ཆས་དང་འདོགས་ཆ་ཚང་མ་བཏགས་ཏེ་གནས་ལ་ཆས་པའི་སྟ་གོན་བྱེད།