རྒྱལ་དབང་བཅུ་བཞི་པའི་ཚེ་སྟོད་ཀྱི་ལོ་རྒྱུས་དང༌བོད་འབངས་བཅིངས་འགྲོལ་ཐོབ་ཚུལ། （གཉིས་པ）
རབ་བྱུང་བཅུ་དྲུག་པའི་ས་བྱི་སྦྱི་ལོ༡༩༤༨ལ་ཀྲུང་གོ་གུང་ཁྲན་ཏང་གིས་དབུ་ཁྲིད་པའི་ཀྲུང་གོ་མི་དམངས་བཅིངས་འགྲོལ་དམག་གིས་གོ་མིན་ཏང་ལོག་སྤྱོད་སྲིང་གཞུང་གི་ས་ཡ་བརྒྱད་ཀྱི་གཞུང་དམག་རྩ་གཏོར་བྱེད་བཞིན་པར་རྒྱལ་ཡོངས་བཅིངས་འགྲོལ་གཏོང་བའི་སྔ་ལམ་གྱི་སྐབས་དེར། བོད་དུ་ཕྱི་རྒྱལ་བཙན་རྒྱལ་རིང་ལུགས་པ་དང་དེའི་རྗེས་འབྲངས་པ་སྲིད་སྐྱོང་སྟག་བྲག་གཙོས་པའི་གཞུང་སའི་དཔོན་རིགས་དྲག་ཞན་རྣམས་དངངས་སྐྲག་རབ་ཏུ་སྐྱེས་པར་བརྟེན། སྔར་ཡོད་ནན་ཅིན་གྱི་བོད་གཞུང་དོན་གཅོད་ཁང་གི་མི་སྣ་ཕྱིར་འཐེན་བྱས་པ་དང་ཆབས་གཅིག་བོད་སྡོད་གོ་མིན་ཏང་གི་དོན་གཅོད་ཁང་ཡང་གསང་བའི་གུང་ཁྲན་ཏང་མི་འགོག་ཆེད་ཟེར་ནས་ས་གླང་སྤྱི་ལོ༡༩༤༩པའི་ཟླ་བདུན་པར་བོད་ནས་ཕྱིར་འབུད་བྱས་པ་དང༌། ཡང་བོད་ལྗོངས་རྒྱང་བསྒྲགས་ལས་ཁུངས་ཟེར་བ་བཙུགས་ཏེ་བོད་འདི་ཀྲུང་གོའི་མངའ་འོག་མིན་ཚུལ་དང་སྒེར་བཙན་ཡིན་རབས་ཀྱི་དཀྲོགས་གཏམ་སྣ་ཚོགས་སྒྲོག་པ་དང་བསྟུན། ཨ༌རི་སོགས་ཀྱིས་དཀྲུག་ཤིང་བརྒྱབ་པ་ལ་བརྟེན་ནས་བོད་དམག་རྒྱ་བསྐྱེད་ཀྱིས་མི་དམངས་བཅིངས་འགྲོལ་དམག་བོད་དུ་བསྐྱོད་པར་འགོག་རྒོལ་མཐའ་གཅིག་བྱེད་རྒྱུའི་ངན་གྲབས་མང་ཙམ་བྱས་ཀྱང༌། འོན་ཏེ་སྐབས་དེར་ཀྲུང་གོ་མི་དམངས་བཅིངས་འགྲོལ་དམག་གིས་བོད་ལྗོངས་ཕུད་པའི་མེས་རྒྱལ་ནང་ཁུལ་གྱི་ཡུལ་གྲུ་རྒྱ་ཆེ་བ་དང་བོད་མདོ་སྨད་དང་ཁམས་ཕྱོགས་ཀྱི་ས་ཆ་མང་པོ་བཅས་སྔ་གཞུག་ཏུ་བཅིངས་འགྲོལ་བཏང་ཐོག རབ་བྱུང་བཅུ་དྲུག་པའི་ས་གླང་སྤྱི་ལོ༡༩༤༩པའི་སྤྱི་ཟླ་བཅུ་པའི་ཚེས་གཅིག་ལ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དངོས་སུ་དབུ་བརྙེས་པ་འཛམ་གླིང་ཡོངས་ལ་ཁྱབ་བསྒྲགས་བྱས།
ཡང་དེ་སྔོན་རབ་བྱུང་བཅུ་དྲུག་པའི་ས་སྟག་སྤྱི་ལོ༡༩༣༨ལ་པཎ་ཆེན་སྐུ་འཕྲེང་བཅུ་པ་བློ་བཟང་འཕྲིན་ལས་ལྷུན་གྲུབ་ཆོས་ཀྱི་རྒྱལ་མཚན་མཆོག་མཚོ་སྔོན་རྡོ་སྦིས་བིས་མདོ་ཡུལ་དུ་སྐུ་འཁྲུངས་པ་པཎ་ཆེན་མཁན་པོ་ནང་མ་ནས་རྩད་ཆོད་བརྟག་དཔྱད་ངེས་རྙེད་བྱུང་རྗེས། གོ་མིན་ཏང་ཀྲུང་དབྱང་སྲིད་གཞུང་ལ་སྙན་ཞུ་བྱས་པ་བརྒྱུད་གསེར་བུམ་དཀྲུག་འདོན་མ་དགོས་པར་ངོས་འཛིན་ལེགས་པར་ཞུས་ཤིང༌། རབ་བྱུང་བཅུ་དྲུག་པའི་ཤིང་སྤྲེལ་སྤྱི་ལོ༡༩༤༤ལ་མདོ་སྨད་སྐུ་འབུམ་དགོན་དུ་གདན་དྲངས་ཏེ་ཁྲི་འདོན་མངའ་གསོལ་གྱི་མཛད་སོ་རྒྱ་ཆེ་བར་གནང་བས། བོད་གངས་ཅན་པ་སྤྱི་དང་སྒོས་སུ་མདོ་སྨད་སེར་སྐྱ་དད་འབངས་ཡོངས་གྱི་ཡིད་མཚོར་པཎ་ཆེན་ཡང་སྲིད་མཆོག་གི་ཟླ་གཞོན་གསར་པ་མངོན་པར་འཆར་བས་དགའ་སྤྲོའི་ཆུ་གཏེར་འཕེལ་བར་གྱུར་ཏོ།།
དེ་ལྟར་བཅིངས་འགྲོལ་ཐོབ་ཟིན་པའི་བོད་རིགས་ས་ཁུལ་གྱི་མི་དམངས་དང་ཆོས་ལུགས་མི་སྣ་ཡོངས་ཀྱིས་ཀྲུང་དབྱང་མི་དམངས་སྲིད་གཞུང་དང་ཀྲུང་གོ་མི་དམངས་བཅིངས་འགྲོལ་དམག་ལ་དགའ་བསུ་དང་རྒྱབ་སྐྱོར་ཆེན་པོ་བྱས་པ་ཡིན་ཏེ། ཀྲུང་ཧྭ་མི་དམངས་སྤྱི་མཐུན་རྐྱལ་ཁབ་དབུ་བརྙེས་པའི་ཉིན་དེར་པཎ་ཆེན་སྐུ་འཕྲེང་བཅུ་པ་མཆོག་གིས་བོད་མི་དམངས་སེར་སྐྱ་ཡོངས་ཀྱི་ཚབ་བྱས་ཏེ་གློག་འཕྲིན་སྟེང་དགའ་སྟོན་རྟེན་འབྲེལ་དང་ལེགས་སྨོན་བཅས་ཞུས། གཞན་ཡང་སྐད་གྲགས་ཅན་གྱི་མདོ་སྨད་པ་རྡོ་སྦིས་དགེ་བཤེས་ཤེས་རབ་རྒྱ་མཚོ་དང་མདོ་སྟོད་བེ་རི་དགོན་གྱི་དགེ་སྟག་སྤྲུལ་སྐུ་སོགས་རྒྱལ་གཅེས་མི་སྣ་མང་པོས་སྔ་གཞུག་ཏུ་བོད་བཅིངས་འགྲོལ་གཏོང་བའི་ལས་དོན་ལ་མཛད་རྗེས་རླབས་པོ་ཆེ་བཞག་པ་ཡིན་ནོ།།
རབ་བྱུང་བཅུ་དྲུག་པའི་ལྕགས་སྟག་སྤྱི་ལོ༡༩༥༠ལ་ཁམས་ཕྱོགས་དང་མདོ་སྨད་ཀྱི་བོད་རིགས་ས་ཁུལ་ཚང་མ་བཅིངས་འགྲོལ་ཐོབ་རྗེས། བོད་རིགས་འདུས་སྡོད་ས་ཁུལ་རྣམས་སུ་ཞང་དང་རྫོང་ཁུལ་བཅས་ཀྱི་རིམ་པའི་ས་གནས་རང་སྐྱོང་གི་སྲིད་དབང་བཙུགས་ཏེ། སྔར་ཡོད་དཔོན་རིགས་དང་ལས་ཁུངས་མཐའ་དག་བཅོས་བསྒྱུར་དང་རྩ་མེད་བཟོས་ཏེ། བོད་མི་དམངས་ཀྱི་ཕྱེད་ཀ་ནི་སྤུན་ཟླ་མི་རིགས་ཁག་གི་མི་དམངས་དང་མཉམ་དུ་བདེ་སྐྱིད་ལྡན་པའིསྤྱི་ཚོགས་རིང་ལུགས་གྱི་རྒྱལ་ཁབ་ཆེན་པོའི་བདག་པོའི་གྲས་སུ་ཚུད་ནའང༌། འོན་ཏེ་མེས་རྒྱལ་ལྷོ་ནུབ་ས་མཚམས་ཀྱི་བོད་ལྗོངས་མི་དམངས་ད་དུང་བཙན་རྒྱལ་རིང་ལུགས་པ་དང་བོད་གཞུང་དབང་སྒྱུར་གྲལ་རིམ་གྱི་སྡུག་རྩུབ་དང་གཉའ་གནོན་འོག་འཚོ་བ་མྱོང་བཞིན་ཡོད་པར་བརྟེན། ཀྲུང་དབྱང་མི་དམངས་སྲིད་གཞུང་གིས་བོད་ལྗོངས་བཅིངས་འགྲོལ་བཏང་ནས་བཙན་རྒྱལ་རིང་ལུགས་ཀྱི་སྟོབས་ཤུགས་མཐར་བསྐྲོད་གཏོང་རྒྱུའི་གསལ་བསྒྲགས་བྱས་པ་དང་ཆབས་གཅིག བོད་ཞི་བའི་བཅིངས་འགྲོལ་འབྱུང་ཐབས་སྐོར་ལ་གྲ་སྒྲིག་དང་ཐབས་ཇུས་སྣ་ཚོགས་སྤེལ། དེར་བརྟེན་བོད་ཞི་བའི་བཅིངས་འསྲོལ་ཐོབ་པར་འགལ་རྐྱེན་གཙང་སེལ་དང་མེས་རྒྱལ་མཐའ་མཚམས་སྲུང་བ་བཅས་ཀྱི་ཆེད་དུ་ཀྲུང་གོ་མི་དམངས་བཅིངས་འགྲོལ་དམག་གིས་ཆབ་མདོར་དཔུང་བསྐྱོད་གྱིས་“ཆབ་མདོའི་དམག་འཁྲུག”བརྒྱབ་སྟེ་ཆབ་མདོ་བཅིངས་བགྲོལ་བྱས། དེའི་ཚེ་བོད་ཀྱི་མཐོ་རིམ་མི་སྣ་རྣམས་ཀྱང་སྡོད་སྲན་མ་ཚུགས་ཐོག་དབང་སྒྱུར་གྲལ་རིམ་ནང་ཁུལ་དུ་འགལ་ཟླ་ཆེས་ཆེར་བྱུང་མཐར་སྲིད་སྐྱོང་སྟག་བྲག་ངག་དབང་གསུང་རབ་ཀྱིས་དགོངས་ཞུ་གནང་སྟེ། རྒྱལ་དབང་བཅུ་བཞི་པ་བསྟན་འཛིན་རྒྱ་མཆོ་མཆོག་གིས
