༄༅༎བཙན་པོ་ཁྲི་སྲོང་ལྡེ་བརྩན་རིང་ལ།

བཙན་པོ་ཁྲི་སྲོང་ལྡེ་བརྩན་རིང་ལ། །ཆོས་བཟང་སྲིད་ཆེ་སྟེ། རྒྱལ་ཁོ་ནི་གནམ་ས་གཉིས་ཀྱི་བར་ཡུལ་དུ་བརྣམ་ཞིང་། འགྲེང་དུད་གཉིས་ཀྱི་རྗེ་དང་བདག་མཛད་པའི་གཙུག་ལག་ཆེན་པོ། མྱིའི་དཔེར་རུང་བར་མཛད་དོའ།།ལེགས་ཀྱི་བྱ་དགའ་ནི་རངས་པར་བྱིན། ཉེས་ཀྱི་ཆད་པ་ནི་དམིགས་སུ་ཕོག་པར་མཛད་དོ།།འཛངས་པ་དང་དཔའ་བའི་རི་མོ་བསྐྱེད་དོ།།ངན་པ་མ་རབས་ནི་ཆིས(ཚིས་)ཀྱིས་གསོས་སོའ། ། དེའི་ཚེ་བློན་པོ་སྲིད་བྱེད་པ་རྣམས་ཀྱང་བློ་མཐུན་གྲོས་གཆིག་སྟེ།། པྱིའི་དགྲའ་བྱུང་བ་ལ། ཐབས་དང་ཡེ་མྱིག་ཚེར་བྱེད།།ནང་གི་ཆོས་བྱ་བ་ལ་དྲང་ཞིང་འགྲུས་སུ་བྱེད། །འཕྲག་མྱི་དོག །ཉེས་མྱི་བྱེད། །དཔའ་འཛངས་གཉིས་ནི་རླག(རློག)པ་བཞིན་བཙལ་ཏེ། འཛངས་པས་དཔའ་བོ་ནི་ཆེ་ས་ཆུང་སར་བསྟོད་ན་ས། ས་ས་ཡུལ་ཡུལ་དུ་བཀོད་དོ། །འབངས་འོག་མ་དལ་ཞིང་ཡུལ་ན་འཁོད་པ་ནི། འཛངས་དྲང་གཉིས་སླབ་བོའ། །དམག་མྱི་སོ་ལ་འཁོབ་པ་ནི་དཔའ་བའི་ཐབས་དང་། རྩལ་སློབ་བོ། །བློ་སྒྱུ་གཉིས་ཀྱི་རླབས་ཆེད་པོས་ཐུབ་པས། །སྡང་དགྲའ་སྡོ་བ་ཡང་མྱེད་དོ། །སངས་རྒྱས་ཀྱི་ཆོས་བླ་ན་མེད་པ་བརྙེསྟེ་མཛད་ནས།།དབུ་མཐའ་ཀུན་ཏུ་གཙུག་ལག་ཁང་བརྩིགས་ཏེ། ཆོས་བཙུགས་ནས། ཐམས་ཤད་ཀྱང་སྙིང་རྗེ་ལ་ཞུགས་ཤིང་དྲན་བས་སྐྱེ་ཤི་ལས་བསྒྲལ་ཏོ། གཡུང་དྲུང་དུ་བཏོན་ཏོ། །རྗེ་བློན་མོལ་ཏེ། ཞང་མཆིམས་རྒྱལ་ཟིགས་ལ་སྩོགས་པས་རྒྱའི་མཁར་ཀིང་ཤི་ཕམ་སྟེ། རྒྱ་རྗེ་གྭང་བུ་ཧྭང་ཏེ་བསྐོས་སོ། །ལེགས་པ་ཞིན་པའི་བྱ་དགའ་གཡུའི་ཡི་གེ་ཆུ་དུ(ངུ)ནམ་ནམ་ཞར་ཞར་བྱིན་ནོ། །དབའས་སྐྱེས་བཟང་སྟག་སྣང་གིས། །རྒྱའི་དམག་པོན་ཧོན་ཛེ་སངས་དང་། འགུའ་ལོག་སྒང་དུ་གཡུལ་སྤྲད་ནས། རྒྱ་མང་པོ་བཐུངས་སྟེ། འགུའ་ལོག་རྒྱ་དུར་དུ་བཏགསོའ། །སྦྲང་རྒྱལ་སྒྲ་ལེགས་ཟིགས་ཀྱིས་སྟོད་ཕྱོགས་སུ་དྲང་སྟེ། མི་ཛུངསུ་གཡུལ་བཇློག་(བཟློག་)ནས། ལུང་གི་རྒྱལ་པོ་ནུང་ཀོག་མན་ཆད་འབངས་སུ་བསྡུས། དབའས་བཙན་བཞེར་མདོ་ལོད་ལ་སྩོགས་པས། མཁར་ཚན་ཡན་ཆད་དུ་དྲང་སྟེ། མཁར་ཅུ་བ་བརྒྱད་ཕབ་ནས། དོར་པོ་བཏོན་ཏེ་འབངས་སུ་བཞེས་སོ། །ཆབ་སྲིད་ཆེ་སྟེ་ལོང་ཤན་ལ་རྒྱུད་ཡན་ཆད། པྱག་དུ་བཞེས་ནས། མཐོང་ཁྱབ་ཁྲི་སྡེ་ལྔ་བཙུགས། བདེ་བློན་ཁམས་ཆེན་པོ་གཆིག་གསར་དུ་བསྐྱེད་དོ། །བློན་ཆེ་མང་བཞེར་ཟླ་བརྩར་འཛངས་ཤིང་མཁས་པ། བཀྲའ་ཤིས་ཤིང་ཁ་དྲོ་བས། ནོར་བུ་རིན་པོ་ཆེའི་ཡི་གེ་སྩལ་ཏོ། །འབངས་ཀྱི་ནང་ན། དོར་ཏེ་པྱུག་ཚམས་སྟེ་འཛོམ་དཔའ་བའི་མཚན་མར།  སྟགི་ཐོག་བུ་སྩལ་ཏོ།།བཙན་པོའི་ཞ་སྔ་ནས། ཐུགས་སྒམ་པའི་རླབས་དང་། དབུ་རྨོག་བརྩན་པོའི་བྱིན་ཀྱིས།།ཉི་ངོག་རྒྱལ་པོ་གཞན་དཔྱའ་ཕབ་པ་དང་། རྒྱལ་པྲན་འབངས་སུ་བཀུག་པ་ལ་སྩོགས་པ་པྱིར། ཆབ་སྲིད་མཐའ་བཞིར་བསྐྱེད། ནང་གི་བདེ་བ་ནི་སྙོམས་པར་མཛད་དེ། །བོད་འབངས་ཀྱི་ནང་ནས་ཞོ་ཤ་འབུལ་འབུལ་བ་རྣམས་ཀྱང་། ཡང་དག་པར་གཡུང་དྲུང་གི་བཀའ་དྲིན་མ་བྱིན་བ་མྱེད་དོ། །བཙན་པོ་འདི་ལས་ཆབ་སྲིད་ཆེ་བ། སྔོན་ཆད་གདུང་རབས་ཀྱིས་མཛད་པ་ལ་ནི་མ་བྱུང་ངོ་། །
རྒྱལ་པོ་འདི་འི་རིང་ལ། འབྲོ་ཁྲི་གཟུའ་རམ་ཤགས་ཀྱི། སྟོད་ཕྱོགས་སུ་དྲངསྟེ། ལི་འབངས་སུ་བཀུག་ནས་དཔྱའ་ཕབ་བོ། །འུང་གི་འོག་དུ་མྱྭ་དཀར་པོ་འབངས་སུ་མངའ་བ་ལས། གློ་བ་རིངས་པའི་ཚེ། དམག་པོན་འབྲོ་རམ་ཤགས་བཀའ་སྩལ་ནས། བྱག་རྩེད་ནོལ་ཐབས་བཀྱེ་བའི་ཚེ། །འཇང་མང་པོ་བཀུམ་ནས། སྤྱན་ཆེན་པོ་ཉིང་རིམ་དང་། སྣ་ལ་གཐོགས་པ་དང་། དམངས་ཡན་ཆད་སུམ་བརྒྱའི་རྩ་བཅུ་གཉིས་བཟུང་ནས། འཇང་རྗེ་གོལ་གིས་ཀྱང་པྱག་འཚལ་ཏེ། འབངས་རྣལ་མར་བཀུག་ནས། དཔྱའ་ཕབ་སྟེ་སྔ་མཁོ་བཞིན་དུ་བཀོད་དོ། །