བཙན་པོ་ཁྲི་དར་མ་འུ་དུམ་བརྩན་གྱི་ལོ་རྒྱུས་དག་སེལ་གྱི་གཏན་ཚིགས་འགའ།

       དེ་བཞིན་གོང་གསལ་དཔེ་ཚོགས་དེབ་བརྒྱད་པའི་ངོས༤༩༠ལས། བོད་ཡུལ་དུ་དམ་ཆོས་དར་བའི་སྣང་ཚུལ་བཀོད་པ། །ཡུལ་མཐོ་ས་གཚང་བོད་ཀྱི་ཡུལ། །གངས་རྀ་མཐོ་གཚང་ཀུན་ཀྱི་གཉ། །ཆུ་བོ་ཀླུང་ཡས་ཀུན་ཀྱི་མགོ། །ལྷ་གཉན་ཡུལ་དབྱིངས་དཀྱིལ་འདི་ན། །རྒྱལ་པོ་ཙ་ཞེས་བྱ་བ་དེ། །ལྷའི་རིགས་ལ་བྱང་ཅུབ་སེམས་དཔའི་རྒྱུ། །ལྷ་སྲས་ཁྲི་སྲོང་ལྡེ་བཙན་གྱིས། །དམ་ཆོས་སློབས་དཔོན་རྒྱ་གར་ཡུལ་ནས་སྤྱན་དྲངས་ཏེ། །མུན་ནག་དཀྱིལ་དུ་སྒྲོན་བཏེག་བཞིན། །རྒྱལ་ཁམས་ཕྱོགས་ཀྱང་སྩོད་པར་གནང་། །བྱང་ཅུབ་མཆོག་གི་ལམ་ལ་བཀོད། །ལྷ་སྲས་ལྷའི་དྲིན་རེ་ཆེ། །བཀ་ལུང་གཞུང་དང་འཐུན་པའི་ཚེ། །ཕྱི་ནང་གཉིས་ཀྱི་སློབ་དཔོན་དང་། །ལས་ཀྱི་རྡོ་རྗེ་མཁས་དང་གསུམ། །མ་འདྲེས་སྤྱོད་ལམ་འདི་ལྟ་བུ། །མཁས་བཙུན་སྤྱོད་མཁས་འཁྲུག་པ་མྱེད། །བོད་ཁམས་ཀུན་ཀྱང་བདེ་ཞིང་སྐྱིད། །ལྷ་སྲས་དར་མ་མན་ཅད་དང་། །འོད་སྲུང་དབོན་སྲས་ཡན་ཅད་དུ། །སྤྱི་ནི་དམ་ཆོས་ད་ཅིང་རྒྱས། །ཧ་ཅང་དར་ཅྀང་རྒྱས་ཅེས་པས། །མྱིར་སྐྱེས་ཀུན་ཀྱང་འགྲུབ་པར་བཞེད། །སོགས་བཀོད་ཡོད་པས་ཀྱང་། བཙན་པོ་དར་མ་དང་སྲས་འོད་སྲུང་། དབོན་སྲས་དཔལ་འཁོར་ཅན་ཡན་ལ་ནང་པ་དར་རྒྱས་ཧ་ཅང་ཆེ་ཚུལ་བསྟན་འདུག་པས་སྐབས་དེའི་གནས་སྟངས་དངོས་ཤེས་ནུས་སོ། །        བོད་རིག་པའི་མཁས་དབང་ཆེན་མོ་མཁར་རྨེའུ་སོགས་ཀྱིས་བཙན་པོ་དར་མས་ཆོས་བསྣུབས་མེད་ཚུལ་གསལ་བཤད་གནང་ཡོད་ཀྱང་། གནས་ལུགས་དང་ལེན་མི་བྱེད་པར་རིགས་འདིའི་ཆེ་ཕྲ་ཕལ་མོ་ཆེ་ནི་མ་དག་རྒྱུན་འབྱམས་ཁོ་ན་ལ་ཐུགས་མཉེས་ཏེ། ད་དུང་ཡང་ཆོས་ར་དང་དམངས་ཁྲོད་གང་སར་བཙན་པོ་དར་མ་ནི་གླང་གི་སྐྱེ་བ་ཡིན་རབས། གླང་གི་དབྱིབས་ཡོད་རབས། བདུད་རྒྱལ་ཡིན་རབས། བསྟན་པ་བསྣུབས་རབས་གླེང་བཞིན་པའི་སྣང་ཚུལ་འདི་ལ་འགྱུར་བ་འགྲོ་རྒྱུ་ལྟ་ཞོག དེ་ལས་ལྡོག་སྟེ་དམ་ཉམ་དང་ལྟ་ལོག་གི་ཞྭ་མོ་ཆེན་པོ་ཅིག་གནང་རྒྱུ་ཐེ་ཚོམ་མི་འདུག་ན་ཡང་། བདེན་དོན་ནི་ཉུང་ངུའི་ལག་ཏུ་གནས་ཤིང་ནམ་ཡང་བདེན་དོན་ཡིན་གཤིས། འདིར་ནི་རང་གིས་ཆེས་གནའ་བོའི་ཡིག་རྙིང་ཅི་རིགས་དཔེ་ཀློག་གི་འབྲས་བུ་མི་བརྗེད་པའི་གཟུངས་སུ་ཟིན་བྲིས་སུ་བཀོད་པ་ཡིན་ལ། ཞིབ་ཆ་ནི་ལོགས་སུ་སྤྲོ་བྱ་ལས་ཉུང་ངུའི་ལམ་ནས་མཚོན་པར་མི་ནུས་པ་ལགས་སོ། །