༄༅། །གཙོས་ཞེས་པའི་ས་མིང་།

       མདོ་ཁམས་ཕྱོགས་སུ་དབྱངས་ཡིག་ཨོ་དང་རྗེས་འཇུག་ས(ཨོ+ས)ལྷན་དུ་སྦྱར་བའི“ཨོས”སྲོག་ཏུ་ཞུགས་པའི་ཡི་གེ་རྣམས་ཨེ་སྒྲ་ལྡན་པར་ཀློག་སྲོལ་ཡོད་པ་ལྟར། གཙོས་ཞེས་པ་ཨ་མདོའི་རོང་ཕྱོགས་སུ་གཙེའམ་རྩེ་ཞེས་ཀློག་པར་བྱེད་ལ། ཏུན་ཧོང་ཡིག་རྙིང་དུ་སྤུ་རྒྱལ་བཙན་པོའི་དུས་སུ་ལོ་མང་བོ་ཞིག་གི་མདོ་སྨད་ཀྱི་འདུན་མ་ཐེངས་དུ་མར“གཙེ་ནམ་ཡོར”རམ“གཙེ་ནཾ་ཡོར”དུ་བསྡུས་ཞེས་འཁོད་པའི་གནའ་བོའི“གཙེ”དང་དེང་དུས་ཀྱི“གཙོས”གཉིས་བརྡ་གསར་རྙིང་གི་ཁྱད་པར་མ་གཏོགས་དོན་གཅིག་ཅིང་། ད་ལྟའི་ཀན་ལྷོ་བོད་རིགས་རང་སྐྱོང་ཁུལ་གྱི་ལྟེ་བ་གཙོས་གྲོང་ཁྱེར་གྱི་ཤར་ལྷོའི་མཚམས་སུ་མཆིས་པའི་ས་མིང“གཙོས་ལམ་ལུང”ཟེར་བ་མིང་གཞི་ན་དང་ལ་གཉིས་སྒྲའི་སྐྱེ་གནས་མཚུངས་པས། རྒྱ་ཡིག་ཏུ“南木娄”ཞེས་བྲིས་འདུག་པ་དེ་གནའ་དཔེ་ཡིག་རྙིང་ཁྲོད་ཀྱི“གཙེ་ནམ་ཡོར”ཞེས་པའི་ས་མིང་དེ་ཀོ་ལོ་ངོ་ཆིག་སྟོང་ལྷག་གི་ལོ་རྒྱུས་བརྒྱུད་རིམ་རིང་མོའི་ནང་དུ་དང་ཐོག“གཙེ་ནམ་ལུང”དང་། དེ་རྗེས“གཙོས་ལམ་ལུང”ཞེས་སྒྲ་འགྱུར་བའམ་ཟུར་ཆག་པ་སྟེ།“ནམ་”ཞེས་པ“ལམ”དང་། “ཡོར”ཞེས་པ“ལུང”དུ་སྒྲ་འགྱུར་བ་ཨེ་ཡིན་སྙམ་སྟེ་བརྟག་གོ །​