གུང་ཐང་ལོ་ཙཱ་བའི་གདན་ས། མགོན་སེང་ཀརྨ་བདེ་ལེགས།

       དེ་ཡང་སྤྱི་ལོ༢༠༢༢ལོའི་ཟླ༧པའི་ཚེས༢༤ཉིན་ནག་ཚོ་ལོ་ཙཱ་བ་ཚུལ་ཁྲིམས་རྒྱལ་བའི་གདན་ས་ཡང་ཐོག་གསེར་གྱི་ལྷ་ཁང་གི་ཤུལ་དུ་སླེབས། ལོ་ཙཱ་བ་ཁོང་ནི་མཚན་སྙན་ཤིན་ཏུ་ཆེ་ཞིང་ཇོ་བོ་རྗེ་བོད་དུ་གདན་འདྲེན་མཛད་པ་པོ་དེ་ཡིན་ལ། ཁོང་ནས་ནག་ཚོ་བཀའ་བརྒྱུད་ཅེས་པའི་སློབ་བརྒྱུད་མང་པོ་ཞིག་བྱུང་བར་གྲགས་ཀྱང་། དེང་སང་ཁོང་གི་གདན་ས་ནི་ཤུལ་ཙམ་ལས་མེད་པ་དང་། མཛད་རྣམ་ལོ་རྒྱུས་ཁ་གསལ་བ་ཞིག་ཀྱང་མཇལ་རྒྱུ་མེད་པར། ཡིད་ཕམ་གྱི་སེམས་ཚོར་ཆེན་པོ་བྱུང་བ་དང་ཆབས་ཅིག་ཁོང་གི་མཛད་རྣམ་སྔར་ཐོས་མཐོང་སྐོར་ལ་བསམ་གཞིག་གི་རྐྱེན་པས། སྤྱོད་འཇུག་ལས། དྲན་འགྱུར་བྱི་ལའི་དུག་བཞིན་དུ། །ཞེས་པ་ལྟར་སྔར་གྱི་མྱོང་བའི་བག་ཆགས་མང་པོ་ཞིག་རིམ་གྱིས་གསལ་བར་བྱུང་།        ཡང་ཚལ་པ་སྨོན་ལམ་རྡོ་རྗེས་བཞེངས་པའི་བསྟན་འགྱུར་རྒྱུད་པོད་དེ་རྟགས་ཅན་གྱི་ནང་དུ། ཆོས་སྤྱོད་ཐམས་ཅད་ཀྱི་མན་ངག་མངོན་པར་རྟོགས་པའི་རྒྱུད་ཀྱི་འགྲེལ་པ་གཟི་བརྗིད་སྣང་བ་དང་། མན་ངག་བདུད་རྩིའི་འཁོར་ལོ་ཞེས་བྱ་བའི་དཔེ་གཉིས་ཆར་ཡོད་པ་དཀར་ཆག་ལས་གསལ་ཡང་། དེ་རྟགས་ཅན་གྱི་པོད་དེ་ད་ལྟ་མཇལ་རྒྱུ་མེད་རྐྱེན་དགེ་བཤེས་གུང་ཐང་པས་འགྱུར་གནང་བ་མན་ངག་བདུད་རྩིའི་འཁོར་ལོ་ཞེས་པ། ཁོང་གིས་རྩིས་ཆེན་གནང་བའི་དཔེ་དེ་ད་ལྟ་འཇིག་རྟེན་མི་ཡུལ་དུ་བཞུགས་ཡོད་མེད་ལ་བསམ་བློ་མང་པོ་འཁོར།
       ཡང་སྡེ་དགེའི་བསྟན་འགྱུར་དཀར་ཆག་ལས། བྱ་རྒྱུད་ཀྱི་སྐོར་ནུ་རྟགས་ཅན་གྱི་ཆོས་ཚན་བཞི་པར། ཆོས་སྤྱོད་ཐམས་ཅད་ཀྱི་མན་ངག་མངོན་པར་རྟོགས་པའི་རྒྱུད་ཀྱི་འགྲེལ་པ་གཟི་བརྗིད་སྣང་བ་ཞེས་བྱ་བ་ཀླུའི་དབང་ཕྱུག་གིས་མཛད་པ། དགེ་ཚུལ་ཁྱུང་གྲགས་ཀྱིས་བསྒྱུར་ཞེས། འདིར་རྩ་འགྲེལ་གཉིས་ཀ་རྫུན་མ་ཡང་དག་པ་ཞིག་འདུག་སྟེ། ནག་ཚོ་ལོ་ཙཱ་བས་ཡང་དག་ཏུ་བཞེད་པ་ཡིན་ཟེར་ནས། སྔར་གྱི་རྣམས་ཀྱིས་བྲིས་འདུག་པས་འདིར་ཡང་བཞུགས་སུ་བཅུག་པ་ཡིན་ནོ་ཞེས་འཁོད་ཀྱང་། སྡེ་བསྟན་དཔེ་དངོས་སུ་མི་བཞུགས།
       དེ་ཡང་གཞུང་རྩ་འགྲེལ་གཉིས་ནི་དུས་རབས་བཅུ་པའི་སྨད་ཙམ་ལ་བོད་སྐད་དུ་བསྒྱུར་བ་ཞིག་སྟེ། སྒྱུར་བྱེད་ལོ་ཙཱ་བའི་རྣམ་ཐར་དང་བསྒྱུར་བའི་དུས་ཚོད་ཁ་གསལ་མ་རྙེད་རུང་། གཞུང་རྩ་བའི་འགྱུར་བྱང་དུ་ལོ་ཙཱ་བ་དགེ་ཚུལ་ཁྱུང་གྲགས་ཀྱིས། ཆོས་སྐྱོང་བའི་རྒྱལ་པོ་ལྷ་ཅིག་བཙུན་པ་ལ་བསྟོད་པ་ཞེས་བྱ་བར། འོད་གསལ་ལྷ་སྲས་བྱང་ཆུབ་སེམས་དཔའི་གདུང་། །དབུས་ཀྱི་ས་སྐོར་མཁའ་ལ་ཟླ་བ་གཅིག །དམ་ཆོས་བརྟུལ་ཞུགས་གསོ་དཔྱད་མཁྱེན་པ་རྒྱས། །རྒོལ་བ་ཚར་གཅོད་མི་ཟད་དཔའ་བོ་འདྲ། །མི་དབང་ཁ་ལོ་བསྒྱུར་ལ་བདག་གིས་བསྟོད། །གཏི་མུག་ཤས་ཆེ་བློ་གྲོས་རྨོངས་པ་ཡིས། །སྒྲ་སྐད་ཐ་སྙད་རྒྱས་ལ་མི་འཚལ་བས། །ཚིག་དོན་མ་འབྲེལ་གཟིགས་པར་མི་བདེ་བ། །བོད་ཡུལ་དབུས་ཀྱི་མཁས་པ་ཐམས་ཅད་ཀྱིས། །བདག་ལ་བཀའ་མི་དབབ་ཅིང་བཟོད་པར་གསོལ། །ལྷ་ཅིག་བཙུན་པས་གསོལ་བཏབ་བདག་གིས་བསྒྱུར། །འདི་བསྒྱུར་བསོད་ནམས་རྒྱུ་ཆེན་དེ་ཡིས་ནི། །འགྲོ་བ་མ་ལུས་འདི་ལ་རབ་བརྟེན་ནས། །ཡོངས་རྫོགས་མཐའ་རུ་མངོན་པར་སངས་རྒྱས་ཤོག །ཅེས་པ་ལྟར་ན་ལྷ་བཙན་པོ་བོ་དེ་ར་ཙ་ནི་མངའ་བདག་ཡུམ་བསྟན་གྱི་རྒྱུད་པ་ཞིག་སྟེ། ནེའུ་པཎྜི་ཏས་མཛད་པའི་སྔོན་གྱི་གཏམ་མེ་ཏོག་ཕྲེང་བ་ལས། ཡུམ་བསྟན་གྱི་སྲས་ཁྲི་ལྡེ་མགོན། དེའི་སྲས་རིག་པ་མགོན། དེའི་སྲས་རྡོ་རྗེ་འབར། དེ་ལ་སྲས་གཅེན་གཅུང་གཉིས་ལས། གཅུང་ཁྲི་པ་ལ་སྲས་བཞི་ཡོད་པའི་ནང་ནས་ཆུང་བ་ལྷ་བཙུན་བོ་དེ་རཱ་ཛ་ཡིན་པར་གསལ་བས། ཁོང་ནི་དུས་རབས་བཅུ་གཅིག་པའི་སྟོད་ཙམ་དུ་བྱོན་པ་ཞིག་སྟེ། བསྟན་པའི་མེ་རོ་སྨད་ནས་གསོས་པའི་ཚེ་དབུས་གཙང་མི་བཅུའི་ནང་ཚན། འབྲིང་ཡེ་ཤེས་ཡོན་ཏན་ལྷ་བཙུན་བོ་དེ་རཱ་ཛས་བསམ་ཡས་སུ་གདན་དྲངས་ཏེ། ཁམས་གསུམ་ཟངས་ཁང་དུ་བཞུགས་སུ་བཅུག་ཅེས་གསལ་བ་དང་། ཇོ་བོ་རྗེའི་རྣམ་ཐར་ལས་ཀྱང་ཁོང་བསམ་ཡས་སུ་བཞུགས་སྐབས། ལྷ་བཙུན་བོ་དེ་རཱ་ཛས་ཡོན་བདག་མཛད་ནས་རིམ་པའི་ཆོ་ག་བསྒྱུར་ཞེས་གསལ་བ་སོགས་ཀྱིས་ཤེས་ནུས།
       ཡང་གཞུང་རྩ་བའི་བསྒྱུར་བྱང་དུ་ལྷ་བཙུན་བོ་དེ་རཱ་ཛའི་བཀའ་ལུང་གིས་དབུ་རྩེ་ནས་རྒྱ་གར་གྱི་དཔེ་ཕྱུང་ནས་ཞེས་གསལ་བ་ལྟར་ན། སྤྱིར་ལོ་རྒྱུས་རྣམས་སུ་བསམ་ཡས་སུ་རྒྱ་དཔེ་མང་པོ་བཞུགས་ཡོད་ཚུལ་དང་། དེའི་ནང་དུ་བོད་སྐད་དུ་མ་བསྒྱུར་བའི་གཞུང་ཡང་མང་པོ་ཡོད་པར་བཤད་པ། བཙན་པོ་ཁྲི་སྲོང་ལྡེའུ་བཙན་ནས་མངའ་བདག་ཁྲི་རལ་པ་ཅན་གྱི་བར་མི་ལོ་བརྒྱ་ཕྲག་ཙམ་གྱི་རིང་། ཆོས་རྒྱལ་ལོ་པཎ་རྣམས་ཀྱིས་རྒྱ་དཔེ་མང་པོ་ཞིག་བོད་དུ་སྤྱན་དྲངས་པའི་གྲལ་དུ་བཞུགས་ཀྱང་། བོད་སྐད་དུ་མ་བསྒྱུར་བ་ལ་ལྷ་བཙུན་བོ་དེ་རཱ་ཛས་སྐུལ་མ་ཞུས་ནས་ལོ་ཙཱ་བ་དགེ་ཚུལ་ཁྱུང་གྲགས་ཀྱིས་བསྒྱུར་བ་ཞིག་ཡིན་ཚོད་འདུག །
       ད་དུང་འགྱུར་བྱང་འདི་བརྒྱུད་ནས་ལྷ་བཙུན་བོ་དེ་རཱ་ཛ་སོགས་བཙན་པོའི་རྒྱལ་རྒྱུད་ཕྱི་མའི་སྐོར་དང་། སྐབས་དེ་དུས་ཀྱི་བསམ་ཡས་ཀྱི་རྒྱ་དཔེའི་གནས་སྟངས་ལ་ཡང་རྒྱུས་ལོན་དང་དཔྱད་དཔོག་བྱ་རྒྱུ་གལ་ཆེ་བ་དང་། བསྟན་བསྣུབས་ཀྱི་ཚད་གཞི་ལ་ཡང་དཔྱད་འཇོག་ཐུབ་པ་སོགས་ཞིབ་ཕྲ་དགོས་པ་མང་ཡང་དུས་ཚོད་ཀྱི་རྐྱེན་པས་དེ་ཙམ་མོ། །
       གོང་གི་སྡེ་བསྟན་དཀར་ཆག་ནང་དུ་འཁོད་པའི(འདིར་རྩ་འགྲེལ་གཉིས་ཀ་རྫུན་མ་ཡང་དག་པ་ཞིག་འདུག་སྟེ། ནག་ཚོ་ལོ་ཙཱ་བས་ཡང་དག་ཏུ་བཞེད་པ་ཡིན་ཟེར་ནས། སྔར་གྱི་རྣམས་ཀྱིས་བྲིས་འདུག་པས་འདིར་ཡང་བཞུགས་སུ་བཅུག་པ་ཡིན་ནོ་ཞེས་འཁོད།)སྐད་ཆ་འདི་ལ་ཡིག་ནོར་གྱི་སྐྱོན་མེད་ན། ཆོས་སྤྱོད་ཐམས་ཅད་ཀྱི་མན་ངག་མངོན་པར་རྟོགས་པའི་རྒྱུད་རྩ་འགྲེལ་གཉིས་ཆར་རྫུན་མ་ཞིག་རེད། ཡིན་ནའང་ནག་ཚོ་ལོ་ཙཱ་བས་ཡང་དག་ཏུ་བཞེད་པ་དང་། བསྟན་འགྱུར་སྔ་མ་རྣམས་སུ་བཞག་ཡོད་པས་ན་འདིར་ཡང་བཞུགས་སུ་བཅུག་པ་ཡིན་ཞེས་གོ་རྒྱུ་དེ་རེད།
      དེ་ལྟར་ན་ཆོས་གཞུང་འདི་ནི་རྫུན་མ་ཞིག་ཏུ་ངོས་འཛིན་གནང་སྟེ་དངོས་སུ་མ་བཞག་པ་ལྟ་བུ་ཞིག་རེད། འོན་ཀྱང་དོགས་པ་ཅུང་ཟད་ཡོད་པ་ནི་སྡེ་བསྟན་དཀར་ཆག་གི་ཡི་གེ་ལ་ཆད་ལྷག་ཡོད་མེད་དེ་རེད། ད་སྔོན་རྫ་དཔལ་སྤྲུལ་གྱི་སྙིང་ཐིག་སྔོན་འགྲོའི་ནང་ཆོས་སྤྱོད་འདིའི་ལུང་དྲངས་པ་ལས་གཞན་དུ་འདིའི་སྐོར་མཐོང་མ་མྱོང་།
       མ་གཞི་དུས་རབས་བཅུ་པའི་གཡས་གཡོན་ཙམ་ལ་ཆོས་དག་མ་དང་རྫུན་མ། ཡང་ཆོས་ལོག་པ་དང་། ཆོས་ལོག་སྤེལ་མི་སོགས་ཀྱི་གཏམ་སྣ་ཚོགས་ཤིག་བྱུང་ཡོད་རུང་། དེ་དག་ལ་ཞིབ་པར་བརྟག་ན་རྒྱུ་མཚན་ཕྱོགས་རེ་བ་ཙམ་ལ་བརྟེན་ནས། རང་རང་གི་འདོད་བློ་སྐོང་ཆེད་ཙམ་ལས། རྒྱུ་མཚན་ལྡན་པ། གཏན་ཚིགས་ཀྱི་ལམ་ནས་ངེས་ཤེས་འདྲེན་ཆོག་པ་ཞིག་ནི་ད་ལྟའི་ཆར་མ་མཐོང་།
       འགའ་རེས་ནི་མདོ་ལམ་གསང་སྔགས་ཀྱི་ལྟ་སྤྱོད་ལ་སུན་འབྱིན་བྱས་པ་ཙམ་དང་། འགའ་རེས་ནི་གང་ཟག་གི་སྤྱོད་པ་ལ་སྙད་དེ་སྒྲོ་འདོགས་པ། ཡང་ཆོས་གཞུང་དེ་རྒྱ་གར་དུ་མེད་ཚུལ་གྱི་ཟེར་སྒྲོས་དང་། རྒྱ་གར་གྱི་སློབ་དཔོན་ག་གེ་མོའི་བོད་ཀྱིས་བཟོས་པར་བཤད་ཚུལ་སོགས། ཟེར་སྒྲོས་སྣ་ཚོགས་ཀྱི་ཡིག་ཚོགས་བཀྲམ་ནས་ཉི་མ་འཕུལ་བ་ཙམ་ལས། གཏན་ཚིགས་ཡང་དག་གི་ལམ་ནས་ཨོ་འདི་ཆོས་ལོག་ཟེར་ཡ་དེ་ཡིན་ན་ཅི་ཤེས་སྙམ་པའི་ཐེ་ཚོམ་སྐྱེ་ཆོག་པ་ཞིག་ཀྱང་ད་ལྟའི་ཆར་མཐོང་མ་ཐུབ།
       ནམ་རྒྱུན་པར་བོད་བརྒྱུད་ནང་བསྟན་པ་ཚོའི་སྐད་ཆ་བཤད་ཡོང་དུས་དངོས་པོ་སྟོབས་ཤུགས་ཀྱི་རིགས་ལམ་ནས་བདེན་རྫུན་ཐག་གཅོད་ཚུལ་དང་། དེ་ཡང་སྟོན་པའི་བཀའ་རྟགས་ཀྱི་ཕྱག་རྒྱ་བཞི་ལས་འདས་མ་འདས། ཐར་བ་དང་ཐམས་ཅད་མཁྱེན་པའི་ལམ་ལས་ཕྱི་རོལ་ཏུ་གྱུར་མིན་ལ་དཔྱད་པའི་རྣམ་དཔྱོད་ཞིབ་མོ་ཞིག་ཡོད་བཟོ་འདྲ་བ་མང་པོ་ཞིག་བཤད་བཤད་པའི་རྔ་མ་ལ། འདོད་ཕྱོགས་དང་ཞེན་ཕྱོགས་ཀྱི་ལམ་ནས་ཚིག་འཁྲིའི་རྩོད་རྙོག་འབུད་པ་ཙམ་ལས། དེ་འདྲའི་བཤད་བསྡད་པ་ནང་བཞིན་གྱི་གུ་ཡངས་དང་། རྣམ་དཔྱོད་ཅན་གྱི་གཏམ་ནི་ཧ་ཅང་ཉུང་བ་དེ་རེད།
       འདི་འདྲ་ལྟ་ཡོང་དུས་ང་ཚོའི་ཡིད་སྨོན་གྱི་ཡུལ་དུ་གྱུར་པ་ཕལ་ཆེ་བ་ཡང་། མིའི་འཆིང་རྒྱ་ལས་མ་གྲོལ་བར་ཉི་མ་འཕུལ་བྱེད་ཀྱི་སྐད་ཆ་མང་པོ་ཞིག་བཤད་ཡོང་གི་ཡོད་པ་དེ་རེད། མཚམས་རེ་མདོ་སྔགས་བར་ལ་འགལ་འདུ་འདྲ་སྒྲིག །ཡང་ཆོས་དང་གང་ཟག་གི་སྐྱོན་ཡོན་རྣམས་བསྲེས་ནས་བསྟོད་སྨད་འདྲ་བཟོ། མཚམས་རེར་དུས་ཚོད་སྔ་ཕྱི་དང་། གྲུབ་མཐའ་སྔ་ཕྱི། རང་ཕྱོགས་གཞན་ཕྱོགས། ཐེག་པ་གོང་འོག་གི་ལུང་ཚིག་རྣམས་དྲང་ངེས་དང་སྣང་སྟོང་ཕྱོགས་རེ་བའི་ལམ་ནས་འཐེན་ཁྱེར་གྱི་རྩོད་པ་འདི་ཚོ་མཐོང་ཡོང་དུས། གནའ་ནས་བོད་ཡུལ་གྱི་མི་མང་ཤས་ཤིག་ནི། ད་ལྟའི་ང་ཚོ་ནང་བཞིན་ཉི་མ་འཁྱོལ་ཐབས་ཁོ་ན་ལ་བརྩོན་མི་ཡང་མི་ཉུང་བ་ཞིག་ཡོད་པར་མངོན།
       ད་ལྟའི་ཆར་ཆོས་སྤྱོད་ཐམས་ཅད་ཀྱི་མན་ངག་མངོན་པར་རྟོགས་པའི་རྒྱུད་རྩ་འགྲེལ་དང་། དེའི་མན་ངག་གི་ཡིག་ཆ་དག་མེད་ན་ཡང་ཐབས་མི་ཆག་ལ། ཡོད་ན་བེད་སྤྱོད་ཀྱི་རིན་ཐང་ཡོད་མེད་མི་ཤེས་རུང་། ལོ་ཙཱ་བ་དང་སྦྱིན་བདག་སོགས་དཀའ་ལས་རྒྱག་མི་རྣམས་ལ་བསམ་ན་ཅུང་ཟད་སྙིང་རེ་རྗེ་ཡོང་བ་དེ་རེད།        ཡང་བོད་དུ་ཇོ་བོ་རྗེ་ཕེབས་ཐུབ་པ་ནི་ཞེད་པོ་དཀའ་དྲིན་ཆེན་པོ་ཞིག་རེད། གལ་སྲིད་ཁོང་ཕེབས་མ་ཐུབ་ན་བོད་ཀྱི་ཁེ་དབང་ཕལ་ཆེ་བར་ཁ་སྦྱོར་ཐོར་ཅོག་ཅན་དག་གི་ལག་ལ་ཤོར་རྒྱུ་ཉག་ཅིག་ལས། དབུ་རིལ་ཞབས་རྗེན་པ་རྣམས་ཀྱིས་ས་མི་ཟིན་པའི་ཚུལ་གྱི་སྐད་ཆ་མང་དག་ཅིག །རྒྱུ་མཚན་ཡོད་མེད་ལ་དཔྱད་མི་དགོས་པར་ཆོས་ཁ་ལ་ཐོགས་པ་ཚང་མས་བཤད་དང་འཆད་བཞིན་པ་འདི་རེད། དེས་ན་ཇོ་བོ་རྗེ་བོད་དུ་ཕེབས་པ་ལ་ནག་ཚོ་ལོ་ཙཱ་བས་དཀའ་སྡུག་ག་ཚོད་རྒྱབ་པ་ནི་ཤེས་རྒྱུ་དེ་རེད། འོན་ཀྱང་ད་ལྟ་ནག་ལོའི་མཛད་རྗེས་ཀྱི་ཤུལ་ཙམ་ཡང་ཡིག་ངག་གཉིས་ཀྱི་ལམ་ནས་མཐོང་དཀོན་པ་འདི་ཅིས་ལན་པ་ཡིན་ནམ།
       ལར་ནས་ཁོང་སྐུ་འཚོ་བཞུགས་རིང་ཨ་མདོ་དགེ་ཆོས་ལྟ་བུའི་དཀའ་ངལ་འཕྲད་མེད་ཚོད་ཀྱང་། ཁོང་གི་དཀའ་སྡུག་གི་འབྲས་བུ་ལ་ཕྱི་རབས་ཚ་རྒྱུད་དག་གིས་ངོས་འཛིན་མེད་པའི་ཁར་འགའ་ཤས་ནི་རྫུན་མའི་གྲལ་དུའང་འཇོག་ནུས། དགེ་ཆོས་སྐུ་འཚོ་བཞུགས་སྐབས་ལ་བསམ་ན་ཡིད་སེམས་སྐྱོ་བ་ལ་ཚོད་ཅིག་མེད་ནའང་། ད་ལྟ་ཁོང་གི་དཀའ་སྡུག་མཛད་རྗེས་ལ་རིན་ཐང་དང་འདེགས་འཇོག་ཐོབ་པ་ལ་བསམ་ན་སྤྲོ་བ་འཕེལ་ཡོང་བ་དེ་རེད། འོན་ཀྱང་ནམ་རྒྱུན་བོད་ཡུལ་དུ་རྒྱུག་ཆེ་བའི་སྐད་ཆ་དྲིན་ཤེས་པ། དྲིན་བཟོ་བ། ཡ་རབས། དྲང་བདེན། བསྟན་པའི་ལ་རྒྱ། ལས་རྒྱུ་འབྲས་སོགས་སྐད་ཆ་སྙན་པོ་དེ་ཚོ་ནི་དམའ་རིམ་མི་སྣས་ཡིད་སེམས་གསོ་བྱེད་ཙམ་ལས། དོན་དངོས་སུ་གཡོ་སྟོབས་ཀྱི་ལམ་ནས་ཐག་གཅོད་རྒྱུ་ལས་མེད་པ་དེ་རེད།