འོ་མ་འཇོ་དུས་སྒྲོལ་མ་འགུག་པའི་སྲོལ།
སྔོན་གྱི་དུས་ཤིག་ན། ང་ཚོའི་ཁ་བ་ཅན་དུ་གཙོ་བོ་ཕྱུགས་ཟོག་ལ་བྱུང་དྲགས་པའི་ནད་རིགས་ཏེ “རི་བྱི”དང“གེག”ཅེས་པ་བྱུང་ཏེ། ཉིན་ཞིག ཁྱིམ་ཚང་ཞིག་གི་ནོར་ལྷས་ན་བུད་མེད་ཅིག་གིས་འབྲུ་མོའི་འོ་མ་བཞོ་བཞིན་པ་དེ“རི་བྱི”དང“གེག”གཉིས་ཀྱིས་མཐོང་ནས་དེ་ལ་གནོད་ཅིག་སྐྱེལ་བར་གྲོས་འཆམ་སྟེ། གཅིག་གིས་གཅིག་ལ “ཁྱོད་སོང”ཞེས་ཡང་ཡང་བསྒོས་མཐར། “རི་བྱི”འགྲོ་བར་ཐག་བཅད་པས། “རི་བྱི”བུད་མེད་དེས་འབྲུ་མོ་བཞོ་བཞིན་པའི་གམ་དུ་སོང་བ་མ་ཟད། འབྲུ་མོའི་རྔ་མའི་ནང་དུ་རེག་པ་འགའ་བྱས་པས། འབྲུ་མོས་ཚོར་ཏེ་བཞོ་ཟེའུ་ལ་ཕྲ་ཞིག་བཏབ་པའི་རྐྱེན་གྱིས་ཟེའུ་ནང་གི་འོ་མ་ཉུང་ཤས་ཙམ་ས་ལ་འཕྱོ་སོང་བས། བུད་མེད་སེར་སྣའི་དབང་གིས་དྲག་ཏུ་ཁྲོས་ཤིང་འབྲུ་མོའི་གསུས་པར་ཤུགས་གང་ཡོད་ཀྱིས་ཁུ་ཚུར་འགའ་བཞུས་པ་མ་ཟད། ཁ་ནས་ཀྱང “རི་བྱི་བྱུང་རྒྱུ་མ”ཞེས་སྡུག་མོ་གང་བྱུང་དུ་བཏོན་པས། “རི་བྱི”ཡི་འདོད་ཐོག་ནས་རྟ་བརྒྱུགས་པ་ལྟར་འབྲུ་མོ་དེ་དེ་མ་ཐག་ “རི་བྱི”ཡིས་ཤི་སོང་བ་རེད།
ཉིན་ཞིག ཡང་བུད་མེད་ཅིག་གིས་ནོར་ཁུལ་དུ་མཛོ་མོ་ཞིག་བཞོ་བཞོན་པ “རི་བྱི”དང“གེག”གཉིས་ཀྱིས་མཐོང་ནས། “རི་བྱི”“གེག”ལ་བཤད་རྒྱུར། “ད་ནི་གནོད་སྐྱེལ་གྱི་འགན་ཁུར་དེ་ཁྱོད་ཀྱི་མགོར་བབས་ཡོད་པས། ད་ལྟ་ཉིད་དུ་འགྲོ་དགོས”ཞེས་བཀའ་ཕབ་པས། “གེག”ཀྱང་མི་འགྲོ་ཀ་མེད་དུ་གྱུར། དེ་ནས་“གེག”གིས་ཀྱང“རི་བྱི”ལྟར་བཞོ་བཞིན་པའི་མཛོ་མོ་དེའི་རྔ་མའི་སྣེར་རེག་པ་ཙམ་བྱས་པ་དེས་མཛོ་མོ་དྲག་ཏུ་འདྲོགས་ཏེ་སྣ་ནས་བོའུ་སྐད་ཅིག་གྲག་པ་དང་མཉམ་དུ་ཐོག་འདྲ་བའི་ཕྲ་ཞིག་བཏབ་པས། བུད་མེད་གན་རྐྱལ་དུ་བསྒྱེལ་བ་མ་ཟད་ཕྲ་དེ་བཞོ་ཟེའུ་ཡི་ནང་དུ་འཁེལ་བས། ཟེའུ་ཞབས་ཕུད་ཅིང་འོ་མ་ཡོད་ཚད་ས་ལ་བསྲེས་སོང་། ཡིན་ན་ཡང་། བུད་མེད་དེ་ཁྲོ་བ་ཕྲན་ཙམ་མེད་པར“གཡང་ལ་མ་འདི། ཡང་སྔོན་འདི་འདྲ་ཞིག་མིན་པས། ད་ཅི་མ་ལེགས་སམ”ཟེར་བཞིན། “ཨྃ་རྗེ་བཙུན་འཕགས་པ་སྒྲོལ་མ་ལ་ཕྱག་འཚལ་ལོ”ཞེས་སྒྲོལ་མ་དབྱངས་ཀྱི་རྟ་ལ་དྲངས་ཏེ་ཡང་བསྐྱར་མཛོ་མོ་བཞོ་བར་བརྩམས། ཁོ་མོས་ངག་ལ་སྐྱོར་བཞིན་པའི་རྗེ་བཙུན་འཕགས་མ་སྒྲོལ་མའི་བྱིན་རླབས་ཀྱིས“གེག”དེ་དེ་མ་ཐག་དམ་ལ་བཏགས་པས་གཞན་ལ་གནོད་སྐྱེལ་མ་ཐུབ་པ་ཞིག་ཏུ་གྱུར་སོང་བས། ད་ལྟའང“གེག”ནད་དེ“རི་བྱི”ལྟ་བུར་ཁྱབ་ཆེ་བ་ཞིག་མིན་པའང་དེ་ལ་ཐུག་ཟེར་རོ།།
