རྒྱལ་ཕྲན་བཅུ་གཉིས་དང་སིལ་མ་བཞི་བཅུའི་སྐོར།

  བོད་ཀྱི་གནའ་མི་རྣམས་མི་ལོ་སྟོང་ཕྲག་དུ་མར་ཐོན་སྐྱེད་ལ་ཞུགས་པ་དང་ལག་ཆ་སྤྱོད་ཅིང་བཟོ་ཤེས་པ་ནས་རིམ་བཞིན་འཕེལ་རྒྱས་བྱུང་མཐར་མི་གྲངས་ཀྱང་ཆེས་ཆེར་འཕེལ་སྟབས་རུས་ཚན་མང་པོར་གྱེས་ཤིང༌།  རུས་ཚོ་སོ་སོར་ཡར་དར་འཕེལ་ཆ་མི་སྙོམས་པའི་ཐོན་རྫས་ཀྱི་ལྷག་མ་བྱུང་བ་དང་བསྟུན་ནས་ཚོ་བའི་ཁྲོད་ཀྱི་མི་རྒན་རབས་ཉམས་མྱོང་དང་ལྡན་པ་རྣམས་ཀྱིས་ཐུན་མོང་གི་ཐོན་སྐྱེད་དང་འཚོ་བའི་འགན་འཁུར་བས་འགོ་བ་རང་བཞིན་གྱིས་ཆགས་པ་དང༌།     ཁོང་ཚོས་ཚོ་བ་ཐུན་མོང་ལ་བསམ་གཞིགས་དང་བཀོད་འདོམས་བྱེད་ཅིང༌།     དེ་ལ་ཀུན་གྱིས་བརྩི་བཀུར་བྱེད་པའི་སྲོལ་དང་རུས་ཚན་གྱི་ཚོ་བ་སོ་སོའི་རྣམ་པ་ཆེ་ཆུང་ཅི་རིགས་སུ་ཆགས་པའི་དུས་རིམ་ཧ་ཅང་རིང་མོ་ཞིག་བརྒྱུད་པ་རེད།