རྒྱལ་དབང་བཅུ་གསུམ་པའི་སྐབས་ཀྱི་ལོ་རྒྱུས།（གཉིས་པ）
གཉིས་པ། ཕྱི་དགྲ་ནང་དགྲ་བྱུང་སྟེ་ཡུལ་གཞན་ཉེན་གཡོལ་མཛད་པའི་ཚུལ་ནི། དེ་ལྟར་སྐབས་དེར་བོད་ལ་ཕྱིའི་བཙན་འཛུལ་གྱིས་དམག་འཁྲུག་རྒྱག་པའི་དུས་འགག་གི་ཚེ་ནའང་བོད་ཀྱི་གཏམ་ལ་ནང་བཀྲ་མི་ཤིས་ན་ཕྱིའི་དོན་མི་འགྲུབ་ཟེར་བའི་དཔེ་བཞིན། བོད་ཀྱི་དབང་སྒྱུར་གྲལ་རིམ་ནང་ཁུལ་དུ་སྲིད་དབང་འཕྲོག་རེས་བྱེད་པའི་འཐབ་རྩོད་ཛ་དྲག་དང་རྣོ་ངར་ཅན་ཞིག་བྱུང་། དེའང་རྒྱལ་ཚབ་དེ་མོ་རིན་པོ་ཆེ་ཁྲི་ཟུར་མཛད་རྗེས་ཉེ་གནས་སྐུ་ཚ་ནོར་བུ་ཚེ་རིང་ཟེར་བ་དང་ཕྱོགས་གཏོགས་དཔོན་རིགས་བཅས་ཀྱིས་རྒྱལ་དབང་མཆོག་གིས་བོད་སྲིད་བཞེས་པར་ལོག་མཐོང་གིས་ཡིད་རླམས་ཏེ་གོང་ས་མཆོག་གི་སྐུ་ལ་རྒོལ་བར་བརྩམས་ཀྱང་། རེ་ངན་མ་འགྲུབ་གོང་བོད་གཞུང་ནས་ལྐོག་གཡོ་བརྟོལ་ཏེ་བྱེད་གཏེ་གཙོ་བོ་དང་རྗེས་འབྲངས་རྣམས་འཛིན་བཟུང་གིས་ཁྲིམས་གཅོད་བྱས་པར་མ་ཟད། དེ་མོ་རིན་པོ་ཆེའང་གློ་བུར་དུ་སྐུ་གྲོངས་པ་བཅས་ཀྱིས་བསྟན་རྒྱས་གླིང་བླ་བྲང་དང་རང་འཇགས་ཡོད་པའི་དགོན་གཞིས་རྒྱུ་ནོར་དང་བཅས་པ་གཞུང་བཞེས་གནང་ཐོག དེ་མོ་ཚང་གི་མཚན་གནས་བླངས་ཏེ་ཕྱིན་ཆད་ཡང་སྲིད་ཀྱང་ངོས་འཛིན་མི་ཆོག་པ་སོགས་ཀྱི་བཀའ་ཕབ་པས་མཚོན། སྐབས་དེ་ལ་གཞུང་སའི་སྲིད་འགྱུར་གྱི་ལྐོག་གཡོ་ཐེངས་གཅིག་གཙང་སེལ་བྱེད་པ་ཡིན་འདུག ཚུལ་འདིའི་སྟེང་ནས་རྒྱལ་དབང་སྐུ་འཕྲེང་གོང་མ་འགའ་ཡང་དགུང་ན་ཕྲ་དུས་སྐུ་གཤེགས་རྐྱེན་སྐོར་ལ་བོད་མི་བྱིངས་ནས“ལྷ་སའི་སྐུ་དྲག་མི་དྲག ཁ་ལ་རྒྱལ་བ་ནོར་བུ། ལག་ལ་གསོལ་ངན་ནག་པོ།”ཞེས་ཟེར་བ་དེ་དོན་ལ་གནས་པའི་གཏམ་དུ་སྙམ་མོ།། ཡང་སྤྱིར་དབུས་གཙང་གི་དབང་སྒྱུར་པའི་བར་སྔར་ནས་འགལ་ཟླ་ཡོད་ཁར་སྐབས་འདི་ལ་ཡང་བཀྲ་ཤིས་ལྷུན་པོ་དང་བོད་གཞུང་བར་འགལ་བ་ཚབས་ཆེན་བྱུང་སྟེ་མཐར་རྒྱལ་པ་པཎ་ཆེ་གཉིས་ཀྱང་སྤྱིར་སར་གནས་ཀྱི་བྱང་ཆུབ་སེམས་དཔར་ཆགས་སྡང་གི་འཛིན་བཟུང་བྲལ་ཡང་སྐུ་འཁོར་སོ་སྐྱེས་དག་གི་རང་མཚང་གིས་ཡབ་སྲས་ཞལ་མི་མཐུན་པ་ལྟ་བུའི་སྣང་བ་མངོན་གསལ་དུ་གྱུར།
ཡང་སྐབས་འདིའི་སྔ་ཕྱི་ནས་ཨུ་རུ་སུ་བཙན་རྒྱལ་རིང་ལུགས་པས་ཀྱང་བོད་འདི་བཙན་འཛིན་བྱེད་སེམས་བཅངས་ཏེ་མྱུལ་ཞིབ་པ་ཐེངས་མང་མངགས་ནའང་བོད་འབངས་སྐྱ་སེར་མཐའ་དག་གིས་མཐའ་གཅིག་ཏུ་ངོ་རྒོལ་བྱས་རྐྱེན་ཁོ་ཚོའི་དམིགས་ཡུལ་རེ་ཞིག་སྟོང་པར་ལུས། དེའི་ཚེ་ཨུ་རུ་སུ་བོད་ལ་དབང་བསྒྱུར་བྱེད་ན་གཙོ་བོ་ཆོས་དང་ཁ་བྲལ་ཐབས་མེད་པ་ཤེས་ཏེ་སྔར་ནས་ཕྱི་སོག་བཙན་བཟུང་བྱས་ཡོད་པ་གཞི་བྱས་སོག་པོའི་མི་སྣ་བེད་སྤྱོད་ཀྱིས་བོད་དང་འབྲེལ་བ་བཙུགས། དེ་ལ་སྔར་འབྲས་སྤུངས་སུ་སོག་པོའི་གྲྭ་པ་རྡོ་རྗེ་གཡིབ་བྱ་བ་ཞིག་ཡོད་པ་དེ་ཨུ་རུ་སུས་ངོ་ཚབ་ལྟ་བུར་བོད་ལ་མངགས་ཏེ་རྒྱལ་དབང་བཅུ་གསུམ་པ་མཆོག་དང་འཇལ་འཕྲད་ཀྱིས་བོད་དང་འབྲེལ་བ་བྱས། རྒྱལ་དབང་བཅུ་གསུམ་པས་སྐབས་དེའི་དབྱིན་ཇིའི་དཔུང་ཤུགས་ནས་ཕྱིར་བསྐྲོད་གཏོང་ཆེད་ཨུ་རུ་སུ་དང་འབྲེལ་བ་བཙུགས་ཐོག་དེ་ཕྱོགས་ནས་དམག་ཆས་ཀྱང་མང་ཙམ་གྲ་སྒྲིག་བྱས་ལ། འོན་ཏེ་མཐའ་འབྲས་ནི་ཝ་ཚར་སྤྱང་ཚང་སྤོས་པའི་དཔེ་བཞིན་མཐར་ཨུ་རུ་སུའི་ལྐོག་གཡོ་འོག་ཏུ་དབུ་འཁོར་ནས་མེས་རྒྱལ་གཅིག་གྱུར་ལ་མི་ཕན་པའི་མཛད་པ་ནོར་འཁྲུལ་ཅན་འགའ་ཡང་སྤེལ་མོད། འོན་ཀྱང་སྐབས་དེར་ཆིན་གོང་མའི་སྲིད་གཞུང་ཉམས་རུལ་གྱིས་བོད་ལ་ལྟ་རྟོགས་གི་ནུས་པ་མེད་པའི་ལོ་རྒྱུས་ཀྱི་གནས་ཚུལ་དངོས་ལ་གཞིགས་ན་ཧ་ལས་དགོས་པ་ཞིག་ཀྱང་མ་ཡིན་སྙམ་མོ།།
དེ་ལྟར་དབྱིན་ཇི་བཙན་རྒྱལ་རིང་ལུགས་པས་བོད་ལ་བཙན་འཛུལ་བྱེད་པའི་མྱོས་ཧམ་གྱི་འཁོར་ལོ་བོད་དབུས་ལྷ་ལྡན་ཕྱོགས་སུ་བསྐོར་སླེབས་ཡོད་པའི་ཚེ། བོད་གཞུང་དང་གདན་ས་གསུམ་གྱི་འཐུས་མིས་གྲོས་མོལ་བྱས་པའི་སྙིང་པོར་རྒྱལ་དབང་བཅུ་གསུམ་པ་མཆོག་ལྷ་སར་མ་བཞུགས་ན་དགེ་མཚན་ཆེ་བར་བརྟེན། རྒྱལ་ཚབ་ཏུ་དགའ་ལྡན་ཁྲི་པ་བློ་བཟང་རྒྱལ་མཚན་བསྐོ་བཞག་ཐོག རྒྱལ་དབང་མཆོག་སྐུ་འཁོར་ཧྲག་བསྡུས་དང་བཅས་ལྷ་ས་ནས་བྱང་ལམ་བརྒྱུད་ཕྱི་སོག་དང་རྒྱལ་ནང་དུ་ཉེན་གཡོལ་ལ་ཕེབས་དགོས་བྱུང་། རྒྱལ་དབང་སྐུ་འཁོར་བཅས་རབ་བྱུང་བཅོ་ལྔ་བའི་ཤིང་འབྲུག་སྤྱི་ལོ༡༩༠༤ལ་ལྷ་ས་ནས་ཐོན་ཏེ་བྱང་རྭ་སྒྲེང་དང་སྟག་ལུང་ནག་ཆུ་བརྒྱུད་མདོ་སྨད་ནས་ཕྱི་སོག་ཏུ་བསྐྱོད་ཅིང་། ཕྱི་ལོར་ཕྱི་སོག་ཏུ་ཕེབས་འབྱོར་བྱུང་བསྟུན་ཧལ་ཧ་རྗེ་བཙུན་དམ་པ་གཙོས་པའི་དད་ལྡན་སོག་འབངས་ཀུན་ལ་ཆོས་ཀྱི་འཁོར་ལོ་རྒྱ་ཆེན་པོ་བསྐོར་བར་མཛད་ལ། འོན་ཏེ་ཕྱིས་སུ་ཧལ་ཧ་རྗེ་བཙུན་དམ་པ་དང་ཐུགས་ནང་དེ་ཙམ་མ་མཐུན་པ་རྐྱེན་བྱས། བོད་ནས་གདན་ཞུས་མི་སྣ་ཆེད་འབྱོར་དང་བསྟུན་བོད་ལ་ཕྱིར་མྱུར་ཕེབས་མཛད་དགོངས་ཀྱིས་ལམ་བར་གནས་ཆེན་ཁག་ལ་གནས་གཟིགས་དང་འབྲེལ་རིམ་བཞིན་མདོ་སྨད་ཟི་ལིང་མཁར་དུ་ཕེབས། འོན་ཀྱང་སྐབས་དེར་དབྱིན་ཇི་བཙན་འཛུལ་པས་རྒྱལ་དབང་མཆོག་བོད་ལ་ཕྱིར་ཕེབས་པར་བཀག་འགོག་ཆེ་སྟབས་རེ་ཞིག་སྐུ་འབུམ་བྱམས་པ་གླིང་དུ་ལོ་ངོ་གཅིག་ལྷག་བཞུགས་དགོས་བྱུང་། དེའི་ཚེ་ཆིན་གོང་མ་དང་རྒྱལ་ཡུམ་རྣམ་གཉིས་ཀྱིས་བཀོད་མངགས་ལྟར་རྒྱལ་དབང་མཆོག་པེ་ཅིན་དུ་གདན་དྲངས་ཤིང་རབ་བྱུང་
