དབང་མཛད་བཅུའི་སྐོར་མཚམས་སྦྱོར།

དབང་མཛད་ཐོག་མར་བྱུང་ཚུལ།
     དབང་མཛད་ཐོག་མར་བྱུང་བ་ཞེས་པ་ནི་མིས་མི་ལ་དབང་སྒྱུར་བའི་དུས་རབས་ཀྱི་མགོ་ཚུགས་ཤིང་།  དེ་ནི་བསྐལ་པ་ཡ་ཐོག་གི་སྤྱི་ཚོགས་མཇུག་རྫོགས་ནས་བྲན་གཡོག་ལམ་ལུགས་ཀྱི་མགོ་ཚུགས་པའི་དུས་རབས་སུ་བྱུང་ལ།   གནའ་རབས་ཀྱི་བོད་མི་རྣམས་མདོ་དབུས་མཐོ་སྒང་གི་སྟེང་དུ་ཁྱབ་སྟེ་གནས་པ་དང་།  ཐོན་སྐྱེད་ཆུ་ཚད་ཅུང་འཕེལ་རྒྱས་སུ་ཕྱིན་ནས།  ཚོ་སྡེ་རྣམས་ཅུང་གཏན་འཇགས་སུ་གྱུར་པ་དང་མཉམ་དུ་བྲན་གཡོག་ལམ་ལུགས་ཀྱི་རྒྱལ་ཕྲན་གྱི་རྣམ་པ་རིམ་གྱིས་བྱུང་བ་ཡིན།
དབང་མཛད་བཅུའི་གོ་དོན།
     པུར་རྒྱལ་གོང་གི་དབང་མཛད་བཅུ་ཞེས་པ་ནི། ཡུལ་འདིའི་མི་རྣམས་ལ་དབང་བསྒྱུར་བའི་རྒྱལ་པོ་བཅུ་བྱོན་པའི་དོན་མིན་ཏེ། གཉའ་ཁྲི་བཙན་པོའི་སྔོན་དུ་བོད་སྤྱི་ལ་དབང་བའི་རྒྱལ་པོ་མ་བྱུང་པས་སོ། །དེ་ནི་མི་རབས་སམ་དེ་དང་ཆ་འདྲ་བ་དུ་མས་རིམ་བཞིན་བོད་ཁམས་དབང་དུ་བྱས་པ་སྟེ། ས་འདི་དག་བཟུང་ཞིང་དེ་ཡང་དུས་རབས་མི་འདྲ་བ་བཅུ་རིམ་བཞིན་བྱུང་བའི་དོན་ཡིན་ནོ། །
དབང་མཛད་བཅུ།
     《མཁས་པའི་དགའ་སྟོན》ལས། དང་པོ་གནོད་སྦྱིན་ནག་པོས་དབང་བྱས་ཏེ། ། ཡུལ་གྱི་མིང་ཡང་བཟང་ཡུལ་རྒྱན་མེད་ཟེར། །མཚོན་ཆ་མདའ་གཞུ་དེ་ཡི་དུས་སུ་བྱུང་། །དེ་ནས་རེ་ཏེ་མགོ་གཡག་བདུད་ཀྱིས་བྱས། །མིང་ཡང་བདུད་ཡུལ་ཁ་རག་རོང་དགུར་བཏགས། །སྟ་རེ་དགྲ་སྟ་དེ་ཡི་དུས་སུ་བྱུང་། །དེ་ནས་སྲིན་པོ་གཉའ་རེངས་ཁྲག་མིག་བྱས།  །ཡུལ་མིང་སྲིན་པོ་ནག་པོ་དགུ་ཡུལ་ཟེར། །སྲིན་མོའི་རྐང་དང་སྒྱོགས་གཉིས་ལག་ཆ་བྱུང་། །བཞི་བ་དམར་འཇམ་ལྷ་ཡིས་དབང་བྱས་ཏེ། །ལྷ་ཡུལ་གུང་ཐང་ལག་ཆ་ཆུ་གྲི་བྱུང་། །ལྔ་བར་རྨུ་རྒྱལ་ཁོ་རྗེ་ཞེས་བྱས་བཟུང་། །ད་ཕྲང་ཅང་ཕྲང་ལག་ཆ་ཞགས་པ་འཕེན། །དྲུག་པར་ཀྲོག་ཀྲོག་འདྲེ་ཡིས་དབང་བྱས་ཏེ། །ལང་ཏང་ལང་ཏང་བར་ཁ་འུར་རྡོ་འཕེན། །བདུན་པ་མ་སངས་རུས་དགུས་དབང་བྱས་ཏེ། །ཡུལ་གྱི་མིང་ལ་བོད་ཁ་ཉ་དྲུག་ཟེར། །ལག་ཆར་དོང་རལ་གོ་ཆ་ཕུབ་ཆུང་བྱུང་། །བརྒྱད་པ་ཀླུས་བཟུང་བོད་ཁམས་གླིང་དགུ་བཏགས། །དགུ་བ་རྒྱལ་པོས་དབང་བྱས་ངམ་པོ་ཅེ། །བཅུ་བ་འགོང་བོ་སྤུན་དགུས་དབང་བྱས་ཏེ།  །ཡུལ་གྱི་མིང་ཡང་སྟོང་སྡེ་བཅོ་བརྒྱད་ཟེར།  །ཞེས་དང་། 《གཡུང་དྲུང་བོན་གྱི་བསྟན་འབྱུང་ཕྱོགས་བསྡུས》ལས། །དེ་ལྟར་ཁ་བ་ཅན་གྱི་བོད་ཁམས་འདི། །སྲིད་པ་དང་པོ་ནམ་མཁའི་ལྷས་བཟུངས་ཏེ། །ཐུགས་དཀར་གེ་ཁོད་གཙང་མའི་ལྷ་རིགས་རྣམས། །གཡའ་རི་གངས་དཀར་རྩེ་ལ་གནས་བཅས་ཤིང་། །སྨྲ་དང་མི་ཡི་མགོན་བྱེད་བོན་བསྟན་སྲུང་། །དེ་དུས་སྨྲ་དང་མི་གཉིས་གཅིག་ཏུ་གནས། །ཡུལ་མིང་སྨྲའམ་ལྷ་ཡུལ་གུང་ཐང་ཞེས། །མི་ཡིས་དུད་འགྲོར་མི་འཚེ་གཏམ་བརྡ་འཕྲོད། །མི་ལོ་ཁྲི་འབུམ་མང་པོར་དེ་ལྟར་གནས། །དེ་རྗེས་མ་སངས་གཉན་གྱིས་དབང་མཛད་དེ། །རྫ་རི་སྤང་ལྗོངས་ཤིང་ལ་གནས་བཅས་ནས། །འགྲོ་བ་མི་དང་གཉེན་བསྡེབས་དེ་ཕན་བྱེད། །མི་དང་གཉན་དག་མཛའ་བཤེས་ཚུལ་དུ་གནས། །མི་དག་གཉན་གྱི་གནས་སུ་འགྲོ་བ་དང་། །གཉན་ཡང་མི་ཡི་ཁྱིམ་འོང་གཏམ་གླེང་བྱེད། །དེ་དུས་མི་ཡིས་དུད་འགྲོ་གསོད་པ་བྱུང་། །ཡུལ་གྱི་མིང་ནི་གཉན་ཡུལ་གསེར་སྟེང་ཞེས། །དེ་རྗེས་འཕྱེ་བོ་ཀླུ་ཡི་དབང་བྱས་ཏེ། །མཚོ་རྫིང་ཆུ་ཀླུང་ནེའུ་གསེང་ལ་གནས་བཅས། །འགྲོ་བ་མི་དང་གྲོགས་བསྡེབས་དཔལ་ཁ་བསྐྱེད། །སྤྲིན་སྡུད་ཆར་འབེབས་རྩི་ཤིང་ལོ་འབྲས་བསྐྱེད། །མི་རྣམས་མནོལ་བཙོག་བྱས་ཚེ་ཀླུས་གནོད་བྱེད། །དེ་བཅོས་ཀླུ་འབུམ་ཀླུ་ཆོག་ལ་སོགས་དར། །ཡུལ་མིང་ཀླུ་ཡུལ་ན་ར་གསེང་སྔོན་ཞེས། །སྔ་རྟགས་རྟ་ཕྱུགས་ལོངས་སྤྱོད་བྱེད་པ་བྱུང་། །དེ་རྗེས་གནོད་སྦྱིན་བཙན་གྱིས་མངའ་དབང་མཛད། །ཐུགས་དམར་བཙན་དང་གནོད་སྦྱིན་བོད་དུ་གྲོལ། །རྫ་བྲག་ནགས་ཁྲོད་ཤིང་ལ་གནས་བཅས་ཏེ། །འགྲོ་བ་མི་ལ་ཕན་དང་གནོད་པ་བྱེད། །བཙན་བཅོས་ལ་སོགས་མདོས་གླུད་གཏོང་བ་བྱུང་། །ཡུལ་ལྷ་མཆོད་པས་མི་དང་གཏམ་ཡང་སྨྲ། །ཡུལ་མིང་གདོང་དམར་བཙན་གྱི་ཡུལ་ཞེས་བྱ། །སྔ་རྟགས་གཉན་པོ་བཙན་པ་དེ་ནས་བྱུང་། །དེ་རྗེས་བདུད་དང་སྲིན་མོས་དབང་བྱས་ཤིང་། །བྲག་རི་དམར་ནག་ནགས་ཁྲོད་ལ་གནས་བཅས། །འགྲོ་བ་མི་ལ་གནོད་བྱེད་དངོས་སུ་ཟ། །མི་རྣམས་སེམས་ཅན་ཤ་ཟ་གདོང་པ་དམར། །ཡུལ་མིང་བདུད་ཡུལ་ནག་པོ་དགུ་སུལ་ལམ། །ཁ་རོག་སྒོ་དགུ་ལྷ་སྲིན་གཉིས་ཀྱི་ཡུལ། །མི་དང་སྲིན་འབྲེལ་སྲིན་གྱི་ཚ་བོའང་མང་། །འགལ་རྐྱེན་བྱུང་ན་ཡུལ་ལྷ་དམར་གྱིས་གསོལ། །དེ་རྗེས་མི་ལས་གདོན་གྱུར་བདུད་ཀྱིས་བཟུང་། །རྩི་ཤིང་རྡོ་ཁང་བྲག་ལ་གནས་བཅས་ནས། །བོད་ཀྱི་ཆུ་བོ་བཞི་འདུས་འགོ་མཇུག་བཟུང་། །མི་དང་བསྡོངས་ཏེ་གཤེན་ལ་དོ་རུ་བསྡོ། །བདུད་སྲིན་མི་དང་སྲིད་བསྡེབས་དམག་དཔུང་འདྲེན། །སྟོན་པ་བྱོན་ནས་ཐམས་ཅད་དབང་དུ་བསྡུས། །ལྷ་སྲིན་སྡེ་བརྒྱད་བཀའ་བསྒོས་དམ་ལ་བཞག  །མི་ལ་ལྷ་གསོལ་བྱུར་ཕུད་བཀའ་ལུང་ཕོག  །འདི་ཡན་ལྷ་སྲིན་མི་དང་མ་བྱེའི་དུས། །བསྐལ་པའི་དུས་རབས་ཆེན་པོ་དྲུག་ཙམ་བྱུང་། །མི་ལོ་འབུམ་ཕྲག་མང་པོའི་ཡུན་དུ་གནས། །མི་ཡི་ཁྱིམ་ཡང་ས་ཁུལ་བྲག་ཕུག་དང་། །བྱུང་བའི་རྡོ་་ཁང་བརྩེགས་དབུབ་བྱེད་པ་ལས། །ཤིང་གཅོད་ཐག་ཚེམ་སོགས་ཀྱི་ལས་མི་ཤེས། །ཟས་ནི་སར་སྐྱེས་ལྡུམ་དང་ཤ་ཟ་ལས། །ཞིང་འདེབས་བཟའ་ཤིང་འཛུགས་པའི་རིག་པ་མེད། །དེ་འོག་བསྐལ་པར་ཞང་ཞུང་བོད་དང་ཁམས། །སོ་སོར་རིམ་བྱེ་མི་རྣམས་ལས་རིམ་ཤེས། །ལྷ་སྲིན་སྡེ་རྣམས་རི་བྲག་ཆུ་སོགས་ལ། །གནས་ཤིང་དངོས་སུ་མི་རྒྱུ་བརྫུས་ཏེ་སྐྱེ། །གདོས་བཅས་ལུས་མིན་མི་ལས་ལྐོག་གྱུར་ཏེ། །མི་དང་ལྷ་འདྲེ་འབྲེལ་བ་ཇེ་ཉུང་སོང་། །ཕན་ཚུན་མི་མཐོང་གནས་དང་རང་བཞིན་བསྐལ། །བོད་ཡུལ་མ་སངས་སྤུན་དགུས་དབང་བྱས་ཏེ། །ཡུལ་མིང་བོད་ཁམས་གཞུང་དྲུག་ཅེས་སུ་གྲགས། །སྔ་རྟགས་མདའ་མདུང་མཚོན་ཆ་བརྩེ་བ་དང་། །བཞོན་པ་ཞོན་དང་དངོས་པོ་ཉོ་ཚོང་བྱུང་། །དེ་རྗེས་ཟ་རམ་སྐྱེས་དྲུག་གིས་དབང་བྱས། །ཡུལ་མིང་བོད་ཡུལ་སྟོང་སྡེ་བཅོ་བརྒྱད་ཅེས། །སྔ་རྟགས་མགོ་རྒྱན་རྣ་ཆ་འདོགས་པ་དང་། །གླུ་གར་རོལ་རྩེད་དགའ་སྟོན་བྱེད་པ་བྱུང་། །དེ་རྗེས་རྒྱལ་ཕྲན་བཅུ་གཉིས་དབང་བྱས་ཏེ། །ཡུལ་མིང་བོད་ཡུལ་སྦར་ཁ་ཆེ་བརྒྱད་ཅེས། །སྔ་རྟགས་ཕྱག་དང་ཞེ་ས་བྱེད་པ་དང་། །སྔར་གྱི་སྒྲུང་གཏམ་ཕྱིས་མིས་བཤད་པ་བྱུང་། །དེ་རྗེས་དེར་གྱེས་རྒྱལ་ཕྲན་སིལ་མ་ནི། །བཞི་བཅུའི་བར་འཕེལ་བོད་ཁམས་གླིང་དགུ་ཞེས། །སྔ་རྟགས་བོན་ལ་སྐྱབས་གསོལ་ཐར་པ་བསྒྲུབ། །ལྷ་རྟེན་བརྩེགས་ཤིང་རྟེན་གསུམ་བཞེངས་པ་བྱུང་། །དུས་རབས་དེ་བཞིའི་རིང་ལ་རིམ་བཞིན་དུ། །ལྕགས་རིགས་རྙེད་ཅིང་རྡོ་བཟོ་ཤིང་གཅོད་ཤེས། །སྤུ་བྲེག་ཐག་ཚེམ་ཞིང་འདེབས་སོགས་ཤེས་དུས། །འབྲོག་དང་ཡུལ་པ་ཞེས་པའི་སྲིད་པ་བྱུང་། །དེ་ནས་སྤུ་རྒྱལ་བཙན་པོས་དབང་མཛད་དེ། །རྗེ་ལ་སྔ་བ་གཉའ་ཁྲི་བཙན་པོ་དང་། །ཡུལ་ལ་སྔ་བ་ཡར་ལུང་སོག་ཁ་ཞེས། །ཡུལ་གྱི་མིང་ནི་བོད་ཡུལ་རུ་བཞིར་གྲགས། །ཞེས་སོགས་སོ། །
དབང་མཛད་བཅུའི་མིང་གི་ཐོགས་ཚུལ།
     བོད་དུ་བྱུང་བའི་དུས་རིམ་མི་འདྲ་བའི་དབང་སྒྱུར་པ་པོའི་བྱ་སྤྱོད་སོགས་ཀྱི་སྒོ་ནས་དུས་རབས་རེར་གནོད་སྦྱིན་དང་། བདུད་ལྷ་སོགས་ཀྱི་ཐ་སྙད་རེ་སྦྱར་ཡོད་ཅིང་། དེ་དག་གི་དབང་སྒྱུར་གྱི་ལྟེ་གནས་ད་ལྟ་ངོས་འཛིན་དཀའ་ཡང་བོད་ཀྱི་མངའ་ཁོངས་སུ་ངེས་ལ། མཚོན་ཆ་མདའ་གཞུ་དང་ཆུ་གྲི་སོགས་སྐབས་དེར་བེད་སྤྱོད་བྱེད་རྒྱུ་སྔར་བས་དར་རྒྱུས་སུ་སོང་བར་མངོན། མངའ་མཛད་ཐོག་མ་གནོད་སྦྱིན་ནག་པོ་ཞེས་པ་དེའང་ཐོག་མར་ཚོ་བ་ཞིག་གི་མིང་ཡིན་པ་ལ། རྗེས་སུ་དུས་རབས་སམ་རྒྱལ་རབས་ཀྱི་མིང་དུ་ཆགས་པར་ངེས་ཏེ། དེའི་རྗེས་སུ་བྱུང་བའི་དབང་མཛད་དེ་དག་ཀྱང་རིགས་སྤྱི་ཡི་མིང་ཡིན་པ་ལས། གང་ཟག་གཅིག་མཚོན་པར་བྱེད་པའི་མིང་མིན།
     འདིའི་གནོད་སྦྱིན་ནག་པོ་དང་། བདུད། སྲིན་པོ། ལྷ་འདྲེ་སོགས་ནི་སྐབས་དེར་མིའི་ཆ་རྐྱེན་མི་འཛོམ་ཞིང་གོས་དང་རྒྱན་སོགས་མེད་པར་གཅེར་བུར་འགྲོ་བའི་དུས་སྐབས་སུ་གནོད་སྦྱིན་ནག་པོ་དང་། དེ་ནས་རེ་ལྡེ་འཐག་ཐོག་མར་ཤེས་པའི་རེ་ལྡེ་མགོ་གཡག་སོགས་ལུས་སྟོབས་ཆེ་ཞིང་། ཤ་དམར་ཟ་ཞིང་ཁྲག་ལ་རོལ་བའི་མེས་པོ་དག་ལ་གནོད་སྦྱིན་དང་བདུད་སྲིན་སོགས་ཀྱི་མིང་བཏགས་པ་དང་། ཤ་བཙོས་ནས་ཟ་ཞིང་སྤྱོད་པ་ཅུང་ཇེ་འཇམ་ལ་སོང་བའི་དུས་སྐབས་སུ་དམར་འཇམ་ལྷ་དང་། དེ་ནས་བློ་རིག་ཅུང་ཟད་རྒྱས་ཏེ་གཡོ་ཇུས་འགོད་ཤེས་པའི་སྐབས་སུ་འདྲེ་དང་། རིགས་མང་དུ་འཕེལ་ཏེ་ཚོ་ཁག་དུ་མར་གྱེས་པའི་སྐབས་སུ་མ་སངས་རུས་དགུ། ལྷ་མཆོད་འདྲེ་མཆོད་ཀྱི་གདོད་མའི་ཆོས་ལུགས་དར་མགོ་ཚུགས་པའི་སྐབས་སུ་རྒྱལ་པོ། ཟས་ནོར་ལ་སྲེད་པ་ཆེ་བའི་སྐབས་སུ་འགོང་བོ་སོགས་འདྲ་བ་རྒྱུ་མཚན་དུ་བྱས་ནས་འདི་འདྲའི་མིང་བཏགས་པར་སྙམ།
དུས་རབས་སོ་སོའི་ངོས་འཛིན།
     དུས་རབས་དང་པོ། དམར་འཇམ་ལྷའི་དུས་ཡིན་ཞིང་། ཡིན་ནའང་སྐབས་དེར་མི་དང་དུད་འགྲོའི་འཚོ་བའི་བར་ཧེ་བག་ཆེར་མེད་པ་ཕན་ཚུན་འདྲ་མཉམ་དུ་གནས་པ་དང་། མི་ལོ་འབུམ་ཕྲག་མང་པོར་དེ་ལྟར་གནས་པ་བཤད་པ་ལྟར་ན། འདི་ཕལ་ཆེར་བསྐལ་པ་ཡ་ཆོག་གམ་གདོད་མའི་སྤྱི་ཚོགས་ཀྱི་འཚོ་བ་གཙོ་བོར་བསྟན་ཡོད་པར་འདྲ། སྐབས་འདིར་ཡུལ་གྱི་མིང་ལ་ལྷ་ཡུལ་གུང་ཐང་ཟེར་བ་དང་། མིི་རྣམས་གཡའ་རི་དང་གངས་རེིའི་རྩེ་གནས་བཅས་ཡོད་པར་བཤད།
     དུས་རབས་གཉིས་པ། སྐབས་དེར་མ་སངས་གཉན་གྱི་དུས་ཡིན་ལ་དུས་དེར་མིའི་བསམ་བློ་དང་ཐབས་ཤེས་གང་ཅིའི་ཐད་དུད་འགྲོ་གཞན་ལས་སྟོབས་ཆེ་བར་ཆགས་ཡོད་པ་དང་། གནས་ཡུལ་ཀྱང་རྫ་རི་དང་། ཤིང་ནགས། སྤང་ལྗོངས་སོགས་ག་ས་ག་ལ་གནས་ཡོད་པ་དང་། ཡུལ་གྱི་མིང་ལ་གཉན་ཡུལ་གསེར་སྟེང་ཟེར་བར་བཤད། དུས་ཚོད་ནི་མི་ལོ་འབུམ་ཕྲག་མང་པོ་དེ་ལྟར་བྱུང་ཞེས་བཤད།
     དུས་རབས་གསུམ་པ། འཕྱེ་བོ་ཀླུ་ཡི་དུས་ཞེས་ཟེར་ཞིང་སྐབས་དེར་མིའི་ཤེས་རིག་ལ་སྔ་དང་མི་འདྲ་བའི་ཡར་རྒྱས་ཆེན་པོར་བྱུང་ཡོད་པར་གསལ་སྟེ། ལྷ་ཡིས་ཕན་པ་དང་འདྲེ་ཡིས་གནོད་པའི་བསམ་བློ། ཀླུ་མཆོད་དང་ཀླུ་བསངས་སོགས་ཆོས་ལུགས་ཀྱི་བསམ་བློ་དང་ཆོ་ག་བྱེད་ཤེས་པ། རྟ་དང་ནོར་སོགས་བདག་ཏུ་བཟུང་ནས་བེད་སྤྱོད་ཤེས་པ་བཅས་བྱུང་ཡོད་པར་གསལ། ཡུལ་གྱི་མིང་ལ་ཀླུ་ཡུལ་ན་ར་སེང་སྔོན་ཞེས་ཟེར། བཀའ་ཐང་སྡེ་ལྔ་ལས། ཀླུ་ཡི་སྐབས་སུ། སྔ་རྟགས་རྐ་ཆུ་ལ་སྤྱོད་པར་བྱུང་། ཞེས་པ་ཆུ་རྐ་བཟོས་ཏེ་ཆུ་ཡུར་དུ་དྲངས་ནས་ཆུའི་ནུས་པ་དེ་བེད་སྤྱོད་བྱས་པའི་དོན་ཡིན་པར་སེམས།
     དུས་རབས་བཞི་པ། གནོད་སྦྱིན་བཙན་གྱི་དུས་ཟེར་ཞིང་། སྐབས་དེར་འགྲོ་བ་མིའི་བར་ཕན་ཚུན་རོགས་རམ་དང་། གནོད་པ་བྱེད་རེས་བྱ་ཞིང་ཡོད་པ་དང་། ཡུལ་ལྷ་མཆོད་པ་དང་བཙན་མདོས་བཏང་བ་སོགས་ཆོས་ལུགས་ཀྱི་ཤེས་རིག་དང་ཆོ་ག་མང་པོ་བྱུང་ཡོད་པ་དང་། མཚོན་ཆ་མདའ་གཞུ་སོགས་བཟོ་ཤེས་པའི་ཤེས་རིག་དང་ལག་རྩལ་དར་ཡོད་པར་བཤད། སྔ་རྟགས་གཉན་པོ་བཙན་པ་དེ་ནས་བྱུང་། ཞེས་པའི་དོན་ལ་བརྟགས་ན། ལྷག་པར་ཏུ་བཙན་པོ་དང་གཡོག་པོ་ཞེས་དཔོན་གཡོག་བར་གྱི་དབྱེ་བ་ཆེན་པོར་བྱུང་ཡོད་པ་གསལ། ཡུལ་གྱི་མིང་ལ་གདོང་དམར་བཙན་ཡུལ་ཞེས་ཟེར། མཁས་པའི་དགའ་སྟོན་སོགས་ལས་བཟང་ཡུལ་རྒྱན་མེད་ཅེས་ཟེར།
     དུས་རབས་ལྔ་པ། སྲིན་པོས་དབང་སྒྱུར་བྱས་པའི་དུས་ཟེར། དུས་དེར་འཁྲུག་རྩོད་དང་རྐུན་ཇག་མང་སྟབས་མི་རྣམས་བྲག་རི་དང་། ནགས་ཁྲོད་སོགས་བཙན་ས་བཟུང་ནས་བསྡད་ཡོད་པ་དང་། མི་ཚོས་འཚོ་བ་གཙོ་བོ་སེམས་ཅན་བསད་པའི་ཤ་ཁྲག་ལ་ལོངས་སྤྱོད་ཅིང་ཡོད་པས་མི་ཐམས་ཅད་ངོ་གདོང་དམར་པོ་ཡོད་པ། མི་བདེ་བ་དང་གནོད་པ་སོགས་བྱུང་ན་ཡུལ་ལྷ་ལ་ཤ་ཁྲག་གིས་མཆོད་པ་བཅས་ཀྱི་སྲོལ་བྱུང་ཡོད་པ་དང་། འུར་རྡོ་དང་མདུང་སོགས་བཟོ་རྒྱུའི་ལག་རྩལ་བྱུང་ཡོད་པར་བཤད། ཡུལ་གྱི་མིང་ལ་སྲིན་པོ་ནག་པོའི་ཡུལ་དགུ་ཞེས་ཟེར།
     དུས་རབས་དྲུག་པ། བདུད་ཀྱིས་དབང་བསྒྱུར་བའི་དུས་ཟེར། སྐབས་དེར་རྩྭ་ཁང་དང་། ཤིང་ཁང་། རྡོ་ཁང་བཅས་མི་སྡོད་གནས་ཀྱི་ཁང་པ་རིགས་སྣ་ཚོགས་བཟོ་ཐུབ་པར་བྱུང་བ་དང་། བོད་ཀྱི་ཆུ་བོ་བཞི་འདུས་མགོ་མཇུག་བར་ཏེ་དེང་དུས་མངའ་རིས་ཡུལ་གྱི་གངས་ཏི་སིའིི་ཉེ་སྐོར་བར་དམག་དྲུངས་ནས་གཤེན་ལ་དོ་བརྡོ་ཞེིང་། དགྲ་སྟ་བཟོས་ཤིང་གཞན་སྡེ་བཅོམ་པར་བཤད། ཡུལ་གྱི་མིང་ལ་བདུད་ཡུལ་ཁ་རགས་རོང་དགུ་ཟེར། དེང་དུས་ཀོང་པོའི་ཡུལ་འདི་ཡིན་པར་སེམས་ཏེ། འདི་ཡན་བསྐལ་པའི་དུས་རབས་ཆེན་པོ་དྲུག་ལ་མི་ལོ་འབུམ་ཕྲག་མང་པོའི་ཡུན་དུ་གནས་ཞེས་བོན་གྱི་བསྟན་འབྱུང་ལས་གསུངས། ཡུལ་གྱི་མིང་ལ་བདུད་ཡུལ་ཁ་རག་རོང་དགུ་ཞེས་ཟེར་བ་ནི་དབང་བསྒྱུར་བྱེད་པའི་དཔོན་པོ་དེའི་རུས་མིང་ཡུལ་ལ་བཏགས་པར་ངེས་ལ། ཆབ་སྲིད་ཀྱི་ལྟེ་གནས་དེ་དེང་དུས་ཀྱི་སྤོ་བོ་སྦྲ་རྨོག་དང་། རྫ་ཡུལ། མེ་ཏོག་བཅས་ཀྱི་ས་ཕྱོགས་གང་རུང་ཞིག་ཡིན་པར་ངེས་ཏེ། བོན་གྱི་ལོ་རྒྱུས་རནམས་ལས། བདུད་དམག་གིས་སྟོན་པ་གཤེན་རབ་ཚང་གི་རྟ་དེད་སོང་བ་ལ། གཤེན་རབ་ར་མདའ་རྗེས་དེད་ཕེབས་པའི་ལམ་བར་ཀོང་པོར་སླེབས་པ་དང་། བདུད་ཀྱིས་བདུད་རི་ནག་པོས་ལམ་བཅད་པར་སྟོན་པས་མཐེའུ་ཆུང་གཡོན་པས་བླངས་ཏེ་སྒང་ཀ་སུམ་མདོར་བཞག  མདུང་རྩེ་འདྲ་བའི་སྤྲུལ་པའི་རི་ཞིག་སྤྲུལ་ནས་ལྷ྄རི་གྱང་ཐོའི་ཟུར་ལ་བཞག་པའི་མཚན་ཡང་བོན་རི་ཆེན་པོར་བཏགས་ཞེས་དེང་སང་གི་ཀོང་བོན་རི་འདི་ཡིན་པར་གསལ་བ་དང་། ཡང་མར་བྱོན་པ་ལ་བདུད་མོའི་རིགས་བུད་མེད་གཞོན་ནུ་མཛེས་མ་མང་པོས་གསོལ་ཆས་ལ་དུག་སྦྱར་ཏེ་དྲངས་པ་ལ། སྟོན་པས་ཐལ་མོ་བརྡལ་པས་བདུད་མོ་རྣམས་མི་སྡུག་པའི་རྒན་མོ་སེ་མོ་བརྒྱ་རུ་སོང་བ་ལ་དེང་སང་ཀྱང་སེ་མོ་བོན་ཐང་དུ་གྲགས་པ་སོགས་གསལ་བ་ལྟར་ན། བདུད་ཡུལ་དེ་ཀོང་བོན་རིའི་ཕྱི་ལོགས་སུ་ཡོད་དགོས། སྐབས་དེར་ཐོན་སྐྱེད་ཀྱི་ལག་ཆ་བེད་སྤྱོད་ཕོན་ཆེ་ཤོས་སྟ་རེ༼རྡོ་ཡི་སྟ་རེ༽ཡིན་པར་གསལ།
     དུས་རབས་བདུན་པ། འགོང་པོ་སྤུན་དགུས་དབང་བསྒྱུར་བའི་དུས་ཡིན་ཟེར། བོན་གྱི་བསྟན་འབྱུང་ལས་འགོང་པོ་སྤུན་དགུས་དབང་བསྒྱུར་བྱས་པ་དང་། རྨུ་རྒྱལ་ཁོ་རྗེས་དབང་བསྒྱུར་བྱས་པའི་ལོ་རྒྱུས་མི་གསལ་ཡང་། འདི་གཉིས་བདུད་རིགས་ཀྱི་ཁོངས་སུ་གཏོགས་པ་ཡིན་པར་སེམས།
     དུས་རབས་བརྒྱད་པ། རྨུ་རྒྱལ་ཁོ་རྗེའི་དུས་ཡིན། དུས་དེར་རི་དྭགས་སེམས་ཅན་འཛིན་པ་མ་ཟད། དམག་འཐབ་པའི་སྐབས་སུ་དགྲ་བོ་ཞགས་པས་འཛིན་པ་དང་། མདུང་ཞགས་འཕེན་སྲོལ་ཡང་དུས་འདི་ཙམ་ནས་དར་ཡོད་པར་སེམས། བོན་གྱི་སྟོན་པ་གཤེན་རབ་ཡང་རྨུའི་གདུང་རབས་ཡིན་པར་ཞང་བོད་ལོ་རྒྱུས་ཏི་སེའི་འོད་ལས་གསལ།
     དུས་རབས་དགུ་པ། མ་སངས་རུས་དགུའི་ཡུལ་འདིར་དབང་བྱས་པའི་དུས་ལ་ཟེར།
     མ་སངས་རུས་དགུ་ནི། གཉའ་གཡའ་སྤང་སྐྱེས། གར་ཏིང་ནམ་ཚ། གླེ་ངན་ལམ་ཙང་སྐྱེས། རུ་ཐོ་གར་སྐྱེས། ཤེ་དོ་ཀེར་ཏིང་ནས། མེ་པད་སྐྱེས། གསད་གེ་འཕྲུལ་པོ་ཆེ། དྲང་བ་དྲངས་མ་མགུར། བཀོད་སྟོར་ནམ་ཚ་བཅས་བྲིས་འདུག  རྩིས་ཀྱི་བསྟན་བཅོས་བེེ་དཀར་དུ་དྲངས་པའི་བོན་གྱི་དཔེ་རྙིང་རྩིས་ཀྱི་འབྱུང་ཁུངས་སྐོར་ལས་གསལ་བ་ལྟར་ན། ཀོང་ཙེ་འཕྲུལ་རྒྱལ་མ་བྱོན་གོང་གི་ལོ་ངོ་གཉིས་སྟོང་ལྷག་ཙམ་ན། མ་སངས་རུས་དགུས་ཡུལ་འདིར་དབང་བསྒྱུར་བྱས་ཤིང་། བོད་འདིར་ཡོངས་གྲགས་ལ་མ་སངས་སྤུན་དགུའམ་ཐེ་རངས་སྤུན་དགུས་ཤྭོ་བཟོས་པར་བཤད་པ་བཞིན། དུས་འདིར་ལྕགས་རིགས་རྙེད་ཅིང་ལྕགས་ཆས་བེད་སྤྱོད་དར་བ་དང་། དངོས་རྫས་བགོ་བཤའི་ཆེད་དུ་ཤྭོ་རྒྱན་འདེབས་པ་དང་། བྲེ་དང་སྲང་བཅོས་ནས་དངོས་པོ་ཉོ་ཚོང་གི་ལས་ལ་དར་རྒྱས་བྱུང་བ་དང་། མཚོན་འགོག་གི་ཆེད་དུ་གོ་ཆ་དང་ཕུབ་ཆུང་བཟོས་ནས་སྤྱོད་སྲོལ་དར་བ་དང་། རྟ་ཞོན་ཞིང་རྣ་རྒྱན་འདོགས་པ་སོགས་འཚོ་བའི་སྤྱོད་ཚུལ་ལ་སྔ་ལས་སྤྲོས་པ་ཇེ་ཆེ་ཕྱིན་ཚུལ་ཆོས་བོན་གཉིས་ཀའི་ལོ་རྒྱུས་ལས་གསལ་བ་ལྟར་རོ། །དེང་དུས་གནའ་ཤུལ་ཞིབ་འཇུག་དང་བསྡུར་ན་སྐབས་འདི་ཕལ་ཆེར་ཆབ་མདོའི་ཁ་རོའི་གནའ་ཤུལ་གྱི་དུས་ཙམ་ཡིན་པར་གསལ། སྐབས་འདིར་ཡུལ་གྱི་མིང་ལ་བོད་ཁམས་གཡའ་དྲུག་ཟེར། བོད་ཅེས་ཡུལ་མིང་ཐོག་མར་བྱུང་བའི་དུས་ནི་མ་སངས་རུས་དགུ་ནས་ཡིན། དེས་ན་བོད་ཅེས་པའི་ཡུལ་མིང་འདི་ལ་རྗེས་གྲུབ་ཀྱི་མིང་གི་འགྲེལ་བཤད་གནང་བ་ནི་སྙིང་བོ་ཅི་ཡང་མེད་པར་མཐོང་།
     དུས་རབས་བཅུ་པ། ཟ་རམས་སྐྱེས་དྲུག་གི་དུས་ལ་ཟེར། འབྱུང་རྩིས་ཀྱི་ལོ་རྒྱུས་ལྟར་ན། ཧ་ལམ་སྤྱི་ལོའི་སྔོན་གྱི་དུས་རབས་ཉི་ཤུ་པའི་སྟོད་སྨད་ཐམས་ཅད་ལ་ཟ་རམས་སྐྱེས་དྲུག་གི་དུས་ཡིན་པར་འདྲ་སྟེ། སྤྱི་ལོའི་སྔོན་གྱི༢༣༡༧པའི་ཤིང་སྤྲེལ་ལོར་རྩིས་ཀྱི་སློབ་དཔོན་ས་བདག་རླུང་རྒྱལ་ཞེས་པར་འཁྲུངས་ཤིང་དེས་ལོ་སྐོར་བཅུ་གཉིས་དང་། འབྱུང་བ་ལྔ་སྦྱར་ནས་ལོ་རྒན་དྲུག་བཅུའི་བརྩི་སྲོལ་བསྟན་ཡོད་པ་དང་། སྐབས་དེའི་དུས་ན་རྡོ་བཟོ་དང་ཤིང་བཟོའི་ལག་རྩལ་བཟང་པོར་བྱུང་ཞིང་། མི་རྣམས་གླུ་གར་རོལ་མོ་ལ་དགའ་བར་བཤད་པ་དང་། ཟ་རམས་སྐྱེས་དྲུག་སྐབས་སུ་མགོ་རྒྱན་དང་། རྣ་རྒྱན་ལེགས་པོར་འདོགས་ཤིང་། གླུ་གར་རོལ་མོ་སོགས་ལ་དགའ་སྟོན་ལ་དགྱེས་པར་བཤད་པ་གཅིག་གྱུར་བྱུང་། ཡུལ་གྱི་མིང་ལ་བོད་ཡུལ་སྟོང་སྡེ་བཅོ་བརྒྱད་ཅེས་ཟེར།