རྒྱལ་དང་སྐུ་ཕྲེང་བཅུ་བའི་སྐབས་ཀྱི་ལོ་རྒྱུས།
རྒྱལ་བ་སྐུ་ཕྲེང་བཅུ་བ་ནི་ངག་དབང་བློ་བཟང་འཇམ་དཔལ་ཚུལ་ཁྲིམས་རྒྱ་མཚོ་ཡིན་ལ། ཁོང་རབ་བྱུང་བཅུ་བཞི་པའི་མེ་བྱི་སྤྱི་ལོ༡༨༡༦ལ་མདོ་ཁམས་ཀྱི་ལི་ཐང་ཤོག་དྲུག་སྒྲོ་མདོངས་ཞེས་པར་ཡབ་བློ་བཟང་སྙན་གྲགས་དང་ཡུམ་རྣམ་རྒྱལ་བུ་ཁྲིད་གཉིས་ཀྱི་སྲས་སུ་སྐུ་འཁྲུངས། དེའང་རྒྱལ་དབང་དགུ་པ་སྐུ་གཤེགས་རྗེས་རྒྱལ་ཚབ་དེ་མོ་རིན་པོ་ཆེས་གཙོས་བོད་གཞུང་ཐུན་མོང་ནས་ཡང་སྲིད་རྩད་གཅོད་ཀྱི་བཀོད་འདོམས་སྔར་ལུགས་བཞིན་གནང་ཡོད་པར་བརྟེན། ལི་ཐང་དུ་འཁྲུངས་པའི་ཆུང་སྲིད་ཕྱོགས་ཀུན་ཏུ་སྙན་གྲགས་ཁྱབ་པ་དང་ལི་ཐང་ཆོས་རྫོང་ནས་ཀྱང་གཞུང་སའི་བཀའ་རྒྱ་རིམ་ཕེབས་ཀྱི་དགོངས་དོན་ལྟར་དངོས་གནས་ཟོལ་བྲལ་གྱི་སྙན་ཞུ་སྔ་ཕྱིར་འབུལ་འབྱོར་བྱུང་བསྟུན། བོད་ཀྱི་སྐྱ་སེར་དཔོན་རིགས་མགྲིན་མཐུན་གྱིས་རྒྱལ་ཚབ་རིན་པོ་ཆེར་སྐུ་གོང་མ་ལྟར་ངོས་འཛིན་དགོས་ལུགས་སྙན་ཞུ་ཞུས་པ་བཞིན་དེ་དོན་ཆིན་གོང་མར་གསེར་སྙན་སྒྲོན་འབུལ་མཛད་ཅིང་། ཡང་སྲིད་ངོས་འཛིན་མ་གྲུབ་གོང་རབ་བྱུང་བཅུ་བཞི་བའི་ས་ཡོས་སྤྱི་ལོ༡༨༡༩ལ་རྒྱལ་ཚབ་དེ་མོ་རིན་པོ་ཆེ་གློ་བུར་ཞབས་པད་མ་བརྟན་པས། དེ་འཕྲལ་ཁྲི་ཆེན་ཚེ་སྨོན་གླིང་སྤྲུལ་བའི་སྐུ་ངག་དབང་འཇམ་དཔལ་ཚུལ་ཁྲིམས་རྒྱ་མཚོ་རིན་པོ་ཆེ་ལས་ཚབ་ཏུ་བསྐོ་བཞག་དང་སྦྲགས་གོང་མར་གསེར་སྙན་འབུལ་མཛད། རབ་བྱུང་བཅུ་བཞི་བའི་ལྕགས་འབྲུག་སྤྱི་ལོ༡༨༢༠ལ་རྒྱལ་ཚབ་དང་ཡང་སྲིད་བཅས་ཀྱི་སྐོར་གང་ཞུས་པའི་བཀའ་ལན་ཕེབས་ཐོག ཡང་སྲིད་གསེར་བུམ་དཀྲུག་འདོན་དགོས་ལུགས་ལྟར་ཡང་སྐྱར་བོད་དབུས་གཙང་དང་སྟོད་སྨད་བར་གསུམ་བཅས་ཀྱི་རྫོང་གཞིས་ཁག་ལ་མཆོག་སྤྲུལ་དོགས་གནས་ཀྱི་བྱིས་པ་ངོ་མཚར་བ་ཇི་ཡོད་ཞུ་འབུལ་དགོས་པའི་བཀའ་ཁྱབ་གནང་བ་ལྟར། འོས་སྤྲུལ་དུ་མ་བྱུང་བ་པཎ་ཆེན་ཐམས་ཅད་མཁྱེན་པར་ཐུགས་བརྟག་ཞུ་གནང་མཛད་པར་སྔར་ཡོད་ལི་ཐང་གི་ཆུང་སྲིད་ཐོག ཆབ་མདོ་ནས་ཡིན་པའི་ཆུང་སྲིད་གཉིས་བཟང་ཚུལ་བཅས་ཕེབས་བསྟུན། རབ་བྱུང་བཅུ་བཞི་པའི་ལྕགས་སྦྲུལ་སྤྱི་ལོ༡༨༢༡ལ་རྒྱལ་ཚབ་རིན་པོ་ཆེ་དང་པཎ་ཆེན་ཐམས་ཆད་མཁྱེན་པ་གཙོས་བོད་ཀྱི་སྐྱ་སེར་ཆེ་རྒུས་གྲོས་ཐོག་མགྲིན་གཅིག་གིས་འོས་སྤྲུལ་གསུམ་གསེར་བུམ་དཀྲུག་འདོད་མཛད་ཕྱིར་འོས་སྤྲུལ་གསུམ་པོ་སོ་སོའི་འཁྲུངས་ཡུལ་ནས་དབུས་སུ་བསུས། དེར་པཎ་ཆེན་ཐམས་ཆད་མཁྱེན་པ་དབུས་ཕེབས་གནང་ཐོག ཁྲི་ཆེན་ངག་དབང་སྙན་གྲགས་གཙོས་བོད་རྒྱའི་དཔོན་རིགས་འཛོམས་ཐོག་ཏུ་ཁྱེའུ་གསུམ་གྱི་མཚན་བྱང་བོད་མན་ཡིག་གཉིས་ཀྱིས་བྱང་བུར་བྲིས་ཏེ་གསེར་བུམ་དཀྲུག་འདོན་བྱས་འབྲས། སྔར་གྱི་འོས་སྤྲུལ་ལི་ཐང་དུ་འཁྲུངས་པ་ཐོན་པ་ལ་ཀུན་གྱིས་ལེགས་སོའི་དགའ་དར་དང་མཆོད་བསྟོད་ཀྱི་རིམ་པ་རྒྱ་ཆེ་བ་བྱས། དེ་ནས་པཎ་ཆེན་ཐམས་ཅད་མཁྱེན་པས་ཡང་སྲིད་རིན་པོ་ཆེའི་དབུས་སྐྱེས་གཙུག་ཕུད་དང་རབ་བྱུང་གི་བསླབ་སྡོམ་འབུལ་བཞེས་ལེགས་པར་མཛད། རབ་བྱུང་བཅུ་བཞི་པའི་ཆུ་རྟ་སྤྱི་ལོ༡༨༢༢ལ་ཡང་སྲིད་རིན་པོ་ཆེ་སྙེ་ཐང་བདེ་བ་ཅན་ནས་ཆིབས་ཞལ་བསྒྱུར་ཏེ་སྔར་ལམ་ལྟར་དགོན་ཁག་གི་སེར་སྦྲེང་དང་ཆབ་འབངས་ཀྱི་བྲོ་གཞས་སོགས་ཀྱིས་མདུན་བསྟར་ཏེ་ཆིབས་བསུ་གཟབ་རྒྱས་དང་བཅས་ཕོ་བྲང་ཆེན་པོ་གྲུ་འཛིན་གཉིས་པའི་མི་འཇིགས་ཆོས་ཀྱི་ཁྲི་འཕང་མཐོན་པོར་ཞབས་སོར་འཁོད། ཆིན་གོང་མའི་སྐུ་ཚབ་ལྕང་སྐྱ་རིན་པོ་ཆེ་དང་བོད་སྡོད་ཨམ་བན་སོགས་ཁྱབ་ཕེབས་འཛོམ་ཐོག རྒྱལ་ཚབ་རིན་པོ་ཆེ་དང་ཡོངས་འཛིན་ཚེ་མཆོག་གླིང་པ་དང་བཀའ་བློན་མི་དྲག་ཆེ་རྒུ་བཅས་ཀྱིས་སྔར་སྲོལ་ལྟར་གྱི་ཁྲི་ཕེབས་ལེགས་འབུལ་གྱི་མཛད་སྒོ་གཟབ་ཅིང་རྒྱས་པ་གནང་། དེ་སྔོན་ཡོངས་འཛིན་སྐོར་ལ་རྒྱལ་ཚབ་ཚེ་སྨོན་གླིང་པ་རིན་པོ་ཆེ་ཡོངས་འཛིན་ཆེ་བ་དང་དགའ་ལྡན་ཁྲི་ཟུར་ངག་དབང་སྙན་གྲགས། དབུས་གཙང་གླིང་བཞིའི་ཡ་གྱལ་ཚེ་མཆོག་གླིང་པ་སྤྲུལ་བའི་སྐུ་འཇམ་དཔལ་ཡེ་ཤེས་བསྟན་པའི་རྒྱ་མཚོ་གཉིས་ཡོངས་འཛིན་ཆུང་བར་བསྐོས་ཡོད་ཐོག གསོལ་གཟིམ་མཆོད་གསུམ་བཅས་སྔར་ལུགས་བཞིན་བསྐོ་བཞག་གནང་སྟེ་ཡང་སྲིད་རིན་པོ་ཆེས་སྐུ་བབ་དང་བསྟུན་པའི་གསན་བཞེས་ལ་ཐུགས་བརྩོན་ལྷུར་ལེན་མཛད། དེ་ལྟར་མཆོག་སྤྲུལ་རིན་པོ་ཆེ་གཞོན་ནུའི་ཚུལ་བཞེས་ལྟར་གཙོ་བོ་མདོ་སྔགས་གཞུང་ལུགས་རྒྱ་མཚོའི་གསན་བསམ་ལ་གཅིག་ཏུ་འགྲུས་པར་མཛད་པའི་མཐུ་ལས་ལུང་རྟོགས་ཀྱི་སྐུ་ཡོན་ཡར་ཟླའི་དཔལ་ལ་འགྲན་བཞིན་གོང་འཕེལ་དུ་འཚོ་ཞིང་བཞེས་ཐོག རབ་བྱུང་བཅུ་བཞི་པའི་ཤིང་སྤྲེལ་སྤྱི་ལོ༡༨༢༤ལ་མཆོད་ཡོན་ལྷན་རྒྱས་ནས་རྭ་སྒྲེང་ཁྲི་ཆེན་རིན་པོ་ཆེའི་ཡང་སྲིད་ངོས་འཛིན་དང་དེ་མིན་འབྲུག་པ་ཐམས་ཅད་མཁྱེན་པ་དང་ཡར་ལུང་དབོན་སྤྲུལ་སོགས་སྐུ་སྐྱེས་ཆེ་འབྲིང་མང་པོ་ངོས་འཛིན་ཞུ་བའི་མཛད་སྒོར་དངོས་ཕེབས་ཀྱིས་རེ་རེ་བཞིན་ངོས་འཛིན་ལེགས་པར་གནང་བས་མཚོན་བསྟན་སྲིད་འཕྲིན་ལས་ཀྱི་མཛད་པ་རྒྱ་ཆེར་བསྐྱངས།
རབ་བྱུང་བཅུ་བཞི་པའི་ལྕགས་སྟག་སྤྱི་ལོ༡༨༣༠ལ་བོད་ཀྱི་མངའ་འབངས་ཀྱི་ཁྲལ་རིགས་རྐང་འདོན་སོགས་སྐྱིད་སྡུག་མོས་སྙོམས་དང་གཞུང་འབབ་ཡོང་ཆེད་བཅས་ལ་དམིགས་ཏེ་གཏན་འཁེལ་གནང་བའི《ལྕགས་སྟག་ཞིབ་གཞུང》བྱ་བ་ལེགས་གྲུབ་བྱུང་བར་བྱས་པ་དང་། དེ་ནི་སྐབས་དེའི་བོད་ས་གནས་སྲིད་གཞུང་གི་མངའ་ཁོངས་ཡོང
