རྒྱལ་དབང་སྐུ་འཕྲེང་བཅུ་གཅིག་པའི་སྐབས་ཀྱི་ལོ་རྒྱུས།
རྒྱལ་དབང་སྐུ་འཕྲེང་བཅུ་གཅིག་པ་ནི་ངག་དབང་སྐལ་བཟང་བསྟན་པའི་སྒྲོན་མེ་མཁས་གྲུབ་རྒྱ་མཚོ་ཡིན་ལ། ཁོང་རབ་བྱུང་བཅུ་བཞི་པའི་ས་ཁྱི་སྤྱི་ལོ༡༨༣༨ལ་མདོ་ཁམས་ཀྱི་ཆར་མི་ཉག་མགར་ཐར་བྱ་བར་ཡབ་ཚེ་དབང་དོན་གྲུབ་དང་ཡུམ་གཡུང་དྲུང་བུ་ཁྲིད་གཉིས་ཀྱི་སྲས་སུ་སྐུ་འཁྲུངས། རྒྱལ་དབང་བཅུ་པ་ཆེན་པོ་སྐུ་འདས་རྗེས་རྒྱལ་ཚབ་ཚེ་སྨོན་གླིང་རིན་པོ་ཆེ་དང་བོད་གཞུང་བཅས་ནས་སྔར་ལུགས་བཞིན་འོས་སྤྲུལ་རྩད་གཅོད་སྐོར་ས་གནས་སོ་སོར་བཀོད་འདོམས་གནང་ཡོད་པ་ལྟར། སྐབས་དེར་ཡང་སྲིད་འོས་སྤྲུལ་གསུམ་བྱུང་བའི་ནང་ནས་ཆུང་སྲིད་འདི་པ་གང་ཅི་ནས་ངོ་མཚར་དང་སྙན་གྲགས་ཆེ་བར་བརྟེན་པཎ་ཆེན་ཐམས་ཅད་མཁྱེན་པར་ཐུགས་བརྟག་དང་ལྷ་བླར་ལུང་ཞུ་བཅས་རྩེ་མཐུན་བཟང་ཕེབས་ལ་བརྟེན། འབྲས་མཁན་པོ་བློ་གྲོས་བརྟན་པ་གཙོས་པའི་མི་སྣ་རྫོང་དམའ་གནང་སྟེ་མཆོག་སྤྲུལ་རྩད་ཆོད་ཁམས་སུ་དངོས་སྐྱོད་ཀྱིས་ཆུང་སྲིད་འདི་པ་འོས་སྤྲུལ་གྱི་གྲས་སུ་བྱས་ནས་མགར་ཐར་དགོན་རྣམ་རྒྱལ་གླིང་དུ་གདན་འདྲེན་ཞུས་ནས་བཞུགས། རབ་བྱུང་བཅུ་བཞི་པའི་ལྕགས་གླང་སྤྱི་ལོ༡༨༤༡ལ་འོས་སྤྲུལ་ཁག་གསུམ་སྔར་ལམ་ལྟར་གསེར་བུམ་དཀྲུག་འདོན་དགོས་པར་བརྟེན་ཆུང་སྲིད་འདི་པའང་ལྷ་ལྡན་དུ་ཆིབས་ཞལ་བསྒྱུར་ཐོག པཎ་ཆེན་ཐམས་ཅད་མཁྱེན་པ་དང་རྒྱལ་ཚབ་རིན་པོ་ཆེ། བོད་སྡོད་ཨམ་བན་སོགས་བོད་རྒྱའི་ཆེ་རྒུ་ལྷན་འཛོམས་ཀྱིས་གསེར་བུམ་དཀྲུག་འདོན་དང་དགོངས་ངེས་བརྟག་དཔྱད་ཀྱིས་ངོས་འཛིན་འཁྲུལ་མེད་ཞུས། དེ་ནས་པཎ་ཆེན་ཐམས་ཅད་མཁྱེན་པ་བསྟན་པའི་ཉི་མ་མཆོག་གིས་ཡང་སྲིད་རིན་པོ་ཆེའི་དབུ་སྐྱེས་གཙུག་ཕུད་བཞེས་པར་མཛད་དོ།།
རབ་བྱུང་བཅུ་བཞི་པའི་ཆུ་སྟག་སྤྱི་ལོ༡༨༤༢ལ་སྔར་སྲོལ་ཆིབས་བསྒྱུར་དང་ཕེབས་བསུ་གཟབ་རྒྱས་བཅས་ཕོ་བྲང་རིན་པོ་པོ་ཏྰ་ལར་ཞབས་སོར་འཁོད་ཅིང་། རྒྱལ་ཚབ་རིན་པོ་ཆེ་གཙོས་བོད་ཀྱི་སྐྱ་སེར་དཔོན་རིགས་དང་བོད་སྡོད་ཨམ་བན་དང་ལྕང་སྐྱ་རིན་པོ་ཆེ་སོགས་བོད་རྒྱའི་དྲག་རིགས་ཐམས་ཅད་ཀྱིས་ལེགས་འབུལ་དང་བསྟུན་གསེར་ཁྲི་མཐོན་པོར་མངའ་གསོལ་གྱི་མཛད་སྒོ་གཟབ་ཅིང་རྒྱས་པ་སྔར་ལུགས་བཞིན་གནང་ཞིང་དཀར་སྤྲོའི་དགའ་སྟོན་རྒྱ་ཆེན་པོ་ཞུས། ལོ་འདི་ལ་བཀའ་ཤག་གིས་སྔར་ཡོད་བོད་ཀྱི་ལས་དོན་སྐོར་དོན་ཚན་ཉེར་དགུའི་ནང་ཚན་བཅུ་གཅིག་པ་ལྟར་བོད་ས་གནས་སྲིད་གཞུང་གི་ཕྱི་ནང་ལས་ཚན་ཆེ་ཕྲ་མཐའ་དག་བསྐོ་འཐེན་གྱི་ལམ་སྲོལ་གཏན་འཁེལ་གྱི་སྟེང་། ཞིབ་ཕྲའི་ཏོག་གནས་རིམ་པ་རྒྱ་ལུགས་ལྟར་ལག་བསྟར་རྒྱུན་འཁྱོངས་ཡོད་པའི་དེབ་གཞི་གསར་འགོད་ཀྱིས་སེར་སྐྱ་དཔོན་རིགས་ཆེ་འབྲིང་ཆུང་གསུམ་གྱི་གོ་གནས་ཐོབ་ཐང་དང་རྒྱ་ཆེའི་རྫོང་གཞིས་ཀྱི་རྫོང་སྡོད་དང་གནས་ཡུལ་རིང་ཐུང་བཅས་གསལ་བར་བཀོད་པའི《གཞུང་ས་དགའ་ལྡན་ཕོ་བྲང་པའི་ལས་ཚན་ཕྱི་ནང་ཏོག་གནས་ཀྱི་གོ་རིམ་དེབ་ཐེར་རིན་པོ་ཆེ་ཕྲེང་བ》ཞེས་བྱ་བ་དེ་གཏན་འབེབས་གསར་འགོད་བྱས་པ་ཡིན་ལ། དེ་ལས་རེ་འགའ་འཕར་ཆག་སོགས་འགྱུར་ལྡོག་ཕྲན་བུ་མ་གཏོགས་ཆབ་སྲིད་ཀྱི་རྩ་བའི་སྒྲིག་གཞི་དེ་ཉེ་སྔོན་བར་རང་སོར་གནས་ཡོད་པར་བཤད་དོ།།
ལོ་འདིའི་སྔ་ཕྱི་ཙམ་ལ་སིང་པ་བྱ་བས་བོད་ཀྱི་མངའ་རིས་སྐོར་གསུམ་ལ་བཙན་འཛུལ་བྱས་རྐྱེན་སིང་བོད་བར་དམག་འཁྲུག་བྱུང་། དེའང་སིང་པས་ཐོག་མར་ལ་དྭགས་ཀྱི་ས་ཆ་བཙན་བཟུང་བྱས་ཡོད་ཐོག་བོད་ཀྱི་མངའ་རིས་ཕྱོགས་སུ་དཔུང་འཇུག་བྱས་ཏེ་རུ་ཐོག་དང་སྤུ་ཧྲེང་། སྟག་ལ་མཁར་སོགས་རྫོང་ཁག་རྣམས་ཀྱང་བཟུང་། བོད་ཕྱོགས་ནས་མངའ་རིས་སྤྱི་ཁྱབ་གཙོས་པའི་དཔོན་བློན་རྣམས་ཀྱིས་སྲོག་ལ་མ་འཛེམ་པར་འཐབ་འཛིང་དྲག་པོ་བྱས་ཀྱང་དཔུང་ཆས་བཟང་ཞན་གྱི་དབང་གིས་བོད་དམག་རྣམས་ཕམ་སྟེ་དཔོན་བློན་མང་ཙམ་དམག་ཐོག་ཏུ་སྲོག་ཤོར། དེ་ནས་བོད་ས་གནས་སྲིད་གཞུང་གིས་བཀའ་བློན་ཟུར་ཁང་ཚེ་བརྟན་རྡོ་རྗེ་དམག་སྤྱི་དང་གཙང་མདའ་དཔོན་སྤེལ་བཞི་པ་ལས་རོགས་བཅས་སུ་བསྐོས་ཏེ་དབུས་གཙང་ནས་དམག་བསྡུ་བསྐུལ་གྱིས་སིང་པར་ཕར་རྒོལ་དྲག་པོ་བྱས་ཏེ། གནམ་གཤིས་དྲོད་གྲང་སིང་དམག་ལ་མི་ཕན་པའི་གོ་སྐབས་དང་བསྟུན་སིང་པའི་དཔོན་དམག་རྣམས་བསད་བཟུང་གིས་ཚར་བཅད་ནས་མངའ་རིས་སྐོར་གསུམ་ཡོངས་རྫོགས་ཕྱིར་བླངས་པར་མ་ཟད། ལ་དྭགས་ཀྱི་ས་ཆ་ནས་སིང་པ་ཡོངས་རྫོགས་མཐར་བསྐྲོད་བྱས་ཏེ་མེས་རྒྱལ་མཐའ་མཚམས་བཙན་སྲུང་བདེ་འཇག་ཀྱི་གནས་ལ་བཀོད་པར་བགྱིས་སོ།།
རབ་བྱུང་བཅུ་བཞི་པའི་ཤིང་འབྲུག་སྤྱི་ལོ༡༨༤༤ལ་སྲིད་སྐྱོང་ཚེ་སྨོན་གླིང་པ་ངག་དབང་འཇམ་དཔལ་ཚུལ་ཁྲིམས་རྒྱ་མཚོས་བོད་ཀྱི་སྲིད་དབང་མི་ལོ་ཉེར་ལྔ་ལྷག་བསྐྱངས་རྗེས་བོད་སྡོད་ཨམ་བན་གྱིས་ཆིན་གོང་མར་ཞུ་གཏུགས་བྱས་རྐྱེན་ཁོང་ཁྲི་ལས་ཕབ་སྟེ་རྒྱ་ཡུལ་དུ་རྒྱང་འབུད་གནང་། དེ་ལ་རེ་ཞིག་པཎ་ཆེན་སྐུ་འཕྲེང་བདུན་པ་མཆོག་བོད་ཀྱི་སྲིད་སྐྱོང་དུ་དབང་བསྐུར་ནས་ཟླ་ངོ་དགུའི་རིང་སྲིད་མཛད་ཅིང་དེ་ནས་གོང་མའི་བཀའ་ལྟར་རྭ་སྒྲེང་རིན་པོ་ཆེ་ངག་དབང་ཡེ་ཤེས་ཚུལ་ཁྲིམས་རྒྱ་མཚོ་སྲིད་སྐྱོང་དུ་བསྐོས། རབ་བྱུང་བཅུ་བཞི་པའི་མེ་རྟ་སྤྱི་ལོ༡༨༤༦ལ་པཎ་ཆེན་ཐམས་ཅད་མཁྱེན་པ་མཆོག་གིས་མཁན་པོ་གནང་སྟེ་རྒྱལ་བ་བཅུ་གཅིག་པ་མཁས་གྲུབ་རྒ
