འ་ཞའི་རྒྱལ་པོའི་ཕོ་བྲང་སྲིབ་འདུན་མཁར་ཤུལ་ངོས་འཛིན་ཐད་ཀྱི་ཐོག་མའི་དཔྱད་གླེང་1

   ཐོག་མར།  ཁོ་བོས་སྲིབ་འདུན་ཞེས་པའི་མཁར་མིང་འདི་འ་ཞའི་རྒྱལ་པོ་སྲིབ་བློ་སྒམ་དང་འབྲེལ་བ་ཆེར་ཡོད་པར་མཐོང་སྟེ།  སྲིབ་འདུན་མཁར་དང་སྲིབ་བློ་སྒམ་ཞེས་པའི་སྲིབ་ཡིག་འདི་གཉིས་རྒྱའི་ཡིག་ཚང《བེ་བྱང་མའི་ལོ་རྒྱུས》ལས་གཉིས་ཀར་སྲིབ་ཞེས་འབྱུང①བས། སྲིབ་ནི་བོད་ཀྱི་རུས་ཤིག་ཏུ་མངོན་ལ་སྤུ་རྒྱལ་བོད་བཙན་པོའི་གནམ་གྱི་ཁྲི་བདུན་བགྲང་དུས་སུ།  བཙན་པོ②བདུན་པའི་མཚན་ལ《རྒྱལ་རབས་གསལ་བའི་མེ་ལོང》དུ། སྲིབ་ཁྲི་བཙན་པོ་ཞེས་དང་བོན་གྱི་ཆོས་འབྱུང《ལེགས་བཤད་རིན་པོ་ཆེའི་གཏེར་མཛོད》ལས་ཀྱང་། དྭགས་ཁྲི་དང་སྲིབ་ཀྱི་ལྷ་མོ་དཀར་མོའི་སྲས་སྲིབ་ཁྲི་བཙན་པོ③ཞེས་འབྱུང་བས། འ་ཞའི་རྗེ་བོ་འདི་བའི་རུས་མིང་དང་མཁར་མིང་འདི་གཉིས་སྲིབ་ཡིག་ལས་མ་འདས་སྙམ།  ཕལ་ཆེར་རྗེ་བོ་འདི་བའི་འདུན་མ་བསྡུ་སའི་གནས་ཤིག་ཡིན་པས་སྲིབ་འདུན་ཞེས་པའི་ས་མིང་འབྱོར་བ་ཡིན་ནམ་སྙམ་སྟེ།  རྗེ་བོ་སྲིབ་བློ་སྒམ་གྱིས་ཁོང་གི་མངའ་ཞབས་སུ་འདུས་པའི་སྡེ་རྣམས་ཀྱི་དཔོན་རིགས་ཁག་དང་ཞལ་ཏ་མཛད་སྐབས་འདི་འདྲའི་གསུང་མོལ་ཡོད་དེ།  གོང་མེས་རྣམས་ཀྱིས་གནས་འདི་དག་ལ་མངའ་བསྒྱུར་ནས་ང་རང་ཐེ་ན་རྒྱལ་རབས་བདུན་བརྒྱུད་ཐུབ་པ་བྱུང་ལ།  འུ་ཅག་ཚང་མས་གནས་འདིར་བདེ་སྐྱིད་ཀྱི་དཔལ་ལ་རོལ་ཐུབ་པའི་འདུན་པ་བཅིངས། དེང་འུ་ཅག་གི་དམག་དཔུང་ལ་རྟ་མཆོག་གི་ཤེད་ཤུགས་རྒྱས་པ་མ་ཟད།   གཞུ་འཆིང་མདའ་ཐོགས་ཀྱི་ཕོ་རབ་ཀྱང་ཁྲི་ཕྲག་ཁ་ཤས་སུ་མཆིས།  བདག་གིས་སྟོབས་འདི་ལཱེང་ཡེ་སྡེ་ལ་དྲངས་ཏེ་དཔུང་གི་རྩལ་རྒུ་བཏོན་ནས།   ནུབ་རོང་ཁག་ལ་མངའ་བསྒྱུར་རྩོམ།  ཁྱེད་ཅག་གིས་བལྟས་ན་ཇི་ལྟར་སྣང་།   ཞེས་གསུངས་མོད་ལ།  ཚོ་དཔོན་རྣམས་ཞུམ་ཞུམ་ངང་།  དེ་ནི་དེང་གི་དུས་བཟང་འདིར་སྒྲུབ་དགོས་པའི་བྱ་བཞག་ཏུ་འཁུམས་པས་རྒྱལ་པོས་དོན་དེར་ལྷོད་མེད་པར་ཞུ།  ཞེས་བསྔགས་པ་བརྗོད།  ཚུལ་དེ་མཚོ་སྔོན་ཤར་མཐར་འབྲེལ་བའི་ནུབ་ཆིན་རྒྱལ་ཕྲན་གྱི་རྗེ་བོ་ཀན་ཀོས་ཀྱིས་ཐོས་འཕྲལ་ཤིན་ཏུ་འཇིགས་ནས་དུས་མྱུར་དུ་རྐྱ་དམག་ཉིས་ཁྲིའི་ཧྲག་དཔུང་བཏེགས་ཏེ་ཁྲི་ཆུའི་འགྲམ་ནས་འ་ཞར་གཡུལ་ཆེན་པོ་ཞིག་བཀྱེ་མཐར་སྲིབ་བློ་སྒམ་ལ་ཕམ་ཉེས་བྱིན།  ཞེས་པའི་བཀོད་འབྲི་ཞིག་རྒྱའི་དེབ་ཐེར《ཅིན་དཔེ》ལས་བྱུང་། ④ཚུལ་འདིར་གཞིག་ན།  རྗེ་བོ་སྲིབ་བློ་སྒམ་ནས་ཚོ་དཔོན་རྣམས་ཀྱི་འདུན་མ་བསྡུས་ཏེ་དྲག་པོའི་དཔུང་གིས་ཤར་ཕྱོགས་ཐོད་ཆུའི་གཙང་བོའི་ཡུལ་རྣམས་ལེན་པའི་སྟ་གོན་བྱེད་བཞིན་ཡོད།

  འདུན་མའི་སྲོལ་འདི་བོད་གནའ་རབས་ལོ་རྒྱུས་སུ་གང་མང་འབྱུང་སྟེ།《ཏུན་ཧོང་གཏེར་ཡིག》ལས། བྱག་གྀ་ལོ་ལ།   བཙན་པོ་དབྱར་སྟོད་ཕོ་དམ་མདོ་ན་བཞུགས་ཤྀང་།   དབྱར་སྨད་སུམ་ཆུ་བོར་སྤོ་སྟེ།  འདུན་མ་འདོང་ཀའྀ་ནེ་ཙོ་ལུང་དུ་མགར་བཙན་སྙ་སྡོམ་བུ་དྔ། ཁྲྀ་འབྲྀང་བཙན་བྲོད་གཉྀས་གྱིས་བསྡུ་སྟེ།  འབྲོག་མཁོས་ཆེན་པོ་བགྱིས། དགུན་ཕོ་བྲང་ཤངས་གྱི་རབ་ཀ་ཙལ་དུ་གཤེགས་ཤྀང་།  འདུན་མ་དུངས་གྱྀ་སྟག་ཙལ་དུ་བསྡུ་སྟེ།  མུན་མགྀ་རྐང་བཏོན་བགྱྀས།  ཕ་ལོས་བཀུག་པར་ལོ་གཅིག།