རྒྱལ་དབང་སྐུ་འཕྲེང་བཅུ་གཉིས་པའི་སྐབས་ཀྱི་ལོ་རྒྱུས།
རྒྱལ་དབང་སྐུ་འཕྲེང་བཅུ་གཉིས་པ་ནི་ངག་དབང་བློ་བཟང་བསྟན་པའི་རྒྱལ་མཚན་འཕྲིན་ལས་རྒྱ་མཚོ་ཡིན་ལ། ཁོང་རབ་བྱུང་བཅུ་བཞི་པའི་མེ་འབྲུག་སྤྱི་ལོ༡༨༥༦ལ་བོད་དབུས་ལྷོ་ཁའི་འོལ་དགའ་རྫོང་ཕྱིའི་ཉེ་འདབས་སུ་ཡབ་ཕུན་ཚོགས་ཚེ་དབང་དང་ཡུམ་ཚེ་རིང་གཡུ་སྒྲོན་གཉིས་ཀྱི་སྲས་སུ་སྐུ་འཁྲུངས། དེ་ཡང་རྒྱལ་དབང་བཅུ་གཅིག་པ་སྐུ་འདས་རྗེས་རྒྱལ་ཚབ་རྭ་སྒྲེང་རིན་པོ་ཆེས་གཙོས་བོད་གཞུང་གིས་བོད་ཀྱི་ཡུལ་གྲུ་སོ་སོར་འོས་སྤྲུལ་རྩད་ཆོད་ཀྱི་བཀའ་རྒྱ་གནང་ཡོད་པ་ལྟར་མཐར་འོལ་དགའ་སོགས་ནས་འོས་སྤྲུལ་གསུམ་བྱུང་བ་ལས་འདི་པ་སྙན་གྲགས་ཆེ་བར་བརྟེན་འོས་སྤྲུལ་གསུམ་ག་ལྷ་ལྡན་དུ་གདན་དྲངས་ཏེ་གསེར་བུམ་དཀྲུག་འདོན་གྱིས་ཆུང་སྲིད་འདི་པ་ངོས་འཛིན་མཛད་ཅིང་། སྐབས་དེར་པཎ་ཆེན་རིན་པོ་ཆེ་སྐུ་ན་ཕྲ་སྟབས་རྒྱལ་ཚབ་རྭ་སྒྲེང་རིན་པོ་ཆེས་ཡང་སྲིད་མཆོག་གི་དབུ་སྐྱེས་གཙུག་ཕུད་བཞེས་པར་མཛད། རབ་བྱུང་བཅུ་བཞི་པའི་ལྕགས་སྤྲེལ་སྤྱི་ལོ༡༨༦༠ལ་མཆོག་སྤྲུལ་རིན་པོ་ཆེ་གསེར་ཁྲི་མངའ་གསོལ་གྱི་མཛད་སྒོ་སྔར་ལུགས་ལྟར་གཟབ་ཅིང་རྒྱས་པ་གནང་སྟེ་གངས་ཅན་སྐྱེས་འགྲོའི་གཙུག་རྒྱན་དམ་པར་དབང་བསྐུར། སྐབས་དེར་རྒྱལ་བའི་ཡང་སྲིད་རིན་པོ་ཆེ་གསེར་ཁྲི་མངའ་གསོལ་བྱུང་ནའང་སྐུ་ན་ཕྲ་རྐྱེན་ན་ཚོད་དང་བསྟུན་པའི་གསན་སྦྱོང་ཁོ་ན་ལས་ཆོས་སྲིད་ཀྱི་བྱ་བ་མཐའ་དག་སྲིད་སྐྱོང་རྭ་སྒྲེང་རིན་པོ་ཆེ་དང་བཀའ་བློན་ལྷན་རྒྱས་ནས་གནང་མུར་ཡོད་ལ། སྐབས་ཤིག་བཀའ་བློན་གཙོ་བོ་བཤད་སྒྲ་དབང་ཕྱུག་རྒྱལ་པོ་གཙོ་བྱས་སྲིད་སྐྱོང་རྭ་སྒྲེང་རིན་པོ་ཆེའི་བར་འགལ་ཟླ་བྱུང་སྟེ་བོད་ས་གནས་སྲིད་གཞུང་གི་དབང་བསྒྱུར་པ་རྣམ་ནང་འཛིན་ཆེན་པོ་བྱུང་། དེའང་འགལ་ཟླའི་མངོན་རྐྱེན་ལ་སྲིད་སྐྱོང་རྭ་སྒྲེང་རིན་པོ་ཆེས་གང་སར་སྲིད་ཐམ་ཕབ་རྐྱང་གིས་བཀའ་ཤག་ལ་བརྩི་མཐོང་མེད་པ་རྐྱེན་བྱས། བཤད་སྒྲ་དབང་ཕྱུག་རྒྱལ་པོས་གྲོས་མགོ་བཏོན་པ་ལྟར་སྲིད་སྐྱོང་གི་ལས་ཐམས་ཅད་བཀའ་ཤག་ལ་སྤྲད་དེ་བཀའ་བློན་བགྲེས་པ་བཤད་སྒྲ་དབང་ཕྱུག་རང་ཉིད་ཀྱིས་སྲིད་ཐམ་བཏང་འཛིན་བྱེད་པ་ཐག་བཅད། འོན་ཀྱང་རྭ་སྒྲེང་བའི་སྐུ་འཁོར་དང་ཕྱོགས་གཏོགས་རྣམས་ཀྱིས་བྱ་སྤྱོད་དེ་མངོན་གསལ་དུ་སྲིད་དབང་འཕྲོག་པ་ཡིན་ཚུལ་སྐོར་སྲིད་སྐྱོང་རྭ་སྒྲེང་རིན་པོ་ཆེར་ཞུས་པ་ལྟར། སྲིད་སྐྱོང་གིས་བཀའ་བློན་བཤད་སྒྲ་བ་གོ་གནས་ཕབ་སྟེང་གཞུང་ཞབས་ཁོངས་ནས་ཕྱིར་འབུད་ཀྱིས་རང་གཞིས་སྙེ་མོར་བཞག དེའི་ཚེ་སྲིད་སྐྱོང་ཕྱོགས་གཏོགས་དང་བཅས་པས་བཤད་སྒྲ་པས་གོར་ཁ་རྒྱལ་ཁང་གི་བློན་ཆེན་དང་ཡི་གེའི་འགྲོ་འོང་ཡོད་པ་ཉེས་གཞིར་བསྣན་ཏེ་གྲོས་ཐོག་ནས་བཀའ་ཤག་བཤད་སྒྲ་བའི་ངན་རྩ་མེད་པར་བཟོ་དགོས་པའི་བཀའ་ཁྱབ་སྒོས་པ་ལྟར། མདའ་དཔོན་ཐོན་པ་བ་རྫོང་མདའ་མངགས་པ་ལ་བཤད་སྒྲ་བས་གཡོ་ཐབས་ཀྱིས་མདའ་དཔོན་བསླུས་ཏེ་རང་ཉིད་རྩ་མེད་མ་བཟོས་ཐོག་སྙེ་མོ་རྒྱལ་བྱེད་དགོན་དུ་ཡང་བཙོན་ལྟ་བུར་བཀག་སྡོམ་བྱས། ཡང་བཀའ་ཟུར་བཤད་སྒྲ་བ་ནི་སྐབས་དེའི་བཀའ་བློན་བགྲེས་པ་ཡིན་ཐོག་སྐྱ་དཔོན་ཡིན་སྟབས་དམག་བཏེགས་ནས་མཐའ་མཚམས་བདེ་འཇགས་དང་བོད་ཡུལ་ལྷོད་འཇགས་ཡོང་བའི་ཐད་ལ་བྱས་རྗེས་ཡོད་མཁན་ཞིག་ཡིན་པ་མ་ཟད། དགའ་ལྡན་དགོན་པའི་སྦྱིན་བདག་གི་གཙོ་བོ་ཞིག་ཀྱང་ཡིན་སྟབས། དགའ་འབྲས་གྲྭ་མང་ནས་སྲིད་སྐྱོང་རྭ་སྒྲེང་ལ་ངོ་ལོག་བྱེད་རྩིས་ཡོད་པ་བེད་སྤྱད་དེ། ཤར་རྩེའི་ཕྱག་མཛོད་དཔལ་ལྡན་དོན་གྲུབ་བྱ་བ་གཙོས་གསང་སྟབས་ངང་གྲྭ་བ་འགའ་སྙེ་མོར་བཤད་སྒྲ་རྩད་ཆོད་དུ་བཏང་ཁར། དགའ་འབྲས་དང་གཞུང་ཞབས་མི་སྣ་ཚུར་འགུག་བཅས་ཀྱི་ཐབས་སྤེལ། དེ་ནས་མིརིང་བར་གྲྭ་དམག་བཏང་སྟེ་སྙེ་མོ་ནས་བཤད་སྒྲ་དབང་ཕྱུག་རྒྱལ་པོ་ལྷ་སར་བསུས་ཤིང་ཁོ་གཙོ་བྱས་གཞུང་ཞབས་མི་སྣ་དང་དགའ་འབྲས་བཅས་ནས་སྲིད་སྐྱོང་རྭ་སྒྲེང་ལ་མཐའ་གཅིག་ཏུ་ངོ་རྒོལ་བྱས་པའི་རྩ་འཛུགས“དགའ་འབྲས་དྲུང་སྤྱི”ཟེར་བ་བཙུསག་ཏེ་སྲིད་སྐྱོང་གཙོས་པའི་སེར་བྱེས་གྲྭ་མང་དང་བཤད་སྒྲ་བ་གཙོས་པའི་དགའ་འབྲས་གྲྭ་མང་བར་འཐབ་འཛིན་བྱུང་སྟེ། མཐར་སྟོབས་ཤུགས་མང་ཉུང་གི་དབང་གིས་རབ་བྱུང་བཅུ་བཞི་པའི་ཆུ་ཁྱི་སྤྱི་ལོ༡༨༦༢ལ་སྲིད་སྐྱོང་རྭ་སྒྲེང་འཁོར་བཅས་བྲེལ་རྟབ་ངང་མེས་རྒྱལ་ནང་ཁུལ་དུ་ཕེབས་བྱོལ་གནང་དགོས་བྱུང་ལ། ཡང་སྐབས་དེར་ཆིན་གོང་མའང་ལྷ་རང་མགོ་མ་ཐོན་པར་འདྲེ་ཤ་ཐག་ཟེར་བའི་དཔེ་ལྟར་བོད་ལ་རོགས་སྐྱོར་གྱི་ནུས་ཤུགས་མ་ཡོད་སྟབས། སྲིད་སྐྱོང་རྭ་སྒྲེང་ལ་མངོན་ཚུལ་དུ་རྒྱབ་སྐྱོར་བྱས་ཁུལ་ཙམ་ལས་དོན་སྨོན་མ་བྱུང་བས་མཐར་སྲིད་སྐྱོང་རྭ་སྒྲེང་ངག་དབང་ཡེ་ཤེས་ཚུལ་ཁྲིམས་རྒྱ་མཚོ་རྒྱ་ནང་དུ་སྐུ་འདས། དེ་ནས་བོད་ཆོས་སྲིད་ལ་མགོན་སྐྱབས་མེད་མི་རུང་བས་རྒྱལ་དབང་མཆོག་སྤྲུལ་རིན་པོ་ཆེ་དགུང་ལོ་བདུན་པ་བས་གངས་ལྗོངས་ཆོས་སྲིད་ཀྱི་ཐུགས་འགན་བཞེས་པའི་ཚུལ་མཛད་ཅིང་། ལོ་མཇུག་ལ་བཤད་སྒྲ་དབང་ཕྱུག་རྒྱལ་པོ་བོད་ཀྱི་སྡེ་སྲིད་ཀྱི་ཁྲིར་བཏོན། བཤད་སྒྲ་བས་བོད་ཀྱི་སྲིད་དབང་བཟུང་རྗེས་རང་ཕྱོགས་བློས་འཁེལ་བ་ཤར་རྩེ་ཕྱག་མཛོད་དཔལ་ལྡན་དོན་གྲུབ་གཞུང་སའི་རྩེ་སྐོར་དཔོན་རིགས་ཁོངས་སུ་བཅུག་སྟེ་དབང་ཤུགས་ཆེན་པོ་སྤྲད། སྡེ་སྲིད་འདི་པས་བོད་སྲིད་དབང་ལོ་ངོ་གསུམ་ཙམ་བསྐྱངས་
