ལྷ་རྒྱལ་ལོ་ཞེས་པའི་གོ་དོན་དངོས་དེ་གང་ཡིན་ནམ།

        བོད་སྐད་དུ་ལྷ་ཞེས་པར་གོ་དོན་དུ་མ་ཡོད་དེ། གཅིག་ནི་འགྲོ་བ་རིགས་དྲུག་གི་ཡ་གྱལ་ལྷའི་འགྲོ་བ་དང་། གཉིས་ནས་ལྷ་ཞེས་པ་རྒྱལ་པོར་ཡང་གོ་སྟེ། འཕྲུལ་གྱི་ལྷ་བཙན་པོ་ཟེར་བ་དང་། རྒྱལ་པོ་རབ་ཏུ་བྱུང་བར་ལྷ་བླ་མ་ཡེ་ཤེས་འོད་ཞུ་བ་ལྟ་བུ་དང་། སྡེ་པ་གཞུང་ཟེར་བ་ཡང་ལེགས་སྦྱར་གྱི་ལྷའི་སྐད་དོད་དེ་བ་ཞེས་པའི་སྒྲ་ཟུར་ཆག་པར་བཤད་པ་དང་། ལྷ་ཡི་ལྷ་ཞེས་པ་སངས་རྒྱས་ལ་གོ་བ་སོགས་སྐབས་ཐོབ་ཀྱིས་གོ་དགོས་པ་དང་། ལྷ་རྒྱལ་ལོ་ཞེས་པའི་ཁ་གཡང་ངམ་འབོད་པ་འདི་ལྷ་བསང་གཏོང་དུས་དང་རི་མགོ་རུ་ཀི་སྭོ་དང་བཅས་ལྷ་རྒྱལ་འཐེན་པ་དང་། གཞན་ཆོས་སྡེ་དག་གི་ཆོས་གྲྭའི་མཇུག་ཏུ་ལྷ་རྒྱལ་འཐེན་པ་ཞེས་པ་བཀྲ་ཤིས་པའི་ཁ་གཡང་སྒྲོག་པའི་ལུགས་སྲོལ་རིང་མོ་ནས་དར་ཡོད་པ་དང་། ལྷ་བྱ་ཁུ་བྱུག་སྔོན་མོ་ཞེས་དཔྱིད་ཀྱི་ཕོ་ཉའི་དུང་དུང་གི་མགྲིན་དབྱངས་སྐྱོ་བ་སངས་པའི་ཡོན་ཏན་ཅན་ལ་ལྷ་ཞེས་པ་དང་། དྲི་བསུང་ཕྱོགས་བཅུར་རྒྱས་པའི་རང་བྱུང་སྤོས་ཀྱི་ལྗོན་ཤིང་ལ་ཡང་ལྷ་ཤིང་ཞེས་སྦྱར་བ་དང་། དམ་པའི་ལྷ་ཆོས་འཇིག་རྟེན་མི་ཆོས་ཟེར་བ་ལྟ་བུ་དང་། ཉིན་དཀར་ལྷས་བརྩིགས་དགོང་མ་འདྲེས་བཤིག་ཟེར་བ་ལྟ་བུ། དཀར་ཕྱོགས་ལྷའི་གོ་འཕང་བསྟོད། ནག་ཕྱོགས་བདུད་ཀྱི་གོ་འཕང་སྨད་ཅེས་པ་སོགས་ལ་བསམ་ན། ལྷ་རྒྱལ་ལོ་ཞེས་པའི་ལྷས་རྣམ་དཀར་གྱི་ལས་སྤྱི་དང་། བཟང་པོ་དང་མཆོག་གམ་ཕུད། ཡང་ན་ཡང་དག་པ་དང་དྲང་བདེན་གནས་ལུགས་སོགས་ཀྱི་གོ་དོན་མཚོན་པ་དང་། རྒྱལ་ཞེས་པ་མི་ཕམ་པ་དང་། ལོ་ཞེས་པ་རྫོགས་ཚིག་རྐྱང་མ་ཡིན་པར་རྒྱལ་བར་ཤོག་ཅེས་པ་ལྟ་བུའི་སྨོན་ཚིག་གི་ཉམས་ཡོད་པ་རང་རེའི་མྱོང་བས་ཀྱང་འགྲུབ་པ་དང་། དེ་ལྟར་བོད་མི་རིགས་ཀྱིས་གནའ་སྔ་མོ་ནས་རི་གང་མཐོའི་སྒང་ལ་སླེབས་པའམ་རྟ་རྒྱུགས་འགྲན་བསྡུར། ཆོས་གྲྭའི་རྩོད་པ་མཇུག་དྲིལ་མཚམས་དང་། བསང་འབོད་ཀྱི་སྐབས་ལྷ་རྒྱལ་འཐེན་པ་ནི་འགྲོ་བ་མིའི་རིགས་ཀྱི་བདེ་དོག་གི་རྩ་བ་གནས་ལུགས་དང་དྲང་བདེན་རྒྱལ་ལོ་ཞེས་པའི་དོན་དུ་ངེས་སོ་སྙམ།