མཆོད་རྟེན་གྱི་ལོ་རྒྱུས་བཤད་པ།
འབྲས་སྤུངས་དགོན་པའི་མཆོད་རྟེན།
མཆོད་རྟེན་ཞེས་པའི་ཐ་སྙད་ནི་གསུང་ལེགས་སྦྱར་སྐད་ཀྱི་སྟས་ཞེས་པ་ལས་འགྱུར་བ་སྟེ་མཆོད་པའི་ཞིང་ངམ་རྟེན་གྱི་དོན་ཡིན་པར་གསུངས་སོ།། སྤྱིར་སྣོད་ཀྱི་འཇིག་རྟེན་འདི་ཉིད་ཀྱང་རང་བཞིན་ལྷུན་གྱིས་གྲུབ་པའི་མཆོད་རྟེན་གྱི་རང་བཞིན་ཡིན་པར་གསུངས་ཏེ། དུས་འཁོར་ལས། རླུང་དང༌། མེ་དང༌། ཆུ་དང༌། ས་བཅས་ཀྱི་དཀྱིལ་འཁོར་བཞི་པོ་ནི་མཆོད་རྟེན་གྱི་བང་རིམ་དང༌། རི་རབ་བུམ་པ་དང༌། རི་རབ་ཀྱི་མགྲིན་པ་མན་བྲེ་དང༌། དེ་ཡན་ཆོས་འཁོར་ཆར་ཁེབས་ཀྱི་རྣམ་པར་གསུངས་ཤིང༌། རྡོ་རྗེ་བཀོད་པའི་རྒྱུད་ལས་ཀྱང༌། འདོད་ཁམས་དབང་གི་རི་བོ་ལ།། གཟུགས་ཁམས་བང་རིམ་ཁྲི་འཕང་ཅན།། གཟུགས་མེད་བུམ་རྟེན་བུམ་པ་བཅས།། ཞེས་དུས་འཁོར་དང་མཐུན་པར་སྣང་ངོ༌། དེ་ནས་ཕྱོགས་བཞི་བླ་ན་མེད་པའི་མཆོད་རྟེན་བཞི་ཡོད་པའི་བཞེད་ཚུལ་ལ། ཐིག་ལས་དབང་གི་རྒྱུད་ཅེས་པ་ལས། ཚད་མེད་བསམ་ཡས་ལས་བྱུང་འབྲས།། ཤར་དུ་བྱམས་པ་རྡོ་རྗེ་བརྩེགས།། ལྷོ་རུ་སྙིང་རྗེ་རིན་ཆེན་བརྩེགས།། ནུབ་ཏུ་དགའ་བ་པདྨ་བརྩེགས།། བྱང་དུ་བཏང་སྙོམས་རྒྱ་གྲམ་བརྩེགས།། རང་བྱུང་རིན་ཆེན་སྣང་བའོ།། ཞེས་གསུངས་པ་དང༌། བྱིན་རླབས་སྐུ་གདུང་ཆ་བརྒྱད་གླིང་བཞིར་ཡོད་ཚུལ་གསུངས་པའང་སྣང་སྟེ། འཁོར་ལོ་འབྱུང་བའི་རྒྱུད་ལས། ཤར་ལུས་འཕགས་གླིང་ན་བྱིན་ལྡན་སྙོམས་གཏེར་དང༌། མཐར་ལེགས་གཡུང་དྲུང་ཏོག་གཉིས། ལྷོ་འཛམ་བུ་གླིང་ན་ཐུགས་རྗེའི་སྤྲུལ་བ་དང༌། ཡིད་བཞིན་ལྷུན་གྲུབ་གཉིས། ནུབ་བ་ལང་སྤྱོད་ན་དཔེ་མེད་བསམ་འདས་དང༌། རྨད་གྲགས་ཆོས་དབྱིངས། བྱང་སྒྲ་མི་སྙན་ན་ཡོན་ཏན་རིན་ཆེན་བརྩེགས་དང༌། ཁམས་གསུམ་བདེ་རྒྱས་སྒྲོན་མེའི་མཆོད་རྟེན་གཉིས་བཅས་བཞུགས་པར་གསུངས་པ་དང༌། ཡང་ཧེ་རུ་ཀས་དྲག་པོ་ཆེན་པོ་བཏུལ་བའི་ཚེ་ཡུལ་བརྒྱད་ཀྱི་དུར་ཁྲོད་དུ། མ་མོ་བརྒྱད་ཀྱི་དངོས་གྲུབ་འབྱུང་བའི་མཆོད་རྟེན་བརྒྱད་བྱུང་བར་གསུངས་ཏེ། བདུད་རྩི་མཆོག་གི་རྒྱུད་ལས། རོ་ཡི་སྲུང་མ་ཆེན་མོ་ནི།། མ་མོ་ཆེན་མོ་བརྒྱད་བཞག་གོ །ཅེས་པ་སྟེ། མ་ག་དྷར་བདེ་བྱེད་དང༌། སིང་ག་ལར་རི་བོ་ཏཱ་ལ་དང༌། བལ་བོར་བྱ་ཁྲི་ཁ་ཤོར། སེང་གེའི་གླིང་དུ་གེའུ་དོན་ན། ལི་ཡུལ་དུ་གོ་མ་ས་ལ་གན་དྷ། ཁ་ཆེར་ཀ་ན་ཀ ཟ་ཧོར་དུ་བདེ་སྐྱིད་གཞོན་ནུའི་མཆོད་རྟེན་བཅས་དངོས་གྲུབ་འབྱུང་བའི་མཆོད་རྟེན་བརྒྱད་ཡོད་པར་གསུངས་སོ།། གཞན་ཡང་ཉན་ཐོས་དང༌། རང་རྒྱལ་དང་ཐེག་པ་ཆེན་པོ་གསུམ་གྱི་མཆོད་རྟེན་གྱི་བཀོད་པ་སོགས་མི་འདྲ་བ་བཞུགས་པ་དང༌། ཐེག་ཆེན་གྱི་ལུགས་ལའང༌། མགོན་པོ་ཀླུ་སྒྲུབ་ཀྱིས། ལྷུང་བཟེད་སྦུབ་པ་ལྟ་བུ་དང༌། ཁང་བཟང་ལྟ་བུ་དང་རྒྱལ་མཚན་ལྟ་བུ་སོགས་ཀྱི་མཆོད་རྟེན་བརྒྱད་བཞུགས་ཚུལ་གསུངས་པ་དང༌། ཡང་སངས་རྒྱས་དང་སོ་སྐྱེས་ཀྱི་མཆོད་རྟེན་མི་འདྲ་བ་དང༌། སྔགས་ཀྱི་རྒྱུད་སྡེ་སོ་སོའི་མཆོད་རྟེན་མི་འདྲ་བ་ཤིན་ཏུ་མང་པོ་བྱུང་བར་གསུངས་ཀྱང༌། འདིར་མདོ་ཙམ་ལས་ཞིབ་ཏུ་མ་སྨྲས་སོ།། ཡང་སྟས་ཞེས་པའི་ཐ་སྙད་འདི་དྲན་གསོའི་རྟེན་དང་བང་སོ་གཉིས་ཀར་འཇུག་ཅིང་སྔོན་བསྐལ་པ་དུ་མ་ནས་འཕགས་ཡུལ་སོགས་སུ་ཡོད་ཚུལ་ཡང་ཡོད་དེ་ཨསྟུ་ཀ་ཡའི་དཔལ་ལྡན་འབྲས་སྤུངས་ཀྱི་མཆོད་རྟེན་གྱི་ལོ་རྒྱུས་ལས། མཆོད་རྟེན་འདི་བཅོམ་ལྡན་འདས་གསེར་ཐུབ་ཀྱི་བསྟན་པ་ལ་གྲུབ་པ་ཐོབ་པའི་རྣལ་འབྱོར་པ་ཞིག་གིས། ཉིན་ལམ་བཅུ་གཉིས་ཀྱི་ས་ལ་འབྲས་སོ་བའི་ཆར་པ་གྱང་རིམ་གསུམ་ཙམ་རེ་ཕབ་པའི་ཕུད་ལ་ལྷ་དང༌། མི་དང༌། ཁྱབ་འཇུག་དང༌། མགོན་པོ་བདུན་ཅུ་རྩ་ལྔ་སོགས་ཀྱིས་བཞེངས་པར་གྲགས་ཤིང་ཕྱི་ནང་ཐུན་མོང་གི་མཆོད་གནས་གྱུར་པ་དེ་སོགས་སྟོན་པ་སངས་རྒྱས་ཤཱཀྱ་ཐུབ་པ་ཞིང་འདིར་མ་བྱོན་སྔོན་ནས་ཡོད་པར་བཤད་དོ།།
སྐུ་འབུམ་བྱམས་པ་གླིང་གི་མཆོད་རྟེན་བརྒྱད་པོ།
༡ འཕགས་ཡུལ་དུ་མཆོད་རྟེན་ཐོག་མར་དར་ཚུལ།
སངས་རྒྱས་བཅོམ་ལྡན་འདས་ལུམ་བུ་ནའི་ཚལ་དུ་ངོ་མཚར་བའི་མཚན་མ་བྱེ་མ་སྙེད་དང་བཅས་པ་སྐུ་བལྟམས་པ་སོགས། ཞིང་འདིའི་མཛད་པ་གཙོ་བོ་གང་བསྟན་པའི་སར། དེ་མཚོན་པའི་མཚན་མ་དང་བཅས་པའི་མཆོད་རྟེན་ཇི་ལྟར་བཞེངས་པའི་ཚུལ་ལ། ལས་ཀྱི་མཐའ་བརྗོད་པའི་མདོ་ལས། སྤྲུལ་པས་མཛད་པ་སྔོན་བསྟན་ཕྱིར།། མཆོད་རྟེན་བརྒྱད་དུ་སྐུ་གདུང་བཞག ། ཅེས་གསུངས་པ་ལྟར་སྤྱིན་བདག་སྐལ་ལྡན་རྣམས་ཀྱིས། སྟོ
