ཨ་མདོ་ཆབ་འགག་ཡུལ་གྱི་དུས་སྟོན་ལབ་རྩེ་ཆབ་རིལ།
དེ་ཡང་ཆབ་འགག་ཅེས་པའི་ཡུལ་གྲུ་འདི་ནི་སྟོད་ན་རི་རབ་ཀྱི་དབུ་འཕང་རྣམ་པར་མཐོ་བའི་དཀར་ཕྱོགས་སྐྱོང་བའི་བློན་པོ་གསེར་ཆེན་ལྷུན་ཞིང་བརྗིད་པར་ཆགས་ཤིང༌། ཤར་དུ་ཡིད་བཞིན་གྱི་ནོར་བུ་ཁྲི་འབུམ་མང་པོ་ལྷན་དུ་སྤུངས་པ་ལྟ་བུའི་བ་ཝོ་དུང་རི་དཀར་པོ་ལྷང་ངེར་མངོན་པ། ནུབ་ཏུ་བདུད་སྡེ་མ་ལུས་ཟིལ་གྱིས་གནོན་པ་ལྟ་བུའི་དཔའ་རྟུལ་རྫ་རྒན་ཁྲོས་པའི་ཚུལ་གྱིས་འགྱིང་བ། མདུན་དུ་འགྲོ་བ་སེམས་ཅན་ཡོངས་ཀྱི་ཚ་བའི་སྡུག་བསྔལ་སེལ་བའི་རྨ་ཀླུང་གངྒའི་སྲིང་མོ་དལ་གྱིས་དབང་ཕྱོགས་ཡུལ་དུ་འབབ་པ། དབུས་སུ་མདོ་སྔགས་ཟུང་དུ་འབྲེལ་བའི་འཇམ་མགོན་བླ་མའི་ལུགས་བཟང་དྲི་མས་མ་གོས་པར་འཛིན་སྐྱོང་སྤེལ་གསུམ་བགྱིད་པའི་ཆབ་འགག་དགོན་གསར་བཀྲ་ཤིས་ཐེག་མཆོག་གླིང་ཞེས་པ་མིག་གི་དགའ་སྟོན་དུ་གྱུར་པ་དང༌། དེར་མ་ཟད་ད་དུང་སྣོད་བཅུད་འཛོམས་པའི་ཡུལ་ཁམས་འདི་རུ་བོད་གངས་ཅན་གྱི་ཉི་ཟླ་ལྟ་བུའི་སྔོན་བྱོན་སྐྱེས་བུ་དམ་པ་དུ་མ་སྟེ། བཙན་པོ་ཁྲི་རལ་པ་ཅན། ས་སྐྱ་ཀུན་དགའ་རྒྱལ་མཚན། འགྲོ་མགོན་འཕགས་པ། རྒྱལ་པ་སྐུ་ཕྲེང་གསུམ་པ་བསོད་ནམས་རྒྱ་མཚོ། རྒྱལ་དབང་སྐུ་ཕྲེང་ལྔ་བ་བློ་བཟང་རྒྱ་མཚོ། སྐུ་ཕྲེང་དྲུག་པ་ཚངས་དབྱངས་རྒྱ་མཚོ། རྒྱལ་བ་སྐུ་ཕྲེང་བཅུ་གསུམ་པ་ཐུབ་བསྟན་རྒྱ་མཚོ། པཎ་ཆེན་སྐུ་ཕྲེང་བཅུ་བ་ཆོས་ཀྱི་རྒྱལ་མཚན་སོགས་དང༌། རང་རེའི་མཚོ་སྔོན་ནས་སྐུ་འཁྲུངས་པའི་མཁས་པའི་དབང་བོ་སྐྱབས་མགོན་ཚོགས་དྲུག་རང་གྲོལ། ཀ་རྒྱ་ཆབ་རིལ། ཨ་རིག་དགེ་བཤེས་ཆེན་པོ། རྡོ་སྦིས་དགེ་བཤེས་རིན་པོ་ཆེ། སྐུ་གཞོགས་ཨ་རོལ་ཚང་བཅས་དམ་པ་མང་པོས་བྱིན་གྱིས་བརླབས་ཤིང་ཞབས་ཀྱིས་བཅགས་མྱོང་བའི་གནས་འགངས་ཆེན་ཞིག་ལགས་པ་སུས་ཀྱང་ཤེས་གསལ་ལྟར་རོ། །
དེ་ཡང་སྔོན་མཁས་ཆེན་དམ་པ་རྣམས་ཡུལ་འདི་རུ་ཕེབས་པའམ་བརྒྱུད་ནས་འགྲོ་བའི་སྐབས་སུ། དགོན་པ་བཏབ་པ་དང་ལབ་རྩེ་བསྟད་པ། མཆོད་རྟེན་བཞེངས་པ་སོགས་ཀྱི་ལོ་རྒྱུས་ཡིག་ཆ་དང་གནས་ཤུལ་གང་མང་ཞིག་ད་ལྟ་མིག་གི་སྤྱོད་ཡུལ་དུ་གྱུར་ཐུབ་ན་ཡང༌། གནའ་ནས་ད་ལྟའི་བར་རྒྱུན་མ་ཆད་པ་དང་མ་ཉམས་པར་རྒྱུན་སྐྱོང་བཞིན་པའི་ཆབ་འགག་ཡུལ་གྱི་ལབ་རྩེ་ཆབ་རིལ་ལྟ་བུ་ ནི་ཉུང་ཙམ་ལགས་སོ། །དེའི་ཕྱིར། གཤམ་དུ་ལམ་རྩེ་ཆབ་རིལ་ཞེས་པ་བརྗོད་བྱའི་སྙིང་བོར་བཞག་ནས་ཅུང་ཙམ་སྤྲོས་ན། གནས་བཟང་ཆབ་ཆ་མར་ཁུའི་མཚོ་མོར་འབོད་པའི་གྲོང་བརྡལ་ཆེན་པོའི་སྟོད་ན། ཆབ་འགག་དགོན་གསར་བཀྲ་ཤིས་ཐེག་མཆོག་གླིང་གི་ཕང་བ་རུ། བདེ་ཞིང་ཁོད་སྙོམས་པའི་ལབ་རྩེ་ཆབ་རིལ་ཐང་ཞེས་པའི་མེ་ཏོག་སྣ་བརྒྱ་རྣམ་པར་བཞད་ཅིང༌། ལེགས་ཚོགས་ནོར་བུའི་འོད་འབར་བ། ལུས་ཅན་ཀུན་ལ་ཕན་པའི་དཔལ་སྟེར་བའི་སའི་སྙིང་བོ་དེར། ལོ་རེའི་དབྱར་གསུམ་གྱི་རང་བྱུང་སྐྱེལ་མོས་ཚལ་རྣམ་པར་མཛེས་པའི་དུས་བཟང་ཧོར་ཟླ་དྲུག་པའི་ཚེས་བཅུ་བདུན་ནས་བཅུ་དགུའི་བར་ཆབ་འགག་ཡུལ་གྱི་སྡེ་ཆེན་གསུམ་སྟེ། རྒྱ་ར་ལྷ་སྡེ་དཀར་པོ་དང་ཨར་སྟི་གཡང་ས་གོར་མོ། དུམ་པ་བཀྲ་ཤིས་འཁྱིལ་བ་བཅས་གཙོ་མཛད་པའི་སྡེ་བ་ཆེ་འབྲིང་ཆུང་གསུམ་བཅུ་ལྷག་ཅིག་གི་རྒན་དར་གཞོན་གསུམ་གྱི་སྐྱེ་བོ་ཀུན་གྱིས་ལུས་ལ་ཤོམ་ལྭ་གསར་བ་གྱོན་ཏེ་མ་བོས་རང་ཤུགས་སུ་ལབ་རྩེ་ཆབ་རིལ་ཐང་དུ་འཛོམས་ཏེ། ཐོག་མར་སྐྱེས་པ་རྣམས་ཀྱིས་ལབ་རྩེ་བསྟོད་པ་དང་ལྷ་བསང་གཏོང་བ། རིམ་གྱིས་རྟ་རྒྱུག་མདའ་འཕེན། གླུ་ལེན་གར་རྩེད་བཅས་ཀྱི་དགའ་སྟོན་ལ་རོལ་པ་ནི་གནའ་ནས་ད་ལྟའི་བར་འཆོལ་མེད་གོམས་སྲོལ་ཞིག་ཏུ་གྱུར་ཡོད།
དང་པོ། ཐོག་མའི་བྱུང་རིམ།
ཆབ་འགག་ཡུལ་གྱི་ལབ་རྩེ་ཆབ་རིལ་ཞེས་པ་འདི་དང་ཐོག་ཇི་ལྟར་བྱུང་བའི་བརྒྱུད་རིམ་སྐོར་རགས་ཙམ་བརྗོད་ན། དེ་ཡང་ཐོག་མར་ལབ་རྩེ་ཆབ་རིལ་ཞེས་པའི་མིང་འདིའི་འབྱུང་ཁུངས་གསལ་བོར་མ་བརྗོད་ན་མི་ཆོག་པར་བརྟེན། འདིར་ལབ་རྩེ་ཆབ་རིལ་ཞེས་པའི་མིང་གི་ཐོགས་དོན་ངོ་སྤྲོད་ཙམ་བགྱིད་ན། བགྲང་བྱ་བརྒྱ་ཕྲག་དུ་མའི་སྔོན་ལ་ཀ་རྒྱ་ཆབ་རིལ་ཟེར་བའི་སྐྱེས་བུ་དམ་པ་ཞིག་མཆིས་པ་དེ། ད་ལྟའི་དཔའ་ལུང་ཀ་རྒྱ་ཟེར་བའི་ལྷ་སྡེ་རུ་སྐྱེས་པས་ཀ་རྒྱ་ཐོགས་ཤིང༌། ཆུང་བའི་དུས་ནས་རབ་ཏུ་བྱུང་སྟེ་བྱ་ཁྱུང་དགོན་པར་ཞུགས་ནས་ཆོས་མདོ་སྔགས་གཉིས་ལ་སྦྱངས་པ་དཔྱིས་ཕྱིན་པ་གནང་བ་དང༌། ཕྱིས་སུ་དགོན་པའི་ཆབ་རིལ་གྱི་ལས་གནས་ཀྱང་ཁུར་བས་ཆབ་རིལ་ཞེས་པའི་མིང་ཡང་ཀ་རྒྱའི་རྗེས་སུ་ཐོགས་པ་བྱུང༌། དེ་བས་མི་རྣམས་ཀྱིས་ནམ་རྒྱུན་ཀ་རྒྱ་ཆབ་རིལ་ཞེས་འབོད་ཅིང༌། དུས་ཡུན་རིང་པོ་ཞིག་འདས་པས་ན་ཁོང་གི་མཚན་ལ་ཀ་རྒྱ་ཆབ་རིལ་ཟེར་བ་རང་ ཤུགས་སུ་འབྱོར་བའོ།།
དེ་ཡང་ཀ་རྒྱ་ཆབ་རིལ་བྱ་བར་འབོད་པའི་སྐྱེས་བུ་དེ་ཆབ་འགག་ཡུལ་གྱི་སའི་སྙིང་བོ་སྟེ། ཆབ་འགག་དགོན་གསར་བཀྲ་ཤིས་ཐེག་མཆོག་གླིང་ཞེས་པའི་དགོན་སྡེའི་འདབས་སུ་རྩྭ་ཆུ་གཉིས་ལྡན་གྱི་ཐང་ཆེན་གོས་སྔོན་ས་ལ་བཏིང་འདྲ་ཞིག་འདུག་པ་དེར་སླེབས
