《ཐང་ཡིག་གསར་མ》ལས་བྱུང་བའི་ཐུ་བྷོད་གླེགས་བམ་གྱི་དགོངས་དོན་གོ་བདེར་ཚིགས་སུ་བཅད་པ་བཙན་པོའི་ཞལ་ལུང།

《ཐང་ཡིག་གསར་མ》ལས་བྱུང་བའི་ཐུ་བྷོད་གླེགས་བམ་གྱི་དགོངས་དོན་
གོ་བདེར་ཚིགས་སུ་བཅད་པ་བཙན་པོའི་ཞལ་ལུང།
ཐང་ཡིག་གསར་མའི་གླེགས་བམ་ཉིས་བརྒྱ་དང་བཅུ་དྲུག་པའི་སྟོད་ཆ།
              མགར་རྩེ་ཨུ་རྒྱན།

ནུབ་ཕྱོགས་འཛིན་མའི་དབུས་ཀྱི་ལྟེ་བ་རུ།།
སྟོབས་འབྱོར་དཔལ་གྱི་གྲགས་པ་རབ་མཐོ་བའི།།
ཐུ་བྷོད་བཙན་པོའི་དཔའ་མཛངས་རྔ་ཆེན་སྒྲས།།
མཐའ་བཞིའི་རྒྱལ་ཁམས་དྲག་པོས་མངའ་དབང་མཛད།།

ས་མཐོ་ཆུ་གཙང་གངས་འདབས་གྲང་རླུང་རྒོད།།
དབྱར་ཟླ་དྲུག་པར་རི་རྩེར་ཁ་བས་གཡོགས།།
ཐུ་བྷོད་བཙན་པོས་དབྱར་ལྭ(ཕྱིང་བུ)གྱོན།།
དྲག་པོ་གཡུལ་གྱི་བྱ་བར་དཔའ་མཛངས་ལྡན།།

དབྱར་དགུན་སྟོན་དཔྱིད་དུས་བཞིའི་གོམ་སྟབས་མྱུར།།
རྩྭ་ཆུ་འཚོ་རྟེན་བཟང་སར་མཚེར་ས་སྤོ།།
ཕ་རོལ་དགྲ་བོས་རྒོལ་བའི་དུང་བརྡ་རུ།།
དཔའ་འབར་མེ་ཆེན་བཀོལ་ནས་འདུ་འཛོམས་བྱེད།།

ཁྲབ་རྨོག་བཙན་པོ་མདའ་གྲིས་ཆོད་པར་དཀའ།།
དམག་ཁྲིམས་ཞིབ་ཅིང་སྒྲིག་འཛུགས་གོ་རིམ་ལྡན།།
ཕྱི་དགྲར་རྒོལ་བར་འཆམ་མཐུན་དཔའ་རྩལ་འཛོམས།།
རྗེ་བོ་བཀུར་ཅིང་འབངས་མིར་བརྩོན་སེམས་ལྡན།།

སྐབས་འགར་བཙན་པོ་རྒྱན་བློན་ཞལ་འཛོམས་ཏེ།།
རྟ་མཆོག་ཅིབས་ནས་འབྲོང་དང་རྐྱང་རྒོད་རྔོན།།
མཐུན་པའི་མི་ལ(དབུ་སྙུང)མནའ་ཆེན་བོར།།
ལྷ་རྒྱལ་འཐེན་ཅིང་ཨ་རག(འཁྱོར་བས)བཏུང་།།
 
ཐེ་ཙུང་ཀྲིན་ཀོན་ཁྲི་ལོ་བརྒྱད་པ་རུ།།
ཏང་ཞང་པེ་ལན་འ་ཞ་ཕམ་པར་མཛད།།
རྒྱའི་འབངས་འཇང་བ་རྣམས་ཀྱང་བོད་ལ་ལོག།།
རྒྱུ་ནོར་མངའ་ཐང་ཡོད་ཚད་བཙན་པོར་ཐོབ།།

ཐེ་ཙུང་ཀྲིན་ཀོན་ཁྲི་ལོ་བཅོ་ལྔ་བར།།
ལྷ་ཅིག་ལྦུན་ཁྲིན་ཀོང་ཇོ་བོད་དུ་ཕེབས།།
བཙན་པོ་འཁོར་བཅས་སྟོང་རི་མཚོ་ནག་ཏུ།།
གྱི་ལིང་ཞོན་ནས་ཕེབས་བསུར་མདུན་དུ་བསྐྱོད།།

དབུས་སུ་ཐུགས་རྒྱུད་སྒམ་པོའི་སྲོང་བཙན་བཞུགས།།
འོག་ཏུ་འཕྲུལ་བློན་མཛངས་བ་སྟོང་བཙན་གནས།།
བཙན་པོའི་ཆབ་སྲིད་ལྕགས་རིའི་དབུ་འཕང་མཐོ།།
དཔའ་མཛངས་གྲགས་པའི་དབྱངས་སྙན་མཐའ་བཞིར་ལྡིར།།

ཞན་ཆིན་ཁྲི་ལོ་གསུམ་པའི་སྔ་རོལ་ཏུ།།
ཐུ་བྷོད་བཙན་པོའི་གཟུགས་སྐུ་དབྱིངས་སུ་ཡལ།།
དབོན་སྲས་མང་སྲོང་མང་བཙན་སྐུ་ན་ཕྲ་།།
སྲིད་ཀྱི་གཉེར་ཁ་ཐམས་ཅད་མགར་གྱིས་བསྐྱངས།།

སྟོང་བཙན་རྣམ་དཔྱོད་པདྨོའི་སྦྲང་རྩི་ལ།།
ཐེ་ཙོང་བུང་བའི་ཡིད་སེམས་རབ་མྱོས་ནས།།
ལང་ཡ་ཀོང་ཇོའི་ཚ་མོར་གཉེན་བསླངས་ཡང་།།
རེ་འདོད་དབང་གཞུའི་རི་མོ་ངལ་མེད་སྟོང་།།

མི་འདོད་རྐྱེན་ངན་བདག་མོའི་བཀའ་ལུང་གིས།།
དགུང་བློན་སྟོང་བཙན་དམག་ཐོག་དགོངས་པ་རྫོགས།།
ཁྲི་འབྲིང་བཙན་བྲོད་ཟི་མདོ་འབའ་བློན་དང་།།
བཙན་སྙ་ལྡེམ་བུ་སོགས་ཀྱིས་སླར་ཡང་བསྐྱངས།།

ཞན་ཧྲན་ཁྲི་ལོ་དང་པོར་ཁྲི་འབྲིང་གིས།།
འ་ཞ་བཅོམས་ཞིང་ཨ་ཞི་སྡེ་བཞི་བླངས།།
ཀྲུའུ་ཆེན་བཅོ་བརྒྱད་ཕབ་ཅིང་པོ་ཧན་ཐོབ།།
རྒྱལ་ཁའི་ལྷ་དར་འཐེན་ཅིང་དགའ་བདེར་རོལ།།

ཀྲུང་ཙུང་གོང་མར་འཕྲད་པའི་ལབ་གླེང་ལས།།
ཨ་མདོ་རྡོ་སྤི་སྟོང་རི་མཚོ་ནག་རྒྱུད།།
དབྱར་དུས་ཁ་བ་མི་བཞུ་གྲང་རླུང་རྒོད།།
བཙན་པོ་རྒྱལ་བློན་དབྱར་ལྭ་ཕྱིང་བུ་གྱོན།།

ཧྲན་ཡོན་ཁྲི་ལོ་གཉིས་པར་ཐུ་བྷོད་ཀྱིས།།
ཧྲན་ཀྲིག་ཧི་ཀྲིག་ཀོ་ཀྲིག་ཧྤངས་ཀྲིག་བཅོམས།།
འབངས་སེམས་བཀུགས་ཏེ་རྒྱུ་ནོར་ཐམས་ཅད་འཕྲོག།།
ཐང་དམག་ཕམ་ཞིང་བྷོད་འགོག་གྲོས་ཁ་བཏོན།།

དབྱི་ཧྥིན་ཁྲི་ལོ་བཞི་བར་བཙན་པོ་གཤེགས།།
ཐུགས་སྲས་འདུས་སྲོང་མང་རྗེ་རྒྱལ་སར་བཀོད།།
མགར་སྲས་ཁྲི་འབྲིང་བློན་གྱི་གཙོ་བོར་བསྐོས།།
བཙན་བྲོལ་འབའ་བློན་སོགས་ཀྱིས་མཐའ་མཚམས་བསྲུངས།།

ཁྲི་འབྲིང་སྤུན་མཆེན་མཛམས་ལ་དཔའ་ངར་ལྡན།།
ཤར་ཕྱོགས་ཐང་ཡང་རྒོལ་བས་ལན་མང་ཕམ།།
བློན་འབངས་རྣམས་ཀྱང་ཁོ་ཚོའི་ཕྱོགས་སུ་འཁོར།།
སྲིད་ཁྲིམས་ཞལ་ལྕེ་གཅོད་པར་བློ་གྲོས་མངའ།།

བཙན་པོ་འདུས་སྲོང་མང་པོ་ཆེར་རྒྱས་པས།།
རྒྱལ་སྲིད་མངའ་དབང་འཛིན་པར་བློ་མ་བདེ།།
ཁྲི་འབྲིང་ཕྱི་རུ་སྡོད་པར་དུས་བསྟུན་ནས།།
འཁོར་གཡོག་ཉིས་སྟོང་ལྷག་ཀྱང་རྩ་མེད་བཏང་།།

བཙན་པོས་གློ་བ་ཉེ་རྣམས་ཚུར་བསྡུས་ཏེ།།
ནང་དམེའི་གཡུལ་འགྱེད་བྱེད་པར་གྲ་སྒྲིག་ཀྱང།།
ཁྲི་འབྲིང་རྒོལ་བ་མ་བརྩམས་རང་བཀུམས་པས།།
འཁོར་འབངས་ཉིས་བརྒྱ་ལྷག་ཀྱང་གློ་བ་རིང་།།

བཙན་བྲོད་མང་བོ་རྗེ་སོགས་ཡིད་ཆད་ནས།།
ཤར་ཕྱོགས་ཐང་གི་རྗེ་བོར་སྐྱབས་བཅོལ་བས།།
དགའ་སྟོན་རྟེན་འབྲེལ་འཛོམས་པོའི་སྐྱེས་ཕུལ་ཏེ།།
དངུལ་ཡིག་ཆོ་ལོ་མཐོན་པོའི་ཐོབ་གནངས་སོ།།

ལྷོ་ཕྱོགས་ཐུ་བྷོད་མངའ་སྡེ་གློ་བ་རིང་།།
བཙན་པོ་འདུས་སྲོང་མང་རྗེ་དམག་ཐོག་འདས།།
གཅེན་གཅོང་སྲས་རྣམས་མ་མཐུན་རྒྱལ་ས་རྩོད།།
བཙན་པོ་ཁྲི་གཙུགས་ལྡེ་བཙན་རྒྱལ་སར་བཀོད།།

ཀྲུང་ཙུང་ཅིན་ལུང་ཁྲི་ལོ་གཉིས་པ་རུ།།
ལིག་ཧྲིག་ཅིན་ཁྲིན(གྱིམ་ཤིང)ཀོང་ཇོ་བོད་དུ་བསུས།།
གསེར་དངུལ་དར་གོས་སྣ་ཚོགས་རྫོངས་བར་ཕུལ།།
རོལ་རྩེད་གར་མཁན་མང་པོས་སྐྱེལ་མ་བྱས།།

རྐང་མགྱོགས་ཕོ་ཉས་ཡིག་འཕྲིན་མང་དུ་བསྐྱལ།།
བཙན་པོ་དབོན་ཞང་མཐུན་པའི་རྡོ་རིང་བཙུགས།།
དགུང་སྔོན་ཉི་ཟླའི་འོད་སྣང་མཁའ་རུ་གསལ།།
རྒྱལ་ཁམས་བདེ་ཞིང་སྐྱིད་པའི་ལོ་ལེགས་འབྱུང་།།

ཐེན་པོ་ཁྲི་ལོ་བཅུ་བར་བཙན་པོ་གཤེགས།།
ཐུགས་སྲས་ཁྲི་སྲོང་ལྡེ་བཙན་རྒྱལ་སར་བཀོད།།
སུམ་པའི་སྟག་སྒྲ་ཐང་ལ་མགོ་བོ་འཛུལ།།
ཧེད་དབྱིན་དབང་སོགས་ཆོ་ལོ་ཆེན་པོ་སྦྱར།།

པོ་དབྱིན་ཁྲི་ལོ་དང་བོར་བཙན་པོ་ཡིས།།
མཐའ་བཞིའི་རྒྱལ་ཁམས་མ་ལུས་མངའ་དབང་མཛད།།
ཏེ་ཙོང་གོང་མ་ཧྲན་ཀྲིག་ཕྱོགས་སུ་བྲོས།།
རྒྱའི་འབངས་གོང་བློན་རྣམས་ཀྱང་མགོ་བོ་འཛུལ།།

2013ལོའི་ཟླ5བའི་ཚེས4ཉིན།

༼ཕྱིང་བུ།༽
ཕྱུགས་ཀྱི་བལ་དང་ཁུལ་སོགས་གནོན་འཆག་བྱས་ནས་ཐགས་སྐུད་མེད་པར་བཟོས་པའི་དངོས་
རྫས་ཀྱི་མིང་། ཚིག་བསྡུས་ན་ཕྱིང་ཞེས་འབྲི་ཆོག་སྟེ། (དཔེར་ན།)ཕྱིང་གདན། ཕྱིང་ཞྭ། ཕྱིང་འབོབ་
ཅེས་པ་ལྟ་བུ།
༼དབུ་སྙུང་།༽
1 མགོ་ན་བ།
2.མནའ་བསྐྱལ་བའམ་ཁ་ཏན་བཞག་པའི་དོན་ཏེ།
(དཔེར་ན།) རོགས་རམ་གནང་རྒྱུའི་དབུ་སྙུང་བཞེས་སོང་ལྟ་བུ།
༼ཐེ་ཙུང་ཀྲིན་ཀོན་ཁྲི་ལོ་བརྒྱད་པ།༽
སྤྱི་ལོ༦༢༧༼ཤིང་ཕོ་རྟ་༽ཐང་ཐེ་ཙུང་ལི་ཧྲི་མིན།ཀྲིན་ཀོན་ཁྲི་ལོ་བརྒྱད་པ།
༼ཐེ་ཙུང་ཀྲིན་ཀོན་ཁྲི་ལོ་བཅོ་ལྔ་བ།༽སྤྱི་ལོ༦༤༡༼ལྕགས་མོ་གླང་༽ཐང་ཐེ་ཙུང་ལི་ཧྲི་མིན། ཁྲི་ལོ་བཅོ་ལྔ་བ།
༼ལྦུན་ཁྲིན་ཀོང་ཇོ༽རྒྱ་བཟའ་ཀོང་ཇོའི་མིང་།
༼ཞན་ཧྲན་ཁྲི་ལོ་དང་པོ།༽
སྤྱི་ལོ༦༧༠༼ལྕགས་པོ་རྟ་༽ཐང་ཀོ་ཙུང་ལི་ཀྲི།ཞན་ཧྲན་ཁྲི་ལོ་དང་པོ།
༼མཚོ་ནག༽
1.ཚྭ་མཚོ་ཞིག དགེ་རྒྱས་རྫོང་ཁོངས་སུ་ཡོད།
2.མཚོ་ཞིག  ཨ་མདོ་རྫོང་གི་ལྷོ་རྒྱུད་དུ་ཡོད།
༼ཧྲན་ཡོན་ཁྲི་ལོ་གཉིས་པ།༽
སྤྱི་ལོ༦༧༤༼ཤིང་ཕོ་ཁྱི༽ཐང་ཀོ་ཙུང་ལི་ཀྲི། ཧྲན་ཡོན་ཁྲི་ལོ་གཉིས་པ།
༼དབྱི་ཧྥིན་ཁྲི་ལོ་བཞི་བ།༽
སྤྱི་ལོ༦༧༩༼ས་མོ་ཡོས༽ཐང་ཀོ་ཙུང་ལི་ཀྲི། དབྱི་ཧྥིན་ཁྲི་ལོ་བཞི་བ།
༼ཐེན་པོ་ཁྲི་ལོ་བཅུ་བ།༽
ཐང་ཞོན་ཙུང་ལིལུང་ཅི།
༼པོ་དབྱིན་ཁྲི་ལོ་དང་བོ།༽
སྤྱི་ལོ༨༢༥༼ཤིང་མོ་སྦྲུལ༽ཐང་ཅིན་ཙུང་ལི་ཀྲན། པོ་དབྱིན་ཁྲི་ལོ་དང་བོ།