བོད་ཀྱི་ས་ཁམས་ཆགས་ཚུལ།
དང་ཐོག་བོད་ཡུལ་སྟོད་སྨད་བར་གསུམ་ཐམས་ཅད་ཆུ་ཡིས་ཡོངས་སུ་གང་བའི་རྒྱ་མཚོ་ཆེན་པོ་ཞིག་ཡིན་པ་དང༌། དེ་ནས་རིམ་བཞིན་ཀོང་ཆུ་བརླག་ཁ་བྱེ་ནས་ཆུ་རྣམས་དེར་ཐིམ་སྟེ་བོད་ཡུལ་གྱི་རྣམ་པ་གསལ་པོར་ཐོན་པ་ཡིན་ཞེས་སྔོན་གྱི་ཡིག་ཚང་དུ་མའི་ནང་བསྟན་ཡོད་ཅིང༌། དེང་སྐབས་གནའ་རབས་ཀྱི་ས་ཁམས་དང་འགྱུར་རྡོ་ལ་ཞིབ་འཇུག་བྱེད་མཁན་ཚན་རིག་ཞིབ་འཇུག་པ་ཚོས་སྡོམ་ཚིག་བཞག་པ་ལྟར་ནའང༌། “དུས་རབས་རྙིང་མར་རྩིས་པའི་སྐབས་ཀྱི་ཐོག་མའི་དུས་དང་བར་མའི་དུས་སྐབས་སུ་མཚོ་བོད་ས་མཐོ་འདི་ནི་ལྡེམ་ལྡེམ་དུ་འཁྱིལ་བའི་རྒྱ་མཚོ་ཆེན་པོ་ཞིག་ཡིན་ཞིང༌། དུས་རབས་གསར་མའི་འགོ་ཚུགས་པ་ནས་བཟུང་ད་གཟོད་རིམ་བཞིན་སྐམ་སའི་ཡུལ་བྱུང་བ་དང༌། ས་མཐོ་འདི་རྒྱ་མཚོའི་ངོས་ལས་མཐོ་ཚད་སྤྱི་ཁྲི་ཉིས་སྟོང་ཡས་མས་ཙམ་ཡིན་ལ། ས་ཡི་ཆགས་ཚུལ་ཡང་ལྷོ་ཤར་གཉིས་དམའ་ཞིང་ནུབ་ཕྱོགས་ཅུང་ཙམ་མཐོ་བ། ནུབ་བྱང་གཉིས་སུ་ལོ་འདབ་རིང་མོ་ཅན་དང་ལེབ་མོ་ཅན་གྱི་ལྗོན་ཤིང་འཁྲིགས་པའི་ནགས་ཚལ་ཡོད་ཅིང༌། ལྷོ་ཤར་གཉིས་སུ་འདམ་རྩྭ་དང་སྤང་རྩྭས་ཁེངས་པ་མ་ཟད། མཚེའུ་དང་རྫིང་བུ་ཧ་ཅང་མང་བས་མཁའ་ལ་སྐར་ཚོགས་བཀྲ་བ་བཞིན་དུ་ཡོད་”ཅེས་གསལ།
མཚོ་ངོས་ལས་འཕགས་པའི་སྐམ་སའི་ཐོག་དུས་ཡུན་ཧ་ཅང་རིང་བའི་བརྒྱུད་རིམ་ནང་སྲོག་ཆགས་མང་པོ་བྱུང་བའི་སྐོར་ལ་བོད་ཀྱི་ཡིག་ཚང་མང་བོའི་རྩ་དོན་མཚོ་བྲི་ནས་ནགས་ཚལ་སྟུག་པོ་ཆགས་པ་དང་སྟོད་སྨད་བར་གསུམ་དུ་སྲོག་ཆགས་སྣ་ཚོགས་ཀྱིས་གང་བ་སོགས་གཅིག་མཐུན་དུ་གསལ་ཡོད། ཚན་རིག་གིས་དཔྱད་པ་བྱས་པའི་སྡོམ་ཚིག་ལྟར་ནའང༌། “དུས་སྐབས་དེ་ཤེད་དུ་རི་བོ་ཧི་མ་ལ་ཡ་ད་དུང་འབུར་ཐོན་མེད་པས། རྒྱ་གར་ཕྱོགས་ཀྱི་རྒྱ་མཚོ་ཆེན་པོའི་བརླན་གཤེར་དང༌། དྲོད་ཁུལ་ཚ་བ་ལ་སོགས་པ་འགོག་པའི་བཀག་རྒྱ་མེད་སྟབས་མཚོ་བོད་ས་མཐོའི་ཡུལ་ཁམས་འདིའི་གནམ་གཤིས་ནི་དྲོད་གཤེར་གཉིས་ལྡན་གྱི་རང་བཞིན་ཡོད་པ་དང༌། ལོ་ཧྲིལ་བོའི་ཚ་གྲང་ཆ་སྙོམས་བྱས་ན། ཏུའུ་༡༠ཡས་མས་ཡིན་ལ། ལོ་རེར་ཆར་ཆུ་འབབ་ཚད་ཀྱང་ཧའོ་ཧྲེང་ཉིས་སྟོང་ནས་ལྔ་སྟོང་བར་ཡིན་ཏེ། སྐབས་དེར་དྲོད་ཁུལ་དུ་རན་པའི་སྐྱེ་དངོས་རིགས་མང་པོ་ས་མཐོ་འདིའི་ཕྱོགས་སོ་སོར་ཁྱབ་ཡོད་པ་མ་ཟད། སྐྱེ་དངོས་དེ་དག་གི་ཁྲོད་རྩ་ཆེའི་རིགས་རྣམ་གྲངས་བཞི་སྟོང་ཙམ་ཡོད་ཅིང༌། དེ་ལྟ་བུའི་ཡུལ་ཁམས་འདིར་སུག་མ་སུམ་ལྡན་གྱི་རྐྱང་རྒོད་ཀྱང་ཡོད་ལ། དེས་མ་ཚད་ཁྱི་དང༌། གླང་པོ། རི་བོང༌། ཤྭ་བ་ལ་སོགས་པའི་དབྱིབས་གཟུགས་འདྲ་བའི་རི་དྭགས་མང་པོ་ཡོད་པ་དང༌། རྗེས་སུ་རིམ་བཞིན་རི་བོ་ཧི་མ་ལ་ཡ་འབུར་དུ་ཐོན་པ་དང་ཇེ་མཐོ་ཇེ་མཐོར་སོང་སྟེ། སྔོན་ཆད་རྒྱ་གར་ཕྱོགས་ནས་རྒྱུ་བའི་ཁ་དབུགས་དང་ཚ་དྲོད་བཀག་པས་མཚོ་བོད་ས་མཐོ་འདིའི་གནམ་གཤིས་དང་རང་བྱུང་གི་ཁོར་ཡུག་ལའང་འགྱུར་ལྡོག་བྱུང་སྟེ་གྲང་ཞིང་འཁྱགས་པའི་ཡུལ་དུ་གྱུར་པའོ།”ཞེས་གསལ།
