གྲུབ་ཆེན་གླང་དཀར་བའི་ལོ་རྒྱུས་མདོར་བསྡུས།

   གྲོ་ཚང་གོ་ཏམ་སྡེ་ལྷ་ཁང་བཞེངས་བ་པོ་མཚོ་སྙིང་བའམ་གྲུབ་ཆེན་གླང་དཀར་བར་གྲགས་པ་སངས་རྒྱས་བཀྲ་ཤིས་ནི་བོད་རང་སྐྱོང་ལྗོངས་ལྷོ་ཁའི་ལྷོ་བྲག་རྫོང་དུ་འཁྲུངས། ཡོན་རྒྱལ་རབས་ཀྱི་དུས་མཇུག་ཏུ་བོད་ལྗོངས་ནས་མདོ་སྨད་དུ་ཕེབས་ནས་དམ་པའི་ཆོས་སྤེལ་མགོ་ཚུགས། དམ་པ་ཉིད་ཀྱི་ཞབས་རྗེས་མཚོ་སྔོན་པོ་དང་ཙོང་ཆུའི་འགྲམ་རྒྱུད། ཉིན་འབེ（ལོ་ཏུའུ་རྫོང）ལྷོ་ཕྱོགས་ཀྱི་ནགས་ཚལ་སྟུག་པོ་སོགས་སུ་ཕབ།བྲག་དགོན་པའི（མདོ་སྨད་ཆོས་འབྱུང）དུ་ལྷ་དང་བླ་མའི་ལུང་བསྟན་བཞིན་མདོ་སྨད་དུ་ཕེབས་ཤིང༌། མཚོ་སྙིང་རི་བོར་ཡུན་རིང་སྒྲུབ་པ་མཛད་ཅེས་དང༌།སུམ་པའི་གླང་བོ་དཀར་བོར་བཅིབ་ནས་ཕེབས་པར་གསུངས། ཡང་སྐུ་འབུམ་དགོན་པའི་རིག་གནས་ཞེས་པའི་དཔེ་དེབ་ཅིག་ཏུ་དམ་པ་ཉིད་མཚོ་སྙིང་རི་བོར་ཡུན་རིང་སྒྲུབ་པ་མཛད་སྐབས་གླང་བོ་དཀར་བོར་བཅིབ་ནས་ཕེབས་བཞུད་གནང་ཞེས་བཞེད་ཚུལ་མང༌། ཡང་འགའ་རེས་ཧེ་བླ་མ་ནི་འཕགས་པ་ཀུན་ཏུ་བཟང་བོའི་རྣམ་སྤྲུལ་ཡིན་པར་འདོད།

   ལྕང་སྐྱ་རོལ་བའི་རྡོ་རྗེས་རྒྱ་ཡིག་གི་མཚོ་སྔོན་ལ་ཧེ་ཞེས་པ་དེར་བརྟེན་ནས་དམ་པ་ཉིད་ཀྱི་མཚན་ལ་ཧེ་བླ་མའང་གསོལ་ཞེས་གསུངས་འདུག དེ་རྗེས་དགོན་ལུང་བྲག་ཏུ་ཚོགས་བདག་སྒྲུབ་པས་རྒྱལ་བོའི་ཕོ་བྲང་ཆེན་པོ་ཞིག་མཐོང་བའི་མཚན་མ་བྱུང༌། དམ་པ་ཉིད་ཀྱི་མཚན་ལ་བསམ་བླ། ཧེ་བླ་མ། མཚོ་སྙིང་བ།སངས་རྒྱས་བཀྲ་ཤིས། བསམ་གཏན་རྒྱ་མཚོ། བསམ་གཏན་བློ་གྲོས། གླང་དཀར་བ་སོགས་མང།  གྲོ་ཚང་བ་དབང་ཕྱུག་དོན་གྲུབ་དང་སྲུང་མ་སྐྱབས་གཉིས་ཀྱིས་བརྩམས་པའི་གྲོ་ཚང་བོད་མིའི་བྱུང་བ་ཞེས་པའི་དཔེ་དེབ་ཏུ་གྲུབ་ཆེན་གླང་དཀར་བ་མཆོག་བོད་རང་སྐྱོང་ལྗོངས་ལྷོ་ཁ་ས་ཁུལ་གྱི་ལྷོ་བྲག་རྫོང་གྲོ་བོ་ལུང་གི་ཀརྨ་བཀའ་བརྒྱུད་པའི་ཁྱིམ་རྒྱུད་ཅིག་ཏུ་སྐུ་འཁྲུངས༌། མར་བ་ལོ་ཙ་བ་ཆོས་ཀྱི་བློ་གྲོས་དང་གདུང་རྒྱུད་གཅིག་ཡིན་ཞེས་བཀོད་ཡོད། དམ་པ་ཉིད་ཀྱི་འཁྲུངས་ལོ་མི་གསལ་མོད་དཔྱད་པ་ཞིག་བཏང་ཚེ་འདི་ལྟ་སྟེ།གྲུབ་ཆེན་གླང་དཀར་བ་མཆོག་ཏ་མིང་ཡུང་ལིག་ལོ་བཅུ་གཉིས་པ་སྟེ1414ལོར་སྐུ་མྱ་ངན་ལས་འདས།འཁྲུངས་ལོ་ཕལ་ཆེར་སྤྱི་ལོ1330ནས1340བར་ཡིན་ལོས་ཆེ།  རྒྱུ་མཚན་ནི་བོད་ལྗོངས་ཀརྨ་བཀའ་བརྒྱུད་པའི་སྤྲུལ་སྐུ་གསུམ་པ་རང་བྱུང་རྡོ་རྗེ་མཆོག་སྤྱི་ལོ1332ལོར་ཡོན་གོང་མ་ཐུག་ཐའེ་མུར་འཇའ་ཡས་གདན་ཞུ་གནང་བ་ལྟར་རྒྱལ་ས་པེ་ཅིང་དུ་ཐེངས་དང་བོར་ཕེབས་ནས་ཡོན་བུན་ཙུང་གི་རྣམ་ཤེས་དག་ཞིང་དུ་འདྲེན་པར་མཛད་ཅིང་གོང་མ་ཡོན་ཉིན་（རིན་ཆེན་དཔལ）ཁྲིར་བཞུགས་ཤིང་དབུ་བླར་བཀུར།   ཟླ་གཅིག་གི་རྗེས་སུ་རྒྱལ་བོའི་ཚེ་ཡི་འཕེན་པ་རྫོགས་པས་ཕྱིར་དབུས་སུ་བྱོན། དེའི་རྒྱལ་ཚབ་ལ་གོང་མ་དགུ་བ་ཐོ་ཀན་ཐེའི་མུར་གོང་མའི་ཁྲིར་བཀོད་པའི་རྟེན་འབྲེལ་མཛད་སྒོ་སོག་ཡུལ་གྱི་རྒྱལ་ས་ཧྲང་ཏུའུ་ལ་ཚུགས་པ་དེར་ཕེབས་ཏེ་དབང་བསྐུར་མཛད།སྤྱི་ལོ1336ལོར་ཡོན་གོང་མ་ཐོ་ཀན་ཐེའེ་མུར་གྱི་གདན་འདྲེན་པའི་ཞུ་ཡིག་ཐེངས་མང་འབྱོར་བ་ལྟར་མཚོ་སྔོན་བརྒྱུད་པེ་ཅིང་ཕོ་བྲང་ཆེན་མོར་ཕེབས།དེ་སྐབས་གོང་མ་ཉིད་ཕོ་བྲང་གི་རྒྱལ་སྒོའི་མདུན་དུ་བསུ་བར་ཕེབས་ནས་རྒྱལ་བོའི་དོན་དུ་ཚེ་སྒྲུབ་སོགས་རིམ་གྲོ་མཛད།པེ་ཅིང་གི་ནུབ་ཕྱོགས་སུ་ཀརྨ་བཀའ་བརྒྱུད་པའི་དགོན་སྡེ་གསར་བ་གསར་དུ་བཞེངས། ས་ཡོས་སྤྱི་ལོ1339ལོའི་དཀྱིལ་དུ་པེ་ཅིང་ཕོ་བྲང་ནས་སོག་ཡུལ་གྱི་རྒྱལ་ས་རྙིང་བ་ཧྲང་ཏུར་ཕེབས་ཏེ་ཟླ་བ་གཅིག་ཙམ་བཞུགས་ཏེ་དགུང་ལོ་ལྔ་བཅུ་ང་དྲུག་ས་ཡོས1339ལོར་སྐུ་གཤེགས།   རང་བྱུང་རྡོ་རྗེ་མཆོག་སྔ་གཞུག་ཐེངས་གཉིས་ལ་རྒྱལ་སར་ཕེབས་མྱོང་ཞིང༌། ལམ་བར་དང་རྒྱལ་ས་སོགས་སུ་ས་སྐྱ་བའི་མཁས་གྲུབ་དུ་མ་དང་འབྲེལ་ཡོད་མི་སྣའི་གྲུབ་མཐའི་ཕྱོགས་ཞེན་དང་རང་རང་གི་ཁེ་ཕན་ལ་བསམ་ནས་བཀག་འགོག་དང་བར་ཆད་གང་མང་བཟོས་སྐད།

ཁོང་གི་ཐུགས་ལ་ཀརྨ་པའི་བཀའ་བརྒྱུད་པའི་གྲུབ་མཐའ་མདོ་སྨད་དུ་སྤེལ་ནས་ཡོན་གོང་མ་དང་འབྲེལ་འདྲིས་བྱེད་པ་ནི་རང་གི་གྲུབ་མཐའ་ཡུན་རིང་གནས་ཐུབ་མིན་དང་ཡང་ན་ཆག་འཇིག་ཉེན་ཁར་ཐུག་པའི་རྒྱུ་རྐྱེན་གཙོ་བོ་ཡིན་པས་བུ་སློབ་གང་མང་ཞིག་མདོ་སྨད་དུ་མངགས་པ་རེད།   གྲུབ་ཆེན་གླང་དཀར་བའང་དེའི་གྲས་ཀྱི་མཆོག་ཏུ་གྱུར་བ་དང་ཁོང་གི་ཐུགས་སྲས་ཡིན་པ་གདོན་མི་ཟ།  བྲག་དགོན་པའི་མདོ་སྨད་ཆོས་འབྱུང་དུ་ལྷ་དང་བླ་མའི་ལུང་བསྟན་བཞིན་མདོ་སྨད་དུ་ཕེབས་ཞེས་པ་ལས་ལྷ་ཞེས་པ་ལྷག་པའི་ལྷ་དང་བླ་མ་ཞེས་པ་ནི་རང་བྱུང་རྡོ་རྗེ་མཆོག་ལ་ངོས་འཛིན་པ་ལས་གཞན་དུ་མ་མཆིས།    རང་གི་དྲིན་ཅན་རྩ་བའི་བླ་མའི་ཅི་གསུངས་བཀའ་བཞིན་སྒྲུབ་པའི་ཀུན་སློང་གིས་མདོ་སྨད་དུ་ཕེབས་ཞེས་བརྗོད་ཚེ་རྩོད་མེད་ཀྱི་གནས་ལུགས་རྣལ་མ་ཞིག་རེད་སྙམ། ལྷ་ཁང་འདི་ཏ་མིང་ཧུང་བུ་སྤྱི་ལོ་ཉེར་ལྔ་བ1392ལོར་ཐོག་མར་གསར་བཞེངས་ཀྱི་འགོ་བརྩམས་པ་དང༌། ད་རག་བར་ཏུ་ཕལ་ཆེར་ལོ་ངོ600ལྷག་གི་ལོ་རྒྱུས་ཡོད། ཧུང་བུ། ཅན་བུན། ཡུང་ལིག ཧུང་ཞི། ཞོན་ཏིག་རྒྱལ་བོ་ལྔའི་ལོ་བཞི་བཅུའི་རིང་ལ་འཛུགས་སྐྲུན་བྱས་མྱོང་ཞིང༌། ཁྲིན་ཧ། ཧུང་ཀྲི། ཅ་ཅིན་རྒྱལ་བོ་གསུམ་གྱི་རིང་ལ་གཟིགས་རྟོག་དང་བདགརྐ