རིན་ཆེན་བྱུ་རུའི་རྣམ་བཤད་རགས་རིམ།

བྱུ་རུ་ཞེས་པའི་མིང་གི་འགྲེལ་ཚུལ།
       བྱུ་རུ་ཞེས་པར་ཚིག་མཛོད་དག་ལས་མིང་གི་འགྲེལ་ཚུལ་མི་འདྲ་བ་ཡོད་དེ། ཀློང་རྡོལ་ངག་དབང་བློ་བཟང་གི«རིན་པོ་ཆེ་བརྟགས་ཐབ་མདོར་བསྡུས་ཉུང་གསལ»ལས། “རྒྱུ་དངོས་རྡོ་ཡིན་ཡང་རྒྱ་མཚོའི་འགྲམ་གྱི་བྲག་དང་བྱེ་མ་ལས་ཤིང་ལྟར་སྐྱེས་པ་སྟེ་རིགས་དཀར་དམར་གཉིས་ཡོད”ཚུལ་གསུངས། «སྨོན་ལམ་ཚིག་མཛོད»ལས། “རྒྱ་མཚོར་གནས་པའི་བྱུ་རུའི་འབུའམ་སྲོག་ཆགས་རིགས་འགའ་ཞིག་གི་ལུས་ལས་བྱུང་བའི་རྡོ་ཐལ་གྱི་རྒྱུ་དང་རྭ་སྤྱིན་འདྲེས་པ་ལས་གྲུབ་པའི་རུས་པའི་མིང་།”ཅེས་པ་ལྟ་བུའོ། །
མིང་གི་རྣམ་གྲངས།        བྱུ་རུའི་ཁ་མདོག་ལ་དབྱེ་ན་མདོག་དམར་པོ་དང་ནག་པོ། དཀར་པོ་བཅས་གསུམ་མཆིས། དམར་པོ་ནི་མཆོག་སྟེ་སྨན་ལ་འདི་ཁོ་ན་གཏོང་བ་དང༌། ནག་པོ་ཧོར་ལ་སོགས་པས་གཙིགས་ཆེར་བྱེད་པ། དཀར་པོ་བོད་ཡུལ་ལ་བྲིན་ཡང་འཕགས་ཡུལ་དུ་གཙིགས་ཆུང་བས་ལེན་པར་མ་བརྩོན་སྟབས་དཀོན་པར་བཤད། དབྱིབས་ནི་ཕལ་ཆེར་ཤིང་གི་ཡལ་ག་དང༌། ཤ་བའི་རྭ་འདྲ་བ། དུ་བ་འཕྱུར་བ། ལྒང་བུ་འདྲ་བའི་སྒོར་དབྱིབས་སོགས་འཁྱོགས་པོ་ཡལ་ཕྲན་མང་ཞིང༌མཛེས་ཤིང་ལྟ་ན་སྡུག་པ་དང་། འགའ་ཞིག་ཕྱི་ངོས་ལ་འབྲུམ་ཕྲན་དང་ཁུང་སོབ་ཡོད་པ། ངོ་བོ་མཁྲེགས་ལ་ལྕི་ཞིང་ཁྲོབ་པ། དབྱིབས་དང་ཆེ་ཆུང་ལ་ངེས་པ་ཆེར་མེད་ཀྱང་ཕལ་ཆེར་ནི་ཟླུམ་པོ་དབུས་སུ་ཁུང་བུ་ཅན་དང་། ཡང་ན་ཕལ་ཆེར་ལ་དཀྱིལ་དུ་དཀར་ཐིག་ཡོད་པ་བཏུལ་བས་ཕྱེ་མ་དཀར་པོར་འགྱུར་བ་དང༌། མེར་བསྲེགས་ན་ཁ་དོག་སྐྱ་བོར་འགྱུར་བ། གླ་རྩི་དང༌། ག་བུར། དྲི་ཞིམ་དག་རྫས་སོགས་དང་མཉམ་དུ་བཞག་ན་གས་ཆག་འགྲོ་བ་ཞིག་གོ །
བྱུ་རུའི་འབྱུང་ཁུངས་དང་ཐོན་ཁུངས།
       སློབ་དཔོན་ཧཱུཾ་ཆེན་ཀ་རའི«པད་དཀར་ཆུན་པོ»ལས། “རིན་ཆེན་བྱུ་རུ་མཚོ་འགྲམ་བྱེ་མའི་ཤིང༌། །”ཞེས་གསུངས། བྱུ་རུ་ནི་མཐའི་རྒྱ་མཚོའི་འགྲམ་གྱི་བྲག་དང་བྱེ་མ་ལས་ཤིང་ལྟར་སྐྱེ་བས་རྒྱུ་དངོས་རྡོ་ཡིན་ཀྱང༌། སྐྱེ་ལུགས་ཀྱིས་ཤིང་ཡང་ཟེར། གྲུབ་ཆ་གཙོ་བོ་ནི་རྫས་འགྱུརcaco3ཐན་སྐྱུར་ཀལ་ཡིན་པ་དང་། སྲ་ཚད་ལ་ཏུའུ་༢.༦ནས་ཏུའུ༤.༣ཡོད། ཚ་བའི་ས་ཁུལ་གྱི་རྒྱ་མཚོའི་ཆུ་དྭངས་ཤིང་ལྷིང་འཇགས་ཡིན་སའི་བྲག་རྡོ་དང་བྲག་སྲུབས་བཅས་ན་སྐྱེས་ཡོད་ཅིང་། ཐོན་ཡུལ་གཙོ་བོ་ནི་ས་དབུས་རྒྱ་མཚོ་ཡིན་ལ། དེ་མིན་ཏ་ཟིག་མཚོ་འགག་དང་ཧིན་རྡུ་རྒྱ་མཚོ། ལྷོ་རྒྱ་མཚོ། ཧྥ་རན་སི། དབྱི་ཐ་ལི། ཉི་ཧོང་། སིངྒ་ལ། མུ་ཀུ་ཌ། སོ་ཀི་དྷ་རི་ལ་སོགས་པའི་གླིང་ནས་འབྱུང༌། དེང་སང་ཀསྨིར་དང༌། བལ་པོའི་ཚོང་པ་རྣམས་ཀྱིས་མང་དུ་ཁྱེར་ཡོང༌། རང་རྒྱལ་གྱི་ཧའེ་ནན་དང་ཀོའང་ཏུང་བཅས་ནས་ཐོན་པ་མང་། རྒྱ་མཚོའི་གཏིང་རུམ་ན་ཡོད་པའི་བྱུ་རུ་ནི་གསོན་པོ་ཡིན་ལ། རྒྱ་མཚོའི་ཁ་ན་གཡེང་བ་ནི་བྱུ་རུ་ཤི་བོ་ཡིན་ཟེར་བ་ལྟར། གཏིང་རུམ་ནས་ལོན་པའི་བྱུ་རུ་དག་ནི་རྒྱུ་ཁ་མདོག་གང་གི་ཆ་ནས་མཆོག་ཏུ་བརྩི་བ་དང་། མཚོ་ཁར་གཡེང་བ་དག་ནི་སོབ་སོབ་དང་འབུ་ཁུང་མང་བས་དམན་པར་བལྟའོ། །སྔོན་གྱི་ཡིག་རྙིང་ལྟར་ན། དམར་གསལ་འོ་མའི་རི་མོ་ཅན་ནི་རླན་ལས་སྐྱེས་པས་མཆོག །ཁྲག་མདོག་སྣུམ་མདོག་ཆེ་བ་ནི་སྐམ་ས་ལས་ཐོན་པས་འབྲིང་པོ་དང་། །ནག་པོ་ནི་ཚད་པས་གདུང་བས་ཐ་མ་ཡིན་པར་བཤད། །དམར་པོ་ཁྲག་གི་མདོག་ཅན་ནི་རྒྱ་མཚོ་ཆེན་པོའི་ཟབ་སར་སྐྱེས་པས་དཀོན་ལ་རིན་ཐང་ཧ་ཅང་ཆེ་ཞིང་། དམར་སྐྱ་ནི་རྒྱ་མཚོ་ཆུའི་རགས་སར་གྲུབ་པས་བྱུར་དམར་ལས་རྙེད་སླ་ཞིང་རིན་ཐང་ཆུང་བར་བརྗོད།        བོད་ཡུལ་ལ་མི་ལོ་ཉིས་སྟོང་ཙམ་གྱི་སྔ་རོལ་ན་རྒྱན་ཆར་རིན་ཆེན་གསེར་དངུལ་དང་། བྱུ་རུ། གཡུ། སྤོས་ཤེལ་སོགས་ལས་གྲུབ་པའི་རྒྱན་ཆ་སྣ་ཚོགས་ཡོད་པ་མ་ཟད། ལྷོ་ཁ་གྲོང་ཁྱེར་སྣ་དཀར་རྩེའི་རྫོང་ཁོངས་ཀྱི་གནའ་བོའི་བང་སོ་གཉིས་ཀྱི་ནང་ནས་བསམ་ཡུལ་ལས་འདས་པའི་རྒྱན་ཆའི་རིགས་མང་པོ་རྙེད་ཡོད། དེ་ཡང«བཤད་མཛོད་ཡིད་ཀྱི་ནོར་བུ»སོགས་སུ“དེ་ནས་ཟ་ར་སྐྱེ་དྲུག་དབང་བྱས་ཏེ། ཡུལ་གྱི་མིང་ནི་སྟོང་སྡེ་བཅོ་བརྒྱད་བཏགས། རྟ་བཞོན་རྒྱན་ཆ་འདོགས་པ་དེ་ནས་བྱུང་”ཞེས་གསུངས་པ་ལྟར། མཁས་དབང་དུང་དཀར་རིན་པོ་ཆེའི«དུང་དཀར་ཚིག་མཛོད་ཆེན་མོ»ལས། “ཕྱྭ་གཡང་འགུགས་པའི་བོན་པོ་ནི་ལུག་དམར་མོའི་ལག་པའི་ཤ་དང་ཚིགས་གསུམ་ཅན་གྱི་མདའ་ལ་དར་ཚོན་སྣ་ལྔ་དང་། གཟི། སྤོས་ཤེལ། བྱུ་རུ། གཡུ། མེ་ལོང་བཅས་བཏགས་པའི་མདའ་དར་ཕྱེ་མར་བཅས་ལག་ཏུ་ཐོགས་ཏེ་ཚེ་དང་བསོད་ནམས་དབང་བར་བྱེད་པའི་བོན་ཆོག་ཅིག་སྟེ། སྔར་རྒྱལ་པོ་གཉའ་ཁྲི་བཙན་པོའི་གོང་ནས་བོད་ཀྱི་བོན་པོ་ཤེས་པ་ཅན་བཅུ་གཉིས་ཞེས་པ་ཞིག་བྱུང་བ་དེའི་ནང་ནས་གཡང་ཤེས་ཕྱྭ་བོན་གྱིས་གཡང་སྒྲུབ་བྱེད་པའི་སྲོལ་ཡོད་ཅིང་། རྒྱལ་པོ་ཁྲི་སྲོང་ལྡེ་བཙན་གྱིས་བོན་ཆོས་བསྣུབས་པའི་སྐབས་སུ་གཡང་ཆོག་སོགས་ཕན་ཐོགས་ཡོད་པའི་རིགས་འགའ་ཞིག་མ་བསྣུབས་པར་བཞག་པ་མ་ཟད། རྗེས་སུ་སངས་རྒྱས་ཆོས་ལུགས་པས་བོན་གྱི་གཡང་ཆོག་བྱེད་སྲོལ་གྱི་རྣམ་པ་རང་སོར་བཞག་ནས་ནང་དོན་སངས་རྒྱས་ཆོས་ལུགས་དང་མཐུན་པར་བྱས་པ་ཡིན་ནམ་སྙམ།”        མཁས་དབང་དུང་དཀར་རིན་པོ་ཆེའི«དུང་དཀར་ཚིག་མཛོད་ཆེན་མོ»ལས། “རིན་རྒྱན་གྱི་གཞི་རྩའི་ཕྱུ་པ་ནི་རྩེ་བེར་ཞེས་པ་ཧོར་བལ་བཏགས། ཚོན་ཁྲ་པད་མ་རིས་ཅན་སོགས་རྒྱུ་གོས་ཆེན་གྱིས་བཟོས་པ། ཕུ་ཐུང་གཉིས་ལྡན། སྟ་ཟུར་སུལ་ཅན་དེང་སྐབས་ཀྱི་དྭ་ཡིའི(རྒྱ་ཆས་ཤིག)ལྟར་ཁ་མདུན་དུ་བཤགས་པ་དང་འདྲ་ཞིང་། གོང་བ་དང་ཕུ་ཐུང་ལ་སྲམ་རྒྱན་ལྡན་པ་ཞིག་གྱོན། སྐྲ་ལོ་རྣམས་དྲུའུ་རྩི་དམར་པོ་དང་ལྷན་དུ་ལན་བུར་ལྷས(རྗེས་སོར་སྤ་ལྕོག་ལ་སྐྲ་རྫུས་ཀྱི་ལན་བུ་ཞིག་བསྒྲོགས་པའི་སྲོལ་དུ་གྱུར)མགོ་ལ་གཙུག་ཞྭ་ཞེས་གྲྭ་པའི་ཞྭ་མོ་རྩེ་སྒྲོ་དང་འདྲ་བ་ཆུང་ཆུང་ཞིག་གྱོན། རྣ་ཅོག་གཡས་པར་རྣ་གཡུ་དང་གཡོན་མར་སོག་བྱིལ། སྤ་ལྕོག(སྐྲ་ལྕོག)ལ་སི་ཤན་དམར་པོའི་ལུང་ཐག་གཉིས་བསྒྲོགས་པ་དེའི་ཐོག་ཏུ་གཡས་ཕྱོགས་སུ་རིན་རྒྱན་གྱི་ཐུན་མོང་མ་ཡིན་པའི་རྒྱན་ཆའི་གྲས་གསེར་གྱི་སོག་སྒོར་སྨད་གའུ་ལྟ་བུའི་སྒོར་དབྱིབས་ཅན། སྟོད་ཆ་དབྱིབས་རྡོ་རྗེ་འདྲ་བའི་སྟེང་ན་གཡུའི་ནོར་བུ་མེ་འབར་དང་། གཤམ་ཆར་ཙི་པ་ཊ་གཟུགས་རིས་ཀྱིས་བརྒྱན་པ་ཞིག་དང་། གཡོན་ཕྱོགས་སུ་རྣ་བསྐྱངས་ཞེས་བོད་གཡུ་ལེབ་མོ་རིང་ཚད་ཁྲེད་རྩེ་གང་ཙམ་ཞིག། སྣེ་གཅིག་སྤ་ལྕོག་ལ་བཏགས་ནས་སྣེ་གཞན་དེ་སྐྲ་ལོའི་ལན་བུ་དང་ལྷན་ཅིག་ལག་གཡོན་པས་བཏེགས། ལྕགས་དཀྱུས་དཔུང་གཡས་པའི་ཐོག་ཏུ་བསྒྲོགས་ཏེ་བྲང་ཟུར་ལ་འཕྱང་འཁྲུལ་དུ་བཏགས། བྲང་ཁའི་དབུས་སུ་གཡུ་ཡིས་ལེགས་པར་བརྒྱན་པའི་གསེར་གྱི་གའུ་ཆེ་ཆུང་སྡེར་མ་ཆུང་བ་ཙམ་ཞིག་བཏགས། ཤེལ་དཀར་མར་ཞེས་ཧ་ཅང་ཆེ་བའི་བྱུ་རུའི་དོ་ཤལ་དང་། ཆེ་ཆུང་རྫོག་མགོ་ལས་ཀྱང་ཆེ་བའི་སྤོས་ཤེལ་གྱི་དོ་ཤལ་པང་དུ་སླེབས་པ་གཅིག་སྐེ་ལ་གྱོན། མདུན་གྱི་ཕྱོགས་སུ་གོས་ཆེན་གྱི་ཕོར་ཤུབས་ཤིག་དཔྱངས། ཀོ་ལྷམ་རྡོག་གཅིག་མ་ཞིག་གྱོན་ཞིང་། སྐེད་པར་སྐེད་གྲི་གཟེར་བ་བྱེད།”        གཅིག། བོད་ལུགས་གསོ་རིག་ཁྲོད་ཀྱི་སྨན་ནུས།
       བྱུ་རུ་ནི་མི་བཞུ་བའི་ཁམས་ཀྱི་རིན་པོ་ཆེའི་སྨན་རིགས་ཀྱི་ཁོངས་སུ་བསྡུ་ཞིང་། རོ་བསྐ་བ། ཞུ་རྗེས་ཁ་བ། ནུས་པ་བསིལ་ལ་རྟུལ་བ། ངོ་བོའི་ནུས་པས་མཆིན་ཚད་དང༌། དུག་ཚད་སེལ། བརྒྱལ་གཟེར་དང༌། ཀླད་པའི་ནད། སྨྱོ་འབོག་འཇོམས་ཤིང༌། རྩ་དཀར་དང༌། རྩ་ནག་གི་ནད་རིགས་ཀུན་ལ་མཆོག་ཏུ་ཕན་ཞིང༌། འདུས་པའི་ནད་ལ་སོགས་པ་ནད་གཞི་སྤྱི་ལ་ཕན་པའོ། །བྱུ་རུ་ནི་བྱུར་དམར་ཉེར་ལྔ་དང་གཡུ་རྙིང་ཉེར་ལྔ། རཏྣ་བསམ་འཕེལ། རིན་ཆེན་གྲང་སྦྱོར། རིན་ཆེན་མང་སྦྱོར། བྱུ་དམར་བདུན་ཅུ་སོགས་ལ་སྦྱོར་བ་ཡིན། «སྨོན་ལམ་ཚིག་མཛོད»ལས། “བྱུ་རུས་མཆིན་ཚད་རྩ་ནད་དུག་ཚད་སེལ། །ཞེས་དང༌། ཀརྨ་རང་བྱུང་རྡོ་རྗེ་མཛད་པའི«སྨན་ནུས་རྒྱས་པར་བཤད་པ»ལས། “བྱུ་རུས་འདུས་པའི་ནད་ལ་ཕན།”ཞེས་གསུངས་པ་ལས་ང་ཚོས་བྱུ་རུའི་སྨན་ནུས་ཤེས་ཐུབ་ལ། བྱུ་རུ་ནི་བོད་ལུགས་གསོ་རིགས་ཁྲོད་ཀྱི་མེད་དུ་མི་རུང་བའི་གྲུབ་ཆ་གཙོ་བོ་ཡིན་པ་ཤེས་ཐུབ།
       གཉིས། བྱུ་རུ་ལུས་ལ་བཏགས་པའི་ཕན་ཡོན།
       ཕག་གྲུའི་བརྩམས་པའི་«རིན་པོ་ཆེ་བྱུ་རུ་བཤད་པ།»ལས། “«བཤའ་ཕྲེང་མུན་སེལ་སྒྲོན་མེ»ལས། རིན་ཆེན་ལུས་ལ་གནས་པ་ན། །སྐྱེས་པ་བརྒྱ་ཡིས་མི་ཐུབ་ཅིང་། །བགེགས་ནི་སྟོང་གིས་མི་ཚུགས་སོ། །ལུས་རྩལ་ཆེ་དང་མགྱོགས་པ་དང་། །རྟ་དང་གཡག་རྣམས་པང་དུ་ཐེག། །བུད་མེད་སྟོང་སྤྱད་ཁུ་མི་ཉམས། །གཞན་ཡང་ཡོན་ཏན་བརྗོད་པ་ན། །བསྐལ་པ་སྟོང་དུ་རྫོགས་པ་མེད། །”ཅེས་སྤྱིར་རིན་པོ་ཆེ་ལུས་ལ་བཅངས་པའི་ནུས་པ་ཤིན་ཏུ་ཆེ་བར་བཤད་ཅིང་། བྱེ་བྲག་ཏུ་བྱུ་རུ་ལུས་ལ་བཏགས་ན་བསྲུང་བའི་ནུས་པ་དང་ལྡན་པ་ནི། «རྡོ་རྗེ་བདེ་ཁྲོས་རྒྱུད་ཀྱི་རྒྱལ་པོ»ལས། “རྟེན་འབྲེལ་རྫས་ཀྱི་ལེའུའི་སྐབས། །གསེར་གཡུ་བྱུ་རུ་མིག་མ་ཕུག། །བཙན་དུག་རྨ་བྱའི་མཁྲིས་པར་བཅས། །བཅངས་ན་བསྲུང་བའི་མཆོག་ཏུ་འགྱུར། །”ཞེས་གསུངས་པ་ལས་ཀྱང་སྔོན་ཆད་སྤོས་ཤེལ་བཏགས་ན་མིག་ལ་བཟང་ཟེར་བ་དང་། བྱུ་རུ་བཏགས་ན་སྙིང་ལ་བཟང་། གཟི་བཏགས་ན་མགོ་དང་སོ་ན་བར་ཕན་ཞེས་བཤད་སྲོལ་ཡོད། གང་ལྟར་བྱུ་རུ་ནི་རིན་པོ་ཆེ་སྣ་བདུན་གྱི་གྲས་གཅིག་ཡིན་ལ། ནད་གདོན་འགོག་པ་དང་། བར་ཆད་བཟློག་པ། བསོད་ནམས་འཕེལ་བ། བླ་ན་མཐོ་བ་མཚོན་པའི་ཁྱད་ཆོས་ཡོད།
       མདོར་བསྡུས་ན། བྱུ་རུའི་བོད་མིའི་འཚོ་བའི་ཁྲོད་དུ་གོ་གནས་གལ་ཆེན་ཞིག་བཟུང་ཡོད་པ་མ་ཟད་བེད་སྤྱོད་རྒྱ་ཆེར་བྱེད་བཞིན་ཡོད་ལ། བོད་མིའི་ལུས་ལ་འདོགས་པའི་རྒྱན་ཆ་དང་། སྐུ་གསུང་ཐུགས་རྟེན་གྱི་ཕྲ་རྒྱན། ལྷ་ལ་མཆོད་འབུལ་བྱེད་པའི་མཆོད་རྫས། བོད་ལུགས་གསོ་རིགས་ཁྲོད་ཀྱི་མེད་དུ་མི་རུང་བའི་གྲུབ་ཆ་གཙོ་བོ་ཡིན་པ་ཤེས་ཐུབ། བོད་མི་རྣམས་རིན་པོ་ཆེ་བེད་སྤྱོད་བྱེད་པར་དགའ་བ་དང་དེ་རྩ་ཆེན་དུ་བརྩི་བ་ནི་མི་རིགས་གཞན་དང་མ་འདྲ་བ་ཞིག་ཡིན། ང་ཚོ་བོད་ཡུལ་གྱི་ས་ཆ་སོ་སོའི་ཡུལ་སྲོལ་གོམས་གཤིས་མི་འདྲ་བའི་རྐྱེན་གྱིས་རྒྱན་ཆ་འདོགས་ལུགས་ལ་ཁྱད་ཆོས་མི་འདྲ་བ་ཞིག་ཆགས་ཡོད། དུས་ད་ལྟའང་བོད་ཡུལ་གྱི་ས་ཆ་སོ་སོ་རུ་ལོ་གསར་སོགས་དུས་ཆེན་ཁག་དང་། གཞན་གྱི་ཁྱིམ་དུ་མགྲོན་པོར་འགྲོ་བ། གླིང་ཁ་སོགས་སྤྲོ་སྐྱིད་གཏོང་བ་བཅས་ཀྱི་སྐབས་སུ་རྒྱན་གོས་དང་བྱུ་རུའི་གཟབ་མཆོར་སྤྲས་པའི་སྲོལ་ཡོད། བྱུ་རུ་ནི་བོད་མིའི་རིག་གནས་ཀྱི་གྲུབ་ཆ་གཙོ་བོ་དང་བོད་མིའི་འཚོ་བའི་ཁྲོད་དུ་གཞི་གཅིག་ཏུ་འདྲེས་ཡོད་པ་ཆོས་འབྱུང་ལོ་རྒྱུས་དང་། སྨན་གཞུང་། དམངས་ཁྲོད་རིག་གནས་སོགས་ལ་བལྟས་ན་གསལ་བོར་ཤེས་ཐུབ།

དཔྱད་གཞིའི་ཡིག་ཆ།
༡ «སྨོན་ལམ་ཚིག་མཛོད།» བློ་བཟང་སྨོན་ལམ།
༢ «དུང་དཀར་ཚིག་མཛོད་ཆེན་མོ།» དུང་དཀར་བློ་བཟང་འཕྲིན་ལས།
༣ «གསེར་གདུང་འཛམ་གླིང་རྒྱན་གཅིག་གི་དཀར་ཆག།» སྡེ་སྲིད་སངས་རྒྱས་རྒྱ་མཚོ།
༤ «སྨན་ནུས་རྒྱས་པར་བཤད་པ།» ཀརྨ་རང་བྱུང་རྡོ་རྗེ།
༥ «རིན་པོ་ཆེ་བརྟགས་ཐབ་མདོར་བསྡུས་ཉུང་གསལ།» ཀློང་རྡོལ་ངག་དབང་བློ་བཟང་།
༦ «པད་དཀར་ཆུན་པོ།» སློབ་དཔོན་ཧཱུཾ་ཆེན་ཀ་ར།
༧ «པཎ་ཆེན་བློ་བཟང་ཆོས་ཀྱི་རྒྱལ་མཚན་གྱི་གསུང་པོད་དང་པོ།» པཎ་ཆེན་བློ་བཟང་ཆོས་རྒྱན།
༨ ཁམས་པའི་བརྙན་འཕྲིན་ཁང་གི«བྱམས་པའི་ཁ་བརྡ»ལེ་ཚན། ལྟག་ཨོ་རྒྱན་ཆོས་འཕེལ་དང་དཀོན་མཆོག་བསྟན་འཛིན།
༩ «རིན་པོ་ཆེ་བྱུ་རུ་བཤད་པ།» ཕག་གྲུ།