ཨ་མདོ་ཆབ་འགག་ཡུལ་གྱི་མདའ་རྩེད།
དེ་ཡང་མདའ་ཞེས་པའི་ཐ་སྙད་འདི་མི་ཡུལ་ཁམས་སུ་ཁྱབ་ནས་བགྲང་བྱ་ག་ཚོད་འདས་པ་སུས་ཀྱང་ཁ་ཚོན་ངེས་ཅན་ཞིག་གཅོད་དཀའ་ཡང༌། སྔོན་བྱོན་མཁས་པ་དམ་པ་རྣམས་ཀྱིས་བརྩམས་པའི་ལོ་རྒྱུས་དེབ་ཐེར་ཆེན་པོ་སྟེ། དཀར་དང་དམར་སེར་བཅས་སུ་གསལ་བ་ལྟར་ན། བོད་འདིར་གདོད་མའི་སྤྱི་ཚོགས་ཀྱི་སྐབས་ནས་བཟུང་མདའ་མདུང་གྲི་གསུམ་གྱི་མཚོན་ཆ་དར་མྱོང་བར་བརྟེན། ད་ལྟ་མ་མཐའ་ཡང་བགྲང་བྱ་སྟོང་ཕྲག་འགའི་ལོ་རྒྱུས་ཡོད་པ་བསྙོན་དུ་མེད། ཉག་ཕྲན་མདའ་མོ་འདི་བོད་རང་ལ་དར་བ་ཤིན་ཏུ་སྔ་བར་མ་ཟད། མི་རིགས་གཞན་པ་སྟེ་རྒྱ་རིགས་དང་སོགས་རིགས་བཅས་ལ་ཡང་དར་བ་ཧ་ཅང་སྔ་བ་ལགས། ད་དུང་ཕྱི་གླིང་པ་ལའང་གནའ་སྔ་མོ་ནས་དར་ཡོད་པ་ཡང་ལོ་རྒྱུས་ཀྱི་དེབ་ཐེར་མང་པོ་ལས་ཤེས་ཐུབ། ལྷག་པར་དུ་རྒྱ་རིགས་ལ་ཆ་མཚོན་ན་དུས་སྔ་མོ་ནས་དར་རྒྱ་དང་བཀོལ་རྒྱ་ཆེ་བ་ཡང《རྒྱལ་ཁབ་གསུམ་གྱི་གཏམ་རྒྱུད》དང《ཆུ་ངོགས་གཏམ་རྒྱུད》སོགས་ཀྱི་སྒྲུང་གཏམ་ལས་གསལ་ལེར་མཐོང་ཐུབ་པ་ལགས། མི་རིགས་གང་ཡིན་ཡང་རང་གི་མི་རིགས་དེ་གྲུབ་པའི་བརྒྱུད་རིམ་ནང་དུ་རང་བྱུང་གིས་གྲུབ་པའི་རྡོ་དང་དབྱུག་པ་ལག་ཆར་བགྱིས་མྱོང་བ་ལས་གཞན། ཐོག་མའི་མཚོན་ཆ་དེ་ནི་མདའ་མདུང་གྲི་གསུམ་ཡིན་པ་ཁས་མ་བླངས་ན་མི་ཆོག་སྙམ། དེ་ཡང་གནའ་རབས་སུ་འཐབ་འཁྲུག་གང་བྱུང་བ་དེའི་སྟེང་དུ་བཀོལ་སྤྱོད་བྱེད་པའི་མཚོན་ཆ་གཙོ་བོ་ཡངས་མདའ་མདུང་གི་གསུམ་དང་ཞགས་པ་སོགས་ཡིན་ལ། དཔེར་ན། བོད་རིགས་རང་གི་བློ་གྲོས་ཀྱི་རྩལ་ལས་ཐོན་པའི་ལོ་རྒྱུས་བརྗོད་པའི་སྙན་རྩོམ་རིང་མོ་གླིང་རྗེ་གེ་སར་རྒྱལ་པོའི་སྒྲུང་གི་བརྗོད་དོན་ལྟར་ནའང༌། གླིང་གེ་སར་རྒྱལ་པོ་དང་དཔའ་རྟུལ་སུམ་ཅུ་ཐམས་ཅད་ཀྱིས་རང་གི་འཁོར་གསུམ་མདའ་མདུང་གྲི་གསུམ་ལ་བརྟེན་ནས་ཕྱོགས་བཞིའི་དགྲ་བཞི་དང་རྫོང་ཆེན་བཅོ་བརྒྱད་ཆམ་ལ་ཕབ་པ་ཡིན། གཞན་ཡང་བོད་བཙན་པོའི་སྐབས་སུ་བྱུང་བའི་གཡུལ་འགྱེད་སོ་སོའི་སྟེང་དུ་བཀོལ་བའི་མཚོན་ཆ་གཙོ་བོ་དེ་ཡང་མདའ་མདུང་གྲི་གསུམ་ཡིན་ལ། ལྷ་ལུང་དཔལ་གྱི་རྡོ་རྗེ་གླང་དར་མ་འདུལ་བའི་སྐབས་སུ་བཀོལ་བའི་མཚོན་ཆ་ཡང་སྒྲོ་ལྡན་མདའ་ཡིན་པ་ཚང་མས་ཤེས་གསལ་ལྟར་རོ།།
ཕྱིས་སུ་མི་རིགས་གང་དང་གང་ཡིན་ཡང་སྤྱི་ཚོགས་ཀྱི་འཕེལ་འགྱུར་དང་བསྟུན་ནས་ཐོན་སྐྱེད་ནུས་ཤུགས་ཇེ་ལེགས་དང་ཚན་རིག་ལག་རྩལ་ཇེ་མཐོར་སོང་བའི་བརྒྱུད་རིམ་ཁྲོད་ཐོན་སྐྱེད་ཡོ་བྱད་དང་དགྲ་འགོག་གི་མཚོན་ཆ་སོགས་ལ་མཚོན་ནའང་མེད་པ་ནས་ཡོད་པ་དང༌། ཆུང་བ་ནས་ཆེ་བ། རྗེས་ལུས་ནས་སྔོན་ཐོན་ཕྱོགས་སུ་གོམ་ཁ་སྤོས་པའི་རྐྱེན་གྱིས་གཡུལ་འགྱེད་སྐབས་སུ་མདའ་མདུང་གྲི་གསུམ་གྱི་བཀོལ་རྒྱ་ཡང་ཇེ་ཆུང་དུ་གྱུར་པར་བརྟེན། མཚོན་ཆའི་ནུས་པ་རིམ་གྱིས་ཤོར་ཞིང་དམསང་ཁྲོད་ཀྱི་སྤྲོ་རྩེད་བྱེད་པའི་ལག་ཆ་ཞིག་ཏུ་གྱུར་པས། མི་རྣམས་ཀྱིས་རང་ཤུགས་སུ་མདའ་རྩེད་ཅེས་པའི་མིང་ཚིག་འདི་གསར་བཟོ་བགྱིས་པ་ལགས། སྐབས་དེ་ནས་བཟུང་མདོ་སྨད་ཕྱོགས་ཀྱི་རོང་སྡེ་ཕལ་མོ་ཆེར་རྟ་རྒྱུག་མདའ་འཕེན་གྱི་སྲོལ་ཆགས་ཤིང༌། ལོ་རེའི་རྒྱ་ལོ་དང་དབྱར་ཟླ་དྲུག་པའི་ནང་དུ་མདའ་རྩེད་ཀྱི་དགའ་མགུའི་དཔལ་ལ་རོལ་བཞིན་པ་ནི་ད་ལྟའི་བར་རྒྱུན་ཆད་མ་མྱོང་ངོ་唰
མདའ་ལ་ཡང་རིགས་མང་སྟེ་གསེར་ལྟོང་མ་དང༌། དངུལ་ལྟོང་མ། དུང་ལྟོང་མ་བཅས་ཡོད་ལ། དེའི་རྒྱུ་མཚན་ཡང་མདའི་ལྟོང་གསེར་གྱིས་བརྒྱན་པ་ན་གསེར་ལྟོང་མ་ཟེར་བ་དང༌། མདའི་ལྟོང་དངུལ་གྱིས་བརྒྱན་པ་ན་དངུལ་ལྟོང་མ་ཟེར། ད་དུང་མདའ་མོ་དགོད་སྒྲོ་མ་དང༌། འུག་སྒྲོ་མ། ཁྲ་སྒྲོ་མ་ཟེར་སྲོལ་ཡང་ཡོད། དེའི་རྒྱུ་མཚན་ཡང་རྒོད་སྒྲོས་བསྟད་པའི་མདའ་མོར་རྒོད་སྒྲོ་མ་ཟེར་བ་དང༌། འུག་སྒྲོས་བསྟད་པའི་མདའ་མོ་ལ་འུག་སྒྲོ་མ་ཟེར་ལ། ཁྲ་སྒྲོས་བསྟད་པའི་མདའ་མོ་ལ་ཁྲ་སྒྲོ་མ་ཟེར་རོ།། དམངས་ཁྲོད་ཀྱི་བཤད་སྲོལ་ལྟར་ན། རྒོད་སྒྲོ་མ་དེ་ཤུགས་ཆེ་ལ་རྒྱང་ཆོད་པ་དང༌། འུག་སྒྲོ་མ་དེ་མཚན་མོར་འཕངས་ན་གནད་ལ་ཕོག་ཐུབ་པ། ཁྲ་སྒྲོ་མ་དེ་མྱུར་ལ་རྣོ་བའི་ཁྱད་ཆོས་ལྡན་པ་ཡིན་སྐད། གཞན་ཡང་མདའ་གཞུའི་རིགས་ལ་ལྕགས་མདའ་དང་ལྕགས་གཞུ། སྨྱུག་མདའ་དང་སྨྱུག་གཞུ། སྐྱེར་མདའ་དང་སྐྱེར་གཞུ་ཞེས་པ་ཡང་བྱུང་ཞིང༌། ཕྱིས་སུ་དར་ཁྱབ་ཤིན་ཏུ་ཆེ་བ་ནི་གསོམ་དཀར་གྱི་མདའ་དང་འབྲོང་རྭའི་གཞུ་ཡིན། དམངས་ཁྲོད་ཀྱི་ངག་སྒྲོས་ལ་ཡང༌། ནང་ཨ་ཁུ་བཟང་བའི་བཀའ་དྲིན་ལ唰འབྲོང་རྭ་སྨུག་པོ་གཞུ་ལ་བཀུག ། ནང་བུ་ཚ་ཡོང་ན་འཕེན་རྐྱང་ཡིན།། ཟེར་བ་བཞིན་རྭ་གཞུ་ཐམས་ཅད་འབྲོང་རྭ་འབའ་ཞིག་ཡིན་པ་སུས་ཀྱང་ཁ་ཚོན་གཅོད་དཀའ་མོད། འོན་ཏེ་རྭ་ཅོའི་གཞུ་ཡིན་པ་སུས་ཀྱང་ཁས་ལེན་བཞིན་འདུག རྭ་གཞུ་དེ་སྨྱུག་གཞུའམ་སྐྱེར་གཞུ་དང་མི་འདྲ་སྟེ། མདའ་འཕེན་མཁན་ལ་ཤུགས་ཅུང་ཆེ་བ་མེད་ན་གཞུ་རྒྱུད་འཐེན་དཀའ་ལ། འཐེན་ཐུབ་པའི་དབང་དུ
